ವಿಶ್ವದ ಅತ್ಯಂತ ದುಬಾರಿ ಸಿನಿಮಾ ಇದು, ಬಜೆಟ್ ಎಷ್ಟು ಗೊತ್ತೆ?

ಸಿನಿಮಾ ನಿರ್ಮಾಣಕ್ಕೆ ಹಣವನ್ನು ನೀರಿನಂತೆ ಖರ್ಚು ಮಾಡಲಾಗುತ್ತಿದೆ. ಭಾರತದಲ್ಲಿಯೇ ಸಿನಿಮಾಗಳ ಮೇಳೆ 500 ಕೋಟಿ, 700 ಕೋಟಿ ಬಜೆಟ್​ಗಳನ್ನು ಹಾಕಲಾಗುತ್ತದೆ. ಭಾರತದಲ್ಲಿ ಮಾತ್ರವಲ್ಲ ವಿಶ್ವದಾದ್ಯಂತ ಸಿನಿಮಾಗಳ ಬಜೆಟ್​ ಹೆಚ್ಚಳವಾಗಿದೆ. ಹಾಲಿವುಡ್​ನಲ್ಲಂತೂ ಮೊದಲಿನಿಂದಲೂ ಸಿನಿಮಾಗಳ ಮೇಲೆ ದೊಡ್ಡ ಬಜೆಟ್ ಹಾಕಲಾಗುತ್ತಿದೆ. ಇದೀಗ ವಿಶ್ವದ ಅತ್ಯಂತ ದುಬಾರಿ ಸಿನಿಮಾ ನಿರ್ಮಾಣ ಮಾಡುತ್ತಿದೆ ಹಾಲಿವುಡ್​ನ ನಿರ್ಮಾಣ ಸಂಸ್ಥೆ ಮಾರ್ವೆಲ್.

ಮಾರ್ವೆಲ್ ಮೊದಲಿನಿಂದಲೂ ತಮ್ಮ ಅದ್ಧೂರಿ ಮತ್ತು ಫ್ಯೂಚರಿಸ್ಟಿಕ್ ಸಿನಿಮಾಗಳ ನಿರ್ಮಾಣಕ್ಕೆ ಜನಪ್ರಿಯ. ಇದೀಗ ಈ ಹಿಂದೆ ಯಾರೂ ಸಹ ಖರ್ಚು ಮಾಡದಷ್ಟು ಹಣ ಖರ್ಚು ಮಾಡಿ ಸಿನಿಮಾ ನಿರ್ಮಾಣ ಮಾಡಲು ಮುಂದಾಗಿದೆ. ಮಾರ್ವೆಲ್​ನ ಬಲು ಜನಪ್ರಿಯ ಸಿನಿಮಾ ಸರಣಿ ‘ಅವೇಂಜರ್ಸ್’ನ ಹೊಸ ಸಿನಿಮಾ ‘ಅವೇಂಜರ್ಸ್: ಡೂಮ್ಸ್​ಡೇ’ ಸಿನಿಮಾ ವಿಶ್ವದ ಅತಿ ದೊಡ್ಡ ಬಜೆಟ್​ನ ಸಿನಿಮಾ ಆಗಲಿದೆ.

‘ಅವೇಂಜರ್ಸ್: ಡೂಮ್ಸ್​ಡೇ’ ಸಿನಿಮಾದ ಘೋಷಣೆ ಕೆಲ ವಾರಗಳ ಹಿಂದಷ್ಟೆ ಮಾರ್ವೆಲ್ ಮಾಡಿದೆ. ಈ ಸಿನಿಮಾನಲ್ಲಿ ಭಾರಿ ದೊಡ್ಡ ತಾರಾಗಣ ಇರಲಿದೆ. ಸಿನಿಮಾದಲ್ಲಿ ನಟಿಸಲಿರುವ ನಟ-ನಟಿಯರ ಸಂಬಳವೇ 2150 ಕೋಟಿ ರೂಪಾಯಿಗಳು ಆಗಲಿದೆಯಂತೆ. ಸಿನಿಮಾದ ಪ್ರಿ ಪ್ರೊಡಕ್ಷನ್​ಗೆ ಸುಮಾರು ನೂರು ಕೋಟಿ ರೂಪಾಯಿ ಖರ್ಚಾಗಲಿದೆ. ಸಿನಿಮಾದ ನಿರ್ಮಾಣಕ್ಕೆ ಸುಮಾರು 700 ಮಿಲಿಯನ್ ಡಾಲರ್, ಅಂದರೆ 6 ಸಾವಿರ ಕೋಟಿ, ಸಿನಿಮಾದ ಪೋಸ್ಟ್ ಪ್ರೊಡಕ್ಷನ್ ಮತ್ತು ಪ್ರಚಾರಕ್ಕೆ 800 ಕೋಟಿ ರೂಪಾಯಿಗಳು ಖರ್ಚಾಗಲಿದೆ.

ಇದನ್ನೂ ಓದಿ:ಹಾಲಿವುಡ್​​ನಲ್ಲಿ ಸೆಟಲ್ ಆಗುವ ಪ್ರಯತ್ನದಲ್ಲಿ ನಟಿ ನೋರಾ ಫತೇಹಿ

ಅಲ್ಲಿಗೆ ಒಟ್ಟು ಸುಮಾರು 1 ಬಿಲಿಯನ್ ಡಾಲರ್ ಹಣವನ್ನು ಸಿನಿಮಾಕ್ಕಾಗಿ ಖರ್ಚು ಮಾಡಲಾಗುತ್ತಿದೆ. ಭಾರತದ ರೂಪಾಯಿ ಲೆಕ್ಕದಲ್ಲಿ ಸುಮಾರು ಒಂಬತ್ತು ಸಾವಿರ ಕೋಟಿ ರೂಪಾಯಿ ಹಣವನ್ನು ಈ ಸಿನಿಮಾಕ್ಕಾಗಿ ಖರ್ಚು ಮಾಡಲಾಗುತ್ತಿದೆ. ಈ ಮೊದಲು ‘ಸ್ಟಾರ್ ವಾರ್ಸ್’ (2015) ವಿಶ್ವದ ಅತ್ಯಂತ ದುಬಾರಿ ಬಜೆಟ್​ನ ಸಿನಿಮಾ ಆಗಿತ್ತು. ಆದರೆ ‘ಅವೇಂಜರ್ಸ್: ಡೂಮ್ಸ್​ಡೇ’ ಸಿನಿಮಾ ಆ ಸಿನಿಮಾದ ದುಪ್ಪಟ್ಟು ಹಣವನ್ನು ಖರ್ಚು ಮಾಡುತ್ತಿದೆ.

‘ಅವೇಂಜರ್ಸ್: ಡೂಮ್ಸ್​ಡೇ’ ಸಿನಿಮಾನಲ್ಲಿ ಖ್ಯಾತ ಹಾಲಿವುಡ್ ನಟ ರಾಬರ್ಟ್ ಡೌನಿ ಜೂನಿಯರ್ ವಿಲನ್ ಪಾತ್ರದಲ್ಲಿ ನಟಿಸುತ್ತಿದ್ದಾರೆ. ಸಿನಿಮಾನಲ್ಲಿ ಕ್ರಿಸ್ ಇವಾನ್ಸ್, ಕ್ರಿಸ್ ಹ್ಯಾಮ್ಸ್​ವರ್ತ್, ಪೆಡ್ರೊ ಪ್ಯಾಸ್ಕಲ್, ಟಾಮ್ ಹಿಡಲ್​ಸ್ಟನ್,  ವಾನೆಸ್ಸಾ, ಫ್ಲಾರೆನ್ಸ್ ಇನ್ನೂ ಹಲವಾರು ಮಂದಿ ಟಾಪ್ ತಾರೆಯರು ನಟಿಸುತ್ತಿದ್ದಾರೆ. ಇದೇ ಕಾರಣಕ್ಕೆ ಸಿನಿಮಾದ ಬಜೆಟ್ ಗಗನಕ್ಕೇರಿದೆ.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ