ಭಾರತದಲ್ಲಿ ದಾಖಲೆ ಬರೆಯಲು ಸಜ್ಜಾದ ಹಾಲಿವುಡ್ ಸಿನಿಮಾ ‘ಮಿಷನ್ ಇಂಪಾಸಿಬಲ್’

ಭಾರತದಲ್ಲಿ ಹಾಲಿವುಡ್ (Hollywood) ಸಿನಿಮಾಗಳು ದೊಡ್ಡ ಮಟ್ಟದ ಲಾಭ ಮಾಡುತ್ತಿರುವುದು ಹೊಸದಲ್ಲ. ಕೋವಿಡ್​ಗೆ ಮುಂಚೆಯಿಂದಲೂ ಹಾಲಿವುಡ್​ನ ಕೆಲ ಸಿನಿಮಾಗಳು ನೂರಾರು ಕೋಟಿ ಬಾಕ್ಸ್ ಆಫೀಸ್ ಗಳಿಕೆಯನ್ನು ಭಾರತದಲ್ಲಿ ಮಾಡುತ್ತಿವೆ. ಹಲವು ಹಾಲಿವುಡ್ ಸಿನಿಮಾಗಳು, ಭಾರತಕ್ಕಾಗಿ ಇಲ್ಲಿನ ಪ್ರಾದೇಶಿಕ ಭಾಷೆಗಳಲ್ಲಿ ಡಬ್ ಮಾಡಿ ಸಿನಿಮಾ ಮಾಡುತ್ತವೆ. ಇತ್ತೀಚೆಗಿನ ವರ್ಷಗಳಲ್ಲಿ ಮಾರ್ವೆಲ್​ನ ‘ಅವೇಂಜರ್ಸ್​’ ಸಿನಿಮಾ ಸರಣಿ, ‘ಸ್ಪೈಡರ್​ಮ್ಯಾನ್’, ‘ಅವತಾರ್ 2’, ‘ಆಪನ್​ಹೈಮರ್’ ಸಿನಿಮಾಗಳು ಭಾರತದಲ್ಲಿ ಭಾರಿ ಪಸಲು ತೆಗೆದಿವೆ. ಇದೀಗ ಅದೇ ಸಾಲಿಗೆ ಸೇರಲು ಸಜ್ಜಾಗಿದೆ ಮತ್ತೊಂದು ಹಾಲಿವುಡ್ ಸಿನಿಮಾ.

ವಿಶ್ವದ ಅತ್ಯಂತ ದುಬಾರಿ ನಟ ಟಾಮ್ ಕ್ರೂಸ್ ನಟಿಸಿರುವ ‘ಮಿಷನ್ ಇಂಪಾಸಿಬಲ್’ ಸಿನಿಮಾ ಸರಣಿಯ ಎಂಟನೇ ಸಿನಿಮಾ ‘ಮಿಷನ್ ಇಂಪಾಸಿಬಲ್: ದಿ ಫೈನಲ್ ರೆಕನಿಂಗ್’ ಸಿನಿಮಾ ಇನ್ನೊಂದು ವಾರದಲ್ಲಿ ಭಾರತದಲ್ಲಿ ಬಿಡುಗಡೆ ಆಗಲಿದೆ. ಸಿನಿಮಾದ ಅಡ್ವಾನ್ಸ್ ಬುಕಿಂಗ್ ಓಪನ್ ಆಗಿದ್ದು, ಮೊದಲ 24 ಗಂಟೆ ಅವಧಿಯಲ್ಲಿ 11 ಸಾವಿರಕ್ಕೂ ಹೆಚ್ಚು ಟಿಕೆಟ್​ಗಳು ಮಾರಾಟವಾಗಿವೆ. ಇದು ಕಡಿಮೆ ಸಂಖ್ಯೆಯಲ್ಲ.

ಇದನ್ನೂ ಓದಿ:ಮಿಷನ್ ಇಂಪಾಸಿಬಲ್ 7 ನೋಡಿದ ನೆಟ್ಟಿಗರು ಏನಂದರು?

‘ಮಿಷನ್ ಇಂಪಾಸಿಬಲ್: ದಿ ಫೈನಲ್ ರೆಕನಿಂಗ್’ ಸಿನಿಮಾ ಮೇ 17ಕ್ಕೆ ಭಾರತದಲ್ಲಿ ಬಿಡುಗಡೆ ಆಗಲಿದೆ. ವಿಶೇಷವೆಂದರೆ ಈ ಸಿನಿಮಾ ಇಡೀ ವಿಶ್ವದಲ್ಲಿ ಮೊದಲಿಗೆ ಭಾರತದಲ್ಲಿಯೇ ಬಿಡುಗಡೆ ಆಗುತ್ತಿದೆ. ಭಾರತದಲ್ಲಿ ಬಿಡುಗಡೆ ಆದ ಒಂದು ವಾರದ ಬಳಿಕ ಅಮೆರಿಕ ಹಾಗೂ ಇತರೆಡೆ ಬಿಡುಗಡೆ ಆಗಲಿದೆ. ಅಲ್ಲದೆ, ‘ಮಿಷನ್ ಇಂಪಾಸಿಬಲ್’ನ ಈ ಹಿಂದಿನ ಕೆಲ ಸರಣಿಗಳು ಭಾರತದಲ್ಲಿ ಭರ್ಜರಿ ಕಲೆಕ್ಷನ್ ಮಾಡಿದ್ದು, ಟಾಮ್ ಕ್ರೂಸ್​ಗೆ ಭಾರಿ ಸಂಖ್ಯೆಯ ಅಭಿಮಾನಿಗಳು ಭಾರತದಲ್ಲಿ ಇದ್ದಾರೆ. ಹಾಗಾಗಿ ಸಿನಿಮಾದ ಕಲೆಕ್ಷನ್ ಭಾರತದಲ್ಲಿ ಬಲು ಜೋರಾಗಿಯೇ ಆಗುವ ನಿರೀಕ್ಷೆ ಇದೆ.

‘ಮಿಷನ್ ಇಂಪಾಸಿಬಲ್: ದಿ ಫೈನಲ್ ರೆಕನಿಂಗ್’ ಸಿನಿಮಾ, ಇಂಗ್ಲೀಷ್, ತೆಲುಗು, ತಮಿಳು ಮತ್ತು ಹಿಂದಿ ಭಾಷೆಗಳಲ್ಲಿ ಮೇ 17ರಂದೇ ತೆರೆಗೆ ಬರಲಿದೆ. ಈ ಸಿನಿಮಾದ ಮೊದಲ ಭಾಗ ‘ಮಿಷನ್ ಇಂಪಾಸಿಬಲ್: ಡೆಡ್ ರಕೂನ್’ 2023ರ ಜುಲೈ ತಿಂಗಳಲ್ಲಿ ಬಿಡುಗಡೆ ಆಗಿತ್ತು. ಒಂದು ಬೀಗದ ಹಿಂದೆ ಬಿದ್ದ ಮಾಫಿಯಾ ಗುಂಪನ್ನು ನಾಯಕ ಟಾಮ್ ಕ್ರೂಸ್ ತಡೆಯುವ ಕತೆಯನ್ನು ಆ ಸಿನಿಮಾ ಒಳಗೊಂಡಿತ್ತು. ಸಿನಿಮಾದ ಅಂತ್ಯದಲ್ಲಿ ಆ ಬೀಗ ಟಾಮ್ ಕ್ರೂಸ್ ಕೈ ಸೇರಿತ್ತು. ಇದೀಗ ಅದೇ ಕತೆಯ ಮುಂದುವರೆದ ಭಾಗ ಬರಲಿದೆ.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ