ಅವತಾರ್ 2 ಒಟಿಟಿ ಬಿಡುಗಡೆ ದಿನಾಂಕ ಪ್ರಕಟ: ಹೆಚ್ಚುವರಿ ಶುಲ್ಕ ಪಾವತಿಯ ಅಗತ್ಯವಿಲ್ಲ

ಅವತಾರ್ 2 (Avatar 2) ಸಿನಿಮಾ ಕಳೆದ ವರ್ಷಾಂತ್ಯಕ್ಕೆ ಡಿಸೆಂಬರ್ 16 ರಂದು ಬಿಡುಗಡೆ ಆಗಿ ದೊಡ್ಡ ಹಿಟ್ ಎನಿಸಿಕೊಂಡಿತ್ತು. ಭಾರತ ಸೇರಿದಂತೆ ವಿಶ್ವದಾದ್ಯಂತ ಬಿಡುಗಡೆ ಆಗಿ ಕಲೆಕ್ಷನ್​ನಲ್ಲಿ ಹಲವು ದಾಖಲೆಗಳನ್ನು ಪುಡಿಗಟ್ಟಿತು. ಅಂದಿನಿಂದಲೂ ಈ ಸಿನಿಮಾ ಯಾವ ಒಟಿಟಿಗೆ ಬರಬಹುದು ಎಂಬ ಬಗ್ಗೆ ಲೆಕ್ಕಾಚಾರಗಳು ನಡೆಯುತ್ತಲೇ ಇದ್ದವು. ಸಿನಿಮಾವನ್ನು ತಮ್ಮ ಒಟಿಟಿ ಪ್ಲ್ಯಾಟ್​ಫಾರ್ಮ್​ಗೆ ತೆಗೆದುಕೊಳ್ಳಲು ಕೆಲವು ದೊಡ್ಡ ಒಟಿಟಿ (OTT) ವೇದಿಕೆಗಳು ಯತ್ನಿಸಿದ್ದವು. ಆದರೆ ಈಗ ಕೊನೆಗೂ ಅವತಾರ್ 2 ಸಿನಿಮಾದ ಒಟಿಟಿ ಪ್ರವೇಶ ನಿಗದಿಯಾಗಿದೆ.

ಡಿಸ್ಲಿ ಪ್ಲಸ್ ನಲ್ಲಿ ಅವತಾರ್ 2 (Avatar 2) ಸಿನಿಮಾ ಜೂನ್ 7ರಿಂದ ಪ್ರಸಾರವಾಗಲಿದೆ. ಅವತಾರ್ 2 ಸಿನಿಮಾ ನೋಡಲು ಹೆಚ್ಚುವರಿ ಶುಲ್ಕ ನೀಡಬೇಕಾಗುತ್ತದೆಯೇ? ಎಂಬ ಆತಂಕ ಸಿನಿಪ್ರಿಯರಲ್ಲಿತ್ತು ಆದರೆ ಡಿಸ್ನಿ ಪ್ಲಸ್ ಅವತಾರ್ 2 ನೋಡಲು ಯಾವುದೇ ಹೆಚ್ಚುವರಿ ಶುಲ್ಕವನ್ನು ವಿಧಿಸುತ್ತಿಲ್ಲ ಎನ್ನಲಾಗಿದೆ.

ಅವತಾರ್ 2 ಸಿನಿಮಾ ಆಪಲ್ ಪ್ಲಸ್ ಹಾಗೂ ಅಮೆಜಾನ್ ಪ್ರೈಂನಲ್ಲಿ (Amazon Prime) ಬಿಡುಗಡೆ ಆಗಲಿದೆ. ಫುಲ್ ಎಚ್​ಡಿ, ಎಚ್​ಡಿ ಹಾಗೂ ಎಸ್​ಡಿ ಮಾದರಿಯಲ್ಲಿ ಸಿನಿಮಾ ವೀಕ್ಷಣೆಗೆ ಲಭ್ಯವಾಗಲಿದ್ದು, ಮೂರು ಬಗೆಯಲ್ಲಿ ಸಿನಿಮಾ ನೋಡಲು ದೊಡ್ಡ ಮೊತ್ತವನ್ನು ನೀಡಬೇಕಾಗುತ್ತದೆ ಎಂಬ ಸುದ್ದಿಗಳು ತಿಂಗಳ ಹಿಂದಷ್ಟೆ ಹರಿದಾಡಿದ್ದವು. ಆದರೆ ಇದೀಗ ಅದೆಲ್ಲ ಸುಳ್ಳಾಗಿದ್ದು ಫುಲ್​ ಎಚ್​ಡಿ ಮಾದರಿಯಲ್ಲಿ ಯಾವುದೇ ಹೆಚ್ಚುವರಿ ಶುಲ್ಕ ಇಲ್ಲದೆ ಡಿಸ್ನಿ ಪ್ಲಸ್​ನಲ್ಲಿ ಅವತಾರ್ 2 ವೀಕ್ಷಣೆಗೆ ಲಭ್ಯವಾಗುತ್ತಿದೆ.

ಅವತಾರ್ 2 ಸಿನಿಮಾ ಡಿಸೆಂಬರ್ 16 ರಂದು ವಿಶ್ವದಾದ್ಯಂತ ಬಿಡುಗಡೆ ಆಗಿತ್ತು. ಅವತಾರ್ ಸಿನಿಮಾದ ಮೊದಲ ಭಾಗ ಬಿಡುಗಡೆ ಆಗಿ 13 ವರ್ಷಗಳ ಬಳಿಕ ಎರಡನೇ ಭಾಗ ಬಿಡುಗಡೆ ಆಗಿದ್ದು ವಿಶೇಷ. ಜೇಮ್ಸ್ ಕ್ಯಾಮರನ್ ನಿರ್ದೇಶನದ ಈ ಸಿನಿಮಾ ನೀರಿನಾಳದ ಅದ್ಭುತ ಪ್ರಪಂಚವನ್ನು ಒಳಗೊಂಡಿದೆ. ಚಿತ್ರಮಂದಿರಗಳಲ್ಲಿ ಬಿಡುಗಡೆ ಆದಾಗ ಈ ಸಿನಿಮಾ 1.90 ಲಕ್ಷ ಕೋಟಿಗೂ ಹೆಚ್ಚಿನ ಹಣ ಗಳಿಸಿದೆ. ಇದೀಗ ಒಟಿಟಿಯಲ್ಲಿ ಬಿಡುಗಡೆ ಆಗಿ ದೊಡ್ಡ ಸಂಖ್ಯೆಯ ಪ್ರೇಕ್ಷಕರನ್ನು ಈ ಸಿನಿಮಾ ತಲುಪಲಿದೆ.

ಅವತಾರ್ 2 ಸಿನಿಮಾದ ಮುಂದಿನ ಭಾಗದ ಬಹುತೇಕ ಚಿತ್ರೀಕರಣವನ್ನು ನಿರ್ದೇಶಕ ಜೇಮ್ಸ್ ಕ್ಯಾಮರನ್ ಮುಗಿಸಿದ್ದಾರೆ. ಅವತಾರ್ 2 ಸಿನಿಮಾದಲ್ಲಿದ್ದ ಹಲವು ಮಕ್ಕಳು ಅವತಾರ್ 3 ಸಿನಿಮಾದಲ್ಲಿಯೂ ಇರುವ ಕಾರಣ ಅವರು ಬೆಳೆದ ದೇಹಾಕಾರದಲ್ಲಿ ಬದಲಾವಣೆ ಆಗುವ ಮುನ್ನವೇ ಸಿನಿಮಾದ ಚಿತ್ರೀಕರಣ ಮುಗಿಸಬೇಕೆಂಬ ಕಾರಣಕ್ಕೆ ಜೇಮ್ಸ್ ಕ್ಯಾಮರನ್ ಅವತಾರ್ 2 ಜೊತೆಗೇ ಅವತಾರ್ 3 ಸಿನಿಮಾದ ಚಿತ್ರೀಕರಣವನ್ನು ಬಹುತೇಕ ಮುಗಿಸಿದ್ದಾರೆ. ಅವತಾರ್ 3 ಸಿನಿಮಾದ ಬಿಡುಗಡೆ ಮುಂದಿನ ವರ್ಷಾಂತ್ಯಕ್ಕೆ ಆಗಲಿದೆ. ಆ ಬಳಿಕ ಅವತಾರ್ 4 ಹಾಗೂ ಅವತಾರ್ 5 ಸಿನಿಮಾ ಸಹ ನಿರ್ಮಾಣಗೊಳ್ಳಲಿದೆ. ಈ ಎಲ್ಲ ಸಿನಿಮಾವನ್ನು ಜೇಮ್ಸ್ ಕ್ಯಾಮರನ್ ಅವರೇ ನಿರ್ದೇಶನ ಮಾಡಲಿದ್ದಾರೆ. ಅವತಾರ್ 2 ಸಿನಿಮಾದಲ್ಲಿ ಸ್ಯಾಮ್ ವರ್ತಿಂಗ್​ಟನ್, ಜೋ ಸೆಲ್ಡಾನಾ, ಸಿಗುನೇರಿ, ಟೈಟ್ಯಾನಿಕ್ ನಟಿ ಕೇಟ್ ವಿನ್​ಸ್ಲೆಟ್ ಇನ್ನೂ ಹಲವರು ನಟಿಸಿದ್ದಾರೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ