ಸರ್ಕಾರದಿಂದಲೇ ಶುರುವಾಗಲಿದೆ ಹೊಸ ಒಟಿಟಿ; ಭಾರತದಲ್ಲಿ ಇದು ಮೊದಲ ಪ್ರಯತ್ನ

ಇದು ಡಿಜಿಟಲ್​ ಜಮಾನಾ. ಒಟಿಟಿ ಪ್ಲಾಟ್​ಫಾರ್ಮ್​ಗಳು (OTT platform) ತುಂಬ ಫೇಮಸ್​ ಆಗಿವೆ. ದಿನದಿಂದ ದಿನಕ್ಕೆ ಒಟಿಟಿ ಬಳಕೆದಾರರ ಸಂಖ್ಯೆ ಹೆಚ್ಚುತ್ತಿದೆ. ಎಲ್ಲ ಒಟಿಟಿ ಪ್ಲಾಟ್​ಫಾರ್ಮ್​ಗಳ ನಡುವೆ ಪೈಪೋಟಿ ಜೋರಾಗಿದೆ. ಈ ಸಂದರ್ಭದಲ್ಲಿ ಸರ್ಕಾರವೇ ಹೊಸ ಒಟಿಟಿ ಸಂಸ್ಥೆಯನ್ನು (Government OTT) ಆರಂಭಿಸಲು ಮುಂದಾಗಿದೆ. ಹೌದು, ಕೇರಳದಲ್ಲಿ ಸರ್ಕಾರದ ವತಿಯಿಂದಲೇ ಒಟಿಟಿ ಸೇವೆ ಆರಂಭಿಸಲಾಗುತ್ತಿದೆ. ಇದಕ್ಕೆ ‘ಸಿ ಸ್ಪೇಸ್​’ (C Space) ಎಂದು ಹೆಸರು ಇಡಲಾಗಿದೆ. ಶೀಘ್ರದಲ್ಲೇ ಕಾರ್ಯಾರಂಭ ಆಗಲಿರುವ ಈ ಒಟಿಟಿ ಪ್ಲಾಟ್​ಫಾರ್ಮ್​ ಬಗ್ಗೆ ಇಲ್ಲಿದೆ ಮಾಹಿತಿ..

ಮಾರ್ಚ್​ 7ರಂದು ಕೇರಳ ಮುಖ್ಯಮಂತ್ರಿ ಪಿಣರಾಯಿ ವಿಜಯನ್​ ಅವರು ಸರ್ಕಾರದ ಒಟಿಟಿ ಪ್ಲಾಟ್​ಫಾರ್ಮ್​ ಅನಾವರಣ ಮಾಡಲಿದ್ದಾರೆ. ಅಂದು ಬೆಳಿಗ್ಗೆ 9.30ರಂದು ಕೈರಾಲಿ ಥಿಯೇಟರ್​ನಲ್ಲಿ ಒಟಿಟಿ ಲಾಂಚ್​ ಆಗಲಿದೆ. ಸಚಿವ ಸಾಜಿ ಚೆರಿಯನ್​ ಅವರು ಇದರ ಅಧ್ಯಕ್ಷತೆ ವಹಿಸಲಿದ್ದಾರೆ. ‘ಕೇರಳ ರಾಜ್ಯ ಸಿನಿಮಾಭಿವೃದ್ಧಿ ಕಾರ್ಪೊರೇಷನ್​’ ಈ ಒಟಿಟಿಯ ನಿರ್ವಹಣೆ ಮಾಡಲಿದೆ.

ಸರ್ಕಾರದ ವತಿಯಿಂದ ಒಟಿಟಿ ಲಾಂಚ್​ ಆಗುತ್ತಿರುವುದರಿಂದ ಸಾಕಷ್ಟು ನಿರೀಕ್ಷೆ ಮನೆ ಮಾಡಿದೆ. ಭಾರತದಲ್ಲಿ ಇದೇ ಮೊದಲ ಬಾರಿಗೆ ಈ ಪ್ರಯತ್ನ ನಡೆದಿದೆ. ‘ಸಿ ಸ್ಪೇಸ್​’ ಒಟಿಟಿಗೆ ಯಾವ ರೀತಿಯ ಕಂಟೆಂಟ್​ ಆಯ್ಕೆ ಮಾಡಬೇಕು ಎಂಬುದನ್ನು ನಿರ್ಧರಿಸಲು 60 ಜನರನ್ನು ಒಳಗೊಂಡ ಸಮಿತಿ ರಚನೆ ಮಾಡಲಾಗಿದೆ. ಕೇರಳದ ಸಿನಿಮಾ ಮತ್ತು ಸಾಂಸ್ಕೃತಿಕ ವಲಯದ ಪ್ರಮುಖ ವ್ಯಕ್ತಿಗಳು ಈ ಸಮಿತಿಯಲ್ಲಿ ಸದಸ್ಯತ್ವ ಹೊಂದಿದ್ದಾರೆ.

ಇದನ್ನೂ ಓದಿ: ತೆಲುಗಿನ ಬಿಗ್ ಬಜೆಟ್ ಚಿತ್ರಗಳಿಗೆ ಸಿಗುತ್ತಿಲ್ಲ ಒಟಿಟಿ ಡೀಲ್; ಕಾರಣ ತುಂಬಾನೇ ಸಿಂಪಲ್

‘ಸಿ ಸ್ಪೇಸ್​’ ಒಟಿಟಿಗೆ ಆಯ್ಕೆ ಆಗಲು ಅರ್ಜಿ ಸಲ್ಲಿಸುವ ಕಂಟೆಂಟ್​ಗಳನ್ನು ಆಯ್ಕೆ ಸಮಿತಿಯ ಸದಸ್ಯರು ಮೌಲ್ಯಮಾಪನ ಮಾಡಲಿದ್ದಾರೆ. ಆ ರೀತಿ ಆಯ್ಕೆಯಾದ ಕಂಟೆಂಟ್​ಗಳನ್ನು ಮಾತ್ರ ಈ ಒಟಿಟಿಯಲ್ಲಿ ಪ್ರಸಾರ ಮಾಡಲಾಗುವುದು. ಮೊದಲ ಹಂತದಲ್ಲಿ ಈಗಾಗಲೇ 42 ಸಿನಿಮಾಗಳನ್ನು ಆಯ್ಕೆ ಮಾಡಲಾಗಿದೆ. ಇದರಲ್ಲಿ 35 ಕಥಾಚಿತ್ರಗಳು, 6 ಸಾಕ್ಷ್ಯಚಿತ್ರಗಳು ಹಾಗೂ ಒಂದು ಕಿರುಚಿತ್ರ ಸೇರಿದೆ. ರಾಜ್ಯ ಹಾಗೂ ರಾಷ್ಟ್ರ ಪ್ರಶಸ್ತಿಗಳನ್ನು ಪಡೆದ ಸಿನಿಮಾಗಳು ಮತ್ತು ಪ್ರಮುಖ ಚಿತ್ರೋತ್ಸವಗಳಲ್ಲಿ ಪ್ರದರ್ಶನ ಕಂಡ ಸಿನಿಮಾಗಳು ಕೂಡ ಇದರಲ್ಲಿ ಲಭ್ಯವಾಗಲಿವೆ.

ಮಾರ್ಚ್​ 7ರ ಬಳಿಕ ಪ್ಲೇ ಸ್ಟೋರ್​ನಿಂದ ಜನರು ‘ಸಿ ಸ್ಪೇಸ್​’ ಒಟಿಟಿ ಆ್ಯಪ್​ ಡೌನ್​ಲೋಡ್​ ಮಾಡಿಕೊಳ್ಳಬಹುದು. ಪ್ರತಿ ಸಿನಿಮಾವನ್ನು 75 ರೂಪಾಯಿ ನೀಡಿ ವೀಕ್ಷಿಸಬಹುದು. ಚಿಕ್ಕ ಕಂಟೆಂಟ್​ಗಳ ವೀಕ್ಷಣೆಗೆ ಕಡಿಮೆ ಹಣ ನಿಗದಿ ಆಗಲಿದೆ. ಈ ಒಟಿಟಿಯಿಂದ ಬರುವ ಆದಾಯದ ಲೆಕ್ಕ ಸಂಪೂರ್ಣ ಪಾರದರ್ಶಕ ಆಗಿರಲಿದೆ ಎಂದು ಹೇಳಲಾಗಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.