ಏಕಕಾಲಕ್ಕೆ ಎರಡು ಒಟಿಟಿ ಪ್ಲಾಟ್ಫಾರ್ಮ್ಗಳಲ್ಲಿ ‘83’ ರಿಲೀಸ್; ಇಲ್ಲಿದೆ ಬಿಡುಗಡೆ ದಿನಾಂಕ
ನೆಟ್ಫ್ಲಿಕ್ಸ್ ಹಾಗೂ ಡಿಸ್ನಿ ಪ್ಲಸ್ ಹಾಟ್ಸ್ಟಾರ್ನಲ್ಲಿ ಈ ಚಿತ್ರ ಬಿಡುಗಡೆ ಆಗುತ್ತಿದೆ. ನೆಟ್ಫ್ಲಿಕ್ಸ್ನಲ್ಲಿ ‘83’ ಚಿತ್ರದ ಹಿಂದಿ ವರ್ಷನ್ ರಿಲೀಸ್ ಆದರೆ, ಕನ್ನಡ, ತಮಿಳು, ಮಲಯಾಳಂ ಹಾಗೂ ತೆಲುಗು ಅವತರಣಿಕೆಯ ಚಿತ್ರ ಡಿಸ್ನಿಯಲ್ಲಿ ಬಿಡುಗಡೆ ಆಗುತ್ತಿದೆ.
Updated on:Feb 12, 2022 | 4:53 PM
ರಣವೀರ್ ಸಿಂಗ್ ನಟನೆಯ ‘83’ ಚಿತ್ರ ವಿಮರ್ಶೆಯಲ್ಲಿ ಗೆದ್ದಿದೆ. 1983ರಲ್ಲಿ ಟೀಂ ಇಂಡಿಯಾ ವಿಶ್ವಕಪ್ ಗೆದ್ದ ಘಟನೆಯನ್ನು ತೆರೆಮೇಲೆ ಅದ್ಭುತವಾಗಿ ಕಟ್ಟಿಕೊಟ್ಟ ಖ್ಯಾತಿ ಕಬೀರ್ ಖಾನ್ಗೆ ಸಲ್ಲಿಕೆ ಆಗುತ್ತದೆ. ಈ ಸಿನಿಮಾ ಕಲೆಕ್ಷನ್ 100 ಕೋಟಿ ರೂಪಾಯಿ ದಾಟಿಗೆ. ಈಗ ಚಿತ್ರ ಒಟಿಟಿಯಲ್ಲಿ ತೆರೆಗೆ ಬರೋಕೆ ರೆಡಿ ಆಗಿದೆ. ‘83’ ಕ್ಲಾಸಿಕ್ ಸಿನಿಮಾ. ಮಲ್ಟಿಪ್ಲೆಕ್ಸ್ನಲ್ಲಿ ಈ ಸಿನಿಮಾಗೆ ಭಾರೀ ಬೇಡಿಕೆ ಇತ್ತು. ಆದರೆ, ಕೊವಿಡ್ ಕಾರಣದಿಂದ ಅನೇಕರು ಚಿತ್ರಮಂದಿರದತ್ತ ಮುಖ ಮಾಡಿರಲಿಲ್ಲ. ಈಗ, ಈ ಸಿನಿಮಾ ಒಟಿಟಿಯಲ್ಲಿ ತೆರೆಗೆ ಬರೋಕೆ ರೆಡಿ ಆಗಿದೆ. ವಿಶೇಷ ಎಂದರೆ ಎರಡು ಪ್ಲಾಟ್ಫಾರ್ಮ್ಗಳಲ್ಲಿ ಈ ಚಿತ್ರ ರಿಲೀಸ್ ಆಗುತ್ತಿದೆ. ಚಿತ್ರಮಂದಿರದಲ್ಲಿ ಸಿನಿಮಾ ಮಿಸ್ ಮಾಡಿಕೊಂಡವರು ಈ ಚಿತ್ರವನ್ನು ಒಟಿಟಿಯಲ್ಲಿ ವೀಕ್ಷಣೆ ಮಾಡಬಹುದಾಗಿದೆ.
ನೆಟ್ಫ್ಲಿಕ್ಸ್ ಹಾಗೂ ಡಿಸ್ನಿ ಪ್ಲಸ್ ಹಾಟ್ಸ್ಟಾರ್ನಲ್ಲಿ ಈ ಚಿತ್ರ ಬಿಡುಗಡೆ ಆಗುತ್ತಿದೆ. ನೆಟ್ಫ್ಲಿಕ್ಸ್ನಲ್ಲಿ ‘83’ ಚಿತ್ರದ ಹಿಂದಿ ವರ್ಷನ್ ರಿಲೀಸ್ ಆದರೆ, ಕನ್ನಡ, ತಮಿಳು, ಮಲಯಾಳಂ ಹಾಗೂ ತೆಲುಗು ಅವತರಣಿಕೆಯ ಚಿತ್ರ ಡಿಸ್ನಿಯಲ್ಲಿ ಬಿಡುಗಡೆ ಆಗುತ್ತಿದೆ. ಈ ಮೊದಲು ‘ತಲೈವಿ’ ಸಿನಿಮಾದ ಹಿಂದಿ ವರ್ಷನ್ ನೆಟ್ಫ್ಲಿಕ್ಸ್ನಲ್ಲಿ ರಿಲೀಸ್ ಆಗಿದ್ದರೆ, ಉಳಿದ ಭಾಷೆಯ ಅವತರಣಿಕೆ ಅಮೇಜಾನ್ ಪ್ರೈಮ್ ವಿಡಿಯೋದಲ್ಲಿ ರಿಲೀಸ್ ಆಗಿತ್ತು.
ಕಮಲ್ ಹಾಸನ್ ರಾಜ್ಕಮಲ್ ಫಿಲ್ಮ್ಸ್ ಇಂಟರ್ನ್ಯಾಷನಲ್ ಮತ್ತು ಅಕ್ಕಿನೇನಿ ನಾಗಾರ್ಜುನ ಅವರ ಅನ್ನಪೂರ್ಣ ಸ್ಟುಡಿಯೋ, ರಿಲಾಯನ್ಸ್ ಎಂಟರ್ಟೇನ್ಮೆಂಟ್ ಜತೆ ಕೈ ಜೋಡಿಸಿ ಅನುಕ್ರಮವಾಗಿ ತಮಿಳು ಹಾಗೂ ತೆಲುಗಿನಲ್ಲಿ ‘83’ ಚಿತ್ರವನ್ನು ರಿಲೀಸ್ ಮಾಡಿತ್ತು. ಕನ್ನಡದಲ್ಲಿ ಕಿಚ್ಚ ಸುದೀಪ್ ಈ ಚಿತ್ರವನ್ನು ಅರ್ಪಿಸಿದ್ದರು. ಮಲಯಾಳಂನಲ್ಲಿ ಪೃಥ್ವಿರಾಜ್ ಫಿಲ್ಮ್ಸ್ ಈ ಸಿನಿಮಾವನ್ನು ಬಿಡುಗಡೆ ಮಾಡಿತ್ತು. ಈಗ ಈ ಚಿತ್ರ ಒಟಿಟಿಯಲ್ಲಿ ಬರೋಕೆ ರೆಡಿ ಆಗಿದೆ. ಫೆಬ್ರವರಿ 18 ಅಥವಾ ಫೆಬ್ರವರಿ 25ರಂದು ಈ ಚಿತ್ರ ಏಕಕಾಲಕ್ಕೆ ಒಟಿಟಿಯಲ್ಲಿ ರಿಲೀಸ್ ಆಗಲಿದೆ.
ರಣವೀರ್ ಸಿಂಗ್ ಅವರು ತಾವು ಅದ್ಭುತ ನಟ ಎಂಬುದನ್ನು ಅನೇಕ ಬಾರಿ ಸಾಬೀತು ಮಾಡಿದ್ದಾರೆ. ‘83’ ಚಿತ್ರದಿಂದ ರಣವೀರ್ಗೆ ಇದ್ದ ಬೇಡಿಕೆ ಹೆಚ್ಚಿದೆ. ಇದನ್ನು ಅವರೇ ಒಪ್ಪಿಕೊಂಡಿದ್ದರು. ಬಯೋಪಿಕ್ ಆಫರ್ಗಳು ರಣವೀರ್ ಸಿಂಗ್ಗೆ ಹೆಚ್ಚುತ್ತಿದೆ. ಈ ಬಗ್ಗೆ ಅವರು ಮಾಹಿತಿ ಹಂಚಿಕೊಂಡಿದ್ದರು.
‘ನಾನು ಐದು ನಿರ್ಮಾಪಕರ ಜತೆ ಚರ್ಚೆಯಲ್ಲಿದ್ದೇನೆ. ಇವೆಲ್ಲವೂ ಬಯೋಪಿಕ್. ಇದರಲ್ಲಿ ಮೂರು ಕ್ರೀಡಾಪಟುಗಳ ಬಯೋಪಿಕ್ ಹಾಗೂ ಉಳಿದ ಎರಡು ಇತರ ದೊಡ್ಡ ವ್ಯಕ್ತಿಗಳ ಬಯೋಪಿಕ್. ಆ ಬಗ್ಗೆ ನಾನು ಈಗಲೇ ಏನನ್ನೂ ಬಹಿರಂಗಪಡಿಸಲು ಸಾಧ್ಯವಿಲ್ಲ’ ಎಂದಿದ್ದಾರೆ ಅವರು. ‘ಎಲ್ಲಾ ಸ್ಕ್ರಿಪ್ಟ್ಗಳು ಈಗತಾನೇ ಆರಂಭವಾಗಿದೆ. ಇದರಲ್ಲಿ ಒಂದು ಸ್ಕ್ರಿಪ್ಟ್ ಅದ್ಭುತವಾಗಿಗಿದೆ. ಈ ಬಗ್ಗೆ ಶೀಘ್ರವೇ ಘೋಷಣೆ ಆಗಲಿದೆ’ ಎಂದು ರಣವೀರ್ ಸಿಂಗ್ ಹೇಳಿದ್ದರು.
ಇದನ್ನೂ ಓದಿ: ಏರಲೇ ಇಲ್ಲ ರಣವೀರ್ ಸಿಂಗ್ ನಟನೆಯ ‘83’ ಸಿನಿಮಾ ಕಲೆಕ್ಷನ್; ಇದಕ್ಕೆ ಕಾರಣಗಳೇನು?
‘ಇದು ರಣವೀರ್ ಸಿಂಗ್ ಡ್ರೆಸ್’; ಬಟ್ಟೆ ವಿಚಾರದಲ್ಲಿ ಟ್ರೋಲ್ ಆದ ದೀಪಿಕಾ ಪಡುಕೋಣೆ
Published On - 4:50 pm, Sat, 12 February 22
