Rashmika Mandanna: ಇಬ್ಬರು ಸ್ಟಾರ್ ನಟರ ಸಿನಿಮಾಕ್ಕೆ ರಶ್ಮಿಕಾ ಮಂದಣ್ಣ ನಾಯಕಿ

ನಟಿ ರಶ್ಮಿಕಾ ಮಂದಣ್ಣಗೆ (Rashmika Mandanna) ತೆಲುಗಿನಲ್ಲಿ ಅವಕಾಶಗಳು ಕಡಿಮೆ ಆಗಿವೆ, ಅವರ ಗಮನ ಈಗೇನಿದ್ದರು ಬಾಲಿವುಡ್​ ಕಡೆಗೆ ಮಾತ್ರ ಎಂಬ ಸುದ್ದಿಗಳು ಹರಿದಾಡುತ್ತಿರುವ ಬೆನ್ನಲ್ಲೆ ರಶ್ಮಿಕಾಗೆ ಬಂಪರ್ ಆಫರ್ ಒಂದು ಬಂದೊದಗಿದೆ. ತಮಿಳಿನ ಸ್ಟಾರ್ ನಟ, ತೆಲುಗಿನ ಸ್ಟಾರ್ ನಟ ಒಟ್ಟಿಗೆ ನಟಿಸುತ್ತಿರುವ ಸಿನಿಮಾದಲ್ಲಿ ನಟಿಸುವ ಅವಕಾಶ ರಶ್ಮಿಕಾ ಮಂದಣ್ಣಗೆ ಲಭಿಸಿದೆ. ಈ ಸಿನಿಮಾವನ್ನು ನಿರ್ದೇಶಿಸುತ್ತಿರುವುದು ತೆಲುಗಿನ ಸ್ಟಾರ್ ನಿರ್ದೇಶಕ (Director) ಎಂಬುದು ಮತ್ತೊಂದು ವಿಶೇಷ.

‘ಹ್ಯಾಪಿ ಡೇಸ್’, ‘ಲೀಡರ್’, ‘ಗೋಧಾವರಿ’, ‘ಫಿದಾ’, ‘ಲವ್ ಸ್ಟೋರಿ’ ಅಂಥಹಾ ಸೂಪರ್-ಡೂಪರ್ ಹಿಟ್ ಸಿನಿಮಾಗಳನ್ನು ನಿರ್ದೇಶನ ಮಾಡಿರುವ ಶೇಖರ್ ಕಮ್ಮುಲ ಇದೇ ಮೊದಲ ಬಾರಿಗೆ ತಮಿಳು-ತೆಲುಗು ಬೈಲಿಂಗ್ವಲ್ ಸಿನಿಮಾ ಮಾಡಲು ಮುಂದಾಗಿದ್ದಾರೆ. ಈ ಸಿನಿಮಾಕ್ಕೆ ತಮಿಳಿನಿಂದ ಒಬ್ಬರು ಹಾಗೂ ತೆಲುಗು ಇಂದ ಒಬ್ಬರು ಸೂಪರ್ ಸ್ಟಾರ್​ಗಳನ್ನು ಆರಿಸಿಕೊಂಡಿದ್ದಾರೆ.

ಶೇಖರ್ ಕಮ್ಮುಲ ನಿರ್ದೇಶಿಸಲಿರುವ ಹೊಸ ಸಿನಿಮಾದಲ್ಲಿ ತಮಿಳಿನ ಸ್ಟಾರ್ ನಟ ಧನುಶ್ ನಾಯಕನಾಗಿ ನಟಿಸಲಿದ್ದಾರೆ. ವಿಶೇಷವೆಂದರೆ ಈ ಸಿನಿಮಾದಲ್ಲಿ ತೆಲುಗಿನ ಸ್ಟಾರ್ ನಟ ಅಕ್ಕಿನೇನಿ ನಾಗಾರ್ಜುನ ಸಹ ನಟಿಸುತ್ತಿದ್ದು ಈ ಸಿನಿಮಾ ತಮಿಳು ಹಾಗೂ ತೆಲುಗು ಭಾಷೆಗಳಲ್ಲಿ ಬಿಡುಗಡೆ ಆಗಲಿದೆ. ಈ ಸಿನಿಮಾಕ್ಕೆ ನಾಯಕಿಯಾಗಿ ನಟಿ ರಶ್ಮಿಕಾ ಮಂದಣ್ಣ ಆಯ್ಕೆ ಆಗಿದ್ದಾರೆ.

ಇದನ್ನೂ ಓದಿ:Rashmika Mandanna: ರಿಲೀಸ್​ಗೂ ಮುನ್ನ 32 ಕೋಟಿ ರೂ. ಬಿಸ್ನೆಸ್​ ಮಾಡಿದ ರಶ್ಮಿಕಾ ಮಂದಣ್ಣ ಸಿನಿಮಾ? ಸಮಂತಾ ದಾಖಲೆ ಉಡೀಸ್​

ಶೇಖರ್ ಕಮ್ಮುಲ ಸಿನಿಮಾಗಳಲ್ಲಿ ನಾಯಕಿ ಪಾತ್ರಗಳು ಬಹಳ ಗಟ್ಟಿಯಾಗಿರುತ್ತವೆ. ಹಾಗಾಗಿ ರಶ್ಮಿಕಾ ಮಂದಣ್ಣಗೆ ಈ ಅವಕಾಶ ಸಿಕ್ಕಿರುವುದು ಅವರ ವೃತ್ತಿ ಜೀವನದ ಪ್ರಮುಖ ನಾಯಕಿ ಪಾತ್ರ ಇದಾಗುವ ಸಂಭವ ಇದೆ. ಇನ್ನು ಶೇಖರ್ ಕಮ್ಮುಲ ಅವರ ಈ ಸಿನಿಮಾ ರಾಜಕೀಯ ವಿಷಯವನ್ನು ಆಧರಿಸಿದ್ದು, ಕಮ್ಮುಲ ಅವರೇ ಈ ಹಿಂದೆ ‘ಲೀಡರ್’ ಸಿನಿಮಾ ನಿರ್ದೇಶನ ಮಾಡಿದ್ದರು. ಈ ಬಾರಿ ಧನುಶ್​ಗೆ ಎಂಥಹಾ ರಾಜಕೀಯ ಸಿನಿಮಾವನ್ನು ಹೆಣೆಯಲಿದ್ದಾರೆ ಎಂಬುದು ಕುತೂಹಲ.

ಧನುಶ್ ಅವರ ‘ಕ್ಯಾಪ್ಟನ್ ಮಿಲ್ಲರ್’ ಸಿನಿಮಾ ಕೆಲವೇ ದಿನಗಳಲ್ಲಿ ಬಿಡುಗಡೆ ಆಗಲಿದ್ದು, ಅದಾದ ಬಳಿಕ ಧನುಶ್, ಶೇಖರ್ ಕಮ್ಮುಲ ಜೊತೆಗಿನ ಸಿನಿಮಾದ ಶೂಟಿಂಗ್ ಆರಂಭಿಸಲಿದ್ದಾರೆ. ಇನ್ನು ನಾಗಾರ್ಜುನ, ಬಿಗ್​ಬಾಸ್​ನಲ್ಲಿ ತೊಡಗಿಸಿಕೊಂಡಿದ್ದು, ಅದರ ನಡುವೆಯೇ ಈ ಸಿನಿಮಾದ ಚಿತ್ರೀಕರಣದಲ್ಲಿ ಭಾಗಿಯಾಗಲಿದ್ದಾರೆ.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ