32 ವರ್ಷದ ಕೆರಿಯರ್ನಲ್ಲಿ ಮೊಟ್ಟಮೊದಲ ಬಾರಿಗೆ ಬಯೋಪಿಕ್ಗೆ ಸಹಿ ಹಾಕಿದ ಸಲ್ಮಾನ್ ಖಾನ್
ಸಲ್ಮಾನ್ ಖಾನ್ ನಟನೆಯ ಸಿನಿಮಾ ಎಂದರೆ ಅಲ್ಲಿ ಆ್ಯಕ್ಷನ್ಗೆ ಕೊರತೆ ಇರುವುದಿಲ್ಲ. ಅದೇ ರೀತಿ, ಈ ಚಿತ್ರದಲ್ಲೂ ಸಾಕಷ್ಟು ಆ್ಯಕ್ಷನ್ ಥ್ರಿಲ್ಲರ್ ಅಂಶ ಇರಲಿದೆಯಂತೆ.
Updated on:Jun 18, 2021 | 7:51 PM
ಇತ್ತೀಚೆಗೆ ಸಾಕಷ್ಟು ಬಯೋಪಿಕ್ಗಳು ತೆರೆಗೆ ಬಂದಿವೆ. ಕೆಲವು ಅದ್ಭುತ ಎನಿಸಿಕೊಂಡರೆ, ಇನ್ನೂ ಕೆಲವು ಕಳಪೆ ನಿರ್ದೇಶನದಿಂದ ಸೋತಿವೆ. ಸಾಕಷ್ಟು ಹೀರೋಗಳು ಈಗಾಗಲೇ ಬಯೋಪಿಕ್ನಲ್ಲಿ ನಟಿಸಿದ್ದಾರೆ. ಸಲ್ಮಾನ್ ಖಾನ್ ಚಿತ್ರರಂಗಕ್ಕೆ ಬಂದು 32 ವರ್ಷ ಕಳೆದಿದೆ. ಆದರೆ, ಸಲ್ಲು ಮಾತ್ರ ಈವರೆಗೆ ಬಯೋಪಿಕ್ನಲ್ಲಿ ನಟಿಸಿಲ್ಲ. ತಮ್ಮ ಕೆರಿಯರ್ನಲ್ಲಿ ಸಲ್ಲು ಯಾವಾಗಲೂ ರೊಮ್ಯಾಂಟಿಕ್ ಡ್ರಾಮಾ ಹಾಗೂ ಆ್ಯಕ್ಷನ್ ಸಿನಿಮಾಗಳನ್ನು ಮಾಡಿದ್ದೇ ಹೆಚ್ಚು. ಈಗ ಅವರು ಬಯೋಪಿಕ್ ಮಾಡೋಕೆ ಸಹಿ ಹಾಕಿದ್ದಾರೆ ಎನ್ನಲಾಗುತ್ತಿದೆ.
ಹಾಗಾದರೆ ಸಲ್ಮಾನ್ ಖಾನ್ ಯಾರ ಬಯೋಪಿಕ್ನಲ್ಲಿ ನಟಿಸಲಿದ್ದಾರೆ? ರವಿಂದ್ರ ಕೌಶಿಕ್. ಭಾರತದ ಸ್ಪೈ ಆಗಿದ್ದ ರವೀಂದ್ರ ಅವರು ಬ್ಲ್ಯಾಕ್ ಟೈಗರ್ ಎಂದೇ ಖ್ಯಾತಿ ಪಡೆದುಕೊಂಡವರು. ಇವರ ಜೀವನ ಆಧರಿಸಿ ಬಯೋಪಿಕ್ ಸಿದ್ಧಗೊಳ್ಳುತ್ತಿದೆ. ರಾಜ್ಕುಮಾರ್ ಗುಪ್ತಾ ಸಿನಿಮಾ ನಿರ್ದೇಶನ ಮಾಡುತ್ತಿದ್ದು, ಸಲ್ಲು ಸಹಿ ಹಾಕಿದ್ದಾರಂತೆ.
ಸಲ್ಮಾನ್ ಖಾನ್ ನಟನೆಯ ಸಿನಿಮಾ ಎಂದರೆ ಅಲ್ಲಿ ಆ್ಯಕ್ಷನ್ಗೆ ಕೊರತೆ ಇರುವುದಿಲ್ಲ. ಅದೇ ರೀತಿ, ಈ ಚಿತ್ರದಲ್ಲೂ ಸಾಕಷ್ಟು ಆ್ಯಕ್ಷನ್ ಥ್ರಿಲ್ಲರ್ ಅಂಶ ಇರಲಿದೆಯಂತೆ. ಅಷ್ಟೇ ಅಲ್ಲ ಸಿನಿಮಾದಲ್ಲಿ ಸಾಕಷ್ಟು ಟ್ವಿಸ್ಟ್ಗಳು ಕೂಡ ಇರಲಿವೆಯಂತೆ.
ರವೀಂದ್ರ ಕೌಶಿಕ್ ಭಾರತದ ಅತ್ಯುತ್ತಮ ಸ್ಪೈ ಎನ್ನುವ ಖ್ಯಾತಿ ಪಡೆದುಕೊಂಡಿದ್ದಾರೆ. ಈ ಸಿನಿಮಾ ಸ್ಕ್ರಿಪ್ಟ್ಗಾಗಿ ರಾಜ್ಕುಮಾರ್ ಬರೋಬ್ಬರಿ 5 ವರ್ಷ ಕೆಲಸ ಮಾಡಿದ್ದಾರಂತೆ. ಈ ಚಿತ್ರ ಸಂಪೂರ್ಣವಾಗಿ ರೆಟ್ರೋ ಶೈಲಿಯಲ್ಲಿ ಇರಲಿದೆಯಂತೆ. ಇನ್ನು, ಸಿನಿಮಾಗೆ ಬ್ಲ್ಯಾಕ್ ಟೈಗರ್ ಎಂದೇ ಹೆಸರಿಡಲು ನಿರ್ಧರಿಸಲಾಗಿತ್ತು. ಆದರೆ, ಈಗಾಗಲೇ ಸಲ್ಮಾನ್ ಖಾನ್ ‘ಏಕ್ ಥಾ ಟೈಗರ್’, ‘ಟೈಗರ್ ಜಿಂದಾ ಹೈ’ ಸಿನಿಮಾಗಳಲ್ಲಿ ನಟಿಸಿದ್ದಾರೆ. ಹೀಗಾಗಿ, ಈ ಚಿತ್ರಕ್ಕೆ ಈ ಟೈಟಲ್ ಫೈನಲ್ ಮಾಡೋದು ಅನುಮಾನ ಎನ್ನಲಾಗುತ್ತಿದೆ.
ಈ ಮೊದಲು ರಾಜ್ಕುಮಾರ್ ಗುಪ್ತಾ ರೇಡ್, ನೋ ಒನ್ ಕಿಲ್ಲಡ್ ಜೆಸ್ಸಿಕಾ ಮೊದಲಾದ ಚಿತ್ರಗಳನ್ನು ನಿರ್ದೇಶನ ಮಾಡಿ ಭರವಸೆ ಮೂಡಿಸಿದ್ದಾರೆ. ಈಗ ಹೊಸ ಸಿನಿಮಾ ಬಗ್ಗೆ ಶೀಘ್ರವೇ ಘೋಷಣೆ ಆಗಲಿದೆ ಎನ್ನಲಾಗುತ್ತಿದೆ. ಇನ್ನು, ರವಿತೇಜ್ ನಟನೆಯ ‘ಖಿಲಾಡಿ’ ಸಿನಿಮಾ ಹಿಂದಿ ರಿಮೇಕ್ನಲ್ಲಿ ಸಲ್ಮಾನ್ ಖಾನ್ ನಟಿಸಲಿದ್ದಾರೆ ಎನ್ನುವ ಸುದ್ದಿ ಕೇಳಿ ಬಂದಿತ್ತು. ಸಲ್ಮಾನ್ ಖಾನ್ ಯಾವ ಚಿತ್ರವನ್ನು ಮೊದಲು ಎತ್ತಿ ಕೊಳ್ಳಲಿದ್ದಾರೆ ಎನ್ನುವ ಕುತೂಹಲ ಸದ್ಯದ್ದು.
ಇದನ್ನೂ ಓದಿ: Salman Khan: ರಿಮೇಕ್ ಮಾಡೋಕೆ ಸಲ್ಮಾನ್ ಖಾನ್ ಕೊನೆಗೂ ಫೈನಲ್ ಮಾಡಿದ್ರು ಸಿನಿಮಾ
Published On - 7:27 pm, Fri, 18 June 21
