ಸೋನಲ್​-ತರುಣ್​ ಸುಧೀರ್​ ಅದ್ದೂರಿ ರಿಸೆಪ್ಷನ್: ಆಶೀರ್ವಾದ ಮಾಡಿದ ಬಿ.ಎಸ್​. ಯಡಿಯೂರಪ್ಪ

‘ರಾಬರ್ಟ್​’ ಸಿನಿಮಾದಲ್ಲಿ ಜೊತೆಯಾಗಿ ಕೆಲಸ ಮಾಡಿದ್ದ ನಿರ್ದೇಶಕ ತರುಣ್​ ಸುಧೀರ್​ ಹಾಗೂ ನಟಿ ಸೋನಲ್​ ಮಾಂತೆರೋ ಅವರು ಈಗ ದಾಂಪತ್ಯ ಜೀವನಕ್ಕೆ ಕಾಲಿಡುತ್ತಿದ್ದಾರೆ. ಆಪ್ತರು, ಸ್ನೇಹಿತರು, ಸೆಲೆಬ್ರಿಟಿಗಳ ಸಮ್ಮುಖದಲ್ಲಿ ಅವರ ವಿವಾಹ ಕಾರ್ಯ ನಡೆಯುತ್ತಿದೆ. ನಿನ್ನೆಯಿಂದಲೇ (ಆಗಸ್ಟ್ 09) ವಿವಾಹಪೂರ್ವ ಶಾಸ್ತ್ರಗಳು ಆರಂಭ ಆಗಿದ್ದವು. ಇಂದು (ಆಗಸ್ಟ್​ 10) ಬೆಂಗಳೂರಿನ ಪೂರ್ಣಿಮಾ ಪ್ಯಾಲೇಸ್​ನಲ್ಲಿ ಅದ್ದೂರಿಯಾಗಿ ರಿಸೆಪ್ಷನ್​ ನಡೆಯುತ್ತಿದೆ. ಬಿ.ಎಸ್​. ಯಡಿಯೂರಪ್ಪ ಸೇರಿದಂತೆ ಅನೇಕ ಗಣ್ಯರು ಬಂದು ಆಶೀರ್ವಾದ ಮಾಡಿದ್ದಾರೆ. ಚಿತ್ರರಂಗದ ಹಲವು ಸೆಲೆಬ್ರಿಟಿಗಳು ಆರತಕ್ಷತೆ ಸಮಾರಂಭದಲ್ಲಿ ಭಾಗಿ ಆಗಿದ್ದಾರೆ.

ರೆಡ್​ ರೋಸ್​ ಥೀಮ್​ನಲ್ಲಿ ಆರತಕ್ಷತೆ ವೇದಿಕೆ ಸಿದ್ಧವಾಗಿದೆ. ಅವಾರ್ಡ್​ ಫಂಕ್ಷನ್​ ರೀತಿ ಇಡೀ ವಾತಾವರಣ ಸಿಂಗಾರಗೊಂಡಿದೆ. ಪವನ್​ ಒಡೆಯರ್​, ಅನಿರುದ್ಧ್​ ಜತ್ಕರ್​, ಸಂತೋಷ್​ ಆನಂದ್​ರಾಮ್​, ರವಿಶಂಕರ್​ ಗೌಡ, ಕಾರುಣ್ಯ ರಾಮ್​, ಉಮಾಪತಿ ಶ್ರೀನಿವಾಸ್​ ಗೌಡ, ಹರ್ಷಿಕಾ ಪೂಣಚ್ಚ ಸೇರಿದಂತೆ ಹಲವು ಸೆಲೆಬ್ರಿಟಿಗಳು ಬಂದು ನವ ಜೋಡಿಯನ್ನು ಹರಸಿದ್ದಾರೆ. ‘ನಟನಾಗಿ, ನಿರ್ದೇಶಕನಾಗಿ ಯಶಸ್ಸು ಕಂಡ ತರುಣ್​ ಈಗ ದಾಂಪತ್ಯ ಜೀವನಕ್ಕೆ ಕಾಲಿಡುತ್ತಿದ್ದಾರೆ. ವೃತ್ತಿಜೀವನ ಮತ್ತು ಖಾಸಗಿ ಬದುಕಿನಲ್ಲಿ ದೇವರು ಅವರಿಗೆ ಒಳ್ಳೆಯದು ಮಾಡಿದ್ದಾರೆ. ಈ ಜೋಡಿಗೆ ನನ್ನ ಅಭಿನಂದನೆಗಳು’ ಎಂದು ಸಂತೋಷ್​ ಆನಂದ್​ ರಾಮ್ ಹೇಳಿದ್ದಾರೆ.

‘ರಾಬರ್ಟ್​’ ಸಿನಿಮಾದ ನಿರ್ಮಾಪಕ ಉಮಾಪತಿ ಶ್ರೀನಿವಾಸ್​ ಗೌಡ ಅವರು ಮಾತನಾಡಿ, ‘ನಮ್ಮ ಸಿನಿಮಾದ ಶೂಟಿಂಗ್​ನಲ್ಲಿ ನಾಯಕ ನಟರು ಅಣಕಿಸುತ್ತಿದ್ದರು. ಆದರೆ ಸೀರಿಯಸ್​ ಆಗಿ ಈ ಮದುವೆ ಆಗುತ್ತದೆ ಅಂತ ನಾವು ಅಂದುಕೊಂಡಿರಲಿಲ್ಲ. ಸೋನಲ್​-ತರುಣ್​ ಜೋಡಿ ಚೆನ್ನಾಗಿದೆ. ನಮ್ಮ ಸಿನಿಮಾ ಮಾಡಿದ್ದರಿಂದ ಈ ರೀತಿ ಒಳ್ಳೆಯದು ಆಯಿತು ಅಂತ ನಮಗೆ ಖುಷಿ’ ಎಂದಿದ್ದಾರೆ.

ತರುಣ್​ ಸುಧೀರ್​-ಸೋನಲ್​ ಆರತಕ್ಷತೆಗೆ 180 ಬಗೆಯ ಊಟ; ಸಿದ್ಧವಾಗಿದೆ ಭರ್ಜರಿ ಭೋಜನ

‘ಇಂದು ನಮ್ಮ ತರುಣ್​ ಮದುವೆ. ನನ್ನ ಬಳಗದಲ್ಲಿ ಇದ್ದ ಬ್ಯಾಚುಲರ್​ ಅವನೊಬ್ಬನೇ. ಅವನು ಇಂದು ಮದುವೆ ಆಗುತ್ತಿರುವುದಕ್ಕೆ ನಮಗೆಲ್ಲ ತುಂಬ ಸಂತೋಷ. ತರುಣ್​-ಸೋನಲ್​ ವೈವಾಹಿಕ ಜೀವನ ಸುಖಮಯವಾಗಿ ಇರಲಿ’ ಎಂದು ರವಿಶಂಕರ್​ ಗೌಡ ಹಾರೈಸಿದ್ದಾರೆ. ‘ತರುಣ್​ ನನಗೆ ಬಹಳ ವರ್ಷಗಳಿಂದ ಸ್ನೇಹಿತ. ಅವರ ಮದುವೆ ವಿಷಯ ಮೊದಲು ತಿಳಿದು ಬಹಳ ಖುಷಿ ಆಯ್ತು. ಈಗ ಅವರು ವಿವಾಹಿತರ ಕ್ಲಬ್​ಗೆ ಬಂದಿರುವುದು ನಮಗೆ ಖುಷಿ ಆಗಿದೆ’ ಎಂದು ಪವನ್ ಒಡೆಯರ್​ ಹೇಳಿದ್ದಾರೆ. ಪವನ್​ ಒಡೆಯರ್​ ಪತ್ನಿ ಅಪೇಕ್ಷಾ ಪುರೋಹಿತ್​ ಕೂಡ ಆರತಕ್ಷತೆಗೆ ಬಂದು ವಿಶ್​ ಮಾಡಿದ್ದಾರೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.