ಶಿವರಾತ್ರಿ ಪ್ರಯುಕ್ತ ಶಿವನ ವಿಶೇಷ ಹಾಡು; ಹಬ್ಬಕ್ಕೆ ಉಡುಗೊರೆ ನೀಡಿದ ‘ವೀರಂ’ ಚಿತ್ರತಂಡ

ಶಿವರಾತ್ರಿ (Shivaratri 2022) ಹಬ್ಬದ ಆಚರಣೆಗೆ ಎಲ್ಲರೂ ಸಜ್ಜಾಗಿದ್ದಾರೆ. ಪರಮೇಶ್ವರನನ್ನು ಭಕ್ತಿ-ಭಾವದಿಂದ ಪೂಜಿಸಲು ಸಕಲ ತಯಾರಿ ನಡೆದಿದೆ. ಈ ಸಮಯದಲ್ಲಿ ಎಲ್ಲೆಲ್ಲೂ ಶಿವನ ಗಾನ ಕೇಳಿಸುತ್ತದೆ. ಈ ಸಂದರ್ಭಕ್ಕೆ ಸರಿಯಾಗಿ ‘ವೀರಂ’ ಸಿನಿಮಾದಿಂದ ಒಂದು ವಿಶೇಷ ಹಾಡು ಬಿಡುಗಡೆ ಆಗಿದೆ. ಪ್ರಜ್ವಲ್​ ದೇವರಾಜ್​ ಅಭಿನಯದ ಈ ಚಿತ್ರದಿಂದ ಶಿವನ ಹಾಡನ್ನು ರಿಲೀಸ್​ ಮಾಡಲಾಗಿದೆ. ಶಿವರಾತ್ರಿಯ ಪ್ರಯುಕ್ತ ಈ ಗೀತೆ ಹೊರಬಂದಿದ್ದು, ಜನಮೆಚ್ಚುಗೆ ಪಡೆದುಕೊಳ್ಳುತ್ತಿದೆ. ‘ವೀರಂ’ (Veeram Kannada Movie) ಸಿನಿಮಾಗೆ ಖ್ಯಾತ ಸಂಗೀತ ನಿರ್ದೇಶಕ ಅನೂಪ್​ ಸೀಳಿನ್​ ಅವರು ಸಂಗೀತ ನೀಡಿದ್ದಾರೆ. ಶಶಿಧರ ಕೆ.ಎಂ. ಅವರು ಈ ಚಿತ್ರಕ್ಕೆ ಬಂಡವಾಳ ಹೂಡಿದ್ದಾರೆ. ಮೇ 6ಕ್ಕೆ ಈ ಸಿನಿಮಾ ರಿಲೀಸ್​ ಆಗಲಿದೆ. ಅದಕ್ಕೂ ಮುನ್ನ ‘ಶಿವ ಶಿವ..’ ಹಾಡಿನ ಮೂಲಕ ಚಿತ್ರತಂಡ ಗಮನ ಸೆಳೆಯುತ್ತಿದೆ. ಈ ಸಿನಿಮಾದಲ್ಲಿ ಪ್ರಜ್ವಲ್​ ದೇವರಾಜ್​ (Prajwal Devaraj) ಜೊತೆ ಹಿರಿಯ ನಟಿ ಶ್ರುತಿ ಅಭಿನಯಿಸಿದ್ದಾರೆ. ತಾಯಿ-ಮಗನ ಪಾತ್ರದಲ್ಲಿ ಅವರಿಬ್ಬರು ಕಾಣಿಸಿಕೊಳ್ಳಲಿದ್ದಾರೆ. ಜೊತೆಗೆ ಶ್ರೀನಗರ ಕಿಟ್ಟಿ, ಅಚ್ಯುತ್​ ಕುಮಾರ್​ ಅವರಂತಹ ಪ್ರತಿಭಾವಂತ ಕಲಾವಿದರು ಬಣ್ಣ ಹಚ್ಚಿದ್ದಾರೆ. ಸದ್ಯ ಬಿಡುಗಡೆ ಆಗಿರುವ ‘ಶಿವ ಶಿವ..’ ಹಾಡಿಗೆ ಖ್ಯಾತ ಗಾಯಕಿ ಅನನ್ಯಾ ಭಟ್​ ಧ್ವನಿ ನೀಡಿದ್ದಾರೆ. ‘ಖದರ್’ ಕುಮಾರ್​ ಅವರು ಈ ಚಿತ್ರದ ನಿರ್ದೇಶಕರು.

‘ವೀರಂ’ ಸಿನಿಮಾದಲ್ಲಿ ಹಿರಿಯ ನಟಿ ಶ್ರುತಿ ಅವರು ಶಿವನ ಭಕ್ತೆಯಾಗಿ ಕಾಣಿಸಿಕೊಳ್ಳಲಿದ್ದಾರೆ. ಈ ಸಿನಿಮಾದ ಕಥೆಯ ಪ್ರಮುಖ ಘಟ್ಟದಲ್ಲಿ ‘ಶಿವ ಶಿವ..’ ಹಾಡು ಬರುತ್ತದೆ. ಸಿನಿಮಾ ಬಿಡುಗಡೆಗೆ ಇನ್ನೂ ಎರಡು ತಿಂಗಳು ಸಮಯ ಇದೆಯಾದರೂ ಶಿವರಾತ್ರಿ ಹಬ್ಬವೇ ಈ ಹಾಡಿನ ಬಿಡುಗಡೆಗೆ ಸೂಕ್ತ ಸಮಯ ಎಂದು ನಿರ್ಧರಿಸಿ ರಿಲೀಸ್​ ಮಾಡಲಾಗಿದೆ.

ಅನನ್ಯಾ ಭಟ್​ ಅವರಿಗೂ ಶಿವನ ಗೀತೆಗೂ ಗಾಢ ನಂಟು ಇದೆ ಎಂದೇ ಹೇಳಬಹುದು. ಈ ಹಿಂದೆ ಅವರು ‘ಸೋಜುಗಾದ ಸೂಜು ಮಲ್ಲಿಗೆ..’ ಹಾಡು ಹೇಳಿ ದೇಶಾದ್ಯಂತ ಫೇಮಸ್​ ಆಗಿದ್ದರು. ಯೂಟ್ಯೂಬ್​ನಲ್ಲಿ ಆ ಗೀತೆ ಕೋಟ್ಯಂತರ ಭಾರಿ ವೀಕ್ಷಣೆ ಕಂಡಿದೆ. ಈಗ ಅವರ ಕಂಠದಲ್ಲಿಯೇ ಶಿವನ ಮತ್ತೊಂದು ಹಾಡು ಮೂಡಿಬಂದಿದೆ. ಅನೂಪ್​ ಸಿಳೀನ್​ ಸಂಗೀತ ಮತ್ತು ಅನನ್ಯಾ ಭಟ್​ ಗಾಯನದಲ್ಲಿ ಇತ್ತೀಚೆಗೆ ಮೂಡಿಬಂದ ‘ಬಾಗ್ಲಿ ತೆಗಿ ಮೇರಿ ಜಾನ್​’ ಹಾಡು ಸೂಪರ್​ ಹಿಟ್​ ಆಗಿ ಮುನ್ನುತ್ತಿದೆ. ಈಗ ‘ವೀರಂ’ ಚಿತ್ರದ ಈ ಗೀತೆ ಕೂಡ ಅವರಿಬ್ಬರ ಕಾಂಬಿನೇಷನ್​ನಲ್ಲಿ ಸಿದ್ಧವಾಗಿದೆ.

ಈ ಹಾಡಿಗೆ ಖ್ಯಾತ ಸಾಹಿತಿ ನಾಗೇಂದ್ರ ಪ್ರಸಾದ್​ ಅವರು ಸಾಹಿತ್ಯ ಬರೆದಿದ್ದಾರೆ. ‘ನಾಗೇಂದ್ರ ಪ್ರಸಾದ್​ ಅವರಿಗೆ ಈ ಟ್ಯೂನ್​ ತುಂಬ ಇಷ್ಟ ಆಯಿತು. ಹಾಗಾಗಿ ಕೆಲವೇ ನಿಮಿಷಗಳಲ್ಲಿ ಈ ಗೀತೆಯನ್ನು ಬರೆದುಕೊಟ್ಟರು. ಈ ಸಿನಿಮಾದಲ್ಲಿ ಒಟ್ಟು 5 ಹಾಡು ಇರಲಿದೆ. ಆ ಪೈಕಿ ಮೊದಲ ಗೀತೆಯನ್ನು ಈಗ ರಿಲೀಸ್​ ಮಾಡಿದ್ದೇವೆ’ ಎಂದಿದ್ದಾರೆ ಸಂಗೀತ ನಿರ್ದೇಶಕ ಅನೂಪ್​ ಸೀಳಿನ್​.

‘ವೀರಂ’ ಚಿತ್ರಕ್ಕೆ ಪೋಸ್ಟ್​ ಪ್ರೊಡಕ್ಷನ್​ ಕೆಲಸಗಳು ನಡೆಯುತ್ತಿವೆ. ಡಬ್ಬಿಂಗ್ ಕಾರ್ಯ ಪೂರ್ಣಗೊಂಡಿದೆ. ಮೇ 6ರಂದು ಅದ್ದೂರಿಯಾಗಿ ಈ ಚಿತ್ರ ರಿಲೀಸ್​ ಆಗಲಿದೆ. ಇದರಲ್ಲಿ ಪ್ರಜ್ವಲ್​ ದೇವರಾಜ್ ಅವರು ವಿಷ್ಣುವರ್ಧನ್​ ಅಭಿಮಾನಿಯಾಗಿ ಕಾಣಿಸಿಕೊಳ್ಳಲಿದ್ದಾರೆ.

ಇದನ್ನೂ ಓದಿ:

Maha Shivaratri 2022: ಶಿವರಾತ್ರಿಯಂದು ಮಾಡಬೇಕಾದ ಮೂರು ಸರಳ ಕರ್ತವ್ಯಗಳು ಯಾವುವು ಗೊತ್ತಾ?

Mahashivratri 2022: ಶಿವರಾತ್ರಿಯಂದು ಜಾಗರಣೆ ಮಾಡುವ ಭಕ್ತರಿಗೆ ಇಲ್ಲಿವೆ ಕನ್ನಡ ಭಕ್ತಿಗೀತೆಗಳು