Shivarajkumar: ‘ಶಕ್ತಿಧಾಮ ಬಗ್ಗೆ ನೀವು ಮಿಸ್ಟೇಕ್ ಮಾಡ್ಕೊಂಡಿದ್ದೀರಿ, ಪುನೀತ್ ಮಾಡಿದ ಸಹಾಯ ಬೇರೆ’: ಶಿವಣ್ಣ ಸ್ಪಷ್ಟನೆ
Shakthidhama: ‘ಮೊದಲಿನಿಂದಲೂ ಶಕ್ತಿಧಾಮದ ಜವಾಬ್ದಾರಿ ಇತ್ತು. ಈ ಕುರಿತಂತೆ ನೀವು ಮಿಸ್ಟೇಕ್ ಮಾಡಿಕೊಂಡಿದ್ದೀರಿ’ ಎನ್ನುವ ಮೂಲಕ ಶಿವರಾಜ್ಕುಮಾರ್ ಅವರು ಕೆಲವು ಸ್ಪಷ್ಟನೆ ನೀಡಿದ್ದಾರೆ.
Updated on:May 01, 2023 | 6:23 PM
ಕರ್ನಾಟಕ ವಿಧಾನಸಭಾ ಚುನಾವಣೆಗೆ ಕೆಲವೇ ದಿನಗಳು ಬಾಕಿ ಇವೆ. ಗೀತಾ ಶಿವರಾಜ್ಕುಮಾರ್ ಅವರು ಕಾಂಗ್ರೆಸ್ ಸೇರ್ಪಡೆ ಆದ ಬಳಿಕ ನಟ ಶಿವರಾಜ್ಕುಮಾರ್ (Shivarajkumar) ಅವರು ಕೆಲವು ಅಭ್ಯರ್ಥಿಗಳ ಪರವಾಗಿ ಪ್ರಚಾರಕ್ಕೆ ಮುಂದಾಗಿದ್ದಾರೆ. ಈ ವೇಳೆ ಸುದ್ದಿಗೋಷ್ಠಿ ನಡೆಸಿದ ಅವರಿಗೆ ಶಕ್ತಿಧಾಮ ಬಗ್ಗೆ ಪ್ರಶ್ನೆ ಎದುರಾಯಿತು. ‘ಪುನೀತ್ ರಾಜ್ಕುಮಾರ್ (Puneeth Rajkumar) ಅವರ ನಿಧನದ ನಂತರ ಶಕ್ತಿಧಾಮದ ಜವಾಬ್ದಾರಿ ನಿಮ್ಮ ಮೇಲೆ ಜಾಸ್ತಿ ಆಗಿದೆಯೇ’ ಎಂದು ಕೇಳಿದ ಪ್ರಶ್ನೆಗೆ ಶಿವಣ್ಣ ಉತ್ತರ ನೀಡಿದ್ದಾರೆ. ಈ ಸಂದರ್ಭದಲ್ಲಿ ಅವರು ಒಂದು ಸ್ಪಷ್ಟನೆ ನೀಡಿದ್ದಾರೆ. ‘ಮೊದಲಿನಿಂದಲೂ ಶಕ್ತಿಧಾಮದ ಜವಾಬ್ದಾರಿ ಇತ್ತು. ಈ ಕುರಿತಂತೆ ನೀವು ಮಿಸ್ಟೇಕ್ ಮಾಡಿಕೊಂಡಿದ್ದೀರಿ’ ಎಂದು ಶಿವರಾಜ್ಕುಮಾರ್ ಹೇಳಿದ್ದಾರೆ. ಅಲ್ಲದೇ, ಶಕ್ತಿಧಾಮದ (Shakthidhama) ಹಿಂದಿನ ವಿವರಗಳನ್ನು ಅವರು ತಿಳಿಸಿದ್ದಾರೆ.
‘ಶಕ್ತಿಧಾಮ ಶುರುವಾಗಿದ್ದು 1998ರಲ್ಲಿ. ಆಗ ಅಮ್ಮ ಶುರು ಮಾಡಿದ್ದು ಇದು. ಅಂದಿನಿಂದ ಇಂದಿನ ತನಕ ಸಾಕಷ್ಟು ಜನ ಟ್ರಸ್ಟಿಗಳು ಆಗಿದ್ದಾರೆ. ಅಮ್ಮ ಪ್ರೆಸಿಡೆಂಟ್ ಆಗಿದ್ದರು. ಕೆಂಪಯ್ಯ, ಸುಮನಾ, ಜಯದೇವ್, ಕೋಮಲಮ್ಮ ಮುಂತಾದವರು ಇದ್ದಾರೆ. ದೊರೆ ಭಗವಾನ್ ಕೂಡ ಇದ್ದರು. ಇವರೆಲ್ಲರೂ ನೋಡಿಕೊಳ್ಳುತ್ತಿದ್ದರು. ನಾನೇ ಹೋಗುತ್ತಿರಲಿಲ್ಲ. ಅಮ್ಮ ಯಾವಾಗಲೂ ಬಯ್ಯುತ್ತಿದ್ದರು. ಒಮ್ಮೆ ಹೋಗಿ ಬಾ ಅಂತ ಹೇಳುತ್ತಿದ್ದರು. ಕಷ್ಟದಲ್ಲಿ ಇರುವವರನ್ನು ನೋಡೋಕೆ ಆಗಲ್ಲ. ಬೇಕಿದ್ದರೆ ದುಡ್ಡು ಕೊಡುತ್ತೇನೆ ಅಂತ ನಾನು ಹೇಳುತ್ತಿದ್ದೆ. ಆಗ ನಾವೆಲ್ಲ ಯುವಕರು. ಶೂಟಿಂಗ್ನಲ್ಲಿ ಬ್ಯುಸಿ ಇರುತ್ತಿದ್ದೆವು’ ಎಂದಿದ್ದಾರೆ ಶಿವಣ್ಣ.
ಇದನ್ನೂ ಓದಿ: Vishal: ‘ಶಕ್ತಿಧಾಮದ ಮಕ್ಕಳನ್ನು ದತ್ತು ಪಡೆಯಲು ಸಿದ್ಧನಿದ್ದೇನೆ, ಆದರೆ..’: ವಾಸ್ತವ ಸ್ಥಿತಿ ವಿವರಿಸಿದ ನಟ ವಿಶಾಲ್
‘ಇದೆಲ್ಲ ಆವಾಗಿನಿಂದಲೇ ನಡೆಯುತ್ತಿದೆ. ಪುನೀತ್ ಮಾಡುತ್ತಿದ್ದದ್ದು ಬೇರೆ. ಅವರು ಬೇರೆ ಶಾಲೆಗಳಿಗೆ ಸಹಾಯ ಮಾಡುತ್ತಿದ್ದರು. ಅಮ್ಮ ಮತ್ತು ಇತರೆ ಟ್ರಸ್ಟಿಗಳು ಶಕ್ತಿಧಾಮ ನೋಡಿಕೊಳ್ಳುತ್ತಿದ್ದರು. ಅಮ್ಮ ಹೋದ್ಮೇಲೆ 2016-17ರಲ್ಲಿ ಗೀತಾ ಅವರು ಪ್ರೆಸಿಡೆಂಟ್ ಆಗಿ ಬೇರೆ ಥರ ಡೆವೆಲಪ್ಮೆಂಟ್ ಆಯಿತು. ಅಲ್ಲಿ ಶಾಲೆ ಕಟ್ಟಬೇಕು ಎಂಬ ಕನಸು ಕೆಂಪಯ್ಯ ಅವರದ್ದು. ನಮ್ಮದೇ ಆದಂತಹ ಶಾಲೆ ಇರಬೇಕು ಅಂತ ನಿರ್ಧಾರ ಮಾಡಿದ್ದು ಅವರು’ ಎಂದು ಶಿವರಾಜ್ಕುಮಾರ್ ಹೇಳಿದ್ದಾರೆ.
ಇದನ್ನೂ ಓದಿ: ಶಕ್ತಿಧಾಮದ ಮಕ್ಕಳಿಗೆ ಲಾಲ್ಬಾಗ್ ತೋರಿಸಿದ ಶಿವಣ್ಣ
ಶಿವಣ್ಣ ರಾಜಕೀಯಕ್ಕೆ ಬರಲ್ಲ:
ಸಿನಿಮಾ ಕಲಾವಿದರು ರಾಜಕೀಯಕ್ಕೆ ಬರುವುದು ಕಾಮನ್. ಆದರೆ ಶಿವರಾಜ್ಕುಮಾರ್ ಅವರು ರಾಜಕೀಯಕ್ಕೆ ಎಂಟ್ರಿ ನೀಡುವುದಿಲ್ಲ ಎಂದು ಹೇಳಿದ್ದಾರೆ. ‘ಯಾರಾದರೂ ಕಷ್ಟ ಅಂತ ಬಂದು ಸಹಾಯ ಕೇಳಿದರೆ ದುಡ್ಡು ಕೊಡುತ್ತೇನೆ. ಆದರೆ ರಾಜಕೀಯಕ್ಕೆ ಬರಲ್ಲ. ನನ್ನ ಕೈಯಲ್ಲಿ ಆಗುವಷ್ಟು ಸಹಾಯ ಮಾಡ್ತೀನಿ. ಮಾರ್ನಿಂಗ್ ವಾಕ್ ಮಾಡುವಾಗ ಬಂದು ಸಹಾಯ ಕೇಳ್ತಾರೆ. ಕೆಲವರಿಗೆ 5 ಸಾವಿರ, ತುಂಬ ಕಷ್ಟ ಇದ್ದರೆ 10 ಸಾವಿರ ರೂಪಾಯಿ ಕೊಡುತ್ತೇನೆ’ ಎಂದು ಶಿವರಾಜ್ಕುಮಾರ್ ಹೇಳಿದ್ದಾರೆ.
ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ.
Published On - 5:45 pm, Mon, 1 May 23
