150ನೇ ಸಿನಿಮಾಗೆ ಸಂಗೀತ ನೀಡಿದ ವಿ. ಮನೋಹರ್; ‘31 ಡೇಸ್’ ಚಿತ್ರದಿಂದ ಹೊಸ ಹಾಡು

ಕನ್ನಡ ಚಿತ್ರರಂಗದಲ್ಲಿ ಅನೇಕ ಸೂಪರ್​ ಹಿಟ್​ ಗೀತೆಗಳನ್ನು ನೀಡಿರುವ ವಿ. ಮನೋಹರ್​ ಅವರು 150ನೇ ಸಿನಿಮಾದ ಮೈಲಿಗಲ್ಲಿನಲ್ಲಿ ನಿಂತಿದ್ದಾರೆ. ‘ಜಾಲಿಡೇಸ್’ ಸಿನಿಮಾ ಖ್ಯಾತಿಯ ನಿರಂಜನ್ ಶೆಟ್ಟಿ ಅವರು ಹೀರೋ ಆಗಿ ಅಭಿನಯಿಸಿರುವ ‘31 ಡೇಸ್​’ ಸಿನಿಮಾಗೆ ವಿ. ಮನೋಹರ್ ಸಂಗೀತ ನೀಡಿದ್ದಾರೆ. ಇದು ಅವರು 150ನೇ ಸಿನಿಮಾ ಎಂಬುದು ವಿಶೇಷ. ಒಪೇರಾ ಶೈಲಿಯ ಹಾಡು ಈಗ ಬಿಡುಗಡೆ ಆಗಿದೆ. ಈ ಹಾಡನ್ನು ವಿ. ಮನೋಹರ್​ ಅವರೇ ಬರೆದು, ಹಾಡಿ, ಸಂಗೀತ ಸಂಯೋಜಿಸಿದ್ದಾರೆ. ಜೊತೆಗೆ ನಿರಂಜನ್ ಶೆಟ್ಟಿ ಜೊತೆ ನಟಿಸಿದ್ದಾರೆ ಕೂಡ! ಇತ್ತೀಚೆಗೆ (ಡಿಸೆಂಬರ್ 31) ಈ ಹಾಡು ರಿಲೀಸ್ ಆಯಿತು.

ಹಾಡು ಬಿಡುಗಡೆ ಸಲುವಾಗಿ ಸುದ್ದಿಗೋಷ್ಠಿ ಆಯೋಜಿಸಲಾಗಿತ್ತು. ಈ ವೇಳೆ ಚಿತ್ರತಂಡದವರು ಮಾತನಾಡಿದರು. ಸಂಗೀತ ನಿರ್ದೇಶಕ ವಿ. ಮನೋಹರ್ ಮಾತನಾಡಿ. ‘ಇಂದು ರಿಲೀಸ್ ಆಗಿರುವ ಒಪೇರಾ ಶೈಲಿಯ ಹಾಡು ಕನ್ನಡದಲ್ಲಿ ಇದೇ ಮೊದಲು ಎಂಬುದು ನನ್ನ ಅಭಿಪ್ರಾಯ. ನಿರಂಜನ್ ಒತ್ತಾಯಕ್ಕೆ ಮಣಿದು ಈ ಸಾಂಗ್​ನಲ್ಲಿ ನಾನು ಕೂಡ ನಟಿಸಿದ್ದೇನೆ. ಈ ಸಿನಿಮಾದಲ್ಲಿ ಒಟ್ಟು 10 ಹಾಡುಗಳಿವೆ. ರವೀಂದ್ರ ಸೊರಗಾವಿ, ಎಂ.ಡಿ. ಪಲ್ಲವಿ ಸೇರಿದಂತೆ ಹಲವು ಜನಪ್ರಿಯ ಗಾಯಕರು ಹಾಡಿದ್ದಾರೆ’ ಎಂದು ಹೇಳಿದರು.

ನಿರಂಜನ್ ಶೆಟ್ಟಿ ಅವರ ಸಿನಿಮಾ ಜರ್ನಿಗೆ ಈಗ 15 ವರ್ಷಗಳಾಗಿವೆ. ‘31 ಡೇಸ್​’ ಸಿನಿಮಾವನ್ನು ಅವರ ಹೋಮ್​ ಬ್ಯಾನರ್​ ಮೂಲಕ ನಿರ್ಮಾಣ ಮಾಡಲಾಗಿದೆ. ಅವರ ಪತ್ನಿ ನಾಗವೇಣಿ ನಿರ್ಮಾಪಕರಾಗಿದ್ದಾರೆ. ‘ಇದು 31 ದಿನಗಳಲ್ಲಿ ನಡೆಯುವ ಲವ್​ ಸ್ಟೋರಿ. ಆದ್ದರಿಂದ 31 ಡೇಸ್​ ಎಂದು ಶೀರ್ಷಿಕೆ ಇಟ್ಟಿದ್ದೇವೆ. ಮಧ್ಯಂತರಕ್ಕಿಂತ ಮೊದಲು 15 ದಿನಗಳು ಮತ್ತು ಮಧ್ಯಂತರದ ಬಳಿಕ 15 ದಿನಗಳ ಕಥೆ ಸಾಗುತ್ತದೆ. ಕೊನೆಯ ದಿನ ಕ್ಲೈಮ್ಯಾಕ್ಸ್ ಆಗಿರುತ್ತದೆ. ಯಾರೂ ಊಹಿಸದ ಕ್ಲೈಮ್ಯಾಕ್ಸ್ ಈ ಸಿನಿಮಾದಲ್ಲಿದೆ. ವಿ. ಮನೋಹರ್ ಅವರ 150ನೇ ಸಿನಿಮಾ ನನಗೆ ಸಿಕ್ಕಿದ್ದು ನನ್ನ‌ ಪಾಲಿನ ಪುಣ್ಯ’ ಎಂದು ನಿರಂಜನ್ ಶೆಟ್ಟಿ ಹೇಳಿದರು.‌

ಇದನ್ನೂ ಓದಿ: 2025ರ ಬಹು ನಿರೀಕ್ಷಿತ ಕನ್ನಡ ಸಿನಿಮಾಗಳಿವು

ವಿನುತ್ ಕೆ. ಅವರು ಛಾಯಾಗ್ರಹಣ ಮಾಡಿದ್ದಾರೆ. ತ್ರಿಭುವನ್, ಧನು ಕುಮಾರ್ ಅವರ ನೃತ್ಯ ನಿರ್ದೇಶನ ಈ ಚಿತ್ರಕ್ಕಿದೆ. ರವಿತೇಜ್ ಸಿ.ಎಚ್, ನಿತೀಶ್ ಪೂಜಾರಿ, ಸನತ್ ಅವರ ಸಂಕಲನದಲ್ಲಿ ‘31 ಡೇಸ್​’ ಚಿತ್ರ ಸಿದ್ಧವಾಗಿದೆ. ‘ಸಾಕಷ್ಟು ಸಿನಿಮಾಗಳಿಗೆ ಸಹ-ನಿರ್ದೇಶಕನಾಗಿದ್ದ ನನ್ನನ್ನು ನಿರಂಜನ್ ಅವರು ಈ ಸಿನಿಮಾದ ಮೂಲಕ ನಿರ್ದೇಶಕನಾಗಿ‌ ಮಾಡಿದ್ದಾರೆ. ವಿ. ಮನೋಹರ್ ಸಂಗೀತ 150ನೇ ಸಿನಿಮಾ ನನ್ನ‌ ಮೊದಲ ನಿರ್ದೇಶನದ ಚಿತ್ರ ಆಗಿರುವುದು ಖುಷಿ. ಇದು ಹೈವೋಲ್ಟೇಜ್ ಲವ್ ಸ್ಟೋರಿ’ ಎಂದು ನಿರ್ದೇಶಕ ರಾಜ ರವಿಕುಮಾರ್ ಹೇಳಿದ್ದಾರೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.