150 ಕೋಟಿ ರೂ. ಬಂಗಲೆ ಕಟ್ಟಿಸುತ್ತಿರುವ ನಟ ಧನುಷ್​​; ಈ ಮನೆಯ ವಿಶೇಷ ಏನು?

ನಟ ಧನುಷ್​​ ಅವರಿಗೆ ಇಡೀ ಭಾರತೀಯ ಚಿತ್ರರಂಗದಲ್ಲಿ ಸಿಕ್ಕಾಪಟ್ಟೆ ಬೇಡಿಕೆ ಇದೆ. ಈ ಕಾಲಿವುಡ್​ ನಟ ತಮಿಳಿನಲ್ಲಿ ಮಾತ್ರವಲ್ಲದೆ ಬಾಲಿವುಡ್ ಹಾಗೂ ಹಾಲಿವುಡ್​ನಲ್ಲೂ ಬ್ಯುಸಿ ಆಗಿದ್ದಾರೆ. ರಾಷ್ಟ್ರ ಪ್ರಶಸ್ತಿ ಪುರಸ್ಕೃತ ಧನುಷ್​ಗೆ ಎಲ್ಲ ಸಿನಿಮಾದಲ್ಲೂ ಬಹುಕೋಟಿ ಸಂಭಾವನೆ ಕೂಡ ಸಿಗುತ್ತದೆ. ಹಲವು ವರ್ಷಗಳಿಂದ ಚಿತ್ರರಂಗದಲ್ಲಿ ಸಕ್ರಿಯರಾಗಿರುವ ಅವರು ಈಗ ಹೊಸದೊಂದು ಮನೆ ಕಟ್ಟುವ ಕೆಲಸದಲ್ಲಿ ತೊಡಗಿಕೊಂಡಿದ್ದಾರೆ. ಅವರ ಈ ಕನಸಿನ ಬಂಗಲೆ ಬಗ್ಗೆ ಹಲವು ಸುದ್ದಿಗಳು ಕೇಳಿಬರುತ್ತಿವೆ.

ಮನೆಯ ಬಜೆಟ್​ 150 ಕೋಟಿ ರೂ.!

ಇಂಥದ್ದೊಂದು ಬಂಗಲೆ ಕಟ್ಟಿಸಬೇಕು ಎಂಬುದು ಧನುಷ್​ ಅವರ ಬಹುವರ್ಷಗಳ ಕನಸು. ಇಷ್ಟು ವರ್ಷ ಕಷ್ಟಪಟ್ಟು ದುಡಿದಿರುವ ಅವರು ಬರೋಬ್ಬರಿ 150 ಕೋಟಿ ರೂ.ಗಳನ್ನು ಈ ಮನೆ ನಿರ್ಮಾಣಕ್ಕಾಗಿ ವ್ಯಯಿಸುತ್ತಿದ್ದಾರೆ ಎನ್ನಲಾಗಿದೆ. ಈ ಬಗ್ಗೆ ಅವರು ಅಧಿಕೃತವಾಗಿ ಹೇಳಿಕೊಂಡಿಲ್ಲವಾದರೂ ಹಲವು ಕಡೆಗಳಲ್ಲಿ ವರದಿ ಆಗಿದೆ.

ನಾಲ್ಕು ಅಂತಸ್ಥಿನ ಅರಮನೆ

150 ಕೋಟಿ ರೂ. ವೆಚ್ಚದಲ್ಲಿ ಮನೆ ನಿರ್ಮಾಣ ಆಗುತ್ತಿದೆ ಎಂದರೆ, ಅದರಲ್ಲಿನ ಸವಲತ್ತುಗಳು ಹೇಗಿರಲಿದೆ ಎಂದು ಕಲ್ಪಿಸಿಕೊಳ್ಳಬಹುದು. ಬರೋಬ್ಬರಿ 19 ಸಾವಿರ ಚದರ ಅಡಿಯಲ್ಲಿ ಈ ಮನೆಯನ್ನು ಕಟ್ಟಲಾಗುತ್ತಿದೆ. ಈ ಐಷಾರಾಮಿ ಬಂಗಲೆ ನಾಲ್ಕು ಮಹಡಿಗಳನ್ನು ಹೊಂದಿರಲಿದೆ. ಧನುಷ್​ ಅವರ ಕನಸಿನಂತೆಯೇ ಮನೆಯ ಪ್ರತಿ ಮೂಲೆ ಕೂಡ ವಿನ್ಯಾಸಗೊಳ್ಳಲಿದೆ.

ಎಲ್ಲಿ ನಿರ್ಮಾಣ ಆಗುತ್ತಿದೆ ಈ ಬಂಗಲೆ?

ಚೆನ್ನೈನ ಪೋಯಿಸ್ ಗಾರ್ಡನ್​ನಲ್ಲಿ ಧನುಷ್​ ಅವರ ಈ ಬಂಗಲೆ ನಿರ್ಮಾಣ ಆಗುತ್ತಿದೆ. ರಜನಿಕಾಂತ್​ ಸೇರಿದಂತೆ ಕಾಲಿವುಡ್​ನ ಹಲವು ಜನಪ್ರಿಯ ಸೆಲೆಬ್ರಿಟಿಗಳ ಮನೆ ಈ ಏರಿಯಾದಲ್ಲಿದೆ. ತಮಿಳುನಾಡು ಮಾಜಿ ಮುಖ್ಯಮಂತ್ರಿ ಜಯಲಲಿತಾ ವಾಸಿಸಿದ್ದ ಬಹುಕೋಟಿ ಬಂಗಲೆ ಇರುವುದು ಕೂಡ ಪೋಯಿಸ್​​ ಗಾರ್ಡನ್​ನಲ್ಲಿ. ಈ ವರ್ಷ ಫೆಬ್ರವರಿಯಲ್ಲಿ ಧನುಷ್​ ಅವರು ಭೂಮಿ ಖರೀದಿಸಿದ್ದರು. ಪತ್ನಿ ಐಶ್ವರ್ಯಾ, ಮಾವ ರಜನಿಕಾಂತ್​ ಮತ್ತು ಅತ್ತೆ ಲತಾ ಸಮ್ಮುಖದಲ್ಲಿ ಭೂಮಿ ಪೂಜೆ ನೆರವೇರಿಸಿದ್ದರು.

ಸಿನಿಮಾ ವಿಚಾರಕ್ಕೆ ಬರುವುದಾದರೆ, ಧನುಷ್​ ನಟನೆಯ ‘ಜಗಮೇ ತಂದಿರನ್​’ ಚಿತ್ರ ಜೂ.18ರಂದು ನೆಟ್​ಫ್ಲಿಕ್ಸ್​ನಲ್ಲಿ ರಿಲೀಸ್​ ಆಯಿತು. ಟಾಲಿವುಡ್ ನಿರ್ದೇಶಕ ಶೇಖರ್​ ಕಮ್ಮುಲ ಜೊತೆ ಅವರೊಂದು ಸಿನಿಮಾ ಮಾಡುತ್ತಿದ್ದು ತೆಲುಗು, ತಮಿಳು ಮತ್ತು ಹಿಂದಿಯಲ್ಲಿ ಆ ಚಿತ್ರ ಮೂಡಿಬರಲಿದೆ. ಆ ಚಿತ್ರಕ್ಕೆ ಧನುಷ್ 50 ಕೋಟಿ ರೂ. ಸಂಭಾವನೆ ಪಡೆಯಲಿದ್ದಾರೆ ಎಂಬ ಗುಸುಗುಸು ಕೂಡ ಹರಡಿದೆ. ಇದಲ್ಲದೆ, ಹಾಲಿವುಡ್​ನ ಗ್ರೇ ಮ್ಯಾನ್​, ಬಾಲಿವುಡ್​ನ ಅತರಂಗೀ ರೇ ಚಿತ್ರಗಳಲ್ಲಿ ಧನುಷ್​ ನಟಿಸುತ್ತಿದ್ದಾರೆ.

ಇದನ್ನೂ ಓದಿ:

Dhanush: ‘ಕರ್ಣನ್’​ ಗೆದ್ದ ಬಳಿಕ ಧನುಷ್​ ಸಂಭಾವನೆ ಏರಿಕೆ; ಖ್ಯಾತ ನಟನಿಗೆ ಈಗ ಸಿಗುತ್ತಿರುವ ಹಣ ಎಷ್ಟು?

ಕೊವಿಡ್​ ಇಳಿಮುಖ ಆಗುತ್ತಿದ್ದಂತೆಯೇ ವಿದೇಶಕ್ಕೆ ಹಾರಿದ ರಜನಿಕಾಂತ್​; ಕಾರಣ ಏನು?

Published On - 4:27 pm, Mon, 28 June 21