‘ಕರ್ಣ’ ಧಾರಾವಾಹಿ ಒಪ್ಪಿಕೊಳ್ಳಲು ಕಾರಣ ಆಯ್ತು ಒಂದು ಅಂಶ; ವಿವರಿಸಿದ ನಮ್ರತಾ ಗೌಡ
ಜೀ ಕನ್ನಡದ ‘ಕರ್ಣ’ ಧಾರಾವಾಹಿಯಲ್ಲಿ ನಮ್ರತಾ ಗೌಡ ಅವರು ನಿತ್ಯಾ ಪಾತ್ರದಲ್ಲಿ ನಟಿಸಿದ್ದಾರೆ. ‘ಬಿಗ್ ಬಾಸ್ ಕನ್ನಡ ಸೀಸನ್ 10’ರಲ್ಲಿ ಭಾಗಿ ಆಗಿದ್ದ ಅವರು ಅಪಾರ ಜನಪ್ರಿಯತೆ ಪಡೆದರು. ಇದಾದ ಬಳಿಕ ಅವರು ಯಾವುದೇ ಆಫರ್ನ ಒಪ್ಪಿಕೊಂಡಿರಲಿಲ್ಲ. ಈಗ ಅವರು ಹೊಸ ಧಾರಾವಾಹಿಯಲ್ಲಿ ಕಾಣಿಸಿಕೊಂಡು ಮೆಚ್ಚುಗೆ ಪಡೆದಿದ್ದಾರೆ.
Updated on:Jul 08, 2025 | 12:32 PM
ಜೀ ಕನ್ನಡದಲ್ಲಿ ‘ಕರ್ಣ’ ಧಾರಾವಾಹಿ (Karna Serial) ಪ್ರಸಾರ ಆರಂಭಿಸಿದೆ. ಈ ಧಾರಾವಾಹಿಯಲ್ಲಿ ಕಿರಣ್ ರಾಜ್, ನಮ್ರತಾ ಗೌಡ ಹಾಗೂ ಭವ್ಯಾ ಗೌಡ ಮುಖ್ಯಭೂಮಿಕೆಯಲ್ಲಿ ಇದ್ದಾರೆ. ನಮ್ರತಾ ಅವರು ಈ ಧಾರಾವಾಹಿಯಲ್ಲಿ ನಿತ್ಯಾ ಹೆಸರಿನ ಪಾತ್ರ ಮಾಡಿದ್ದಾರೆ. ಈ ಧಾರಾವಾಹಿಯ ಕೆಲವು ಎಪಿಸೋಡ್ಗಳು ಪ್ರಸಾರ ಕಂಡಿದ್ದು ಪ್ರೇಕ್ಷಕರಿಗೆ ಇಷ್ಟವಾಗಿದೆ. ಈ ಧಾರಾವಾಹಿಯಲ್ಲಿ ವಿವಿಧ ಭಾವನೆಗಳನ್ನು ತೋರಿಸಲಾಗುತ್ತಿದೆ. ‘ಕರ್ಣ’ ಇಷ್ಟ ಆಗಲು ಕಾರಣ ಏನು ಎಂಬುದನ್ನು ನಮ್ರತಾ ಗೌಡ ಅವರು ವಿವರಿಸಿದ್ದಾರೆ. ಅವರು ಈ ಬಗ್ಗೆ ಟಿವಿ9 ಕನ್ನಡ ಡಿಜಿಟಲ್ ಜೊತೆ ಮಾತನಾಡಿದ್ದಾರೆ.
ಎರಡು ವರ್ಷದ ಹಿಂದೇ ಬಂದಿತ್ತು ಆಫರ್..
‘ಬಿಗ್ ಬಾಸ್ ಆದಮೇಲೆ ಸಾಕಷ್ಟು ಆಫರ್ಗಳು ಬಂದವು. ಯಾವುದೂ ಇಷ್ಟ ಆಗಿಲ್ಲ. ಒಳ್ಳೆಯ ಪಾತ್ರ ಹಾಗೂ ಕಥೆ ಹುಡುಕುವಾಗ ಸಿಕ್ಕಿದ್ದೇ ಕರ್ಣ’ ಎಂದಿದ್ದಾರೆ ನಮ್ರತಾ ಗೌಡ. ಇಲ್ಲೊಂದು ಟ್ವಿಸ್ಟ್ ಇದೆ. ಈ ಧಾರಾವಾಹಿಯ ಆಫರ್ ನಮ್ರತಾಗೆ ಎರಡು ವರ್ಷಗಳ ಹಿಂದೇ ಬಂದಿತ್ತಂತೆ. ‘ಬಿಗ್ ಬಾಸ್ಗೆ ಹೋಗುವ ಮೊದಲೇ ನನಗೆ ನಿತ್ಯಾ ಪಾತ್ರದ ಆಫರ್ ಬಂದಿತ್ತು. ಆದರೆ, ಧಾರಾವಾಹಿ ಸೆಟ್ಟೇರಲಿಲ್ಲ. ಈಗ ಮತ್ತೆ ನನ್ನನ್ನು ಅಪ್ರೋಚ್ ಮಾಡಿದರು. ನಾನು ಓಕೆ ಎಂದೆ. ಆರಂಭದ ಎಪಿಸೋಡ್ನಲ್ಲಿ ನಾನು ಹೆಚ್ಚು ತೆರೆಮೇಲೆ ಕಾಣಿಸಿಕೊಳ್ಳೋದಿಲ್ಲ. ಆದಾಗ್ಯೂ ಜನರು ಹೆಚ್ಚಿನ ಪ್ರೀತಿ ಕೊಟ್ಟಿದ್ದಾರೆ’ ಎಂದಿದ್ದಾರೆ ಅವರು.
ಭವ್ಯಾ ಜೊತೆ ಬಾಂಡಿಂಗ್..
ಈ ಧಾರಾವಾಹಿಯಲ್ಲಿ ನಮ್ರತಾ ಅವರು ಭವ್ಯಾ ಗೌಡನ ಅಕ್ಕನ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಇವರನ್ನು ತೆರೆಮೇಲೆ ನೋಡಿದಾಗ ಇವರು ನಿಜವಾದ ಸಹೋದರಿಯರು ಎನ್ನುವ ಫೀಲ್ ಬರುತ್ತದೆ. ‘ನಾನು ಭವ್ಯಾ ಈ ಮೊದಲು ಒಂದೇ ನಿರ್ಮಾಣ ಸಂಸ್ಥೆ ಅಡಿಯಲ್ಲಿ ಕೆಲಸ ಮಾಡಿದ್ದೇವೆ. ನಮ್ಮಿಬ್ಬರ ಮಧ್ಯೆ ಒಳ್ಳೆಯ ಪರಿಚಯ ಇದೆ. ನಮ್ಮಿಬ್ಬರ ಮಧ್ಯೆ ಒಳ್ಳೆಯ ಒಡನಾಟ ಇದ್ದಿದ್ದರಿಂದ ಆ ಕೆಮಿಸ್ಟ್ರಿ ತರೋಕೆ ಸುಲಭ ಆಯ್ತು’ ಎನ್ನುತ್ತಾರೆ ನಮ್ರತಾ.
ಧಾರಾವಾಹಿ ಇಷ್ಟ ಆಗೋಕೆ ಒಂದು ಕಾರಣ..
ಈ ಧಾರಾವಾಹಿಯಲ್ಲಿ ನಿತ್ಯಾ ಹೆಸರಿನ ಕ್ಯಾರೆಕ್ಟರ್ ನೋಡಿ ನಮ್ರತಾ ನಿಜಕ್ಕೂ ಖುಷಿಪಟ್ಟರಂತೆ. ‘ನಾನು ನಿಜ ಜೀವನದಲ್ಲಿ ತುಂಬಾನೇ ಪ್ರ್ಯಾಕ್ಟಿಕಲ್ ಆಗಿ ಆಲೋಚಿಸುತ್ತೇನೆ. ಭಾವನೆಗಳನ್ನು ತೋರಿಸಿಕೊಳ್ಳೋದಿಲ್ಲ. ಆ ಪಾತ್ರ ಕೂಡ ಹಾಗೆಯೇ ಇದೆ. ಕೆಲವು ಧಾರಾವಾಹಿಗಳಲ್ಲಿ ಕಥಾ ನಾಯಕಿ ಸ್ವಲ್ಪ ಅಳುಮುಂಜಿ ಆಗಿರುತ್ತಾಳೆ ಅಥವಾ ಸಾಫ್ಟ್ ಆಗಿರುತ್ತಾಳೆ. ಆದರೆ, ನಿತ್ಯಾ ಪಾತ್ರ ಇದಕ್ಕೆ ಸಂಪೂರ್ಣ ಭಿನ್ನವಾಗಿದೆ. ಈ ಕಾರಣಕ್ಕೆ ನನಗೆ ಪಾತ್ರ ಸಖತ್ ಇಷ್ಟ ಆಯ್ತು. ಹೀಗಾಗಿ ಧಾರಾವಾಹಿ ಒಪ್ಪಿಕೊಂಡೆ’ ಎನ್ನುತ್ತಾರೆ ಅವರು.
ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ.
Published On - 12:28 pm, Tue, 8 July 25
