22ರ ಪ್ರಾಯದ ಯುವತಿಗೆ ಲೈಂಗಿಕ ಕಿರುಕುಳ ನೀಡಿದ ಆರೋಪದಲ್ಲಿ ಕಿರುತೆರೆ ನಟನ ಬಂಧನ

‘ಕಸೌಟಿ ಜಿಂದಗಿ ಕೆ’ ಸೀರಿಯಲ್​ ಮೂಲಕ ಸಖತ್​ ಜನಪ್ರಿಯತೆ ಪಡೆದುಕೊಂಡಿದ್ದ ನಟ ಪ್ರಾಚೀನ್​ ಚೌಹಾಣ್​​ ಮೇಲೆ ಗಂಭೀರ ಆರೋಪ ಕೇಳಿಬಂದಿದೆ. 22ರ ಪ್ರಾಯದ ಯುವತಿಗೆ ಪ್ರಾಚೀನ್​ ಅವರು ಲೈಂಗಿಕ ಕಿರುಕುಳ ನೀಡಿದ್ದಾರೆ ಎಂದು ದೂರು ದಾಖಲಾಗಿದೆ. ಯುವತಿ ನೀಡಿದ ದೂರು ಆಧರಿಸಿ, ಅವರನ್ನು ಮುಂಬೈ ಪೊಲೀಸರು ಬಂಧಿಸಿದ್ದಾರೆ. ಹಿಂದಿ ಕಿರುತೆರೆಯ ಹಲವಾರು ಧಾರಾವಾಹಿಗಳಲ್ಲಿ ನಟಿಸಿರುವ ಪ್ರಾಚೀನ್​ ಅವರಿಗೆ ದೊಡ್ಡ ಅಭಿಮಾನಿ ಬಳಗ ಇದೆ. ಆದರೆ ಈಗ ಅವರ ಮೇಲೆ ಇಂಥ ಗಂಭೀರ ಆರೋಪ ಹೊರಿಸಲಾಗಿದ್ದು, ಫ್ಯಾನ್ಸ್​ಗೆ ಬೇಸರ ಆಗಿದೆ.

ಸ್ಟಾರ್​ ಪ್ಲಸ್​ ವಾಹಿನಿಯ ಜನಪ್ರಿಯ ಧಾರಾವಾಹಿ ‘ಕಸೌಟಿ ಜಿಂದಗಿ ಕೆ’ ಮೂಲಕ ಪ್ರಾಚೀನ್ ಅವರು ನಟನೆಗೆ ಕಾಲಿಟ್ಟರು. ಬಳಿಕ ಅನೇಕ ಅವಕಾಶಗಳು ಅವರನ್ನು ಅರಸಿಕೊಂಡು ಬಂದವು. 15ಕ್ಕೂ ಅಧಿಕ ಸೀರಿಯಲ್​ಗಳಲ್ಲಿ ಅವರು ಕಾಣಿಸಿಕೊಂಡಿದ್ದಾರೆ. ಇತ್ತೀಚಿನ ದಿನಗಳಲ್ಲಿ ವೆಬ್​ ಸಿರೀಸ್​ ಮೂಲಕವೂ ಅವರು ಫೇಮಸ್​ ಆಗಿದ್ದಾರೆ. ಈ ನಡುವೆ ಅವರು ಲೈಂಗಿಕ ಕಿರುಕುಳದ ಆರೋಪದಲ್ಲಿ ಬಂಧನಕ್ಕೆ ಒಳಗಾದ ಸುದ್ದಿಯಿಂದ ಕಿರುತೆರೆ ಲೋಕಕ್ಕೆ ಕಳಂಕ ಅಂಟಿದಂತಾಗಿದೆ.

ತನ್ನನ್ನು ಪ್ರಾಚೀನ್​ ಅವರು ಅಸಭ್ಯವಾಗಿ ಮುಟ್ಟಿದ್ದಾರೆ ಎಂದು ಸಂತ್ರಸ್ತ ಯುವತಿಯು ಪೊಲೀಸರ ಎದುರು ಹೇಳಿಕೆ ನೀಡಿದ್ದಾರೆ. ಪ್ರಾಚೀನ್​ರ ಮನೆಗೆ ತೆರಳಿದ ಮುಂಬೈ ಪೊಲೀಸರು ಅವರನ್ನು ಬಂಧಿಸಿದ್ದಾರೆ ಎಂದು ವರದಿ ಆಗಿದೆ. ಹೆಚ್ಚಿನ ಮಾಹಿತಿಗಾಗಿ ನಿರೀಕ್ಷಿಸಲಾಗುತ್ತಿದೆ. ಹಿಂದಿ ಕಿರುತೆರೆಯಿಂದ ಇಂಥ ಸುದ್ದಿಗಳು ಪದೇಪದೆ ಕೇಳಿಬರುತ್ತಿರುವುದು ವಿಪರ್ಯಾಸ.

ಕೆಲವೇ ದಿನಗಳ ಹಿಂದೆ ಜನಪ್ರಿಯ ನಟ ಪರ್ಲ್​ ವಿ. ಪುರಿ ಅವರನ್ನು ಪೊಲೀಸರು ಬಂಧಿಸಿದ್ದರು. ಅಪ್ರಾಪ್ತ ಬಾಲಕಿ ಮೇಲೆ ಅತ್ಯಾಚಾರ ಎಸಗಿದ ಆರೋಪವನ್ನು ಅವರ ಮೇಲೆ ಹೊರಿಸಲಾಗಿತ್ತು. ಸೀರಿಯಲ್​ನಲ್ಲಿ ನಟಿಸಲು ಅವಕಾಶ ಕೊಡಿಸುವುದಾಗಿ ಹೇಳಿ ಬಾಲಕಿಯನ್ನು ಅವರು ಲೈಂಗಿಕವಾಗಿ ಬಳಸಿಕೊಂಡಿದ್ದಾರೆ ಎನ್ನಲಾಗಿತ್ತು. ಆದರೆ ನಂತರ ಬಾಲಕಿ ಕುಟುಂಬದವರೇ ಆ ಆರೋಪವನ್ನು ತಳ್ಳಿಹಾಕಿದರು. ಇತ್ತೀಚೆಗೆ ಜಾಮೀನಿನ ಮೇಲೆ ಹೊರಬಂದ ಪರ್ಲ್​ ವಿ. ಪುರಿ ಅವರು ಸತ್ಯಕ್ಕೆ ಜಯ ಸಿಗಲಿದೆ ಎಂದು ಸೋಶಿಯಲ್​ ಮೀಡಿಯಾದಲ್ಲಿ ಪೋಸ್ಟ್​ ಹಾಕಿದ್ದರು.

ಕಿರುತೆರೆ ನಟ ಪರ್ಲ್​ ವಿ. ಪುರಿ ಪ್ರಕರಣ ಬಗೆಹರಿಯುವುದಕ್ಕೂ ಮುನ್ನವೇ ಪ್ರಾಚೀನ್​ ಚೌಹಾಣ್​ ಮೇಲೆ ಆರೋಪ ಕೇಳಿಬಂದಿದೆ. ಇದು ಅವರ ವೃತ್ತಿಜೀವನದ ಮೇಲೆ ದೊಡ್ಡ ಪರಿಣಾಮ ಬೀರುವ ಸಾಧ್ಯತೆ ಇದೆ.

ಇದನ್ನೂ ಓದಿ:

ರೇಪ್​ ಆರೋಪ, ತಂದೆ ಸಾವು, ತಾಯಿಗೆ ಕ್ಯಾನ್ಸರ್​, ಜೈಲು ವಾಸ; ಒಂದೇ ತಿಂಗಳಲ್ಲಿ ನಟನ ಬದುಕು ಛಿದ್ರ

Pearl V Puri: ಅಪ್ರಾಪ್ತೆ ಮೇಲೆ ಅತ್ಯಾಚಾರ ಪ್ರಕರಣ; ಕಿರುತೆರೆ ನಟ ಪರ್ಲ್​ ವಿ. ಪುರಿಗೆ ಸಿಕ್ತು ರಿಲೀಫ್​