ಸಿನಿಮಾ ವೇದಿಕೆಯಲ್ಲಿ ರಾಜಕೀಯ ಸದ್ದು; ‘ಟಿವಿಕೆ’ ಜಪಕ್ಕೆ ಪ್ರತಿಕ್ರಿಯಿಸಿದ ಜೇಸನ್ ಸಂಜಯ್

ತಮಿಳು ನಟ ಹಾಗೂ ಅಲ್ಲಿನ ಸಿಎಂ ದಳಪತಿ ವಿಜಯ್ ಅವರ ಪುತ್ರ ಜೇಸನ್ ಸಂಜಯ್ ಸಾರ್ವಜನಿಕ ವೇದಿಕೆಯಲ್ಲಿ ಅಪರೂಪದ ಕ್ಷಣಕ್ಕೆ ಸಾಕ್ಷಿಯಾಗಿದ್ದಾರೆ. ಅವರು ನಿರ್ದೇಶಿಸುತ್ತಿರುವ ‘ಸಿಗ್ಮಾ’ ಸಿನಿಮಾದ ಪ್ರೀ-ರಿಲೀಸ್ ಈವೆಂಟ್‌ ಸೇಲಂನಲ್ಲಿ ಮಂಗಳವಾರ ನಡೆಯಿತು. ಈ ವೇಳೆ ಪ್ರೇಕ್ಷಕರು ಹಠಾತ್ತನೆ ವಿಜಯ್ ಅವರ ‘ಟಿವಿಕೆ’ ಪಕ್ಷದ ಪರವಾಗಿ ಘೋಷಣೆ ಕೂಗಲು ಪ್ರಾರಂಭಿಸಿದರು. ಈ ಘಟನೆ ಕಾರ್ಯಕ್ರಮದಲ್ಲಿದ್ದ ಎಲ್ಲರ ಗಮನ ಸೆಳೆಯಿತು.

ವೇದಿಕೆಯಲ್ಲಿ ಜೇಸನ್ ತಮ್ಮ ಚೊಚ್ಚಲ ಚಿತ್ರದ ಬಗ್ಗೆ ಮಾತನಾಡುತ್ತಿದ್ದರು. ಚಿತ್ರತಂಡ ಹಾಗೂ ತಮ್ಮ ಕುಟುಂಬಕ್ಕೆ ಅವರು ಧನ್ಯವಾದ ತಿಳಿಸಿದರು. ‘ಸೇಲಂ ನನಗೆ ಸಾಲು ಸಾಲು ಸಿಹಿ ನೆನಪುಗಳನ್ನು ನೀಡಿದೆ. ಬೆಂಬಲಿಸಿದ ಪ್ರತಿಯೊಬ್ಬರಿಗೂ ನನ್ನ ಕೃತಜ್ಞತೆಗಳು’ ಎಂದು ಅವರು ಹೇಳಿದರು. ಈ ಮಾತುಗಳು ಕೇಳುತ್ತಿದ್ದಂತೆ ಸಭಿಕರ ಗದ್ದಲ ಮತ್ತು ಹರ್ಷೋದ್ಗಾರ ಮುಗಿಲುಮುಟ್ಟಿತ್ತು.

ಜನರ ಕೂಗಾಟದ ನಡುವೆ ಜೇಸನ್ ಮಾತು ನಿಲ್ಲಿಸಿದರು. ಸಭಿಕರತ್ತ ನೋಡಿ ನಗುತ್ತಾ ತಲೆಯಾಡಿಸಿದರು. ಆಗ ನೆರೆದಿದ್ದ ಜನ ‘ಟಿವಿಕೆ’ ‘ಟಿವಿಕೆ’ ಎಂದು ಗಟ್ಟಿಯಾಗಿ ಘೋಷಣೆ ಕೂಗಲು ಶುರು ಮಾಡಿದರು. ಜೇಸನ್ ನಗುಮುಖದಿಂದಲೇ ‘ಥಂಬ್ಸ್ ಅಪ್’ ಸೈನ್ ತೋರಿಸಿ ಕೃತಜ್ಞತೆ ಸಲ್ಲಿಸಿದರು. ಬಳಿಕ ವಾತಾವರಣ ಶಾಂತವಾದಾಗ ಅವರು ತಮ್ಮ ಮಾತನ್ನು ಮುಂದುವರಿಸಿದರು.

When #JasonSanjay said “A special thanks to my Family”

~ The Entire Crowd road of CM Vijay 🥵🔥 pic.twitter.com/1nFlxRMAuY

— AmuthaBharathi (@CinemaWithAB) September 8, 2026

ಇತ್ತೀಚೆಗೆ ವಿಜಯ್ ಹಾಗೂ ಅವರ ಮಗ ಜೇಸನ್ ನಡುವೆ ಭಿನ್ನಾಭಿಪ್ರಾಯವಿದೆ ಎಂಬ ವದಂತಿಗಳು ಹರಡಿದ್ದವು. ಇನ್‌ಸ್ಟಾಗ್ರಾಮ್‌ನಲ್ಲಿ ತಂದೆಯನ್ನು ಅನ್‌ಫಾಲೋ ಮಾಡಿದ್ದು ಮತ್ತು ಹೆಸರಿನಿಂದ ‘ವಿ’ ಅಕ್ಷರ ತೆಗೆದುಹಾಕಿದ್ದು ಚರ್ಚೆಯಾಗಿತ್ತು. ಆದರೆ ಈ ಯಾವುದೇ ವದಂತಿಗಳಿಗೆ ಇಬ್ಬರೂ ಇದುವರೆಗೆ ಪ್ರತಿಕ್ರಿಯೆ ನೀಡಿಲ್ಲ. ಈ ನಡುವೆ ಕಾರ್ಯಕ್ರಮದಲ್ಲಿ ಟಿವಿಕೆ ಘೋಷಣೆ ಕೂಗಿರುವುದು ಗಮನಾರ್ಹವಾಗಿದೆ.

ಇದನ್ನೂ ಓದಿ: ತಾಯಿ ಸಂಗೀತಾ ಹಾಗೂ ತಂದೆ ವಿಜಯ್ ಸಂಬಂಧದ ಬಗ್ಗೆ ಜೇಸನ್ ಸಂಜಯ್ ಮಾತು

‘ಸಿಗ್ಮಾ’ ಸಿನಿಮಾ ಮೂಲಕ ಜೇಸನ್ ಸಂಜಯ್ ನಿರ್ದೇಶಕರಾಗಿ ಚಿತ್ರರಂಗಕ್ಕೆ ಪದಾರ್ಪಣೆ ಮಾಡುತ್ತಿದ್ದಾರೆ. ಇದೊಂದು ಆ್ಯಕ್ಷನ್, ಕಾಮಿಡಿ ಮತ್ತು ಟ್ರೆಷರ್ ಹಂಟ್ ಕಥಾಹಂದರ ಹೊಂದಿರುವ ಸಿನಿಮಾವಾಗಿದೆ. ಸಿನಿಮಾ ಯಶಸ್ವಿಗೊಳಿಸುವುದೇ ನನ್ನ ಮೊದಲ ಆದ್ಯತೆ ಎಂದು ಅವರು ಸ್ಪಷ್ಟಪಡಿಸಿದ್ದಾರೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.