ಮಹೇಶ್ ಬಾಬು-ರಾಜಮೌಳಿ ಸಿನಿಮಾದ ಬಜೆಟ್ ಎಷ್ಟು ಗೊತ್ತೆ?

‘ಆರ್​ಆರ್​ಆರ್’ (RRR) ಸಿನಿಮಾಕ್ಕೆ ಹಾಲಿವುಡ್​ನಲ್ಲಿ ದೊರಕಿರುವ ಅಭೂತಪೂರ್ವ ಜನಪ್ರಿಯತೆ ರಾಜಮೌಳಿಯವರನ್ನು (Rajamouli) ಅಂತರಾಷ್ಟ್ರೀಯ ಶ್ರೇಣಿಯ ನಿರ್ದೇಶಕರನ್ನಾಗಿ ಮಾಡಿದೆ. ‘ಆರ್​ಆರ್​ಆರ್’ ಸಿನಿಮಾದ ಬಳಿಕ ರಾಜಮೌಳಿ ಇನ್ನೇನು ಮಾಡಲಿದ್ದಾರೆ ಎಂಬ ಕುತೂಹಲ ಭಾರತದಲ್ಲಿ ಮಾತ್ರವಲ್ಲ ವಿದೇಶದಲ್ಲೂ ಗರಿಗೆದರಿದೆ. ‘ಆರ್​ಆರ್​ಆರ್’ ಸಿನಿಮಾದ ಬಿಡುಗಡೆ ಮುನ್ನವೇ ರಾಜಮೌಳಿ, ತಾವು ಮಹೇಶ್ ಬಾಬು ಜೊತೆ ಮುಂದಿನ ಸಿನಿಮಾ ಮಾಡುತ್ತಿರುವುದಾಗಿ ಘೋಷಣೆ ಮಾಡಿದ್ದರು. ಆ ಸಿನಿಮಾದ ಪ್ರೀ ಪ್ರೊಡಕ್ಷನ್ ಕಾರ್ಯದಲ್ಲಿ ನಿರತರಾಗಿದ್ದಾರೆ ರಾಜಮೌಳಿ. ಅಂದಹಾಗೆ ಈ ಸಿನಿಮಾದ ಬಜೆಟ್ ದಾಖಲೆಯನ್ನೇ ನಿರ್ಮಿಸಲಿದೆ.

‘ಆರ್​ಆರ್​ಆರ್’ ಸಿನಿಮಾಕ್ಕೆ ದೊರೆತ ಅಭೂತಪೂರ್ವ ಯಶಸ್ಸು, ಜನಮನ್ನಣೆಯ ಬಳಿಕ ರಾಜಮೌಳಿ, ತಮ್ಮ ಮುಂದಿನ ಸಿನಿಮಾದ ಯೋಜನೆಗಳನ್ನು ‘ಸ್ಕೇಲ್ ಅಪ್’ ಮಾಡಿದ್ದಾರೆ. ಈ ಮೊದಲು ಯೋಜಿಸಿದ್ದ ಬಜೆಟ್​ ಮೂರು ಪಟ್ಟು ಹೆಚ್ಚಾಗಿದೆ ಎನ್ನಲಾಗುತ್ತಿದ್ದು, ಸಿನಿಮಾದ ಕತೆಯಲ್ಲಿಯೂ ಕೆಲ ಬದಲಾವಣೆಗಳನ್ನು ಮಾಡಲಾಗಿದೆ. ಭಾರತೀಯ ಪ್ರೇಕ್ಷಕರ ಜೊತೆಗೆ ಅಂತರಾಷ್ಟ್ರೀಯ ಪ್ರೇಕ್ಷಕರನ್ನೂ ಸಹ ಗಮನದಲ್ಲಿರಿಸಿಕೊಂಡು ಕತೆಯನ್ನು ಬದಲಾಯಿಸಲಾಗಿದ್ದು, ಮೇಕಿಂಗ್ ಸಹ ಹಾಲಿವುಡ್ ಸಿನಿಮಾ ರೇಂಜ್​ಗೆ ಇರಲಿದೆ.

ಮಹೇಶ್ ಬಾಬು-ರಾಜಮೌಳಿಯ ಮುಂದಿನ ಸಿನಿಮಾ ಸಾಹಸಮಯ ಯಾತ್ರೆಯ ಕತೆಯನ್ನು ಒಳಗೊಂಡಿರಲಿದೆ. ಹಾಲಿವುಡ್​ನ ‘ಇಂಡಿಯಾನಾ ಜೋನ್ಸ್’ ಸಿನಿಮಾಗಳಿಂದ ಪ್ರೇರೇಪಿತವಾಗಿದ್ದು, ಅರಣ್ಯದೊಳಗೆ ನಡೆವ ಸಾಹಸಮಯ ಯಾತ್ರೆಯ ಕತೆಯನ್ನು ಒಳಗೊಂಡಿರಲಿದೆ. ಸಿನಿಮಾದ ಚಿತ್ರೀಕರಣವನ್ನು ಅಮೆಜಾನ್ ಕಾಡುಗಳಲ್ಲಿ ಮಾಡಲು ರಾಜಮೌಳಿ ನಿಶ್ಚಯಿಸಿದ್ದಾರೆ. ಸಿನಿಮಾದ ಗ್ರಾಫಿಕ್ಸ್, ಸಿಜಿಐ, ಎಡಿಟಿಂಗ್ ಇನ್ನಿತರೆಗಳಿಗೆ ಹಾಲಿವುಡ್​ನ ನುರಿತ ತಂತ್ರಜ್ಞರ ಸಹಾಯವನ್ನು ಪಡೆಯಲಿದ್ದು, ಹಾಲಿವುಡ್​ನ ಜನಪ್ರಿಯ ಸ್ಟುಡಿಯೋ ಜೊತೆಗೆ ಒಪ್ಪಂದವನ್ನೂ ಮಾಡಿಕೊಂಡಿದ್ದಾರೆ.

ಇದನ್ನೂ ಓದಿ:ಬೆಂಗಳೂರು ಅಥವಾ ಹೈದರಾಬಾದ್: ‘ಸಲಾರ್’ ಎಲ್ಲಿ ನೋಡ್ತಾರೆ ರಾಜಮೌಳಿ? ಗೊಂದಲಕ್ಕೆ ಕಾರಣವೇನು?

ಮಹೇಶ್ ಬಾಬು-ರಾಜಮೌಳಿಯ ಸಿನಿಮಾದ ಬಜೆಟ್ ಸುಮಾರು 800 ಕೋಟಿ ಎಂದು ಯೋಜಿಸಲಾಗಿದೆ. ಸಿನಿಮಾದ ಚಿತ್ರೀಕರಣ ಪ್ರಾರಂಭವಾದ ಬಳಿಕ ಈ ಬಜೆಟ್​ ಇನ್ನಷ್ಟು ಹೆಚ್ವಾಗುವ ಸಾಧ್ಯತೆಯೂ ಇದೆ. ಸಿನಿಮಾದ ಪ್ರೀ ಪ್ರೊಡಕ್ಷನ್​ನಲ್ಲಿಯೇ ನೂರು ಕೋಟಿಯಷ್ಟು ಹಣ ಖರ್ಚಾಗಲಿದೆ ಎಂಬ ಮಾತುಗಳು ಸಹ ಕೇಳಿಬಂದಿವೆ. ಭಾರತದಲ್ಲಿ ಇಷ್ಟು ದೊಡ್ಡ ಮೊತ್ತವನ್ನು ಸಿನಿಮಾಕ್ಕಾಗಿ ಖರ್ಚು ಮಾಡಿದ ಉದಾಹರಣೆ ಇಲ್ಲ. ಆ ಮೂಲಕ ಭಾರತದ ಅತಿ ದೊಡ್ಡ ಬಜೆಟ್​ನ ಸಿನಿಮಾ ಎಂಬ ಖ್ಯಾತಿಗೆ ಈ ಸಿನಿಮಾ ಪಾತ್ರವಾಗಲಿದೆ.

ಮಹೇಶ್ ಬಾಬು ಪ್ರಸ್ತುತ ‘ಗುಂಟೂರು ಖಾರಂ’ ಸಿನಿಮಾದ ಪೋಸ್ಟ್ ಪ್ರೊಡಕ್ಷನ್​ನಲ್ಲಿ ಬ್ಯುಸಿಯಾಗಿದ್ದಾರೆ. ಈ ಸಿನಿಮಾ ಇದೇ ಸಂಕ್ರಾಂತಿಗೆ ಬಿಡುಗಡೆ ಆಗಲಿದೆ. ‘ಗುಂಟೂರು ಖಾರಂ’ ಸಿನಿಮಾದ ಚಿತ್ರೀಕರಣದ ಸಮಯದಲ್ಲಿಯೇ ರಾಜಮೌಳಿ ಜೊತೆಗಿನ ಸಿನಿಮಾಕ್ಕೆ ತಯಾರಿ ಆರಂಭಿಸಿದ್ದರು ಮಹೇಶ್ ಬಾಬು. ರಾಜಮೌಳಿ-ಮಹೇಶ್ ಬಾಬು ಸಿನಿಮಾ 2024ರ ಮಾರ್ಚ್ ಅಥವಾ ಏಪ್ರಿಲ್ ತಿಂಗಳಲ್ಲಿ ಚಿತ್ರೀಕರಣ ಪ್ರಾರಂಭವಾಗುವ ನಿರೀಕ್ಷೆ ಇದೆ.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ