ಹೊಸ ‘ಬ್ಲಾಕ್ ಪ್ಯಾಂಥರ್’ ಹುಡುಕಿದ ಮಾರ್ವೆಲ್, ಯಾರು ಈ ಡೇವಿಡ್?

‘ಐರನ್ ಮ್ಯಾನ್’, ‘ಸೂಪರ್ ಮ್ಯಾನ್’, ‘ಸ್ಪೈಡರ್ ಮ್ಯಾನ್’, ‘ಥಾರ್’, ‘ಬ್ಲಾಕ್ ವಿಡೊ’, ‘ಡಾಕ್ಟರ್ ಸ್ಟ್ರೇಂಜ್’ ರೀತಿ ‘ಬ್ಲಾಕ್ ಪ್ಯಾಂಥರ್’ ಸಹ ಬಲು ಜನಪ್ರಿಯ ಸೂಪರ್ ಹೀರೋ. ಮಾರ್ವೆಲ್​​ನ (Marvel) ಈ ಸೂಪರ್ ಹೀರೋ, ‘ಅವೇಂಜರ್ಸ್’ ತಂಡದಲ್ಲಿಯೂ ಇದ್ದಾನೆ. ‘ಬ್ಲಾಕ್ ಪ್ಯಾಂಥರ್’ ಮೊದಲು ಬಿಡುಗಡೆ ಆದಾಗ ಚಾಡ್ವಿಕ್ ಬೋಸ್ಮನ್, ‘ಬ್ಲಾಕ್ ಪ್ಯಾಂಥರ್’ ಆಗಿ ನಟಿಸಿದ್ದರು. ಅವರ ಪಾತ್ರ ಭಾರಿ ದೊಡ್ಡ ಹಿಟ್ ಆಯ್ತು. ‘ಬ್ಲಾಕ್ ಪ್ಯಾಂಥರ್’ಗೆ ಜನಪ್ರಿಯತೆ ತಂದುಕೊಡುವಲ್ಲಿ ಅವರ ಪಾತ್ರ ಮಹತ್ವದ್ದಾಗಿತ್ತು. ಆದರೆ 2020ರಲ್ಲಿ ಅವರು ಕ್ಯಾನ್ಸರ್​​ನಿಂದಾಗಿ ನಿಧನ ಹೊಂದಿದರು. ಈಗ ಅವರ ನಿಧನದ ಆರು ವರ್ಷಗಳ ಬಳಿಕ ಮಾರ್ವೆಲ್ ಹೊಸ ‘ಬ್ಲಾಕ್ ಪ್ಯಾಂಥರ್’ ಅನ್ನು ಹುಡುಕಿದೆ.

ಬ್ರಿಟಿಷ್ ನಟ ಡೇವಿಡ್ ಜಾನ್ಸನ್ ಇನ್ನು ಮುಂದಿನ ಸಿನಿಮಾಗಳಲ್ಲಿ ‘ಬ್ಲಾಕ್ ಪ್ಯಾಂಥರ್’ ಆಗಿ ನಟಿಸಲಿದ್ದಾರೆ. ಸ್ಯಾನ್ ಡಿಯಾಗೋ ಕಾಮಿಕ್ ಕಾನ್‌ನಲ್ಲಿ ಹೊಸ ಬ್ಲ್ಯಾಕ್ ಪ್ಯಾಂಥರ್ ಆಗಿ ಡೇವಿನ್ ಜಾನ್ಸನ್ ಅವರನ್ನು ಪರಿಚಯಿಸಲಾಯ್ತು. ಈ ಪಾತ್ರವು ಅವರ ವೃತ್ತಿಜೀವನದ ಇದುವರೆಗಿನ ಅತ್ಯುನ್ನತ ಮೈಲಿಗಲ್ಲು ಎಂದು ಗುರುತಿಸಲ್ಪಟ್ಟಿದೆ. ಜೊನ್ಸನ್ ಅವರು ಈ ಹಿಂದೆ ಟೆಲಿವಿಷನ್, ರಂಗಭೂಮಿ ಮತ್ತು ಚಲನಚಿತ್ರಗಳಲ್ಲಿ ತಮ್ಮ ನಟನೆ ಮಾಡಿದ್ದಾರೆ. ಆದರೆ ಬ್ಲಾಕ್ ಪ್ಯಾಂಥರ್ ಅವರ ಈ ವರೆಗಿನ ಅತ್ಯುತ್ತಮ ಅವಕಾಶ.

ಇಂಗ್ಲೆಂಡ್‌ನ ಲಂಡನ್‌ನಲ್ಲಿ ಜನಿಸಿದ ಜೊನ್ಸನ್, ಆರಂಭದಲ್ಲೇ ನಟನೆಯಲ್ಲಿ ಒಲವು ಬೆಳೆಸಿಕೊಂಡರು ಮತ್ತು ವಿಶ್ವದ ಅತ್ಯಂತ ಪ್ರತಿಷ್ಠಿತ ನಾಟಕ ಶಾಲೆಗಳಲ್ಲಿ ಒಂದಾದ ರಾಯಲ್ ಅಕಾಡೆಮಿ ಆಫ್ ಡ್ರಾಮಾಟಿಕ್ ಆರ್ಟ್‌ನಲ್ಲಿ (RADA) ಅಧ್ಯಯನ ಮಾಡಿದರು. ಈ ಸಂಸ್ಥೆಯು ಆಂಥೋನಿ ಹಾಪ್ಕಿನ್ಸ್, ಟಾಮ್ ಹಿಡ್ಲ್‌ಸ್ಟನ್, ಸಿಂಥಿಯಾ ಎರಿವೋ, ಕೆನ್ನೆತ್ ಬ್ರಾನಾಗ್, ರಾಲ್ಫ್ ಫೈನ್ಸ್ ಮುಂತಾದ ಹಲವಾರು ಹೆಸರಾಂತ ಬ್ರಿಟಿಷ್ ನಟರನ್ನು ಚಿತ್ರರಂಗಕ್ಕೆ ನೀಡಿದೆ. ಅದೇ ಸಂಸ್ಥೆಯಲ್ಲಿ ನಟನೆ ಕಲಿತ ಡೇವಿಡ್ ಜಾನ್ಸನ್, ಟಿವಿ ಮತ್ತು ರಂಗಭೂಮಿಯಲ್ಲಿ ನಟನೆ ಮೂಲಕ ಛಾಪು ಮೂಡಿಸಿದ್ದಾರೆ.

ಇದನ್ನೂ ಓದಿ:ವಿಶ್ವದ ಟಾಪ್ ಸಿನಿಮಾ ನಿರ್ದೇಶಕನಿಗೆ ಭಾರತದ ಈ ನಿರ್ದೇಶಕ ಅಚ್ಚು-ಮೆಚ್ಚು

‘ಇಂಡಸ್ಟ್ರಿ’ ನಾಟಕದಲ್ಲಿ ಗಸ್ ಸ್ಯಾಕಿ ಪಾತ್ರವನ್ನು ನಿರ್ವಹಿಸುವ ಮೂಲಕ ಜೊನ್ಸನ್ ಮೊದಲು ಗಮನ ಸೆಳೆದರು. 2023ರ ಪ್ರಣಯ ಹಾಸ್ಯ ಚಿತ್ರ ‘ರೈ ಲೇನ್’ ಮೂಲಕ ಅವರು ತಮ್ಮ ಖ್ಯಾತಿಯನ್ನು ಮತ್ತಷ್ಟು ಗಟ್ಟಿಗೊಳಿಸಿದರು. ನಂತರ ಈ ನಟ ‘ಏಲಿಯನ್: ರೋಮುಲಸ್’ ಚಿತ್ರದಲ್ಲಿ ಕಾಣಿಸಿಕೊಂಡರು. ಈಗ ಹಲವು ಹಂತದ ಆಡಿಷನ್, ಪರೀಕ್ಷೆಗಳನ್ನು ದಾಟಿ ಪ್ರತಿಷ್ಠಿತ ‘ಬ್ಲಾಕ್ ಪ್ಯಾಂಥರ್’ ಪಾತ್ರ ತಮ್ಮದಾಗಿಸಿಕೊಂಡಿದ್ದಾರೆ.

ಚಾಡ್ವಿಕ್ ಬೋಸ್​​ಮನ್ ನಿಧನದ ಬಳಿಕ 2022 ರಲ್ಲಿ ಒಂದು ‘ಬ್ಲಾಕ್ ಪ್ಯಾಂಥರ್’ ಸಿನಿಮಾ ಬಂದಿತಾದರೂ ಸಿನಿಮಾನಲ್ಲಿ ಬ್ಲಾಕ್ ಪ್ಯಾಂಥರ್​ನ ತಂಗಿ ಅಣ್ಣನ ಜವಾಬ್ದಾರಿ ನಿರ್ವಹಿಸುವ ಕತೆ ಹೇಳಲಾಗಿತ್ತು. ಈಗ ಕೊನೆಗೂ ಹೊಸ ಬ್ಲಾಕ್ ಪ್ಯಾಂಥರ್ ಅನ್ನು ಮಾರ್ವೆಲ್ ಹುಡುಕಿದ್ದು, ಹೊಸ ನಟನೊಟ್ಟಿಗೆ, ಹೊಸ ‘ಬ್ಲಾಕ್ ಪ್ಯಾಂಥರ್’ ಸಿನಿಮಾ 2029ಕ್ಕೆ ಬಿಡುಗಡೆ ಆಗಲಿದೆಯಂತೆ.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ

Published On - 11:30 am, Wed, 29 July 26