Art Of Yoga: ಆಜ್ಞ ಚಕ್ರ ಸೇರಿ ಮನುಷ್ಯನ ದೇಹದಲ್ಲಿರುವ ಇತರೆ 4 ಚಕ್ರಗಳ ಬಗ್ಗೆ ನೀವು ತಿಳಿದಿರದ ಮಾಹಿತಿ ಇಲ್ಲಿದೆ

ಚಕ್ರ(Chakra) ಎಂದರೆ ಉಂಗುರದಂತೆ ಸುತ್ತಿರುವ ಎಂದರ್ಥ ಈ ಚಕ್ರಗಳು ಚೈತನ್ಯವಾಹನಕಗಳಾಗಿರುತ್ತವೆ, ನಮ್ಮ ದೇಹದಲ್ಲಿರುವ ಚಕ್ರಗಳು ಪ್ರಕೃತಿಯಲ್ಲಿನ ತರಂಗ ಭಾವನೆಗಳನ್ನು ಸಂಗ್ರಹಿಸಿ ದೇಹದ ನಾಡಿ, ಧಮನಿ, ಹಾಗೂ ಮೆದುಳಿಗೆ ತಲುಪಿಸುತ್ತದೆ. ಮನುಷ್ಯನ ಬೆನ್ನುಹುರಿಯ ಕೆಳಭಾಗದಿಂದ ಶಿರೋಭಾಗದವರೆಗೆ ಶಕ್ತಿ ಅಂತರ್ಗತವಾಗಿರುತ್ತದೆ. ಬೆನ್ನುಹುರಿಯಲ್ಲಿ ಇಡಾ, ಪಿಂಗಳಾ ಹಾಗೂ ಸುಷುಮ್ನಾ ಎಂಬುವ ನಾಡಿಗಳಿವೆ ಇದೇ ಬೆನ್ನುಹುರಿಯಲ್ಲಿ ಏಳು ಶಕ್ತಿ ಕೇಂದ್ರಗಳನ್ನು ಚಕ್ರಗಳು ಎನ್ನುತ್ತಾರೆ. ಚಕ್ರಗಳು ಯಾವಾಗಲೂ ನಮ್ಮೊಳಗೆ ತಿರುಗುತ್ತಲೇ ಇದ್ದು, ಇದರಿಂದ ಶಕ್ತಿ ಸಂಚಯಿಸುತ್ತದೆ.

ಸಹಸ್ರಾರ ಚಕ್ರ

ತತ್ವ: ಚೈತನ್ಯ

ಬಣ್ಣ: ಬಿಳಿ ಅಥವಾ ನೇರಳೆ

ಮಂತ್ರ: ಮೌನ

ಸ್ಥಳ: ತಲೆಯ ಮೇಲ್ಭಾಗ

ಸಹಸ್ರಾರ ಚಕ್ರವೆಂದರೆ ಸಹಸ್ರ ದಳವನ್ನು ಹೊಂದಿರುವ ಕಮಲವೆಂದು ಅರ್ಥ, ಅಂತಸ್ಫುರಣೆಯಿಂದ ಕೂಡಿದ ತಿಳಿವಳಿಕೆಯ ಮೇಲೆ, ಅಧ್ಯಾತ್ಮದ ಜತೆ ಸಂಬಂಧದ ಮೇಲೆ, ಮನಸು-ದೇಹ-ಆತ್ಮದೊಡನೆ ಮತ್ತು ಪ್ರಜ್ಞಾಪೂರ್ವಕವಾದ ಅರಿವಿನೊಡನೆ ಸಂಬಂಧಪಟ್ಟಿದೆ. ಈ ಚಕ್ರವು ತಲೆಯ ಕೇಂದ್ರ ಭಾಗವನ್ನು, ಕಿವಿಗಳ ಮೇಲಿರುವ ಮಧ್ಯಭಾಗವನ್ನು, ಮೆದುಳನ್ನು, ನರವ್ಯವಸ್ಥೆಯನ್ನು, ಪೀನಿಯಲ್ ಗ್ರಂಥಿಯನ್ನು ಆಳುತ್ತದೆ. ಸಹಸ್ರಾರ ಚಕ್ರದ ಅಸಮತೋಲನದಿಂದ ದೀರ್ಘ ಕಾಲದ ದಣಿವು, ಬೆಳಕು ಹಾಗೂ ಶಬ್ದಗಳೊಂದಿಗೆ ಸೂಕ್ಷ್ಮತೆ ಉಂಟಾಗುತ್ತವೆ.

• ಅಸಮತೋಲನದಿಂದ ದೇಹ ಹಾಗೂ ಮನಸ್ಸಿನ ಮೇಲಾಗುವ ಪರಿಣಾಮ

ಗುರಿಯೇ ಇಲ್ಲದಇರುವುದು, ಗುರುತಿನ ಸಮಸ್ಯೆ, ಯಾವುದೇ ಅಧ್ಯಾತ್ಮಿಕ ಅಭ್ಯಾಸಗಳಲ್ಲಿ ಅಪನಂಬಿಕೆ, ಭಕ್ತಿಯ ಅಭಾವ , ಸ್ಫೂರ್ತಿಯ ಅಭಾವ, ಭಯ, ಜಗತ್ತಿನ ವಿಷಯಗಳಲ್ಲಿ ಅನುರಕ್ತಿ. ಇಂತವರ ಮನೆಯಲ್ಲಿ ತೀಕ್ಷ್ಣವಾದ ಲೈಟ್​ಗಳನ್ನು ಹಾಕಲು ಇಷ್ಟಪಡುವುದಿಲ್ಲ.

• ಸಹಸ್ರಾರ ಚಕ್ರದ ಸಮತೋಲನದ ಲಕ್ಷಣಗಳು: ಒಂದಾಗಿರುವ ಭಾವನೆ, ತೆರೆದ ಮನಸ್ಸು, ಬುದ್ಧಿವಂತಿಕೆ, ಆಲೋಚನಾ ಪೂರ್ವಕವಾಗಿ ಕಾರ್ಯಾಚರಣೆ, , ಇತರರು ಯೋಜನೆಗಳಿಗೆ, ಆಲೋಚನೆಗಳಿಗೆ ಸ್ಪಂದನೆ, ಸಾಮರಸ್ಯ ಮಯವಾದ ವ್ಯಕ್ತಿತ್ವ.ಈ ಚಕ್ರದ ಸಮತೋಲನವನ್ನುಂಟು ಮಾಡುವ ಆಸನಗಳು: ದೇಹಕ್ಕೆ ಅರಿವನ್ನು ತರುವಂತಹ ಸಮತೋಲನದ ಭಂಗಿಗಳು, ವೃಕ್ಷಾಸನ, ಯೋಗಮುದ್ರೆಯಲ್ಲಿ ಕುಳಿತುಕೊಳ್ಳುವುದು ಮತ್ತು ಧ್ಯಾನ.

ಮೂಲಾಧಾರ ಚಕ್ರ

ತತ್ವ: ಭೂಮಿ

ಬಣ್ಣ: ಕೆಂಪು

ಮಂತ್ರ : ಲಂ

ಸ್ಥಳ: ಜನನೇಂದ್ರಿಯ ಮತ್ತು ಗುದದ್ವಾರದ ನಡುವೆ, ಬೆನ್ನೆಲುಬಿನ ಮೂಲ

ಮೂಲಾಧಾರ ಚಕ್ರವು ಮೂಳೆ, ಹಲ್ಲು, ಉಗುರುಗಳ, ಗುದದ್ವಾರ, ಪ್ರಾಸ್ಟೇಟ್ ಗ್ರಂಥಿ, ಅಡ್ರಿನಲ್ ಗ್ರಂಥಿ, ಮೂತ್ರಪಿಂಡದ, ಜೀರ್ಣ ಪ್ರಕ್ರಿಯೆಯ ಕೆಳಹಂತದ ಕಾರ್ಯ, ವಿಸರ್ಜನೆ ಕ್ರಿಯೆ ಮೇಲೆ ಪರಿಣಾಮ ಬೀರುತ್ತದೆ.

• ದೇಹ ಹಾಗೂ ಮನಸ್ಸಿನ ಮೇಲಾಗುವ ಪರಿಣಾಮ: ದಣಿವು, ನಿದ್ರಾಹೀನತೆ, ಕೆಳಬೆನ್ನಿನ ನೋವು, ಸಯಾಟಿಕ, ಮಲಬದ್ಧತೆ, ರೋಗನಿರೋಧಕ ಖಾಯಿಲೆಗಳು, ಸ್ಥೂಲಕಾಯ, ಖಿನ್ನತೆ, ಮತ್ತು ತಿನ್ನುವ ಖಾಯಿಲೆಗಳು ಉಂಟಾಗುತ್ತವೆ. ಒಬೆಸಿಟಿ ಇರುವವರಿಗೆ ಏನೇ ಮಾಡಿದರೂ ತೂಕ ಇಳಿಕೆಯಾಗುತ್ತಿಲ್ಲ ಎಂದಾದರೆ ಮೂಲಾಧಾರ ಚಕ್ರದ ರೆಕ್ಟಿಫಿಕೇಷನ್ ಮಾಡಬೇಕು.

ಅವರು ಜಾಸ್ತಿ ಪದಾರ್ಥಗಳನ್ನು ಬಳಸುವಾಗ ಅವರು ಬಳಕೆ ಮಾಡುವ ಬಟ್ಟೆ, ಮನೆಯಲ್ಲಿರುವ ವಸ್ಯತುಗಳು, ಟ್ಯೂಬ್​ಲೈಟ್​ನ ಕಲರ್ ಇರಬಹುದು ಅಡುಗೆ ಮನೆಯಲ್ಲಿರುವ ಬಣ್ಣಗಳನ್ನು ಆದಷ್ಟು ಕೆಂಪು ಬಣ್ಣವಾಗಿ ಮಾರ್ಪಾಟು ಮಾಡಿಕೊಳ್ಳಬೇಕು. ಜಪಮಾಲೆಯಲ್ಲಿ ಲಂ ಕಾರದ ಉಚ್ಛಾರಣೆ ಮಾಡಬೇಕು. ಬೇಕಾದಷ್ಟು ಆಸನಗಳು, ಧ್ಯಾನ, ಪ್ರಣಾಯಾಮವನ್ನು ಕೂಡ ಮಾಡಬಹುದು. ಹಾರ್ಮೋನ್ ಸಮತೋಲನ ಉಂಟಾದಾಗ ಹಾರ್ಮೋನ್ ಅಸಮತೋಲನದಿಂದ ಉಂಟಾಗುವ ಸಮಸ್ಯೆ ಕಡಿಮೆ ಮಾಡಬಹುದು.

• ಅಸಮತೋಲನದಿಂದ ದೇಹ ಹಾಗೂ ಮನಸ್ಸಿನಲ್ಲಾಗುವ ವಿಕೋಪ : ನೆಲೆನಿಲ್ಲಲು ಸಾಧ್ಯವಾಗದಿರುವುದು, ಕೋಪ, ಭಯ, ಕೀಳರಿಮೆ, ಅನಿಶ್ಚಿತತೆ, ಸುಖದ ಗೀಳು, ಹಿಡಿತದಲ್ಲಿ ಇಟ್ಟುಕೊಳ್ಳುವ ಪ್ರವೃತ್ತಿ. ಫಿಸಿಕಲ್ ಹಾಗೂ ಮೆಂಟಲ್ ಡಿಸ್​ಫಂಕ್ಷನ್
• ಸಮತೋಲನವುಳ್ಳ ಮೂಲಾಧಾರ ಚಕ್ರದ ಲಕ್ಷಣಗಳು: ನೆಲೆನಿಂತಿರುವ ಭಾವ, ಕೇಂದ್ರೀತತೆ, ಬದ್ಧತೆ, ಸ್ವತಂತ್ರ ಮನೋಭಾವ, ಶಕ್ತಿಯುತವಾಗಿರುವ ಅನುಭವ, ಸತ್ವವುಳ್ಳ ಅನುಭವ, ಬಲ, ಸ್ಥಿರತೆ, ಸ್ತಬ್ಧತೆ, ಉತ್ತಮ ಪಚನ ಶಕ್ತಿ.
• ಈ ಚಕ್ರದ ಸಮತೋಲನವನ್ನು ಉಂಟು ಮಾಡುವ ಯೋಗಾಸನಗಳು: ಪಾದವನ್ನು ನೆಲೆನಿಲ್ಲಿಸುವ ಆಸನಗಳಾದ ಪರ್ವತಾಸನ, ತಾಡಾಸನ, ವೀರಭದ್ರಾಸನ, ನಿಂತು ಮುಂದಕ್ಕೆ ಬಗ್ಗುವ ಆಸನ ಮತ್ತು ಸೇತುಬಂಧಾಸನ. ಚಿನ್ ಮುದ್ರವನ್ನು ಮಾಡಬಹುದು.

ವಿಶುದ್ಧಿ ಚಕ್ರ

ವಿಶುದ್ಧವೆಂದರೆ ಆ ಶಬ್ಧವೇ ಹೇಳುವಂತೆ ಶುದ್ಧಿಯನ್ನು ಮಾಡುವಂಥದ್ದು ಎಂದರ್ಥ

ತತ್ವ: ಶಬ್ದ ಅಥವಾ ಆಕಾಶ

ಬಣ್ಣ: ನೀಲಿ

ಮಂತ್ರ: ಹಂ

ಸ್ಥಳ: ಗಂಟಲಿನ ಭಾಗ, ಧ್ವನಿ ಪೆಟ್ಟಿಗೆಯ ನರಗಳ ಬಳಿ

ವಿಶುದ್ಧಿ ಚಕ್ರ ಉತ್ತಮವಾಗಿರುವವರಿಗೆ ಎಕ್ಸ್​ಪ್ರೆಷನ್ ವಿಚಾರದಲ್ಲಿ ಯಾವುದೇ ತೊಂದರೆಯಿರುವುದಿಲ್ಲ, ಹಾಗೆಯೇ ಅವರು ಯಾವುದನ್ನೇ ಆಸೆ ಪಟ್ಟರೂ ಅದಕ್ಕೆ ಬೇಕಾಗುವ ಶ್ರಮ ಹಾಕಿ ಕಷ್ಟಪಟ್ಟು ಪಡೆಯುವ ಮನಸ್ಥಿತಿಯವರಾಗಿರುತ್ತಾರೆ.

ವಿಶುದ್ಧಿ ಚಕ್ರವು ಸಂಪರ್ಕ, ಸೃಜನಶೀಲತೆ, ವಿಶ್ವಾಸ, ಸತ್ಯಪರತೆ, ಸ್ವ ಅರಿವು, ಅಭಿವ್ಯಕ್ತಿಯೊಡನೆ ಸಂಬಂಧಪಟ್ಟಿದೆ. ಈ ಚಕ್ರವು ಗಂಟಲು, ಥೈರಾಯ್ಡ್ ಗ್ರಂಥಿ, ಪ್ಯಾರಾಥೈರಾಯ್ಡ್ ಗ್ರಂಥಿ, ಧ್ವನಿ ಪೆಟ್ಟಿಗೆ, ಕತ್ತು, ಭುಜಗಳನ್ನು, ತೋಳುಗಳು, ಅನ್ನನಾಳ, ಬಾಯಿ, ಹಲ್ಲು. ಇದರಲ್ಲಿ ಏನೇ ತೊಂದರೆಯಾದರೂ ವಿಶುದ್ಧ ಚಕ್ರದ ರೆಕ್ಟಿಫಿಕೇಷನ್ ಮಾಡಬೇಕಾಗುತ್ತದೆ.

ಈ ಚಕ್ರದ ಅಸಮತೋಲನದಿಂದ ಥೈರಾಯ್ಡ್ ಗ್ರಂಥಿಯ ಖಾಯಿಲೆಗಳು, ಕಟ್ಟಿದ ಗಂಟಲು, ಬಿಗಿಯಾದ ಕತ್ತು, ಬಾಯಿಯ ಹುಣ್ಣು, ವಸಡಿನ ಅಥವಾ ಹಲ್ಲಿನ ಸಮಸ್ಯೆಗಳು, ಲ್ಯಾರಿಂಜೈಟಿಸ್, ಕಿವಿ ಕೇಳಿಸದ ಸಮಸ್ಯೆಗಳು, ಇತ್ಯಾದಿ ಉಂಟಾಗುತ್ತವೆ.

• ವಿಶುದ್ಧಿ ಚಕ್ರದ ಅಸಮತೋಲನದಿಂದ ಮನಸ್ಸು ಹಾಗೂ ದೇಹದ ಮೇಲಾಗುವ ಪರಿಣಾಮ: ನಂಬಿಕೆ ವಿಷಯದಲ್ಲಿ ತಳಮಳ, ವಿಶ್ವಾಸವಿರುವುದಿಲ್ಲ, ಏನೇ ಹೇಳಿದರೂ ಅದರಲ್ಲಿ ಹುಳುಕನ್ನು ಹುಡುಕುವ ಸ್ವಭಾವವಾಗಿರುತ್ತದೆ. ನಿರ್ಧರಿಸುವ ಅಸಮರ್ಥತತೆ, ಕೃಶವಾದ ಇಚ್ಛಾಶಕ್ತಿ, ಅಭಿವ್ಯಕ್ತಿಯ ಅಸಮರ್ಥತತೆ, ಸೃಜನಶೀಲತೆಯ ಅಭಾವ, ವ್ಯಸನಗಳ ಚೀಟಿ.
• ಸಮತೋಲನವುಳ್ಳ ಚಕ್ರದ ಲಕ್ಷಣಗಳು: ಸೃಜನಶೀಲತೆ, ಒಳ್ಳೆಯ ಅಭಿವ್ಯಕ್ತಿ, ಉತ್ತಮ ಸಂಪರ್ಕದ ಕುಶಲತೆ, ತೃಪ್ತಿ, ಒಳ್ಳೆಯ ಕೇಳುಗರು.
• ವಿಶುದ್ಧಿ ಚಕ್ರದದ ಅಸಮತೋಲನವಿರುವವರು ಮಾಡುವ ಯೋಗಾಸನಗಳು: ಮತ್ಸ್ಯಾಸನ, ಮಾರ್ಜಾಲಾಸನ, ಕತ್ತಿನ ವಿಸ್ತರಣೆ, ಆಧಾರಸಹಿತ ಭುಜಗಳ ಸ್ಟಾಂಡ್, ಸೇತುಬಂಧಾಸನ ಮತ್ತು ಹಲಾಸನ, ಲಂಬಸರ್ವಾಂಗಾಸನ.

ಆಜ್ಞ ಚಕ್ರ

ತತ್ವ: ಬೆಳಕು

ಬಣ್ಣ: ಇಂಡಿಗೊ 

ಮಂತ್ರ: ಓಂ

ಸ್ಥಳ: ಭ್ರೂಗಳ ಮಧ್ಯೆ , ಎರಡು ಕಣ್ಣುಗಳ ಮಧ್ಯೆ ಕುಂಕುಮವನ್ನು ಇಟ್ಟುಕೊಳ್ಳುವುದು ಏಕೆಂದರೆ ಪ್ರತಿನಿತ್ಯ ನಮ್ಮ ದೃಷ್ಟಿಯನ್ನು ಧರಿಸಿ ನೋಡಿದಾಗ ಆಜ್ಞ ಚಕ್ರದ ಆಕ್ಟಿವೇಷನ್ ಪ್ರತಿನಿತ್ಯವೂ ಆಗಲಿದೆ.

ಆಜ್ಞ ಚಕ್ರವು ಸ್ವ ಅರಿವಿನೊಂದಿಗೆ, ಜ್ಞಾನದೊಡನೆ, ಬುದ್ಧಿಯೊಡನೆ, ಅಂತಸ್ಫುರಣೆಯೊಡನೆ, ಯೋಜನೆಗಳನ್ನು ಜಾರಿಗೆ ತರುವ ಸಾಮರ್ಥ್ಯದೊಡನೆ, ನಿರ್ಮೋಹತ್ವದೊಡನೆ, ಒಳನೋಟದೊಡನೆ, ತಿಳಿವಳಿಕೆಯೊಡನೆ, ಅಂತಸ್ಫುರಣೆಯೊಡನೆ ಸಂಬಂಧಪಟ್ಟ ವೈಚಾರಿಕತೆಯೊಡನೆ ಸಂಬಂಧಪಟ್ಟಿದೆ. ಈ ಚಕ್ರವು ಮೆದುಳನ್ನು, ಕಿವಿಗಳನ್ನು, ಕಣ್ಣುಗಳನ್ನು, ಮೂಗನ್ನು, ಪಿಟ್ಯೂಟರಿ ಗ್ರಂಥಿಯನ್ನು, ಪೀನಿಯಲ್ ಗ್ರಂಥಿಯನ್ನು ಮತ್ತು ನರವ್ಯವಸ್ಥೆಯನ್ನು ಆಳುತ್ತದೆ.

ಪಿಟ್ಯೂಟಿ ಗ್ರಂಥಿಯ ಪ್ರಭಾವ ಬೇರೆಲ್ಲಾ ಗ್ರಂಥಿಗಳ ಮೇಲೆ ಇರುತ್ತದೆ. ಮೆದುಳು ದೇಹದ ಎಲ್ಲಾ ಭಾಗಗಳನ್ನು ನಿಯಂತ್ರಿಸುವ ರೀತಿಯಲ್ಲಿ ಮನಯೇವ ಮನುಷ್ಯಾಣಾಂ ಕಾರಣಂ ಬಂಧಮೋಚನಂ. ನಾವು ಹೇಗೆ ಯೋಚನೆ ಮಾಡುತ್ತೀವೋ ನಮ್ಮ ಮನಸ್ಸು ಯಾವ ದಾರಿಯಲ್ಲಿ ನಡೆಯುತ್ತೋ ನಮ್ಮ ಜೀವನ ನಿರ್ಧರಿತವಾಗಿರುತ್ತದೆ.

ಎಲ್ಲಾ ಸರಿಯಾಗಿದ್ದು ನಮ್ಮ ಬುದ್ಧಿಯೇ ನಮ್ಮ ಕೈಯಲ್ಲಿ ಇಲ್ಲದೇ ಹೋದರೆ ಏನೇ ಇದ್ದರೂ ಪ್ರಯೋಜನವಿಲ್ಲ. ಈ ಚಕ್ರದ ಅಸಮತೋಲನದಿಂದ ತಲೆನೋವು, ಭೀಕರ ಸ್ವಪ್ನಗಳು, ಕಣ್ಣಿನ ಒತ್ತಡ, ಕಲಿಕೆಯ ಅಸಾಮರ್ಥ್ಯ, ಗಾಬರಿ, ಖಿನ್ನತೆ, ಅಂಧತ್ವ, ಕಿವುಡುತನ, ಮೂರ್ಛೆ ರೋಗ , ಬೆನ್ನೆಲುಬು ಬಾಗಿರುವ ಸಮಸ್ಯೆಗಳು ಉಂಟಾಗುತ್ತವೆ.

• ದೇಹ ಹಾಗೂ ಮನಸ್ಸಿನ ಮೇಲೆ ಬೀರುವಂತ ಪರಿಣಾಮ: ತೀರ್ಪನ್ನು ತೆಗೆದುಕೊಳ್ಳುವ ಅಸಮರ್ಥತೆ, ಗೊಂದಲ, ಸತ್ಯದ ಭಯ, ಅಶಿಸ್ತು ಮತ್ತು ಗಮನ ನೀಡುವ ಸಮಸ್ಯೆ. ಒಂದು ವ್ಯಕ್ತಿ ಸರಿಯೋ ತಪ್ಪೋ ಎಂಬುದನ್ನು ಕಂಡುಕೊಳ್ಳಲು ಸಾಧ್ಯವಿಲ್ಲ. ಸತ್ಯವನ್ನು ಅರಗಿಸಿಕೊಳ್ಳಲು ಕಷ್ಟ, ಸತ್ಯವನ್ನು ಎದುರಿಸುವ ಶಕ್ತಿ ಇರುವುದಿಲ್ಲ, ಏಕಾಗ್ರತೆ ಇರುವುದಿಲ್ಲ.
• ಆಜ್ಞ  ಚಕ್ರದ ಸಮತೋಲಿತ ಲಕ್ಷಣಗಳು: ದಿವ್ಯದೃಷ್ಟಿ, ಸ್ಪಷ್ಟವಾದ ತಿಳಿವಳಿಕೆ, ಆರೋಗ್ಯಕರವಾದ ಕಲ್ಪನೆ, ಬಲವಾದ ಅಂತಸ್ಫುರಣಾ ಸಾಮರ್ಥ್ಯ, ಹೆಚ್ಚಿನ ಏಕಾಗ್ರತೆ.
• ಆಜ್ಞ  ಚಕ್ರದ ಸಮತೋಲನವನ್ನು ಉಂಟು ಮಾಡುವ ಯೋಗಾಸನಗಳು: ಮಗುವಿನ ಭಂಗಿ, ಧ್ಯಾನ, ಕುಳಿತು ಯೋಗಮುದ್ರ, ಕಣ್ಣುಗಳನ್ನು ಮತ್ತು ಕಣ್ಣಿನ ಸುತ್ತಲಿನ ಭಾಗವನ್ನು ಹಸ್ತಗಳಿಂದ ತೀಡುವುದು. ಎರಡು ನಿಮಿಷ ನಿಧಾನವಾಗಿ ಮನಸ್ಸನ್ನು ಮಂತ್ರದ ಉಚ್ಛಾರಣೆಗೋ, ದೀಪದ ಜ್ಯೋತಿಯ ಬಗ್ಗೆಯೋ ಮನಸ್ಸನ್ನು ಕೇಂದ್ರೀಕರಿಸಬೇಕು.

• ಕಮಲಾ ಭಾರಧ್ವಾಜ್ ಕುರಿತು ಮಾಹಿತಿ: ಕಮಲಾ ಭಾರಧ್ವಾಜ್ ಪ್ರಸಿದ್ಧ ಯೋಗ ತಜ್ಞರಾಗಿದ್ದು, ಸತ್ಯವೆನ್ನುವ ಯೋಗ ಕೇಂದ್ರವನ್ನು ಮುನ್ನಡೆಸುತ್ತಿದ್ದಾರೆ. ಯೋಗದಲ್ಲಿ ಎಂಎಸ್​ಸಿ ಮಾಡಿದ್ದು, ಹಾಗೆಯೇ ಯೋಗದಲ್ಲಿಯೇ ಪಿಜಿ ಡಿಪ್ಲೊಮಾ ಓದಿದ್ದಾರೆ. ಅವರು ಜೈನ್​ ಕಾಲೇಜಿನಲ್ಲಿ ಎಂಬಿಎ ಪೂರೈಸಿದ್ದಾರೆ.  ಅವರಿಗೆ 2015ರಲ್ಲಿ ಯೋಗದಲ್ಲಿನ ಸಾಧನೆಗಾಗಿ ಆರ್ಯಭಟ ಅಂತಾರಾಷ್ಟ್ರೀಯ ಪ್ರಶಸ್ತಿ ಲಭಿಸಿದೆ. ಯೋಗ ಕಲಾಸಾಧಕಿ ಪ್ರಶಸ್ತಿಗೂ ಭಾಜನರಾಗಿದ್ದಾರೆ, ಜ್ಯೋತಿಷ ರತ್ನ  ಸೇರಿದಂತೆ ಹಲವು ಕೋರ್ಸ್​ಗಳನ್ನು ಮಾಡಿದ್ದಾರೆ. ಚಕ್ರ ಹಾಗೂ ಯೋಗದ ಬಗ್ಗೆ ಹೆಚ್ಚಿನ ಮಾಹಿತಿಗಾಗಿ ಮೊ.ನಂ.9663879672. astroyoga.co.in ಭೇಟಿ ನೀಡಿ, ಉಚಿತವಾಗಿ ನಿಮ್ಮ ಚಕ್ರಗಳ ಬಗ್ಗೆ ತಿಳಿದುಕೊಳ್ಳಿ.

ಆರೋಗ್ಯ ಸಂಬಂಧಿತ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ

ಪ್ರಮುಖ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ

Published On - 12:03 pm, Fri, 13 May 22