ಫ್ಯಾಟಿ ಲಿವರ್ ಸಮಸ್ಯೆ ಹೆಚ್ಚಳ; ಆರೋಗ್ಯ ಕಾಪಾಡಿಕೊಳ್ಳುವಂತೆ ತಜ್ಞರಿಂದ ಎಚ್ಚರಿಕೆ

ದೇಶದಲ್ಲಿ ಕೊಬ್ಬಿನ ಯಕೃತ್ತಿನ ಕಾಯಿಲೆ ಅಥವಾ ಫ್ಯಾಟಿ ಲಿವರ್ ಸಮಸ್ಯೆ ಹೆಚ್ಚಾಗುತ್ತಿರುವ ಬಗ್ಗೆ ತಜ್ಞರು ಕಳವಳ ವ್ಯಕ್ತಪಡಿಸಿದ್ದಾರೆ. ಕೊಬ್ಬಿನ ಯಕೃತ್ ಇದನ್ನು ಹೆಪಾಟಿಕ್ ಸ್ಟೀಟೋಸಿಸ್ ಎಂದೂ ಕರೆಯಲಾಗುತ್ತದೆ. ಇದು ಯಕೃತ್ತಿನ ಜೀವಕೋಶಗಳಲ್ಲಿ ಅತಿಯಾದ ಕೊಬ್ಬಿನ ಸಂಗ್ರಹವಾದಾಗ ಸಂಭವಿಸುವ ಗಂಭೀರ ಆರೋಗ್ಯ ಸ್ಥಿತಿಯಾಗಿದೆ. ಸುಮಾರು 90 ಪ್ರತಿಶತದಷ್ಟು ಮಧುಮೇಹ ಮತ್ತು ಬೊಜ್ಜಿನ ಸಮಸ್ಯೆ ಇರುವ ರೋಗಿಗಳು ಎಫ್ಎಲ್ಡಿ ಹೊಂದಿದ್ದಾರೆ ಎಂದು ಹೇಳಲಾಗುತ್ತದೆ. ಇದು 75% ಅಧಿಕ ತೂಕದ ಜನರಲ್ಲಿ ಮತ್ತು 90% ತೀವ್ರ ಬೊಜ್ಜಿನ ಸಮಸ್ಯೆ ಇರುವ ವ್ಯಕ್ತಿಗಳಲ್ಲಿ ಕಂಡುಬರುತ್ತದೆ. ದೇಶದಲ್ಲಿ ಈಗಾಗಲೇ 30- 40 ಕೋಟಿ ಫ್ಯಾಟಿ ಲಿವರ್ ಸಮಸ್ಯೆ ಇರುವ ರೋಗಿಗಳಿದ್ದಾರೆ. ಅಲ್ಲದೆ ಇದು ಮುಂದಿನ ಎರಡು ಮೂರು ವರ್ಷಗಳಲ್ಲಿ ಮತ್ತಷ್ಟು ಹೆಚ್ಚಾಗುವ ನಿರೀಕ್ಷೆಯಿದೆ ಎಂದು ತಜ್ಞರು ಎಚ್ಚರಿಕೆ ನೀಡಿದ್ದಾರೆ.

ಫ್ಯಾಟಿ ಲಿವರ್ ಸಮಸ್ಯೆ ಒಂದು ರೀತಿಯ ಸೈಲೆಂಟ್ ಕಿಲ್ಲರ್ ಆಗಿದ್ದು, ಹೆಚ್ಚಿನವರಲ್ಲಿ ಈ ರೋಗದ ಯಾವುದೇ ರೀತಿಯ ಗುಣಲಕ್ಷಣಗಳೂ ಕಂಡು ಬರುವುದಿಲ್ಲ. ಹಾಗಾಗಿ ಜನರು ಆದಷ್ಟು ಜಾಗರೂಕರಾಗಿರಬೇಕು ಎಂದು ತಜ್ಞರು ಹೇಳುತ್ತಾರೆ. ಸಾಮಾನ್ಯವಾಗಿ ಪಿತ್ತಜನಕಾಂಗ ಹಾನಿಗೊಳಗಾದರೂ, ಅದು ಚೇತರಿಸಿಕೊಳ್ಳಲು ಪ್ರಯತ್ನಿಸುತ್ತದೆ. ಆದರೆ ಈಗಿನ ದಿನಮಾನದಲ್ಲಿ ಮುಖ್ಯ ಸಮಸ್ಯೆಯೆಂದರೆ ನಾವು ಆ ಅವಕಾಶವನ್ನು ಸಹ ನೀಡುವುದಿಲ್ಲ.ಅದರಲ್ಲಿಯೂ ಈ ಸಮಸ್ಯೆಯನ್ನು ಮೊದಲೇ ಪತ್ತೆಹಚ್ಚುವುದು ಕಷ್ಟಸಾಧ್ಯ. ರೋಗಲಕ್ಷಣಗಳು ಕಾಣಿಸಿಕೊಳ್ಳಲು ಪ್ರಾರಂಭಿಸುವ ಹೊತ್ತಿಗೆ, ರೋಗವು ಉಲ್ಬಣಗೊಳ್ಳುತ್ತದೆ. ಏಕೆಂದರೆ ಯಕೃತ್ತು 50- 60% ಹಾನಿಗೊಳಗಾದರೂ ಆ ಬಗ್ಗೆ ನಿಮಗೆ ತಿಳಿಯುವುದಿಲ್ಲ. ಆದರೆ ಕೆಲವು ವ್ಯಕ್ತಿಗಳಲ್ಲಿ ಮುಖದಲ್ಲಿ ಮತ್ತು ಕತ್ತಿನ ಭಾಗಗಳಲ್ಲಿ ಹೆಚ್ಚು ಚಿಹ್ನೆಗಳು ಕಂಡುಬರಬಹುದು.

ಫ್ಯಾಟಿ ಲಿವರ್ ನ ರೋಗಲಕ್ಷಣಗಳಲ್ಲಿ ಇವು ಸೇರಿವೆ:

ಹೊಟ್ಟೆಯ ಬಲ ಭಾಗದಲ್ಲಿ ಭಾರವಾದ ಅನುಭವ

ಸ್ವಲ್ಪ ಹೊಟ್ಟೆ ನೋವು

ದಣಿವು

ಹೊಟ್ಟೆಯ ಅಸ್ವಸ್ಥತೆ

ಹಸಿವಿನ ಕೊರತೆ

ಕಾಮಾಲೆ

ಇದನ್ನೂ ಓದಿ: ನೋಯುತ್ತಿರುವ ಗಂಟಲು ಈ ಅಪಾಯಕಾರಿ ಕಾಯಿಲೆಯ ಲಕ್ಷಣವಾಗಿರಬಹುದು

ಫ್ಯಾಟಿ ಲಿವರ್ ನಲ್ಲಿ ಯಾವ ಹಂತ ಅಪಾಯಕಾರಿ

ಪಿತ್ತಜನಕಾಂಗದ ಕಾರ್ಯವನ್ನು ಅವಲಂಬಿಸಿ ಎಫ್ 0 ರಿಂದ ಎಫ್ 4 ವರೆಗಿನ ಸ್ಕೋರ್ ಅನ್ನು ನೀಡಲಾಗುತ್ತದೆ. ಈ ಪರೀಕ್ಷೆಗಳಲ್ಲಿ ಅವರು ಎಫ್ 4 ಫಲಿತಾಂಶವನ್ನು ಪಡೆದರೆ, ಅವರು ಮೂರನೇ ಹಂತವನ್ನು ತಲುಪಿದ್ದಾರೆ ಎಂದರ್ಥ. ಮೂರನೇ ಹಂತವನ್ನು ಪಿತ್ತಜನಕಾಂಗದ ಫೈಬ್ರೋಸಿಸ್ ಎಂದು ಕರೆಯಲಾಗುತ್ತದೆ. ಫೈಬ್ರೋಸಿಸ್ ತುಂಬಾ ಅಪಾಯಕಾರಿ. ನಾಲ್ಕನೇ ಹಂತವನ್ನು ಸಿರೋಸಿಸ್ ಎಂದು ಕರೆಯಲಾಗುತ್ತದೆ. ಈ ಹಂತದಲ್ಲಿ ಯಕೃತ್ತು ಸಂಪೂರ್ಣವಾಗಿ ಹಾನಿಗೊಳಗಾಗುತ್ತದೆ. ಈ ಹಂತವನ್ನು ತಲುಪುವ ಜನರು ಸಾಯುವ ಅಪಾಯವು ಶೇಕಡಾ 20 ರಿಂದ 30 ರಷ್ಟಿದೆ.

ಯಾವ ರೀತಿ ಆರೋಗ್ಯ ಕಾಪಾಡಿಕೊಳ್ಳಬೇಕು?

ಫ್ಯಾಟಿ ಲಿವರ್ ಸಮಸ್ಯೆ ಆರಂಭಿಕ ಹಂತದಲ್ಲಿದ್ದರೆ ಇದನ್ನು ಜೀವನಶೈಲಿಯಲ್ಲಿ ಕೆಲವು ಆರೋಗ್ಯಕರ ಬದಲಾವಣೆಗಳನ್ನು ಮಾಡಿಕೊಳ್ಳುವ ಮೂಲಕ ಸರಿಪಡಿಸಬಹುದು. ವಿಶೇಷವಾಗಿ ತೂಕ ಕಡಿಮೆ ಮಾಡಿಕೊಳ್ಳುವುದು ತುಂಬಾ ಒಳ್ಳೆಯದು. ಆರೋಗ್ಯಕ್ಕೆ ಉತ್ತಮವಾದ ಆಹಾರವನ್ನು ಸೇವನೆ ಮಾಡಬೇಕು. ಕೊಬ್ಬು ಮತ್ತು ಎಣ್ಣೆಯುಕ್ತ ವಸ್ತುಗಳ ಸೇವನೆಯನ್ನು ಕಡಿಮೆ ಮಾಡಬೇಕು. ತರಕಾರಿಗಳು ಮತ್ತು ಹಣ್ಣುಗಳನ್ನು ಸಂಪೂರ್ಣವಾಗಿ ಸ್ವಚ್ಛಗೊಳಿಸಿದ ನಂತರವೇ ತಿನ್ನಬೇಕು. ಸಕ್ಕರೆ ಭರಿತ ತಂಪು ಪಾನೀಯಗಳು ಮತ್ತು ಎನರ್ಜಿ ಡ್ರಿಂಕ್ಸ್ ಅನ್ನು ತಪ್ಪಿಸಿ. ಜೊತೆಗೆ ಪ್ರತಿದಿನ ನಿಯಮಿತವಾಗಿ ವ್ಯಾಯಾಮ ಮಾಡಿ.

(ಸೂಚನೆ: ಇಲ್ಲಿರುವ ವಿಷಯಗಳು ಕೇವಲ ಮಾಹಿತಿಗಾಗಿ ಮಾತ್ರ. ನಿಮಗೆ ಯಾವುದೇ ರೀತಿಯ ಸಂದೇಹಗಳಿದ್ದರೂ ತಜ್ಞರನ್ನು ಸಂಪರ್ಕಿಸಿ.)

ಆರೋಗ್ಯಕ್ಕೆ ಸಂಬಂಧಿಸಿದ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ