ಬೆಂಗಳೂರಿನ ರಸ್ತೆಗಳಲ್ಲಿ AI ಕ್ಯಾಮರಾ ಕಣ್ಣು: ಸಂಚಾರ ನಿಯಮ ಉಲ್ಲಂಘಿಸಿದರೆ ದಂಡ ಫಿಕ್ಸ್
ಬೆಂಗಳೂರು ನಗರದ ಬಹುತೇಕ ರಸ್ತೆಗಳಲ್ಲಿ AI ಕ್ಯಾಮರಾಗಳನ್ನ ಅಳವಡಿಸಲಾಗಿದ್ದು, ಸಂಚಾರ ನಿಯಮ ಉಲ್ಲಂಘಿಸಿದರೆ ದಂಡ ಬೀಳೋದು ಪಕ್ಕಾ. 2025ರ ಜವರಿಯಿಂದ ಜುಲೈವರೆಗೆ ದಾಖಲಾಗಿರುವ ಒಟ್ಟು ಪ್ರಕರಣಗಳ ಪೈಕಿ ಶೇ. 87ರಷ್ಟು ಈ ಕ್ಯಾಮರಾಗಳಿಂದಲೇ ಆಗಿದ್ದು, ವಿಡಿಯೋ ಮತ್ತು ಫೋಟೋ ದಾಖಲಾಗುವ ಕಾರಣ ವಾಹನಗಳ ಮಾಲಕರು ನಾವು ಸಂಚಾರ ನಿಯಮ ಉಲ್ಲಂಘಿಸಿಲ್ಲ ಎಂದು ಹೇಳುವಂತೆಯೂ ಇಲ್ಲ.
Updated on: Oct 14, 2025 | 2:39 PM
ಬೆಂಗಳೂರು, ಅಕ್ಟೋಬರ್ 14: ಟ್ರಾಫಿಕ್ ಪೊಲೀಸರು ಇರಲ್ಲ ಎಂದುಕೊಂಡು ಸಂಚಾರ ನಿಯಮಗಳನ್ನು ಗಾಳಿಗೆ ತೂರಿ ಆರಾಮಾಗಿ ಓಡಾಡಿಕೊಂಡಿದ್ದವರಿಗೆ ಪೊಲೀಸ್ ಇಲಾಖೆ ಶಾಕ್ ಕೊಟ್ಟಿದೆ. ಬೆಂಗಳೂರು ನಗರದ ಬಹುತೇಕ ರಸ್ತೆಗಳಲ್ಲಿ AI ಕ್ಯಾಮರಾಗಳನ್ನ ಅಳವಡಿಸಲಾಗಿದ್ದು, ಸಂಚಾರ ನಿಯಮ (Traffic Rules) ಉಲ್ಲಂಘನೆಯನ್ನು ಇವು ದಾಖಲಿಸಲಿವೆ. 2025ರ ಜವರಿಯಿಂದ ಜುಲೈವರೆಗೆ ದಾಖಲಾಗಿರುವ ಒಟ್ಟು ಪ್ರಕರಣಗಳ ಪೈಕಿ ಶೇ. 87ರಷ್ಟು ಈ ಕ್ಯಾಮರಾಗಳಿಂದಲೇ ಆಗಿವೆ. ಈ ರೀತಿಯ ಕ್ಯಾಮರಾಗಳ ಬಳಕೆಯಿಂದಾಗಿ ಪೊಲೀಸರು ವಾಹನಗಳನ್ನ ತಡೆದು ದಂಡ ವಿಧಿಸಬೇಕಾದ ಅನಿವಾರ್ಯತೆ ಇರಲ್ಲ. ವಿಡಿಯೋ, ಫೋಟೋ ದಾಖಲಾಗುವ ಕಾರಣ ವಾಹನಗಳ ಮಾಲಕರು ನಾವು ಸಂಚಾರ ನಿಯಮ ಉಲ್ಲಂಘಿಸಿಲ್ಲ ಎಂದು ಹೇಳುವಂತೆಯೂ ಇಲ್ಲ.
ಹೆಲ್ಮೆಟ್ ಇಲ್ಲದೆ ವಾಹನ ಚಾಲನೆ, ಹಿಂಬದಿ ಸವಾರರು ಹೆಲ್ಮೆಟ್ ಧರಸಿದೇ ಇರುವುದು, ಸೀಟ್ ಬೆಲ್ಟ್ ಧರಿಸದೆ ಇರುವುದು ಮತ್ತು ಸಿಗ್ನಲ್ ಜಂಪ್ನಂತಹ ಪ್ರಕರಣಗಳನ್ನ ಈ AI ಕ್ಯಾಮರಾಗಳು ಪತ್ತೆ ಮಾಡಲಿವೆ. 2025ರ ಜವರಿಯಿಂದ ಜುಲೈವರೆಗೆ ಒಟ್ಟು 30 ಲಕ್ಷ ಸಂಚಾರ ನಿಯಮ ಉಲ್ಲಂಘನೆ ಪ್ರಕರಣಗಳು ದಾಖಲಾಗಿದ್ದು, ಆ ಪೈಕಿ ಪ್ರತಿದಿನ 11,800 ಕೇಸ್ ಗಳು ಈ AI ಕ್ಯಾಮರಾಗಳಿಂದಲೇ ವರದಿಯಾಗಿವೆ. ಕೇವಲ 1,500 ಪ್ರಕರಣಗಳಷ್ಟೇ ಪೊಲೀಸರಿಂದ ದಾಖಲಾಗಿವೆ. ಇವುಗಳಲ್ಲಿ ನೋ ಎಂಟ್ರಿಯಲ್ಲಿ ವಾಹನ ಚಾಲನೆ, ನಿಷೇಧಿತ ಪ್ರದೇಶದಲ್ಲಿ ವಾಹನಗಳ ಪಾರ್ಕಿಂಗ್ನಂತಹ ಕೇಸ್ಗಳೇ ಹೆಚ್ಚಿವೆ.
ಇದನ್ನೂ ಓದಿ: ಮ್ಯಾಪಲ್ಸ್ ಆ್ಯಪ್ನಲ್ಲಿ ಸಿಗುತ್ತೆ ಬೆಂಗಳೂರು ಟ್ರಾಫಿಕ್ ಸಿಗ್ನಲ್ ಟೈಮಿಂಗ್ಸ್ ಲೈವ್ ಮಾಹಿತಿ! ದೇಶದಲ್ಲೇ ಮೊದಲು
AI ಕ್ಯಾಮರಾಗಳ ಅಳವಡಿಕೆಯಿಂದಾಗಿ ಹೆಚ್ಚು ಪ್ರಕರಣಗಳು ವರದಿಯಾಗಿದ್ದು, ಜನರಿಗೂ ಈ ಬಗ್ಗೆ ಜಾಗೃತಿ ಮೂಡಿದೆ. ನಗರದಾದ್ಯಂತ ಸುಮಾರು 75 ಈ ರೀತಿಯ ಕ್ಯಾಮರಾಗಳನ್ನ ಅಳವಡಿಸಲಾಗಿದ್ದು, ಸಂಚಾರ ನಿಯಮ ಉಲ್ಲಂಘಟನೆ ಕೇಸ್ಗಳ ಮಾಹಿತಿ ತಿಳಿಯಲು ಸಾರ್ವಜನಿಕರ ಅನುಕೂಲಕ್ಕೆ ASTraM ಆ್ಯಪ್ ಕೂಡ ಇದೆ ಎಂದು ಸಂಚಾರ ವಿಭಾಗದ ಜಂಟಿ ಪೊಲೀಸ್ ಆಯುಕ್ತ ಕಾರ್ತಿಕ್ ರೆಡ್ಡಿ ತಿಳಿಸಿರೋದಾಗಿ ಹಿಂದೂಸ್ತಾನ್ ಟೈಮ್ಸ್ ವರದಿ ಮಾಡಿದೆ. ಇಲ್ಲಿಯವರೆಗೆ ಸಂಚಾರಿ ಪೊಲೀಸರು 44 ಲಕ್ಷ ರೂಪಾಯಿ ದಂಡ ಸಂಗ್ರಹಿಸಿದ್ದು, ಈ ಮೂಲಕ ದಾಖಲಾದ ಪ್ರಕರಣಗಳ ದಂಡದ ಅರ್ಧದಷ್ಟು ಹಣ ಪಾವತಿಯಾದಂತಾಗಿದೆ. AI ಕ್ಯಾಮರಾಗಳ ಅಳವಡಿಕೆ ಬಳಿಕವೂ ಪಾರ್ಕಿಂಗ್ ನಿಯಮ ಮತ್ತು ಏಕ ಮುಖ ಸಂಚಾರ ನಿಯಮ ಉಲ್ಲಂಘನೆ ಪ್ರಕರಣಗಳ ತಡೆ ಸಂಚಾರ ಪೊಲೀಸರಿಗೆ ಸವಾಲಾಗಿಯೇ ಉಳಿದಿದೆ.
ಮತ್ತಷ್ಟು ಸುದ್ದಿ ಓದಲು ಇಲ್ಲಿ ಕ್ಲಿಕ್ ಮಾಡಿ.
