Gandhi Bazaar: ಆಮೆಗತಿಯಲ್ಲಿ ಸಾಗುತ್ತಿರುವ ಗಾಂಧಿ ಬಜಾರ್ ರಸ್ತೆ ಕಾಮಗಾರಿ: ಸಿಡಿದೆದ್ದ ವ್ಯಾಪಾರಿಗಳು, ಅಂಗಡಿ ಮುಚ್ಚಿ ಆಕ್ರೋಶ

ಬೆಂಗಳೂರು: ಬೆಂಗಳೂರು ದಕ್ಷಿಣ ವಲಯದ ಬಸವನಗುಡಿಯ ಜೀವನಾಡಿಯಾಗಿರುವ ಗಾಂಧಿಬಜಾರ್(Gandhi Bazaar) ಮುಖ್ಯರಸ್ತೆ, ಪುನರಾಭಿವೃದ್ಧಿ ಕಾಮಗಾರಿಯನ್ನು ವಿರೋಧಿಸಿ ನೂರಾರು ವ್ಯಾಪಾರಿಗಳು ಮಂಗಳವಾರ ಅಂಗಡಿಗಳನ್ನು ಮುಚ್ಚಿ ಪ್ರತಿಭಟನೆ ನಡೆಸಿದರು. ಗಾಂಧಿ ಬಜಾರ್ ನಲ್ಲಿ 8 ತಿಂಗಳಿನಿಂದ ಫುಟ್ ಪಾಥ್ ಕೆಲಸಗಳನ್ನ ಮಾಡಲಾಗುತ್ತಿದೆ. ಆದ್ರೆ ಇಲ್ಲಿಯವರೆಗೂ ಕೆಲಸ ಮುಗಿದಿಲ್ಲ. ಕಳೆದ ವರ್ಷ ಸೆಪ್ಟೆಂಬರ್‌ನಲ್ಲಿ, ಬೃಹತ್ ಬೆಂಗಳೂರು ಮಹಾನಗರ ಪಾಲಿಕೆ(BBMP) ಮತ್ತು ನಗರ ಭೂ ಸಾರಿಗೆ ನಿರ್ದೇಶನಾಲಯವು(Directorate of Urban Land Transport)  ಹಳೆಯ ಶಾಪಿಂಗ್ ಸ್ಟ್ರೀಟ್ ಅನ್ನು ಚರ್ಚ್ ಸ್ಟ್ರೀಟ್‌ನಂತಹ ಶಾಪಿಂಗ್ ಹಬ್ ಆಗಿ ಪರಿವರ್ತಿಸಲು ಶತಮಾನದಷ್ಟು ಹಳೆಯದಾದ ಈ ರಸ್ತೆಯ ನವೀಕರಣವನ್ನು ಪ್ರಾರಂಭಿಸಿತ್ತು.

ಆದ್ರೆ ತಿಂಗಳು ಕಳೆದರೂ ಕಾಮಗಾರಿ ಮುಗಿದಿಲ್ಲ. ಇನ್ನೂ ಶೇ.50ರಷ್ಟು ಆಗಿಲ್ಲವೆಂದು ವ್ಯಾಪಾರಸ್ಥರು ಹಾಗೂ ನಿವಾಸಿಗಳು ಆಕ್ಷೇಪ ವ್ಯಕ್ತಪಡಿಸಿದ್ದಾರೆ. ರಸ್ತೆಯಲ್ಲಿರುವ 120 ವಸತಿ ಗೃಹಗಳ ಪೈಕಿ 40 ಮಾಲೀಕರು ಅವ್ಯವಸ್ಥೆಯಿಂದ ಸ್ಥಳಾಂತರಗೊಂಡಿದ್ದಾರೆ ಎಂದು ಬಸವನಗುಡಿ ನಿವಾಸಿಗಳ ಕ್ಷೇಮಾಭಿವೃದ್ಧಿ ಸಂಘದ ಕಾರ್ಯದರ್ಶಿ ಗುರುಪ್ರಸಾದ್ ತಿಳಿಸಿದರು. ಕಾಮಗಾರಿ ನೆಪದಲ್ಲಿ ಬಳಸುತ್ತಿರುವ ರಾಸಾಯನಿಕಗಳು ಮತ್ತು ನಿರ್ಮಾಣ ಸಾಮಗ್ರಿಗಳಿಂದಾಗಿ ಹತ್ತಾರು ಮರಗಳು ನಾಶವಾಗಿವೆ ಮತ್ತು ಇತರ ಮರಗಳ ಬೇರುಗಳು ದುರ್ಬಲಗೊಂಡಿವೆ, ನಾವು ಕರ್ನಾಟಕ ಮರಗಳ ಸಂರಕ್ಷಣಾ ಕಾಯ್ದೆ ಉಲ್ಲಂಘನೆ ಕುರಿತು ಬಿಬಿಎಂಪಿ ಅರಣ್ಯ ಇಲಾಖೆಗೆ ದೂರು ನೀಡಿದ್ದರೂ ಯಾವುದೇ ಪ್ರಯೋಜನವಾಗಿಲ್ಲ ಎಂದು ಗುರುಪ್ರಸಾದ್ ಬೇಸರ ವ್ಯಕ್ತಪಡಿಸಿದರು. ಇನ್ನು ಈ ಕಾಮಗಾರಿಯಿಂದಾಗಿ ಹೂ, ಹಣ್ಣು, ಚಿಲ್ಲರೆ ಅಂಗಡಿಗಳು ನಷ್ಟ ಅನುಭವಿಸುತ್ತಿವೆ. ಹೀಗಾಗಿ ಬ್ಯಾಂಕ್, ಹೋಟೆಲ್ ರೆಸಾರ್ಟ್ ಮಾಲೀಕರು ತಮ್ಮ ಸ್ಥಳಗಳನ್ನೇ ಬದಲಾಯಿಸಲು ನಿರ್ಧರಿಸಿದ್ದಾರೆ.

ವ್ಯಾಪಾರಕ್ಕಾಗಿ ಅಂಗಡಿಗಳನ್ನು ಹೊಂದಿರುವ ಅಥವಾ ಬಾಡಿಗೆಗೆ ಪಡೆದಿರುವ 700 ವ್ಯಾಪಾರಿಗಳಲ್ಲಿ ಕೆಲವರು ತಮ್ಮ ಅಸಮ್ಮತಿಯನ್ನು ನೋಂದಾಯಿಸಲು BNS ಪಾರ್ಟಿ ಹಾಲ್‌ನಲ್ಲಿ ಜಮಾಯಿಸಿದರು. ಈ ವೇಳೆ ಇಂಡಿಯನ್ ಬ್ಯಾಂಕ್ (ಬಸವನಗುಡಿ ಶಾಖೆ) ವ್ಯವಸ್ಥಾಪಕ ಸುರೇಂದ್ರ ಪ್ರಕಾಶ್ ಮಾತನಾಡಿ, ಕಳೆದ ಆರು ತಿಂಗಳಲ್ಲಿ ಅವರು 100 ಕೋಟಿ ರೂಪಾಯಿ ವ್ಯವಹಾರವನ್ನು ಕಳೆದುಕೊಂಡಿರುವುದಾಗಿ ಹೇಳಿಕೊಂಡಿದ್ದಾರೆ. ಅಲ್ಲದೆ ತಮ್ಮ ಬ್ಯಾಂಕ್ ಇರುವ ಸ್ಥಳವನ್ನೇ ಬದಲಾಯಿಸಲು ಚಿಂತಿಸಿರುವುದಾಗಿ ತಿಳಿಸಿದ್ದಾರೆ.

ಇದನ್ನೂ ಓದಿ:Karnataka Polls: ಮೇ 10ರಂದು ಕರ್ನಾಟಕದಲ್ಲಿ ಎಲ್ಲಾ ಖಾಸಗಿ ಕಚೇರಿ, ಕಾರ್ಖಾನೆಗಳು ಬಂದ್ 

ಅನೇಕ ಗ್ರಾಹಕರು ಹಿರಿಯ ನಾಗರಿಕರಾಗಿದ್ದು, ತೆರೆದ ಮ್ಯಾನ್‌ಹೋಲ್‌ಗಳು ಮತ್ತು ಅರ್ಧ ಅಗೆದ ರಸ್ತೆಗಳಲ್ಲಿ ಸಂಚರಿಸಲು ಸಾಧ್ಯವಿಲ್ಲ. ಅವರು ತಮ್ಮ ಪಿಂಚಣಿ ಪಡೆಯಲು, ಹಣವನ್ನು ಪಡೆಯಲು ಅಥವಾ ಠೇವಣಿ ಮಾಡಲು ಬರುತ್ತಾರೆ ಆದರೆ ಅನೇಕರು ಈಗ ತಮ್ಮ ಖಾತೆಯನ್ನು ಇಲ್ಲಿಂದ ಬದಲಾಯಿಸಿದ್ದಾರೆ ಎಂದು ಸುರೇಂದ್ರ ಪ್ರಕಾಶ್ ಹೇಳಿದರು. ಕಾಮಗಾರಿ ಕೆಲಸ ಪ್ರಾರಂಭವಾದಾಗಿನಿಂದ ವ್ಯಾಪಾರವು 80% ರಷ್ಟು ಕುಸಿದಿದೆ ಎಂದು ಗಾರ್ಮೆಂಟ್ ವ್ಯಾಪಾರಿಗಳು, ಕಿರಾಣಿ ಅಂಗಡಿ ಮಾಲೀಕರು ಮತ್ತು ರೆಸ್ಟೋರೆಂಟ್‌ ಮಾಲೀಕರು ಅಸಮಾಧಾನ ಹೊರ ಹಾಕಿದ್ದಾರೆ.

“ಅವರು ಏನು ಮಾಡುತ್ತಿದ್ದಾರೆ ಮತ್ತು ಹೇಗೆ ಮಾಡುತ್ತಿದ್ದಾರೆಂದು ನಮಗೆ ತಿಳಿದಿಲ್ಲ, ಕಳೆದ ವಾರಾಂತ್ಯದಲ್ಲಿ ನಾವು ಪೊಲೀಸ್ ಠಾಣೆಗೆ ದೂರು ನೀಡಿದ್ದೆವು ಮತ್ತು ಬಿಬಿಎಂಪಿ ಇಂಜಿನಿಯರ್ ಒಂದು ದಿನದಲ್ಲಿ ಯೋಜನೆಯ ಬಗ್ಗೆ ಮಾಹಿತಿ ನೀಡುವುದಾಗಿ ಭರವಸೆ ನೀಡಿದರು. ಎರಡು ದಿನಗಳಿಗಿಂತ ಹೆಚ್ಚು ಸಮಯ ಕಳೆದಿದೆ. ಅವರಿಂದ ಏನ್ನೂ ಮಾತಿಲ್ಲ ಎಂದು ಬಸವನಗುಡಿ ವರ್ತಕರ ಮತ್ತು ನಿವಾಸಿಗಳ ಸಂಘದ ಸಲಹೆಗಾರ ಎಸ್‌ ನಟರಾಜ್‌ ಶರ್ಮಾ ಬೇಸರ ವ್ಯಕ್ತಪಡಿಸಿದರು. ಸ್ಥಳೀಯರು ತಮ್ಮ ಸಮಸ್ಯೆಗಳಿಗೆ ತಮ್ಮ ಪ್ರತಿನಿಧಿಗಳ ಪ್ರತಿಕ್ರಿಯೆಯಿಂದ ಅಸಮಾಧಾನಗೊಂಡಿದ್ದಾರೆ. ನಾಗರಿಕ ಸಂಸ್ಥೆಗಳು ರಸ್ತೆಯ ಸಂಪೂರ್ಣ ಪಾದಚಾರಿಗಳನ್ನು ಯೋಜಿಸುತ್ತವೆ ಆದರೆ ಇದು ಅವರ ಚಲನಶೀಲತೆ, ನೆರೆಯ ಬೀದಿಗಳಿಗೆ ಪ್ರವೇಶ ಮತ್ತು ವ್ಯಾಪಾರ ಕಾರ್ಯಾಚರಣೆಗಳ ಮೇಲೆ ಪರಿಣಾಮ ಬೀರುತ್ತದೆ ಎಂದು ನಿವಾಸಿಗಳು ತಿಳಿಸಿದರು.

ಬೆಂಗಳೂರಿಗೆ ಸಂಬಂಧಿಸಿದ ಸುದ್ದಿಗಳನ್ನು ಓದಲು ಇದರ ಮೇಲೆ ಕ್ಲಿಕ್ ಮಾಡಿ

Published On - 12:42 pm, Wed, 3 May 23