Independence Day 2024: ‘ಜನಗಣಮನ’ವನ್ನು ರಾಷ್ಟ್ರಗೀತೆಯಾಗಿ ಆಯ್ಕೆ ಮಾಡಿಕೊಂಡದ್ದು ಹೇಗೆ? ಈ ಹಾಡಿನ ಅರ್ಥವೇನು?

ನಮ್ಮ ರಾಷ್ಟ್ರ ಗೀತೆ ಜನಗಣಮನ ವನ್ನು ಕೇಳಿದಾಗ ಒಂದು ಕ್ಷಣ ಮೈ ಮನವೆಲ್ಲಾ ರೋಮಾಂಚನವಾಗುತ್ತದೆ. ಜನಗಣಮನ ಗೀತೆಯು ಭಾರತದ ವೈಭವ ಮತ್ತು ಸಾರ್ವಭೌಮತೆಯ ಸಂಕೇತವಾಗಿದೆ. ವಿಶ್ವಮಾನ್ಯ ಕವಿ ರವೀಂದ್ರನಾಥ್ ಟ್ಯಾಗೋರ್ ಅವರು ರಚಿಸಿದ ಜನಗಣಮನ ಈ ಗೀತೆಯ ಸಾಹಿತ್ಯದಲ್ಲಿ ಭಾರತದ ಸಂಸ್ಕೃತಿ ಮತ್ತು ವೈವಿಧ್ಯತೆ, ರಾಷ್ಟ್ರೀಯ ಪರಂಪರೆಯ, ದೇಶಭಕ್ತಿಯು ತುಂಬಿ ತುಳುಕುತ್ತಿದೆ.

ಜನಗಣಮನ ಗೀತೆಯನ್ನು ಮೊದಲು ಹಾಡಿದ್ದು ಯಾವಾಗ?

1911ರಲ್ಲಿ ಕೋಲ್ಕತ್ತದಲ್ಲಿ ನಡೆದ ಭಾರತ ರಾಷ್ಟ್ರೀಯ ಕಾಂಗ್ರೆಸ್ ಅಧಿವೇಶನಕ್ಕೆಂದೇ ಈ ಹಾಡನ್ನು ರವೀಂದ್ರನಾಥ ಟ್ಯಾಗೋರರು ಸಂಯೋಜನೆ ಮಾಡಿದರು. ಹಾಡಿಗೆ ಭಾಗ್ಯವಿಧಾತ’ ಎಂದು ಹೆಸರಿಡಲಾಗಿತ್ತು. ಆದರೆ ಅದಕ್ಕಿಂತ ಮುನ್ನ ಪ್ರತಿಭಟನೆಗಳಲ್ಲಿ ವಂದೇ ಮಾತರಂ ಗೀತೆಯು ಗಟ್ಟಿಯಾಗಿ ಕೇಳಿಸುತ್ತಿತ್ತು. ಹೀಗಿರುವಾಗ 1911 ರ ಡಿಸೆಂಬರ್ 27ರಂದು ನಡೆದ ಭಾರತ ರಾಷ್ಟ್ರೀಯ ಕಾಂಗ್ರೆಸ್ ಅಧಿವೇಶನದ ಎರಡನೇ ದಿನ ಪ್ರಾರ್ಥನೆಯ ರೂಪದಲ್ಲಿ ಜನಗಣಮನವನ್ನು ಹಾಡಲಾಯಿತು. ಆ ದಿನದಂದು ಟ್ಯಾಗೋರರ ಸಹೋದರಿಯ ಮಗಳು ಸರಳಾದೇವಿ ಚೌಧುರಾಣಿ `ಜನಗಣಮನ ಗೀತೆಯನ್ನು ಹಾಡಿದ್ದರು. ಕೋಲ್ಕತಾ ಸಮ್ಮೇಳನದಲ್ಲಿ ಹಾಡಿದ ಜನಗಣಮನ ಹಾಡು ರಾಷ್ಟ್ರೀಯತೆಯನ್ನು ಪ್ರತಿಧ್ವನಿಸಿದ್ದು ಮಾತ್ರವಲ್ಲದೇ, ಅಲ್ಲಿ ಸೇರಿದ್ದವರನ್ನು ಭಾವುಕರನ್ನಾಗಿಸಿತ್ತು.

ರಾಷ್ಟ್ರಗೀತೆಯ ಒಳಅರ್ಥವೇನು?

ಟ್ಯಾಗೋರ್ ಅವರು ಹೇಳುವಂತೆ ಈ ಗೀತೆಯೂ “ಭಾರತದ ಭಾಗ್ಯ ವಿಧಾತ (ಅದೃಷ್ಟದ ದೇವರು) ಭಾರತದ ರಥದ ಹಿಡಿತವನ್ನು ದೃಢವಾಗಿ ಹಿಡಿದು ವಿಜಯವನ್ನು ಆಚರಿಸುತ್ತಾರೆ ಎನ್ನುವುದಾಗಿದೆ. ಆದರೆ ನಮ್ಮ ರಾಷ್ಟ್ರಗೀತೆಯ ಮೂಲ ಅರ್ಥವೇ ಬಹುತ್ವ. ಇದು ಸಂಸ್ಕೃತಿ, ಜಾತಿ ಮತ್ತು ಧರ್ಮದ ವ್ಯತ್ಯಾಸಗಳು ಮತ್ತು ಏಕತೆಯ ಭಾವನೆಯನ್ನು ಈ ಗೀತೆಯು ತಿಳಿಸುತ್ತದೆ.

ಇದನ್ನೂ ಓದಿ: ಚೆನ್ನಾಗಿ ಭಾಷಣ ಮಾಡಬೇಕು ಎನ್ನುವವರು ಈ ಸಲಹೆಯನ್ನು ಪಾಲಿಸಿ

ರಾಷ್ಟ್ರಗೀತೆಯಾಗಿ ಆಯ್ಕೆ ಮಾಡಿಕೊಂಡಿದ್ದು ಯಾವಾಗ?

ಟ್ಯಾಗೋರರು 1919ರಲ್ಲಿ ಜನಗಣಮನ ಗೀತೆಯನ್ನು ಸ್ವತಃ ಇಂಗ್ಲೀಷ್ ಭಾಷೆಗೆ ಅನುವಾದಿಸಿದರು. ಇದಕ್ಕೆ ‘ದಿ ಮಾರ್ನಿಂಗ್ ಸಾಂಗ್ ಆಫ್ ಇಂಡಿಯಾ’ ಎಂದು ಶೀರ್ಷಿಕೆ ಕೊಟ್ಟರು. ಆದರೆ ಇದರ ಮೂಲಗೀತೆಯನ್ನು ಸಂಸ್ಕೃತ ಭೂಯಿಷ್ಠ ಬಂಗಾಳಿ ಭಾಷೆಯಲ್ಲಿ ಟ್ಯಾಗೋರರು ಬರೆದಿದ್ದರು. ಐದು ಚರಣಗಳ ಹಾಡಿನಲ್ಲಿ ಮೊದಲ ಒಂದು ಚರಣವಷ್ಟೇ ರಾಷ್ಟ್ರಗೀತೆಯಾಗಿ ಆಯ್ಕೆ ಮಾಡಿಕೊಳ್ಳಲಾಯಿತು.1950, ಜನವರಿ 24ರಂದು ಸಾಂವಿಧಾನಿಕ ಸಭೆಯಲ್ಲಿ ಈ ಗೀತೆಯನ್ನು ಭಾರತದ ರಾಷ್ಟ್ರಗೀತೆ ಎಂದು ಅನುಮೋದಿಸಲಾಯಿತು.

ಶಿಕ್ಷಣಕ್ಕೆ ಸಂಬಂಧಿಸಿದ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ