National Wine Day: ಮೈಲ್ಸ್ ವೈನ್ ಮಾಯಾ ವೈನ್ ಮತ್ತು ಕಾರೇಹಣ್ಣಿನ ಮಧು ವೈಎನ್
Miles Wine : ಅದೇನೊ ಗೊತ್ತಿಲ್ಲ. ಅದೊಂಥರ ತೆಳು ಸಿಪ್ಪೆಯ, ಭಾವಾತಿರೇಕದ, ಬೇಗ ಹಣ್ಣಾಗುವ ಆದಾಗ್ಯೂ ಗಟ್ಟಿಯಾಗಿರುವ ದ್ರಾಕ್ಷಿ. ಅದು ಕೆಬರ್ನೆಟ್ ದ್ರಾಕ್ಷಿ ತರಹ ಎಲ್ಲಂದರಲ್ಲೆ ಬೆಳೆಯುವ ನಿರ್ಲಕ್ಷ್ಯ ಮಾಡಿದರೂ ಉಳಿಯುವ ಹಣ್ಣಲ್ಲ. ಅದು ನಿರಂತರ ಕಾಳಜಿ ಮತ್ತು ಗಮನ ಬಯಸುತ್ತದೆ.
National Wine Day : ವೈನ್ ಎಂದರೆ ನನಗೆ ಎರಡು ನೆನಪುಗಳು ತಕ್ಷಣಕ್ಕೆ ಹೊಳೆಯುತ್ತವೆ. ಒಂದು Sideways ಸಿನೆಮಾ. ಇನ್ನೊಂದು ಅಮೆರಿಕಾದಲ್ಲಿ ನಾ ಕೈಗೊಂಡ ಸೋಲೋ ಪ್ರಯಾಣ. ಸೈಡ್‌ ವೇಸ್‌ ಸಿನಿಮಾದಲ್ಲಿ ನಾಯಕ ನಟ ಒಬ್ಬ ಖಿನ್ನ ಅಪ್ರಕಟಿತ ನಡು ವಯಸ್ಕ ಲೇಖಕ. ಅನ್‌ ಸಕ್ಸೆಸ್ಫುಲ್ ವ್ಯಕ್ತಿ. ಒಂಥರಾ ಕುಡುಕ. ಹೊಟ್ಟೆ ಮುಂದೆ ಬಂದಿರುತ್ತದೆ, ತಲೆ ಕೂದಲು ಉದುರಿರುತ್ತದೆ. ಅವನ ಹೆಸರು ಮೈಲ್ಸ್ ಎಂದು. ಆತನಿಗೆ ಒಬ್ಬ ಸ್ನೇಹಿತ ಜ್ಯಾಕ್ ಎಂದು. ಅವರು ಒಂದು ವಾರದ ಮಟ್ಟಿಗೆ ರೋಡ್‌ ಟ್ರಿಪ್‌ ಹೊರಡುತ್ತಾರೆ. ಜ್ಯಾಕ್ ಗೆ ಮದುವೆ ಸೆಟ್‌ ಆಗಿದೆ. ಆ ಟ್ರಿಪ್‌ ಅವನಿಗೆ ಕಟ್ಟ ಕಡೆಯ ಬ್ಯಾಚಲರ್‌ ಪಾರ್ಟಿ. ಯಾರ ಜೊತೆನಾದರೂ ಮಲಗಬೇಕು ಅನ್ನುವ ಅದಮ್ಯ ಆಸೆ. ಮೈಲ್ಸ್ ಹಾಗಲ್ಲ, ಅವನಿಗೆ ಸುಮ್ನೆ ಒಂದು ವಾರ ರಿಲ್ಯಾಕ್ಸ್‌ ಆಗಿ ತಿನ್ಕೊಂಡು ಕುಡ್ಕೊಂಡು ಸೋಂಬೇರಿಯಾಗಿ ಟೈಂ ಪಾಸ್‌ ಮಾಡಿಕೊಂಡು ಇದ್ದು ಬರುವ ಉದ್ದೇಶ. ಹ್ಞಾ- ಅವನ ಕುಡಿತ ಎಂದರೆ ವೈನ್. ವೈನ್ ವಿಷಯದಲ್ಲಿ ಅವನು ಪಂಟ. ಗ್ಲಾಸಿನಲ್ಲಿ ಎರಡು ತೊಟ್ಟು ವೈನ್ ಹಾಕಿಕೊಟ್ಟರೆ ಅದರ ಜನ್ಮಕುಂಡಲಿಯನ್ನು ಜಾಲಾಡಿಬಿಡಬಲ್ಲ ಅಪ್ರತಿಭ. ಎಷ್ಟು ಮಂದ ಇದೆ, ಯಾವ ಬಣ್ಣ ಇದೆ, ಏನ್‌ ಸ್ಮೆಲ್‌ ಇದೆ, ಗ್ಲಾಸು ಬಗ್ಗಿಸಿದಾಗ ಕಂದು ಬಣ್ಣದ ವೈನು ತೆಳುಗಂದಾದರೆ ಏನರ್ಥ? – ಇತ್ಯಾದಿಗಳ ಮೂಲಕ ಅದು ಯಾವ ಬಗೆಯ ದ್ರಾಕ್ಷಿಯದು, ಯಾವ ಊರಿನದು, ಎಷ್ಟು ಹಳೆಯದು ಎಂದೆಲ್ಲ ಹೇಳಿಬಿಡುವನು. ಮಧು ವೈ. ಎನ್. ಲೇಖಕ (Madhu Y.N.)
ಅವರು ಟ್ರಿಪ್‌ ನಡುವೆ ಒಂದು ಹೊಟೆಲಿನಲ್ಲಿ ಅಕಸ್ಮಾತ್ತಾಗಿ ಒಬ್ಬ ವೈಟ್ರೆಸ್ ( ಊಟ ವೈನ್ ಬಡಿಸುವ ಪರಿಚಾರಕಿ) ಎದುರಾಗುತ್ತಾಳೆ. ಅವಳ ಹೆಸರು ಮಾಯಾ. (ನನಗೆ ಈಕೆಯಂದರೆ ಪ್ರಾಣ, my eternal quest. ಇನ್ಫ್ಯಾಕ್ಟ್ ನನ್ನ ಮೊದಲ ಪುಸ್ತಕ ‘ಕಾರೇಹಣ್ಣುʼವಿನ ಮೊದಲ ಕತೆಯಾದ ‘ನನ್ನ ಪ್ರೀತಿಯʼದಲ್ಲಿ ಬರುವ ಪಾತ್ರಕ್ಕೆ ಇವಳದೇ ಹೆಸರು). ಅವಳು ಅವರನ್ನು ಎಲ್ಲಿ ಉಳಕೊಂಡಿದೀರಿ ಎಂದು ಕೇಳುತ್ತಾಳೆ. ಇಲ್ಲೇ ವಿಂಡ್‌ ಮಿಲ್ ಬಗಲಲ್ಲಿ ಎಂದು ಉತ್ತರಿಸುತ್ತಾರೆ. ನನ್ನ ಕಂಪ್ಯೂಟರಿನಲ್ಲಿ ಒಂದು ಖಾಸಗಿ ಫೋಲ್ಡರಿನ ಹೆಸರು ವಿಂಡ್‌ ಮಿಲ್ ಎಂದೇ ಇದೆ. ಜ್ಯಾಕ್ ಮೈಲ್ಸ್ ಗೆ ಮಾಯಾ ನಿನ್ನ ಇಷ್ಟಪಡ್ತಿದಾಳೆ ಎಂದು ಹೇಳುತ್ತಾನೆ. ಮೈಲ್ಸ್ ಒಪ್ಪಲ್ಲ. ಏನೊ ತಾನೊಂಚೂರು ಬರೆದಿದ್ದೇನೆ ಎಂದು ಅಭಿಮಾನವಿರುತ್ತೆ ಮಾತ್ರ ಎಂದು ಅವನ ಅನಿಸಿಕೆ. ಜ್ಯಾಕ್ ಅವಳತ್ರ ಹೋಗಿ ಮೈಲ್ಸ್ ಒಬ್ಬ ಪ್ರಕಟಿತ ಯಶಸ್ವೀ ಲೇಖಕ ಎಂದು ಸುಳ್ಳು ಹೇಳಿ ಎತ್ತಿಕೊಡುತ್ತಾನೆ. ಮಾಯಾಳ ಮತ್ತೊಬ್ಬ ಸ್ನೇಹಿತೆ ಸ್ಟೆಫಾನಿಯ ಜೊತೆಗೂಡಿ ಎರಡು ಜೋಡಿಯಾಗಿ ಸ್ಟೆಫಾನಿಯ ಮನೆಗೆ ಹೋಗುತ್ತಾರೆ. ಜ್ಯಾಕ್-ಸ್ಟೆಫಾನಿಯಾ ತಡಮಾಡದೇ ಬೆಡ್‌ ರೂಂ ಸೇರಿಕೊಂಡರೆ- ಮೈಲ್ಸ್ ಮತ್ತು ಮಾಯಾ ವೈನ್ ಕುಡಿಯುತ್ತ ಸಂಜೆ ತಳ್ಳುತ್ತಾರೆ. ಆಗ ಅವರಿಬ್ಬರ ನಡುವೆ ಒಂದು ಸಂಭಾಷಣೆ ಜರುಗುತ್ತದೆ. ಅದನ್ನು ಕನ್ನಡದಲ್ಲಿ ಹೇಳುವ ಪ್ರಯತ್ನ ಮಾಡುತ್ತೇನೆ. ರೂಪಕಮಯವಾಗಿದೆ, ಕಾವ್ಯಮಯವಾಗಿದೆ, ಗಾಢವಾಗಿದೆ… ಮತ್ತು ಬರಿಸುತ್ತದೆ.
ಇದನ್ನೂ ಓದಿ : Poetry : ಅವಿತಕವಿತೆ ; ಪರ್ವತದಿಂದ ಜಾರಿ ಪ್ರಪಾತಕ್ಕೆ ಬೀಳುವಾಗ ಅಚಾನಕ್ಕಾಗಿ ಅಂಗೈಗೆ ಸಿಲುಕಿದ ಹುಲ್ಲುಗರಿಕೆ
(ಮೈಲ್ಸ್ ಗೆ ಪಿನೋಟ್(ಕಪ್ಪು ಹುಳಿ ದ್ರಾಕ್ಷಿ) ಫೇವರಿಟ್ಟು)
ಮಾಯಾ: ನಿಮಗೆ ಯಾಕೆ ಪಿನೋಟ್ ಅಂದ್ರೆ ಅಷ್ಟಿಷ್ಟ?
ಮೈಲ್ಸ್(ವೈನಿನ ಗ್ಲಾಸು ತಿರುಗಿಸುತ್ತ): ಅದೇನೊ ಗೊತ್ತಿಲ್ಲ, ಅದೊಂಥರ ತೆಳು ಸಿಪ್ಪೆಯ, ಭಾವಾತಿರೇಕದ, ಬೇಗ ಹಣ್ಣಾಗುವ ಆದಾಗ್ಯೂ ಗಟ್ಟಿಯಾಗಿರುವ ದ್ರಾಕ್ಷಿ. ಅದು ಕೆಬರ್ ನೆಟ್ ದ್ರಾಕ್ಷಿ ತರಹ ಎಲ್ಲಂದರಲ್ಲೆ ಬೆಳೆಯುವ ನಿರ್ಲಕ್ಷ್ಯ ಮಾಡಿದರೂ ಉಳಿಯುವ ಹಣ್ಣಲ್ಲ. ಅದು ನಿರಂತರ ಕಾಳಜಿ ಮತ್ತು ಗಮನ ಬಯಸುತ್ತದೆ. ಇನ್ಫ್ಯಾಕ್ಟ್ ಪ್ರಪಂಚದ ಕೆಲವೇ ಕೆಲವು ಮೂಲೆಗಳಲ್ಲಿ ಬೆಳೆಯುತ್ತದೆ. ಬಹಳ ತಾಳ್ಮೆಯುಳ್ಳ ಚೆನ್ನಾಗಿ ಆರೈಕೆ ಮಾಡುವ ಕೃಷಿಕರು ಮಾತ್ರ ಅದನ್ನು ಬೆಳೆಯಬಲ್ಲರು. ಅದರ ಸೂಕ್ಷ್ಮ, ನವಿರಾದ ಗುಣಗಳ ಲಾಭ ಪಡೆಯಬಲ್ಲರು. ಯಾರು ಅದನ್ನು ನಿಜವಾಗಿ ಅರ್ಥ ಮಾಡಿಕೊಳ್ಳುತ್ತಾರೊ ಅವರು ಮಾತ್ರ ಅದರಿಂದ ನೈಜ ಅಭಿವ್ಯಕ್ತಿಯನ್ನು ಹೊರತೆಗೆಯಬಲ್ಲರು. ಹಾಗೆ ಮಾಡಲು ಶಕ್ತರಾಗಿಬಿಟ್ಟರೆ- ಆಗ ಅದರ ಸುಂಗಂಧ ಬೊಂಬಾಟಾಗಿರುತ್ತದೆ, ಕಾಡಲಾರಂಭಿಸುತ್ತದೆ. ಒಂಥರ ಮಾಗಿದ ಪ್ರಾಚೀನತೆ ಸೂಸುವ ಸುಗಂಧ.
ಕ್ಯಾಬರನೆಟ್‌ ಪವರ್ ಫುಲ್ಲಾಗಿದೆ, ಉತ್ಕೃಷ್ಟವಾಗಿದೆ ಎಲ್ಲ ನಿಜ, ಆದರೂ ಅದೇನೊ ನೀರಸವೆನಿಸುತ್ತದೆ. ನಿಮಗೇನನ್ನಿಸುತ್ತದೆ?
ನನಗಾ? ಅದೇ, ನಿಮಗ್ಯಾಕೆ ವೈನ್ ಹುಚ್ಚು ಎಂದೆ.
ಮಾಯಾ: ನಂಗೆ ವೈನ್ನ ಜೀವನಚರಿತ್ರೆ ಹೇಗಿರುತ್ತದೆ ಎಂದು ಯೋಚಿಸುವುದು ಇಷ್ಟ. ಅದು ನಮ್‌ ತರಹಾ ಜೀವಿಯಾಗಿದ್ದರೆ ಹೇಗೆ ಅಂತ. ಚಿಕ್ಕಂದಿನಿಂದ ಬೆಳೆಯುವಾಗಿನ ಅದರ ದಿನಗಳು ಹೇಗಿದ್ದವು, ಆ ದಿನಗಳಲ್ಲಿ ಸೂರ್ಯ ಹೇಗೆ ಬೆಳಗುತ್ತಿದ್ದ, ಆಗೆಲ್ಲ ಹೇಗೆ ಮಳೆಯಾಗುತ್ತಿತ್ತು… ಹವಾಮಾನ ಹೇಗಿರುತ್ತಿತ್ತು ಎಂದು. ಆ ದ್ರಾಕ್ಷಿಗಳನ್ನು ಕಾಳಜಿ ಮಾಡಿದ ಎತ್ತಿಕೊಂಡು ಲಾಲಿಸಿದ ಜನರ ಬಗ್ಗೆ ಯೋಚಿಸುತ್ತೇನೆ. ಹಳೆಯ ವೈನ್ ಆಗಿದ್ದರೆ- ಅದರೊಳಗೆ ಅದೆಷ್ಟು ದ್ರಾಕ್ಷಿಗಳು ಆಗಲೇ ಮಡಿದಿರಬಹುದು ಎಂದು ಚಿಂತಿಸುತ್ತೇನೆ. ದಿನಗಳೆದಂಗೆ ವೈನ್ನ ಕಳೆ ಏರುತ್ತ ಹೋಗುತ್ತದೆ ಎಂಬುದೇ ನನಗೆ ಅತ್ಯಂತ ಪ್ರಿಯವಾದ ಸಂಗತಿ. ಪ್ರತಿ ಸಲ ಬಾಟಲ್‌ ಓಪನ್‌ ಮಾಡಿದಾಗಲೂ ಒಂದೊಂದು ರುಚಿ. ಆ ಕ್ಷಣಕೂ ಮುಂಚಿನ ಅಥವಾ ಆನಂತರಕ್ಕೆ ಹೋಲಿಕೆಯಿಲ್ಲದ ಆ ಗಳಿಗೆಯ ವಿಶಿಷ್ಟ ರುಚಿ. ಯಾಕಂದರೆ- ಬಾಟಲಿಯಲ್ಲಿನ ವೈನ್ ಇನ್ನೂ ಜೀವಂತವಿದೆ. ಅದು ನಿರಂತರವಾಗಿ ಬೆಳೆಯುತ್ತಿದೆ, ಸಂಕೀರ್ಣಗೊಳ್ಳುತ್ತಿದೆ. ತನ್ನ ಸುಪ್ರೀಂ ಮಟ್ಟ ತಲುಪುವವರೆಗೆ. ಅಂದ್ರೇ.. ನಾವು ಒಂದು ಅರವತ್ತೊಂದು ವಯಸು ಮುಟ್ತೀವಲ್ಲ ಹಾಗೆ. ಆಮೇಲೆ ನಿಧಾನಕ್ಕೆ ಅನಿವಾರ್ಯವಾಗಿ ಕೆಳಗಿಳಿಯುತ್ತ ಹೋಗುತ್ತದೆ. And it tastes so fucking good.
ಇದನ್ನೂ ಓದಿ : National Wine Day: ಒಡೆದ ವೈನ್ ಬಾಟಲಿ ಮತ್ತು ‘ಕೂಲ್ ರನ್ನಿಂಗ್’ನೊಂದಿಗೆ ಮಮತಾ ಸಾಗರ್
ಆ ಗಳಿಗೆಯಲ್ಲಿ ಅವರಿಬ್ಬರೂ ತಮ್ಮ ತಮ್ಮ ಭಾವನೆಗಳನ್ನು ಸೂಕ್ಷ್ಮವಾಗಿ ದ್ರಾಕ್ಷಿ ಮತ್ತು ವೈನ್ ಮೂಲಕ ಹಂಚಿಕೊಂಡುಬಿಟ್ಟಿರುತ್ತಾರೆ. ಆದರೂ ಅವಳಿಗೆ ತನ್ನ ಮೇಲೆ ಏನಾದರೂ ಭಾವನೆ ಇರಬಹುದಾ ಎಂದು ಮೈಲ್ಸ್ಗಿನ್ನೂ ಖಚಿತವಿಲ್ಲ. ಹೆದರಿ ಕಲ್ಲಿನಂತೆ ಕೂತುಬಿಡುತ್ತಾನೆ. ಇವಳು ಇನ್ನೇನಾದರೂ ಸನ್ನೆ ಕೊಡುತ್ತಾಳಾ ಎಂದು ಕಾಯುತ್ತಾನೆ. ಮಾಯಾ ಆತನ ಕೈಮೇಲೆ ತನ್ನ ಕೈಯನ್ನು ಇರಿಸುತ್ತಾಳೆ.
ಸಿನಿಮಾದ ಮುಂದಿನ ಭಾಗದಲ್ಲಿ ಜ್ಯಾಕ್ಗೆ ಸ್ಟೆಫಾನಿಯಾ ಮೇಲೆ ಆಸೆಯಾಗಿ ಅವಳನ್ನೇ ಮದುವೆಯಾಗಬೇಕೆಂದು ನಿರ್ಧರಿಸಿ ಪ್ರೊಪೋಸ್‌ ಮಾಡಿ- ಮೈಲ್ಸ್ ಒಂದ ಸಲ ಜಾಸ್ತಿ ಕುಡಿದು ಜ್ಯಾಕ್ಗೆ ಈಗಾಗಲೆ ಮದುವೆ ಸೆಟ್‌ ಆಗಿದೆಯೆಂದು ಬಾಯಿಬಿಟ್ಟು, ಮಾಯಾ ನೀವು ಗಂಡಸರೆಲ್ಲ ಒಂದೇ ಬರೀ ಸುಳ್ಳು ಎಂದು ಸಿಟ್ಟು ಮಾಡಿಕೊಂಡು ಹೋಗುತ್ತಾಳೆ. ಎರಡೂ ಜೋಡಿಗಳು ಬೇರಾಗುತ್ತವೆ… ಏನೇನೊ ಆಗುತ್ತದೆ.. ಸುಖಾಂತ್ಯವೋ ದುಃಖಾಂತ್ಯವೊ ಎಂದು ತಿಳಿಯಲು ಸಿನಿಮಾ ನೋಡಿ.
ನಾ ಈ ಸಿನಿಮಾ ನೋಡಿದ ನಂತರದ ದಿನಗಳಲ್ಲಿ ಒಮ್ಮೆ ಅಮೆರಿಕಾಗೆ ಹೋಗಿದ್ದೆ. ಎಲ್ಲರಿಗೂ ಅಮೆರಿಕಾದ ಬಿಲ್ಡಿಂಗು ಮಾಲು ಕಾಂಪ್ಲೆಕ್ಸು ನೋಡಬೇಕು ಎಂಬ ಆಸೆಯಿದ್ದರೆ ನನಗೆ ಅಲ್ಲಿನ ಕಂಟ್ರಿ ಸೈಡ್‌ ನೋಡಬೇಕೆಂಬ ಬಯಕೆ. ಹಾಗಾಗಿ ಒಬ್ಬನೇ ಕಾರನ್ನೆತ್ತಿಕೊಂಡು ಒಂದಿಡೀ ಹಗಲು ಡ್ರೈವ್‌ ಮಾಡುತ್ತ ಹೋದೆ. ಸಿಟಿ ಬಿಟ್ಟು ಹೊರಹೋದಂತೆಲ್ಲ ನನಗೆ ಮನಸು ಪ್ರಫುಲ್ಲವಾಗುತ್ತ ಹೋಯಿತು. ಎಲ್ಲೆಲ್ಲೂ ಹಚ್ಚಹಸಿರು, ತೆಳುಬಿಸಿಲು. ಕೃಷಿಕರು, ದ್ರಾಕ್ಷಿ ತೋಟಗಳು. ನಮ್ಮಲ್ಲಿ ಬೆಂಗಳೂರು ಹೊರಗೆ ಹೋಗುತ್ತಿದ್ದಂತೆ ತೋಟಗಳು ತೆರೆದುಕೊಂಡು ತೋಟಗಳ ಎದುರೇ ರಸ್ತೆ ಬದಿಯಲ್ಲಿ ಹಣ್ಣು ಹಂಪಲು ಎಳನೀರು ಜೋಡಿಸಿಟ್ಟುಕೊಂಡಿರುತ್ತಾರಲ್ಲ ಹಾಗೆ ಅಮೆರಿಕಾದ ಕಂಟ್ರಿಸೈಡಿನಲ್ಲಿ ವೈನಿನ ಅಂಗಡಿಗಳು ಕಾಣಿಸ್ತ ಹೋದವು. ಸೇಮ್‌ ನಾವು ಮಾಡಿದಂತೆ ಅಲ್ಲಿನ ಜನ ಬುಲೆಟ್ಟು ಬೈಕು ಎತ್ತಿಕೊಂಡು ಪ್ರಯಾಣ ಹೊರಡುತ್ತಾರೆ.. ಇಂತಹ ಸ್ತಳಗಳಲ್ಲಿ ನಿಲ್ಲಿಸಿ ದ್ರಾಕ್ಷಿ ತೋಟದ ನಡುವಿರುವ ಅಂಗಡಿಗಳಿಗೆ ಲಗ್ಗೆ ಹಾಕಿ ಅಲ್ಲೇ ತಯಾರಿಸಿದ ವಿಧವಿಧ ವೈನುಗಳನ್ನು ಟೇಸ್ಟ್‌ ಮಾಡಿ ಮುಂದುವರೆಯುತ್ತಾರೆ… ನಾ ಇದನ್ನೆಲ್ಲ ನೋಡಿ ಪುಳಕೊಂಡೆ. ಮೈಲ್ಸ್ ರೀತಿ ಗ್ಲಾಸನ್ನು ಮೂಗಿಗೆ ಹಿಡಿದು ವಾಸನೆ ಗ್ರಹಿಸಲು ಯತ್ನಿಸಿದೆ.
ಮೈಲ್ಸ್ ವೈನ್ ಬಗ್ಗೆ, ಮಾಯಾ ವೈನ್ ಬಗ್ಗೆ ಯೂಟ್ಯೂಬ್ನಲ್ಲಿ ನೋಡಬಹುದು.
*
ಪ್ರತಿಕ್ರಿಯೆಗಾಗಿ : tv9kannadadigital@gmail.com
Published On - 3:13 pm, Wed, 25 May 22
