Air India: ಕಾಕ್ಪಿಟ್ನೊಳಗೆ ಗೆಳತಿ; ಪೈಲಟ್ ಅಧೋಗತಿ- ಒಬ್ಬ ಮಹಿಳೆಯಿಂದ ಪೈಲಟ್, ಕೋ-ಪೈಲಟ್, ಏರ್ ಇಂಡಿಯಾಗೆ ಫಜೀತಿ
DGCA Suspends License of Air India Pilot: ದೆಹಲಿಯಿಂದ ದುಬೈಗೆ ಹೋಗುತ್ತಿದ್ದ ಏರ್ ಇಂಡಿಯಾ ವಿಮಾನದ ಕಾಕ್ಪಿಟ್ನೊಳಗೆ ಪೈಲಟ್ನ ಗೆಳತಿ ಹೋದ ಘಟನೆಯನ್ನು ಡಿಜಿಸಿಎ ಗಂಭೀರವಾಗಿ ಪರಿಗಣಿಸಿದೆ. ಪೈಲಟ್ನ ಲೈಸೆನ್ಸ್ 3 ತಿಂಗಳು ರದ್ದು ಮಾಡಿದೆ. ಏರ್ ಇಂಡಿಯಾಗೆ 30 ಲಕ್ಷ ದಂಡ ವಿಧಿಸಿದೆ. ಪೈಲಟ್ ಗೆಳತಿ ವಿರುದ್ಧ ಕ್ರಮಕ್ಕೆ ಸೂಚಿಸಿದೆ.
Updated on:May 12, 2023 | 7:01 PM
ನವದೆಹಲಿ: ದಿಲ್ಲಿಯಿಂದ ದುಬೈಗೆ ತೆರಳುತ್ತಿದ್ದ ಏರ್ ಇಂಡಿಯಾ ವಿಮಾನದಲ್ಲಿ (Air India) ಮಹಿಳೆಯೊಬ್ಬಳು ಕಾಕ್ಪಿಟ್ನೊಳಗೆ ಹೋದ ಪರಿಣಾಮ ಪೈಲಟ್ನ ಪರವಾನಿಗೆಯನ್ನೇ (Pilot License) ತಾತ್ಕಾಲಿಕವಾಗಿ ರದ್ದು ಮಾಡಿದ ಘಟನೆ ವರದಿಯಾಗಿದೆ. ವಿಮಾನ ಹಾರಾಟದ ಮಾರ್ಗಮಧ್ಯೆ (Mid-air) ಕಾಕ್ಪಿಟ್ನೊಳಗೆ ಹೋದ ಮಹಿಳೆ ಆ ಪೈಲಟ್ನ ಸ್ನೇಹಿತೆ ಎನ್ನಲಾಗಿದೆ. ನಾಗರಿಕ ವಿಮಾನಯಾನ ಮಹಾ ನಿರ್ದೇಶನಾಲಯ (ಡಿಜಿಸಿಎ) ಈ ಪ್ರಕರಣವನ್ನು ಗಂಭೀರವಾಗಿ ಪರಿಗಣಿಸಿದ್ದು, ಆ ಪೈಲಟ್ನ ಲೈಸೆನ್ಸ್ ಅನ್ನು 3 ತಿಂಗಳ ಕಾಲ ಅಮಾನತಿನಲ್ಲಿಟ್ಟಿದೆ. ಪೈಲಟ್ಗೆ ಮಾತ್ರವಲ್ಲ ಏರ್ ಇಂಡಿಯಾ ಸಂಸ್ಥೆಗೂ 30 ಲಕ್ಷ ರೂ ದಂಡ ವಿಧಿಸಿದೆ. ಪೆಬ್ರುವರಿ 27ರಂದು ಈ ಘಟನೆ ನಡೆದದ್ದು. ಈ ಪ್ರಕರಣದ ವಿಚಾರಣೆಯನ್ನು ಸುದೀರ್ಘವಾಗಿ ನಡೆಸಿ ಡಿಜಿಸಿಎ ಇದೀಗ ತೀರ್ಪು ನೀಡಿದೆ.
ಪೈಲಟ್ನ ಬೇಜವಾಬ್ದಾರಿ ವರ್ತನೆಗೆ ಡಿಜಿಸಿಎ ನಿರಾಸೆ ವ್ಯಕ್ತಪಡಿಸಿದೆ. ಹಾಗೆಯೇ, ವಿಮಾನದ ಸುರಕ್ಷತೆಗೆ ಬೇಕಾದ ಅಗತ್ಯ ಕ್ರಮ ಮತ್ತು ವ್ಯವಸ್ಥೆಯನ್ನು ಏರ್ ಇಂಡಿಯಾ ತಂದಿಲ್ಲ ಎಂದೂ ಡಿಜಿಸಿಎ ತರಾಟೆಗೆ ತೆಗೆದುಕೊಂಡಿದೆ. ಪೈಲಟ್ ಜೊತೆಗೆ ಇದ್ದ ಕೋ–ಪೈಲಟ್ಗೂ ಡಿಜಿಸಿಎ ಛೀಮಾರಿ ಹಾಕಿದೆ. ಈ ರೀತಿ ಹೊರಗಿನವರು ಕಾಕ್ಪಿಟ್ಗೆ ಬರುವಾಗ ನೀವೇನು ಮಾಡುತ್ತಿದ್ದೀರಿ, ಯಾಕೆ ಅದನ್ನು ತಡೆಯಲಿಲ್ಲ ಎಂದು ಕೋ ಪೈಲಟ್ರನ್ನು ಪ್ರಶ್ನಿಸಲಾಗಿದೆ.
ಇದನ್ನೂ ಓದಿ: Success: ಮಣಿಪಾಲದಲ್ಲಿ ಓದಿದ್ದೇ ಟರ್ನಿಂಗ್ ಪಾಯಿಂಟ್; ವಿಜ್ಞಾನಿ ಮುರಳಿ ದಿವಿ 1.3 ಲಕ್ಷ ಕೋಟಿ ಕಂಪನಿ ಒಡೆಯರಾದ ಕಥೆ
ಪೈಲಟ್ನ ಕಾಕ್ಪಿಟ್ಗೆ ಹೋದ ಆ ಸ್ನೇಹಿತೆ ಯಾರು?
ಕುತೂಹಲ ಸಂಗತಿ ಎಂದರೆ ಅಂದು ದುಬೈಗೆ ಹೋಗುತ್ತಿದ್ದ ಏರ್ ಇಂಡಿಯಾ ವಿಮಾನದಲ್ಲಿ ಕಾಕ್ಪಿಟ್ನೊಳಗೆ ಹೋದ ಪೈಲಟ್ನ ಗೆಳತಿ ಏರ್ ಇಂಡಿಯಾ ವಿಮಾನ ಸಂಸ್ಥೆಯ ಸಿಬ್ಬಂದಿವರ್ಗಕ್ಕೆ ಸೇರಿದವರೇ ಆಗಿದ್ದರು. ವರದಿಗಳ ಪ್ರಕಾರ ಅವರು ಅಡ್ಮಿನಿಸಿಸ್ಟ್ರೇಷನ್ ವಿಭಾಗದಲ್ಲಿ ಕೆಲಸ ಮಾಡುವವರು. ಆದರೆ, ಅಂದು ದುಬೈಗೆ ಅವರು ಪ್ರಯಾಣಿಕರಾಗಿಯಷ್ಟೇ ವಿಮಾನದಲ್ಲಿದ್ದರು. ಹಾಗಿರುವಾಗ ಅವರು ಕಾಕ್ಪಿಟ್ಗೆ ಹೋಗುವಂತಿರಲಿಲ್ಲ.
ಕಾಕ್ಪಿಟ್ ಎಂಬುದು ವಿಮಾನ ಚಲಾಯಿಸುವ ಜಾಗ. ಇದು ಬಹಳ ಸೂಕ್ಷ್ಮ ಹಾಗೂ ಬಹಳ ಮುಖ್ಯವಾದ ಜಾಗ. ಪೈಲಟ್ ಬಿಟ್ಟರೆ ಬೇರೆ ಯಾರಿಗೂ ಇಲ್ಲಿ ಪ್ರವೇಶ ಇರುವುದಿಲ್ಲ. ಸ್ವಲ್ಪ ಹೆಚ್ಚು ಕಡಿಮೆಯಾದರೂ ವಿಮಾನ ದಿಕ್ಕು ತಪ್ಪಿ ಅನಾಹುತ ಸಂಭವಿಸುವ ಸಾಧ್ಯತೆ ಹೆಚ್ಚಿರುತ್ತದೆ. ಹೀಗಾಗಿ, ಡಿಜಿಸಿಎ ಫೆಬ್ರುವರಿ 27ರ ಏರ್ ಇಂಡಿಯಾ ಘಟನೆಯನ್ನು ಗಂಭೀರವಾಗಿ ಪರಿಗಣಿಸಿದ್ದು.
ಇದನ್ನೂ ಓದಿ: Twitter: ಕೊನೆಗೂ ಇಲಾನ್ ಮಸ್ಕ್ ಕೈಗೆ ಸಿಕ್ರು ಹೊಸ ಸಿಇಒ; ಟ್ವಿಟ್ಟರ್ ಮಾಲೀಕನಿಗೆ ಮುಂದೇನು ಕೆಲಸ?
ಕಾಕ್ಪಿಟ್ನೊಳಗೆ ಹೋದ ಈ ಮಹಿಳೆಯ ಮೇಲೆ ಕ್ರಮ ಕೈಗೊಳ್ಳಬೇಕೆಂದೂ ಡಿಜಿಸಿಎ ಸೂಚಿಸಿದೆ. ಅವರದ್ದು ಮ್ಯಾನೇಜಿಂಗ್ ಜವಾಬ್ದಾರಿಯೇನಾದರೂ ಇದ್ದರೆ ಅದರಿಂದ ಅವರನ್ನು ನಿರ್ದಿಷ್ಟ ಅವಧಿಯವರೆಗೆ ವಿಯುಕ್ತಿಗೊಳಿಸಬೇಕೆಂದು ತಿಳಿಸಿದೆ.
ಇನ್ನಷ್ಟು ರಾಷ್ಟ್ರೀಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
Published On - 7:00 pm, Fri, 12 May 23
