ನವಿ ಮುಂಬೈನ ರೆಸ್ಟೋರೆಂಟ್​ನಲ್ಲಿ ಭಾರಿ ಸ್ಫೋಟ, 100 ಮೀಟರ್ ದೂರದ ಆಸ್ಪತ್ರೆ ಕಿಟಕಿಗಳು ಪುಡಿಪುಡಿ, ಇಬ್ಬರಿಗೆ ಗಂಭೀರ ಗಾಯ

ಮುಂಬೈ, ಸೆಪ್ಟೆಂಬರ್ 15: ನವಿ ಮುಂಬೈನ ಸಾನ್ಪಾಡಾ ಸೆಕ್ಟರ್-1 ರಲ್ಲಿರುವ ರೆಸ್ಟೋರೆಂಟ್ ಒಂದರಲ್ಲಿ ಮಂಗಳವಾರ ಮುಂಜಾನೆ ಸಂಭವಿಸಿದ ಭೀಕರ ಸ್ಫೋಟದಲ್ಲಿ ಇಬ್ಬರು ಗಂಭೀರವಾಗಿ ಗಾಯಗೊಂಡಿದ್ದು, ಸುತ್ತಮುತ್ತಲಿನ ಹಲವು ಮಳಿಗೆಗಳು ಧ್ವಂಸಗೊಂಡಿವೆ. ಸ್ಫೋಟದ ತೀವ್ರತೆ ಎಷ್ಟಿತ್ತೆಂದರೆ ಸಮೀಪದ 5-6 ಅಂಗಡಿಗಳ ಶಟರ್‌ಗಳು ಕಿತ್ತುಬಂದಿದ್ದು, ರಸ್ತೆ ಹಾಗೂ ಫ್ಲೈಓವರ್ ಆಚೆಗಿದ್ದ ಸುಮಾರು 100 ಮೀಟರ್ ದೂರದ ಸೂರಜ್ ಆಸ್ಪತ್ರೆಯ ಗಾಜುಗಳು ಒಡೆದುಹೋಗಿವೆ. ಮೇಲ್ನೋಟಕ್ಕೆ ಗ್ಯಾಸ್ ಸಿಲಿಂಡರ್ ಸೋರಿಕೆಯಿಂದ ಈ ದುರಂತ ಸಂಭವಿಸಿರಬಹುದು ಎಂದು ಶಂಕಿಸಲಾಗಿದೆ.

ಘಟನಾ ಸ್ಥಳ: ಸಾನ್ಪಾಡಾ ಸೆಕ್ಟರ್-1 ರ ಪ್ರತೀಕ್ಷಾ ಕಟ್ಟಡದಲ್ಲಿರುವ ‘ಸಾಗರ್ ಫ್ಯಾಮಿಲಿ ರೆಸ್ಟೋರೆಂಟ್’ ಒಳಗೆ ಈ ಸ್ಫೋಟ ಸಂಭವಿಸಿದೆ. ಮುಂಜಾನೆ ವಾರ್ನಿಂಗ್ ಇಲ್ಲದೆ ಸಂಭವಿಸಿದ ಈ ಸ್ಫೋಟದ ಸದ್ದು ಬರೋಬ್ಬರಿ ಒಂದು ಕಿಲೋಮೀಟರ್ ದೂರದವರೆಗೂ ಕೇಳಿಸಿದ್ದು, ಮುಂಜಾನೆಯ ವಾಯುವಿಹಾರಕ್ಕೆ ತೆರಳಿದ್ದ ಸಾರ್ವಜನಿಕರು ಆತಂಕದಿಂದ ಬೆಚ್ಚಿಬಿದ್ದಿದ್ದಾರೆ.

ಇಬ್ಬರ ಸ್ಥಿತಿ ಗಂಭೀರ: ರೆಸ್ಟೋರೆಂಟ್ ಒಳಗೆ ತಂಗಿದ್ದ ಇಬ್ಬರು ವ್ಯಕ್ತಿಗಳು ಸ್ಫೋಟದಲ್ಲಿ ಗಂಭೀರವಾಗಿ ಗಾಯಗೊಂಡಿದ್ದಾರೆ. ರಕ್ತದ ಮಡುವಿನಲ್ಲಿದ್ದ ಅವರನ್ನು ತಕ್ಷಣವೇ ವಾಶಿಯಲ್ಲಿರುವ ನವಿ ಮುಂಬೈ ಮುನ್ಸಿಪಲ್ ಕಾರ್ಪೊರೇಷನ್ (NMMC) ಆಸ್ಪತ್ರೆಗೆ ದಾಖಲಿಸಲಾಗಿದ್ದು, ಸ್ಥಿತಿ ಚಿಂತಾಜನಕವಾಗಿದೆ. ಅದೃಷ್ಟವಶಾತ್ ಸ್ಫೋಟದ ನಂತರ ಸ್ಥಳದಲ್ಲಿ ಯಾವುದೇ ಬೆಂಕಿ ಹೊತ್ತಿಕೊಳ್ಳದ ಕಾರಣ ಭಾರೀ ಅಗ್ನಿ ದುರಂತ ತಪ್ಪಿದೆ.

ಮತ್ತಷ್ಟು ಓದಿ: ದೆಹಲಿಯ ಓಖ್ಲಾದಲ್ಲಿ ಆಕ್ಸಿಜನ್ ಸಿಲಿಂಡರ್ ಸ್ಫೋಟ: ಒಬ್ಬ ಕಾರ್ಮಿಕ ಸ್ಥಳದಲ್ಲೇ ಸಾವು, ನಾಲ್ವರಿಗೆ ಗಂಭೀರ ಗಾಯ

ವಿಧಿವಿಜ್ಞಾನ ತಂಡದಿಂದ ಪರಿಶೀಲನೆ: ಮಾಹಿತಿ ತಿಳಿಯುತ್ತಿದ್ದಂತೆ ಹತ್ತಿರದ ಠಾಣೆಯ ಪೊಲೀಸರು, ಬಾಂಬ್ ಪತ್ತೆ ಹಾಗೂ ವಿಧಿವಿಜ್ಞಾನ (Forensic) ತಜ್ಞರು ಸ್ಥಳಕ್ಕೆ ದೌಡಾಯಿಸಿ ಅವಶೇಷಗಳು ಮತ್ತು ಮಾದರಿಗಳನ್ನು ಸಂಗ್ರಹಿಸಿದ್ದಾರೆ. ರಾತ್ರಿ ವೇಳೆ ಗ್ಯಾಸ್ ಸಿಲಿಂಡರ್ ವಾಲ್ವ್‌ನಿಂದ ಅನಿಲ ಸೋರಿಕೆಯಾಗಿ ಇಡೀ ಕೊಠಡಿಯಲ್ಲಿ ತುಂಬಿಕೊಂಡಿತ್ತೇ ಅಥವಾ ಮುಂಜಾನೆ ಲೈಟ್ ಸ್ವಿಚ್ ಹಾಕಿದಾಗ ಸ್ಪಾರ್ಕ್ ಉಂಟಾಗಿ ಬ್ಲಾಸ್ಟ್ ಸಂಭವಿಸಿತೇ ಎಂಬ ಕೋನದಲ್ಲಿ ತನಿಖೆ ನಡೆಸಲಾಗುತ್ತಿದೆ.

ವಿಡಿಯೋ

#WATCH | Maharashtra | An explosion occurred at ‘Sagar Family Restaurant,’ located in the Pratiksha Building in Sector 1, Sanpada, Navi Mumbai, today. As per preliminary reports, it was a gas cylinder explosion. Due to the explosion, the shutters of nearby shops were blown off. pic.twitter.com/DsvxEoYwnp

— ANI (@ANI) September 15, 2026

ಸುರಕ್ಷತಾ ನಿಯಮಗಳ ಪರಿಶೀಲನೆ: ವಸತಿ ಕಟ್ಟಡದ ಕೆಳಭಾಗದಲ್ಲಿ ವಾಣಿಜ್ಯ ಸಿಲಿಂಡರ್‌ಗಳನ್ನು ಬಳಸುವಾಗ ಕಡ್ಡಾಯವಾಗಿ ಪಾಲಿಸಬೇಕಾದ ಸುರಕ್ಷತಾ ಕ್ರಮಗಳು ಮತ್ತು ಅಗ್ನಿಶಾಮಕ ಪರವಾನಗಿಯನ್ನು ರೆಸ್ಟೋರೆಂಟ್ ಹೊಂದಿತ್ತೇ ಎಂಬುದನ್ನು ಪಾಲಿಕೆ ಅಧಿಕಾರಿಗಳು ಪರಿಶೀಲಿಸುತ್ತಿದ್ದಾರೆ.

ರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ