ಡಬ್ಲ್ಯೂಟಿಸಿ ಆಡಿದ 45 ದಿನಗಳ ನಂತರ ಭಾರತ ಮತ್ತು ಇಂಗ್ಲೆಂಡ್ ಟೆಸ್ಟ್​ ಸರಣಿಯನ್ನಾಡುವುದು ಮೂರ್ಖತನ ಮತ್ತು ಹಾಸ್ಯಾಸ್ಪದ: ವೆಂಗ್​ಸರ್ಕಾರ್

ಡಬ್ಲ್ಯೂಟಿಸಿ ಆಡಿದ 45 ದಿನಗಳ ನಂತರ ಭಾರತ ಮತ್ತು ಇಂಗ್ಲೆಂಡ್ ಟೆಸ್ಟ್​ ಸರಣಿಯನ್ನಾಡುವುದು ಮೂರ್ಖತನ ಮತ್ತು ಹಾಸ್ಯಾಸ್ಪದ: ವೆಂಗ್​ಸರ್ಕಾರ್
ದಿಲಿಪ್ ವೆಂಗ್​ಸರ್ಕಾರ್

ಡಬ್ಲ್ಯೂಟಿಸಿ ನಂತರ ಇಂಗ್ಲೆಂಡ್, ಶ್ರೀಲಂಕಾ ಮತ್ತು ಪಾಕಿಸ್ತಾನಗಳ ವಿರುದ್ಧ ಸೀಮಿತ ಓವರ್ ಪಂದ್ಯಗಳ ಸರಣಿಗಳನ್ನು ಹೋಸ್ಟ್ ಮಾಡಲಿದೆ. ಈ ಸರಣಿಗಳು ಜೂನ್ ಮತ್ತು ಜುಲೈನಲ್ಲಿ ನಡೆಯಲಿವೆ. ಡಬ್ಲ್ಯೂಟಿಸಿ ಮುಗಿದ ಕೂಡಲೇ ಟೆಸ್ಟ್​ ಸರಣಿಯನ್ನು ಯಾಕೆ ನಿಗದಿಪಡಿಸಿಲ್ಲ ಎಂದು ವೆಂಗ್​ಸರ್ಕಾರ್ ಕೇಳುತ್ತಿದ್ದಾರೆ.

Arun Belly

| Edited By: Ghanashyam D M | ಡಿ.ಎಂ.ಘನಶ್ಯಾಮ

Jun 01, 2021 | 10:40 PM

ಮುಂಬೈ: ಭಾರತದ ಮಾಜಿ ಕ್ರಿಕೆಟ್ ಕ್ಯಾಪ್ಟನ್ ದಿಲಿಪ್ ವೆಂಗ್​ಸರ್ಕಾರ್ ಸ್ಟ್ರೇಟ್ ಡ್ರೈವ್​ಗೆ ಖ್ಯಾತರಾಗಿದ್ದಂತೆ ನೇರ ಮಾತಿಗೂ ಹೆಸರಾದವರು. ಜೇಡವನ್ನು ಜೇಡವೆಂದೇ ಕರೆಯಬಲ್ಲ ಛಾತಿಯುಳ್ಳ ಕೆಲವೇ ಮಾಜಿ ಮತ್ತು ಹಾಲಿ ಆಟಗಾರರಲ್ಲಿ ವೆಂಗ್​ಸರ್ಕಾರ್ ಕೂಡ ಒಬ್ಬರು. ಸಾಮಾನ್ಯವಾಗಿ ರಾಷ್ಟ್ರೀಯ ತಂಡಕ್ಕೆ ಆಯ್ಕೆಯಾದವರು ಭಾರತೀಯ ಕ್ರಿಕೆಟ್​ ನಿಯಂತ್ರಣ ಮಂಡಳಿಯ (ಬಿಸಿಸಿಐ) ವಿರುದ್ಧ ಯಾವುದೇ ಟೀಕೆ ಮಾಡುವುದಿಲ್ಲ. ತಂಡದಲ್ಲಿ ಸ್ಥಾನ ಕಳೆದುಕೊಳ್ಳುವ ಭೀತಿ ಅವರನ್ನು ಆವರಿಸಿರುತ್ತದೆ. ಈಗ ಐಪಿಎಲ್​ನಿಂದಾಗಿ ಪರಿಸ್ಥಿತಿ ಸ್ವಲ್ಪ ಬದಲಾಗಿದೆ. ರಾಷ್ಟ್ರೀಯ ತಂಡಕ್ಕೆ ಆಯ್ಕೆಯಾಗುವ ಅವಕಾಶ ಸಿಗಲಿಲ್ಲದಿದ್ದರೇನಂತೆ, ಐಪಿಎಲ್ ಇದೆಯಲ್ಲ,ಅದರಲ್ಲಿ ನನ್ನ ಪ್ರತಿಭೆ ತೋರುತ್ತೇನೆ ಅಂತ ಯುವ ಪ್ರತಿಭಾವಂತರು ಅಂದುಕೊಳ್ಳುತ್ತಾರೆ. ಆದರೆ, ತಾವಾಡುತ್ತಿದ್ದ ದಿನಗಳಲ್ಲಿ ಕರ್ನಲ್ ಎಂದು ಕರೆಸಿಕೊಳ್ಳುತ್ತಿದ್ದ ವೆಂಗ್​ಸರ್ಕಾರ್ ಬಿಸಿಸಿಐನ ಧೋರಣೆ ಸರಿ ಅನಿಸದಿದ್ದರೆ ಅದನ್ನು ನೇರವಾಗಿ ಹೇಳಿಬಿಡುತ್ತಿದ್ದರು. 

ಈಗ ನೋಡಿ, ಇದೇ ಕರ್ನಲ್ ಮಂಡಳಿಯು ಭಾರತದ ಇಂಗ್ಲೆಂಡ್​ ಪ್ರವಾಸವನ್ನು ಪ್ಲ್ಯಾನ್ ಮಾಡಿರುವ ರೀತಿಯನ್ನು ಪ್ರಶ್ನಿಸಿದ್ದಾರೆ. ಇದು ಕ್ರಿಕೆಟ್ ಪ್ರೇಮಿಗಳ ಗಮನಕ್ಕೂ ಬಂದಿರಲಿಲ್ಲ. ವಿಷಯ ಏನು ಗೊತ್ತಾ? ವಿರಾಟ್​ ಕೊಹ್ಲಿ ನೇತೃತ್ವದ ಟೀಮ್ ಇಂಡಿಯಾ ಕೇನ್ ವಿಲಿಯಮ್ಸನ್ ನೇತೃತ್ವದ ನ್ಯೂಜಿಲೆಂಡ್ ವಿರುದ್ಧ 5 ದಿನಗಳ ವಿಶ್ವ ಟೆಸ್ಟ್​ ಚಾಂಪಿಯನ್​ಶಿಪ್ (ಡಬ್ಲ್ಯೂಟಿಸಿ) ಪಂದ್ಯವನ್ನು ಜೂನ್ 18ರಿಂದ ಆಡಿದ ನಂತರ ಇಂಗ್ಲೆಂಡ್ ವಿರುದ್ಧ 5 ಪಂದ್ಯಗಳ ಟೆಸ್ಟ್​ ಸರಣಿಯನ್ನು ಆಡಲಿದೆ. ಇದು ಎಲ್ಲರಿಗೂ ಗೊತ್ತಿರುವ ಸಂಗತಿಯೇ.

ಆದರೆ ಗೊತ್ತಿರದ ಸಂಗತಿಯೇನೆಂದರೆ, ಈ ಡಬ್ಲ್ಯೂಟಿಸಿ ಪಂದ್ಯ ಆಡಿದ ಒಂದೂವರೆ ತಿಂಗಳ ನಂತರ ಎರಡು ರಾಷ್ಟ್ರಗಳ ನಡುವೆ ಟೆಸ್ಟ್​ ಸರಣಿ ಆರಂಭವಾಗಲಿದೆ! ಡಬ್ಲ್ಯೂಟಿಸಿ ಪಂದ್ಯವು ರಿಸರ್ವ್ ದಿನವನ್ನು ಹಿಡಿದು 23 ಕ್ಕೆ ಕೊನೆಗೊಂಡರೆ ಟೆಸ್ಟ್ ಸರಣಿಯು ಆಗಸ್ಟ್​ 4 ರಿಂದ ಆರಂಭವಾಗಲಿದೆ!! ಅಲ್ಲಿಯವರೆಗೆ ಅಂದರೆ 45 ದಿನಗಳ ಕಾಲ ಟೀಮ್ ಇಂಡಿಯಾದ ಸದಸ್ಯರು ಇಂಗ್ಲೆಂಡ್​ನಲ್ಲಿ ಸೋಂಬೇರಿಗಳಂತೆ ಅಲೆಯಲಿದ್ದಾರೆ. ಹೌದು, ನೀವು ಓದಿದ್ದು ಅಕ್ಷರಶಃ ನಿಜ.

ವೆಂಗ್​ಸರ್ಕಾರ್ ಇದನ್ನೇ ಪ್ರಶ್ನಿಸುತ್ತಿದ್ದಾರೆ.

ಡಬ್ಲ್ಯೂಟಿಸಿ ನಂತರ ಇಂಗ್ಲೆಂಡ್, ಶ್ರೀಲಂಕಾ ಮತ್ತು ಪಾಕಿಸ್ತಾನಗಳ ವಿರುದ್ಧ ಸೀಮಿತ ಓವರ್ ಪಂದ್ಯಗಳ ಸರಣಿಗಳನ್ನು ಹೋಸ್ಟ್ ಮಾಡಲಿದೆ. ಈ ಸರಣಿಗಳು ಜೂನ್ ಮತ್ತು ಜುಲೈನಲ್ಲಿ ನಡೆಯಲಿವೆ. ಡಬ್ಲ್ಯೂಟಿಸಿ ಮುಗಿದ ಕೂಡಲೇ ಟೆಸ್ಟ್​ ಸರಣಿಯನ್ನು ಯಾಕೆ ನಿಗದಿಪಡಿಸಿಲ್ಲ ಎಂದು ವೆಂಗ್​ಸರ್ಕಾರ್ ಕೇಳುತ್ತಿದ್ದಾರೆ.

‘ಈ ಒಂದೂವರೆ ತಿಂಗಳ ಅವಧಿಯಲ್ಲಿ ಭಾರತದ ಆಟಗಾರರು ಏನು ಮಾಡಲಿದ್ದಾರೆ? ಈ ಶೆಡ್ಯೂಲಿಂಗ್ ನನ್ನಲ್ಲಿ ನಿಜಕ್ಕೂ ಅಚ್ಚರಿ ಮೂಡಿಸಿದೆ. ಯಾವ ರೀತಿಯ ಪ್ರವಾಸವನ್ನು ಅವರು (ಬಿಸಿಸಿಐ) ಪ್ಲ್ಯಾನ್ ಮಾಡಿದ್ದಾರೆ? ಒಂದು ಟೆಸ್ಟ್ ಪಂದ್ಯವಾಡಿದ ನಂತರ ಅವರು (ಟೀಮ್ ಇಂಡಿಯಾ ಸದಸ್ಯರು) ಅದ್ಹೇಗೆ ಒಂದೂವರೆ ತಿಂಗಳುಗಳವರೆಗೆ ಯಾವುದೇ ಕ್ರಿಕೆಟ್​ ಆಡದಂತಿರುತ್ತಾರೆ?’ ಎಂದು ಸುದ್ದಿ ಮಾಧ್ಯಮವೊಂದರ ಜೊತೆ ಮಾತಾಡುತ್ತಾ ವೆಂಗ್​ಸರ್ಕಾರ್ ಕೇಳಿದ್ದಾರೆ.

‘ಒಂದು ಪಕ್ಷ ಶ್ರೀಲಂಕಾ ಮತ್ತು ಪಾಕಿಸ್ತಾನ ಸೀಮಿತ ಓವರ್​ಗಳ ಸರಣಿಗಳನ್ನು ಜುಲೈನಲ್ಲಿ ಆಡಲು ಇಂಗ್ಲೆಂಡ್​ (ಶ್ರೀಲಂಕಾ ಮತ್ತು ಪಾಕಿಸ್ತಾನ ಇಂಗ್ಲೆಂಡ್ ವಿರುದ್ಧ ತಲಾ 3-ಪಂದ್ಯಗಳ ಒಡಿಐ ಹಾಗೂ ಅಷ್ಟೇ ಸಂಖ್ಯೆಯ ಟಿ20ಪಂದ್ಯಗಳ ಸರಣಿಗಳನ್ನು ಆಡಲಿವೆ) ಪ್ರವಾಸಕ್ಕೆ ಹೋದರೂ ಡಬ್ಲ್ಯೂಟಿಸಿ ಮುಗಿದ ಕೂಡಲೇ ಟೆಸ್ಟ್​ ಸರಣಿಯನ್ನು ಯಾಕೆ ಆಯೋಜಿಸುತ್ತಿಲ್ಲ?’ಎಂದು ಕರ್ನಲ್ ಕೇಳಿದ್ದಾರೆ

‘ಡಬ್ಲ್ಯೂಟಿಸಿ ನಂತರ ಟೀಮ್ ಇಂಡಿಯಾ ಸ್ವದೇಶಕ್ಕೆ ಮರಳಲಿದೆಯೇ? ಒಂದೂವರೆ ತಿಂಗಳು ಕಾಲ ಅವರೇನು ಮಾಡಲಿದ್ದಾರೆ? ಈ 45 ದಿನಗಳಲ್ಲಿ ವಿವಿಧ ಕೌಂಟಿಗಳ ವಿರುದ್ಧ ಟೂರ್​ ಗೇಮ್​ಗಳನ್ನು ಆಯೋಜಿಸಲಾಗಿದೆ ಎಂದು ಭಾವಿಸಿದರೂ ಒಂದೂವರೆ ತಿಂಗಳು ಸುದೀರ್ಘ ಅವಧಿಯಾಗಿದೆ,’ ಎಂದು 1976ರಿಂದ 1992ರವರೆಗೆ ಭಾರತದ ಪರ 116 ಟೆಸ್ಟ್​ಗಳನ್ನಾಡಿದ ವೆಂಗ್​ಸರ್ಕಾರ್ ಹೇಳಿದ್ದಾರೆ.

‘ಇದು ಹುಚ್ಚುತನದ ಪರಮಾವಧಿ. ಒಂದೂವರೆ ತಿಂಗಳುಗಳವರೆಗೆ ಕ್ರಿಕೆಟ್ ಇಲ್ಲದಿರುವುದು ಆಶ್ಚರ್ಯ ಹುಟ್ಟಿಸುವ ಸಂಗತಿಯಾಗಿದೆ. ಭಾರತ ಅಲ್ಲಿ ಟೆಸ್ಟ್​ಗಳನ್ನಾಡಲು ಹೋಗಿದೆ ಅಂತಾದರೆ, ಅದು ಇಂಥ ಅಂತರಗಳಿಲ್ಲದೆ ಸತತವಾಗಿ ಟೆಸ್ಟ್​ಗಳನ್ನಾಡಬೇಕು. ಈ ಅಂತರಗಳಲ್ಲಿ ಪಾಕಿಸ್ತಾನ ಮತ್ತು ಶ್ರೀಲಂಕಾ ಟಿ20 ಹಾಗೂ ಒಡಿಐ ಪಂದ್ಯಗಳ ಸರಣಿಗಳನ್ನಾಡುವುದು ಮೂರ್ಖತನ ಮತ್ತು ಹಾಸ್ಯಾಸ್ಪದ,’ ಎಂದು ವೆಂಗ್​ಸರ್ಕಾರ್ ಹೇಳಿದ್ದಾರೆ.

ಇದನ್ನೂ ಓದಿ: ವಿಶ್ವ ಟೆಸ್ಟ್ ಚಾಂಪಿಯನ್​ಶಿಪ್: ರೋಹಿತ್​ ಜೊತೆ ಯಾರು ಇನ್ನಿಂಗ್ಸ್ ಆರಂಭಿಸಬಹುದು- ಅಗರವಾಲ್ ಅಥವಾ ಗಿಲ್?

Follow us on

Related Stories

Most Read Stories

Click on your DTH Provider to Add TV9 Kannada