ಅರ್ಧಶತಕದ ಸನಿಹದಲ್ಲಿ ಎಡವಿದ ಆರ್ಯವೀರ್ ಸೆಹ್ವಾಗ್ 

ಟೀಮ್ ಇಂಡಿಯಾದ ಮಾಜಿ ಆರಂಭಿಕ ಬ್ಯಾಟರ್ ವೀರೇಂದ್ರ ಸೆಹ್ವಾಗ್ ಅವರ ಪುತ್ರ  ಆರ್ಯವೀರ್ ಸೆಹ್ವಾಗ್, ಆಸ್ಟ್ರೇಲಿಯಾ ಅಂಡರ್-19 ವಿರುದ್ಧದ ಎರಡನೇ ಯೂತ್ ಏಕದಿನ ಪಂದ್ಯದಲ್ಲಿ ಕೇವಲ 3 ರನ್‌ಗಳಿಂದ ತಮ್ಮ ಚೊಚ್ಚಲ ಅರ್ಧಶತಕವನ್ನು ಮಿಸ್ ಮಾಡಿಕೊಂಡಿದ್ದಾರೆ. ರಾಜ್‌ಕೋಟ್‌ನ ನಿರಂಜನ್ ಶಾ ಸ್ಟೇಡಿಯಂನಲ್ಲಿ ನಡೆದ ಈ ಪಂದ್ಯದಲ್ಲಿ ಆಕರ್ಷಕ ಬ್ಯಾಟಿಂಗ್ ಪ್ರದರ್ಶಿಸಿದ ಅವರು 47 ರನ್ ಗಳಿಸಿ ರನೌಟ್ ಆಗುವ ಮೂಲಕ ನಿರಾಸೆ ಮೂಡಿಸಿದರು.

ಸ್ಫೋಟಕ ಬ್ಯಾಟಿಂಗ್:

ಈ ಪಂದ್ಯದಲ್ಲಿ ಟಾಸ್ ಗೆದ್ದ ಟೀಮ್ ಇಂಡಿಯಾ ಬ್ಯಾಟಿಂಗ್ ಆಯ್ದುಕೊಂಡಿದ್ದರು. ಅದರಂತೆ ಇನಿಂಗ್ಸ್ ಆರಂಭಿಸಿದ ಆರ್ಯವೀರ್, ತಂದೆ ವೀರೇಂದ್ರ ಸೆಹ್ವಾಗ್ ಅವರ ಆಕ್ರಮಣಕಾರಿ ಬ್ಯಾಟಿಂಗ್ ಶೈಲಿಯನ್ನು ನೆನಪಿಸುವಂತೆ ಬ್ಯಾಟ್ ಬೀಸಿದ್ದರು.

ಮೊದಲ ಪಂದ್ಯದಂತೆಯೇ ಈ ಪಂದ್ಯದಲ್ಲೂ ಎದುರಿಸಿದ ಮೊದಲನೇ ಚೆಂಡನ್ನೇ ಬೌಂಡರಿಗಟ್ಟುವ ಮೂಲಕ ರನ್ ಖಾತೆ ತೆರೆದ ಜೂನಿಯರ್ ಸೆಹ್ವಾಗ್, ಆಸೀಸ್ ಬೌಲರ್‌ಗಳನ್ನು ಮನಬಂದಂತೆ ಕಾಡಿದರು. ಕೇವಲ 48 ಎಸೆತಗಳನ್ನು ಎದುರಿಸಿದ ಅವರು 9 ಭರ್ಜರಿ ಬೌಂಡರಿಗಳ ನೆರವಿನಿಂದ 47 ರನ್ ಚಚ್ಚಿದರು. ಆದರೆ ದುರದೃಷ್ಟವಶಾತ್, ಆಸ್ಟ್ರೇಲಿಯಾದ ಜ್ಯಾಕ್ ಝೋಸ್ನೆಕ್ ಎಸೆದ ಅದ್ಭುತ ಥ್ರೋಗೆ ಸಿಲುಕಿ ರನೌಟ್ ರೂಪದಲ್ಲಿ ವಿಕೆಟ್ ಒಪ್ಪಿಸಿ ನಿರಾಸೆಯಿಂದ ಪೆವಿಲಿಯನ್ ಕಡೆ ಹೆಜ್ಜೆ ಹಾಕಬೇಕಾಯಿತು.

ಮೊದಲ ಪಂದ್ಯದಲ್ಲೂ ಮಿಂಚಿದ್ದ ಆರ್ಯವೀರ್:

ಇದೇ ಸರಣಿಯ ಮೊದಲ ಏಕದಿನ ಪಂದ್ಯದ ಮೂಲಕ ಭಾರತ ಅಂಡರ್-19 ತಂಡಕ್ಕೆ ಪಾದಾರ್ಪಣೆ ಮಾಡಿದ್ದ ಆರ್ಯವೀರ್, ಆ ಪಂದ್ಯದಲ್ಲೂ 5 ಬೌಂಡರಿಗಳೊಂದಿಗೆ 26 ಎಸೆತಗಳಲ್ಲಿ 28 ರನ್ ಗಳಿಸಿ ತಂಡಕ್ಕೆ ಉತ್ತಮ ಆರಂಭ ಒದಗಿಸಿದ್ದರು.

ತಮ್ಮ ಎರಡನೇ ಪಂದ್ಯದಲ್ಲೇ ಅರ್ಧಶತಕದ ಸನಿಹ ಬಂದು ರನೌಟ್ ಆಗಿರುವುದು ಅಭಿಮಾನಿಗಳಲ್ಲಿ ಸಣ್ಣ ಬೇಸರ ಮೂಡಿಸಿದ್ದರೂ, ಅವರ ಈ ಸ್ಫೋಟಕ ಬ್ಯಾಟಿಂಗ್ ಶೈಲಿ ಭಾರತೀಯ ಕ್ರಿಕೆಟ್‌ನ ಮುಂದಿನ ಭರವಸೆಯ ತಾರೆಯ ಮುನ್ಸೂಚನೆ ನೀಡಿದೆ.

ಬೃಹತ್ ಮೊತ್ತ ಪೇರಿಸಿದ ಟೀಮ್ ಇಂಡಿಯಾ:

ಈ ಪಂದ್ಯದಲ್ಲಿ 4ನೇ ಕ್ರಮಾಂಕದಲ್ಲಿ ಕಣಕ್ಕಿಳಿದ ಯಶ್‌ಬರ್ಧನ್ ಚೌಹಾಣ್ ಭರ್ಜರಿ ಬ್ಯಾಟಿಂಗ್ ಪ್ರದರ್ಶಿಸಿದರು. ಆರಂಭದಲ್ಲಿ ಎಚ್ಚರಿಕೆಯ ಬ್ಯಾಟಿಂಗ್​ಗೆ ಒತ್ತು ನೀಡಿದ ಯಶ್ ಇದಾದ ಬಳಿಕ ರನ್​ ವೇಗವನ್ನು ಹೆಚ್ಚಿಸಿದರು. ಈ ಮೂಲಕ 100 ಎಸೆತಗಳಲ್ಲಿ 2 ಸಿಕ್ಸ್ ಹಾಗೂ 15 ಫೋರ್​ಗಳೊಂದಿಗೆ 122 ರನ್​ ಬಾರಿಸಿದರು. ಈ ಶತಕದ ನೆರವಿನೊಂದಿಗೆ ಟೀಮ್ ಇಂಡಿಯಾ 50 ಓವರ್​ಗಳಲ್ಲಿ 7 ವಿಕೆಟ್ ಕಳೆದುಕೊಂಡು 341 ರನ್ ಕಲೆಹಾಕಿದೆ.

ಭಾರತ ಅಂಡರ್-19 ಪ್ಲೇಯಿಂಗ್ 11: ಲಕ್ಷ್ಯ ರಾಜೇಶ್ ರಾಯಚಂದನಿ (ನಾಯಕ ) ಆರ್ಯವೀರ್ ಸೆಹ್ವಾಗ್ , ಕುಶಾಗ್ರ ಓಜಾ , ಯಶ್​ಬರ್ಧನ್ ಚೌಹಾಣ್ , ಅನ್ವಯ್ ದ್ರಾವಿಡ್ (ವಿಕೆಟ್ ಕೀಪರ್) , ವಿ ಕೆ ವಿನೀತ್ , ಯಶ್ವೀರ್ ಗೌಡ್ , ಮನಲ್ ಚೌಹಾಣ್ , ಚಿಗುರುಪತಿ ವೆಂಕಟ , ಕಾವ್ಯಾ ಪಟೇಲ್ , ಮೋಹಿತ್ ಉಲ್ವಾ.

ಇದನ್ನೂ ಓದಿ: ಸೆಂಚುರಿ ಮೇಲೆ ಸೆಂಚುರಿ: ಹೊಸ ಇತಿಹಾಸ ಬರೆದ ಮಾಝ್ ಸದಾಕತ್!

ಆಸ್ಟ್ರೇಲಿಯಾ ಅಂಡರ್-19 ಪ್ಲೇಯಿಂಗ್ 11: ನೀಲ್ ಪಟೇಲ್ , ಹೇಡನ್ ಬಾರ್ಬುಲೋವಿಕ್ (ವಿಕೆಟ್ ಕೀಪರ್), ಜೆಡ್ ಹೋಲಿಕ್ , ಜ್ಯಾಕ್ ಜೋಸ್ನೆಕ್ (ನಾಯಕ) , ಬ್ಲೇಕ್ ಕ್ಯಾಟಲ್ , ಮ್ಯಾಥ್ಯೂ ಲೌಗ್ , ಕಾನರ್ ಗ್ರೆಗೊರಿ , ಜಾಕೋಬ್ ಪೀಟ್ಜ್ , ಪ್ಯಾಟ್ರಿಕ್ ಸುಲ್ಲಿವನ್ , ಥಾಮಸ್ ವಾಸಿಯೊ , ಥಿಯೋ ಸಿಂಗೋಸ್.