IND vs SL: ಲಂಕಾ ಪಡೆಯ ದಿಟ್ಟ ಹೋರಾಟ: ಕುತೂಹಲ ಘಟ್ಟದತ್ತ ಪಂದ್ಯ
India vs Sri Lanka 2nd Test: ಭಾರತ ಮತ್ತು ಶ್ರೀಲಂಕಾ ನಡುವಣ ದ್ವಿತೀಯ ಟೆಸ್ಟ್ ಪಂದ್ಯವು ಕೊಲೊಂಬೋದ ಸಿಂಹಳೀಸ್ ಸ್ಪೋರ್ಟ್ಸ್ ಕ್ಲಬ್ (SSC) ಮೈದಾನದಲ್ಲಿ ನಡೆಯುತ್ತಿದೆ. ಎರಡು ಪಂದ್ಯಗಳ ಈ ಸರಣಿಯಲ್ಲಿ ಈಗಾಗಲೇ 1-0 ಮುನ್ನಡೆಯಲ್ಲಿರುವ ಭಾರತ ತಂಡ, ಈ ಪಂದ್ಯದಲ್ಲೂ ಜಯ ಸಾಧಿಸಿದರೆ ಸರಣಿಯನ್ನು ತನ್ನದಾಗಿಸಿಕೊಳ್ಳಲಿದೆ.
Updated on:Aug 27, 2026 | 12:53 PM
ಕೊಲಂಬೋದ ಎಸ್ಎಸ್ಸಿ ಮೈದಾನದಲ್ಲಿ ನಡೆಯುತ್ತಿರುವ ಭಾರತ ಮತ್ತು ಶ್ರೀಲಂಕಾ ನಡುವಣ ದ್ವಿತೀಯ ಟೆಸ್ಟ್ ಪಂದ್ಯವು ರೋಚಕ ಘಟ್ಟ ತಲುಪಿದೆ. ಪ್ರವಾಸಿ ಭಾರತ ತಂಡದ ಬೃಹತ್ ಮೊತ್ತಕ್ಕೆ ಉತ್ತರವಾಗಿ ಫಾಲೋ-ಆನ್ ಹಿನ್ನಡೆ ಅನುಭವಿಸಿದ ಶ್ರೀಲಂಕಾ, ದ್ವಿತೀಯ ಇನ್ನಿಂಗ್ಸ್ನಲ್ಲಿ ದಿಟ್ಟ ಹೋರಾಟ ಪ್ರದರ್ಶಿಸಿದೆ. ಈ ಹೋರಾಟದ ಫಲವಾಗಿ ಲಂಕಾ ಬ್ಯಾಟರ್ಗಳು ಐದನೇ ದಿನದಾಟದ ಮೊದಲ ಸೆಷನ್ನಲ್ಲಿ ಸಂಪೂರ್ಣ ಮೇಲುಗೈ ಸಾಧಿಸಿದ್ದಾರೆ.
ಒಂದು ಹಂತದಲ್ಲಿ ಕೇವಲ 229 ರನ್ಗಳಿಗೆ 6 ವಿಕೆಟ್ ಕಳೆದುಕೊಂಡು ಇನ್ನಿಂಗ್ಸ್ ಸೋಲಿನ ಭೀತಿಯಲ್ಲಿದ್ದ ಸಿಂಹಳೀಯರಿಗೆ ಮಧ್ಯಮ ಕ್ರಮಾಂಕದ ಬ್ಯಾಟರ್ಗಳು ಆಸರೆಯಾಗಿದ್ದಾರೆ. 5ನೇ ದಿನದ ಆರಂಭಿಕ ಅವಧಿಯಲ್ಲಿ ಭಾರತೀಯ ಬೌಲರ್ಗಳ ತಂತ್ರಗಾರಿಕೆಯನ್ನು ಸಮರ್ಥವಾಗಿ ಮೆಟ್ಟಿನಿಂತ ಶ್ರೀಲಂಕಾ ಬ್ಯಾಟರ್ಗಳು ವಿಕೆಟ್ ಪತನಕ್ಕೆ ಬ್ರೇಕ್ ಹಾಕಿದರು.
ದಿನುಷಾ-ನುವಾಂತ ಬ್ಯಾಟಿಂಗ್ ಪರಾಕ್ರಮ:
ಲಂಕಾ ಪಡೆಯ ಪರವಾಗಿ ಸೋನಲ್ ದಿನುಷಾ ಜವಾಬ್ದಾರಿಯುತ ಬ್ಯಾಟಿಂಗ್ ಪ್ರದರ್ಶಿಸಿ ಆಕರ್ಷಕ ಅರ್ಧಶತಕ ದಾಖಲಿಸಿದ್ದಾರೆ. ಅವರಿಗೆ ಕ್ರೀಸ್ನಲ್ಲಿ ದೀರ್ಘಕಾಲ ಸಾಥ್ ನೀಡಿದ ಕೇಶರ ನುವಾಂತ, ಭಾರತದ ಸ್ಪಿನ್ ಹಾಗೂ ವೇಗದ ದಾಳಿಯನ್ನು ಅತ್ಯಂತ ಸಂಯಮದಿಂದ ಎದುರಿಸಿದರು. ಈ ಜೋಡಿಯು ಶತಕದ ಜೊತೆಯಾಟದ ಮೂಲಕ ತಂಡವನ್ನು ಕೇವಲ ಆಪತ್ತಿನಿಂದ ಪಾರು ಮಾಡಿದ್ದಲ್ಲದೆ, ಶ್ರೀಲಂಕಾ ದ್ವಿತೀಯ ಇನ್ನಿಂಗ್ಸ್ನಲ್ಲಿ 320ಕ್ಕೂ ಅಧಿಕ ರನ್ ಕಲೆಹಾಕಲು ನೆರವಾಗಿದ್ದಾರೆ.
ಭಾರತಕ್ಕೆ ಲಂಕಾ ಮುನ್ನಡೆಯ ಶಾಕ್:
ಭೋಜನ ವಿರಾಮದ ವೇಳೆಗೆ ಶ್ರೀಲಂಕಾ ತಂಡ 116 ರನ್ಗಳ ಪ್ರಮುಖ ಮುನ್ನಡೆ ಸಾಧಿಸುವಲ್ಲಿ ಯಶಸ್ವಿಯಾಗಿದೆ. ಸರಣಿಯಲ್ಲಿ 1-0 ಮುನ್ನಡೆ ಕಾಯ್ದುಕೊಂಡಿರುವ ಭಾರತಕ್ಕೆ ಪಂದ್ಯವನ್ನು ಗೆಲ್ಲಲು ಇನ್ನು ಕೇವಲ 4 ವಿಕೆಟ್ಗಳ ಅಗತ್ಯವಿದೆ. ಆದರೆ, ಪಿಚ್ ಬ್ಯಾಟಿಂಗ್ಗೆ ಪೂರಕವಾಗುತ್ತಿರುವುದರಿಂದ ಭಾರತೀಯ ಬೌಲರ್ಗಳು ಹರಸಾಹಸ ಪಡಬೇಕಾಗಿದೆ.
5ನೇ ದಿನದ ಅಂತಿಮ ಅವಧಿಗಳಲ್ಲಿ ಪಂದ್ಯವು ಡ್ರಾದತ್ತ ಸಾಗಲಿದೆಯೇ ಅಥವಾ ಭಾರತದ ಬೌಲರ್ಗಳು ಕಂಬ್ಯಾಕ್ ಮಾಡಲಿದ್ದಾರೆಯೇ ಎಂಬುದು ಕುತೂಹಲ ಮೂಡಿಸಿದೆ.
2 ಸೆಷನ್ ಬಾಕಿ:
ಐದನೇ ದಿನದಾಟದ ಮೊದಲ ಸೆಷನ್ನಲ್ಲಿ ವಿಕೆಟ್ ನಷ್ಟವಿಲ್ಲದೆ ಶ್ರೀಲಂಕಾ ಸಂಪೂರ್ಣ ಮೇಲುಗೈ ಸಾಧಿಸಿದೆ. ಅದರಂತೆ ಇದೀಗ ತಂಡವು 116 ರನ್ಗಳ ಮುನ್ನಡೆ ಪಡೆದುಕೊಂಡಿದೆ. ಆದಾಗ್ಯೂ ಪಂದ್ಯದಲ್ಲಿ ಇನ್ನೆರಡು ಸೆಷನ್ಗಳು ಬಾಕಿ ಇದ್ದು, ಈ ಅವಧಿಯಲ್ಲಿ ಒಟ್ಟು 60 ಓವರ್ಗಳ ಆಟ ನಡೆಯಲಿದೆ.
ಇಲ್ಲಿ 2ನೇ ಸೆಷನ್ನಲ್ಲಿ ಭಾರತ ತಂಡ 4 ವಿಕೆಟ್ಗಳನ್ನು ಕಬಳಿಸಿ ಶ್ರೀಲಂಕಾ ತಂಡವನ್ನು ಆಲೌಟ್ ಮಾಡಬೇಕಾದ ಅನಿವಾರ್ಯತೆ ಎದುರಾಗಿದೆ. ಏಕೆಂದರೆ ಎರಡನೇ ಸೆಷನ್ನಲ್ಲೇ ಆಲೌಟ್ ಮಾಡಿದರೆ ಮಾತ್ರ, ಭಾರತ ತಂಡವು ಮೂರನೇ ಸೆಷನ್ನಲ್ಲಿ ಶ್ರೀಲಂಕಾ ನೀಡುವ ರನ್ ಗುರಿಯನ್ನು ಚೇಸ್ ಮಾಡಿ ಪಂದ್ಯವನ್ನು ಗೆಲ್ಲಲು ಸಾಧ್ಯವಾಗುತ್ತದೆ.
ಇದನ್ನೂ ಓದಿ: ಮೊದಲ 3 ಎಸೆತಗಳಲ್ಲೇ ಹ್ಯಾಟ್ರಿಕ್: ಹೊಸ ವಿಶ್ವ ದಾಖಲೆ ಬರೆದ ಲಿಂಗೇಶ್!
ಆದರೆ ಅತ್ತ ಶ್ರೀಲಂಕಾ ತಂಡವು ಮೂರನೇ ಸೆಷನ್ವರೆಗೂ ಬ್ಯಾಟಿಂಗ್ ಮುಂದುವರಿಸಿ ಪಂದ್ಯವನ್ನು ಡ್ರಾ ಮಾಡಿಕೊಳ್ಳಲು ಪ್ಲಾನ್ ರೂಪಿಸಿದೆ. ಹೀಗಾಗಿ ಟೀಮ್ ಇಂಡಿಯಾಗೆ ಈ 2ನೇ ಸೆಷನ್ ಅತ್ಯಂತ ನಿರ್ಣಾಯಕವಾಗಿ ಮಾರ್ಪಟ್ಟಿದೆ. ಅದರಂತೆ ಈ ಪಂದ್ಯವು ಡ್ರಾದಲ್ಲಿ ಕೊನೆಗೊಳ್ಳಲಿದೆಯೇ ಅಥವಾ ಟೀಮ್ ಇಂಡಿಯಾ ರನ್ ಬೆನ್ನಟ್ಟಿ ಗೆಲುವು ಸಾಧಿಸಲಿದೆಯೇ ಎಂಬುದನ್ನು ಕಾದು ನೋಡಬೇಕಿದೆ.
Published On - 12:48 pm, Thu, 27 August 26
