1,123 ದಿನಗಳ ಬಳಿಕ ರೋಹಿತ್ ಶರ್ಮಾರನ್ನು ಸೊನ್ನೆ ಸುತ್ತಿಸಿದ ಕಿವೀಸ್ ವೇಗಿ!

ಆಕ್ಲೆಂಡ್‌ನ ಈಡನ್ ಪಾರ್ಕ್‌ನಲ್ಲಿ ನ್ಯೂಝಿಲೆಂಡ್ ವಿರುದ್ಧ ನಡೆಯುತ್ತಿರುವ ಐದು ಪಂದ್ಯಗಳ ಏಕದಿನ ಸರಣಿಯ ಮೊದಲ ಪಂದ್ಯದಲ್ಲಿ ಭಾರತ ತಂಡದ ಆರಂಭಿಕ ದಾಂಡಿಗ ರೋಹಿತ್ ಶರ್ಮಾ ಶೂನ್ಯಕ್ಕೆ ಔಟಾಗಿದ್ದಾರೆ. ಕಿವೀಸ್ ವೇಗಿ ಕೈಲ್ ಜೇಮಿಸನ್ ಎಸೆತದಲ್ಲಿ ರೋಹಿತ್ ಶರ್ಮಾ ಕೇವಲ 6 ಎಸೆತಗಳನ್ನು ಎದುರಿಸಿ ಯಾವುದೇ ರನ್ ಗಳಿಸದೆ (ಡಕ್ ಔಟ್) ಮಿಚೆಲ್ ಸ್ಯಾಂಟ್ನರ್‌ಗೆ ಕ್ಯಾಚ್ ನೀಡಿ ಪೆವಿಲಿಯನ್ ಸೇರಿದ್ದಾರೆ. ವಿಶೇಷ ಎಂದರೆ ಏಕದಿನ ಕ್ರಿಕೆಟ್‌ನಲ್ಲಿ ಇದು ಕಳೆದ 1,123 ದಿನಗಳ ನಂತರ ರೋಹಿತ್ ಶರ್ಮಾ ಅವರ ಮೊದಲ ಡಕ್ ಔಟ್ ಆಗಿದೆ.

ಅಂದರೆ 2023ರ ಬಳಿಕ ರೋಹಿತ್ ಶರ್ಮಾ ಏಕದಿನ ಕ್ರಿಕೆಟ್​ನಲ್ಲಿ ಒಮ್ಮೆಯೂ ಶೂನ್ಯಕ್ಕೆ ಔಟಾಗಿರಲಿಲ್ಲ. ಆದರೆ ಈ ಬಾರಿ ಕೈಲ್ ಜೇಮಿಸನ್ ಎಸೆದ ಆಫ್-ಸ್ಟಂಪ್‌ಗಿಂತ ಹೊರಗಿದ್ದ ಫುಲ್ ಲೆಂತ್ ಎಸೆತವನ್ನು ರೋಹಿತ್ ಆಡಲು ಪ್ರಯತ್ನಿಸಿದರು. ಆದರೆ ಚೆಂಡು ಪಿಚ್‌ನಲ್ಲಿ ಕೊಂಚ ನಿಧಾನವಾಗಿ ಬಂದಿದ್ದರಿಂದ ಟೈಮಿಂಗ್ ಮಿಸ್ ಆಗಿ, ಮಿಡ್-ಆಫ್‌ನಲ್ಲಿದ್ದ ನ್ಯೂಝಿಲೆಂಡ್ ನಾಯಕ ಮಿಚೆಲ್ ಸ್ಯಾಂಟ್ನರ್ ಅವರ ಕೈಗೆ ನೇರವಾಗಿ ಕ್ಯಾಚ್ ನೀಡಿತು. ಸ್ಯಾಂಟ್ನರ್ ಡೈವ್ ಹೊಡೆದು ಅತ್ಯಾಕರ್ಷಕ ಕ್ಯಾಚ್ ಪಡೆಯುವಲ್ಲಿ ಯಶಸ್ವಿಯಾದರು.

 1,123 ದಿನಗಳ ಸುದೀರ್ಘ ಓಟಕ್ಕೆ ಬ್ರೇಕ್:

•  ರೋಹಿತ್ ಶರ್ಮಾ ಕೊನೆಯ ಬಾರಿಗೆ ಒಡಿಐ ಮಾದರಿಯಲ್ಲಿ ಶೂನ್ಯಕ್ಕೆ ಔಟ್ ಆಗಿದ್ದು ಅಕ್ಟೋಬರ್ 7, 2023 ರಂದು ಆಸ್ಟ್ರೇಲಿಯಾ ವಿರುದ್ಧದ ಒಡಿಐ ವಿಶ್ವಕಪ್ ಪಂದ್ಯದಲ್ಲಿ.
• ಅದಾದ ನಂತರ ಸತತ 39 ಏಕದಿನ ಇನ್ನಿಂಗ್ಸ್‌ಗಳಲ್ಲಿ ಅವರು ಒಂದೂ ಬಾರಿಯೂ ಶೂನ್ಯಕ್ಕೆ ಔಟ್ ಆಗದೆ ಸ್ಥಿರ ಪ್ರದರ್ಶನ ಕಾಯ್ದುಕೊಂಡಿದ್ದರು.
• ಇದೀಗ ಮೂರು ವರ್ಷಗಳ ನಂತರ ಕೈಲ್ ಜೇಮಿಸನ್, ರೋಹಿತ್ ಶರ್ಮಾ ಅವರ ಈ ಸುದೀರ್ಘ ದಾಖಲೆಯ ಓಟಕ್ಕೆ ಬ್ರೇಕ್ ಹಾಕಿದ್ದಾರೆ.

ಏಕದಿನ ಕ್ರಿಕೆಟ್​ ಶೂನ್ಯಶೂರರು:

ಈ ಶೂನ್ಯದೊಂದಿಗೆ ರೋಹಿತ್ ಶರ್ಮಾ ಟೀಮ್ ಇಂಡಿಯಾ ಪರ ಏಕದಿನ ಕ್ರಿಕೆಟ್​ನಲ್ಲಿ ಅತ್ಯಧಿಕ ಸೊನ್ನೆ ಸುತ್ತಿದ ಆಟಗಾರರ ಪಟ್ಟಿಯಲ್ಲಿ 7ನೇ ಸ್ಥಾನಕ್ಕೇರಿದ್ದಾರೆ. ಈ ಪಟ್ಟಿಯಲ್ಲಿ ಅಗ್ರಸ್ಥಾನದಲ್ಲಿರುವುದು ಮಾಸ್ಟರ್ ಬಾಸ್ಟರ್ ಸಚಿನ್ ತೆಂಡೂಲ್ಕರ್.