SL vs IND: ಭಾರತ ವಿರುದ್ಧದ ಕೊನೆಯ ಸೋಲಿಗೆ ಸೇಡು ತೀರಿಸಿಕೊಂಡ ಶ್ರೀಲಂಕಾ
SL-W vs IN-W: ಕೊಲಂಬೊದ ಪ್ರೇಮದಾಸ ಕ್ರೀಡಾಂಗಣದಲ್ಲಿ ನಡೆದ ತ್ರಿಕೋನ ಸರಣಿಯ ನಾಲ್ಕನೇ ಪಂದ್ಯದಲ್ಲಿ, ಶ್ರೀಲಂಕಾ ಮಹಿಳಾ ತಂಡವು ಭಾರತವನ್ನು 3 ವಿಕೆಟ್ಗಳಿಂದ ಸೋಲಿಸಿದೆ. ಮೊದಲು ಬ್ಯಾಟ್ ಮಾಡಿದ ಭಾರತ 275 ರನ್ ಗಳಿಸಿದರೆ, ಶ್ರೀಲಂಕಾ 49.1 ಓವರ್ಗಳಲ್ಲಿ ಗುರಿ ಮುಟ್ಟಿತು. ರಿಚಾ ಘೋಷ್ ಭಾರತದ ಪರ 58 ರನ್ ಗಳಿಸಿದರೆ, ನೀಲಾಕ್ಷಿ ಡಿ ಸಿಲ್ವಾ ಶ್ರೀಲಂಕಾ ಪರ 56 ರನ್ ಗಳಿಸಿ ತಂಡವನ್ನು ಗೆಲುವಿನತ್ತ ಮುನ್ನಡೆಸಿದರು.
Updated on:May 04, 2025 | 8:53 PM
ಕೊಲಂಬೊದ ಪ್ರೇಮದಾಸ ಕ್ರೀಡಾಂಗಣದಲ್ಲಿ ನಡೆಯುತ್ತಿರುವ ಮೂರು ಮಹಿಳಾ ತಂಡಗಳ ನಡುವಿನ ತ್ರಿಕೋನ ಸರಣಿಯ ನಾಲ್ಕನೇ ಪಂದ್ಯದಲ್ಲಿ ಆತಿಥೇಯ ಶ್ರೀಲಂಕಾ ತಂಡವು, ಭಾರತೀಯ ಮಹಿಳಾ ತಂಡವನ್ನು (IND vs SL) ಮೂರು ವಿಕೆಟ್ಗಳಿಂದ ಸೋಲಿಸಿತು. ಈ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ಮಾಡಿದ ಭಾರತ ಮಹಿಳಾ ತಂಡ 50 ಓವರ್ಗಳಲ್ಲಿ 9 ವಿಕೆಟ್ ನಷ್ಟಕ್ಕೆ 275 ರನ್ ಗಳಿಸಿತು. ಇದಕ್ಕೆ ಉತ್ತರವಾಗಿ ಶ್ರೀಲಂಕಾ ತಂಡ 49.1 ಓವರ್ಗಳಲ್ಲಿ 7 ವಿಕೆಟ್ ಕಳೆದುಕೊಂಡು ಗೆಲುವಿನ ಗುರಿ ತಲುಪಿತು. ಈ ಮೂಲಕ ಶ್ರೀಲಂಕಾ, ಭಾರತದ ವಿರುದ್ಧದ ಹಿಂದಿನ ಸೋಲಿಗೆ ಸೇಡು ತೀರಿಸಿಕೊಂಡಿತು. ಆ ಪಂದ್ಯದಲ್ಲಿ ಟೀಂ ಇಂಡಿಯಾ, ಶ್ರೀಲಂಕಾವನ್ನು 9 ವಿಕೆಟ್ಗಳಿಂದ ಸೋಲಿಸಿತ್ತು.
ರಿಚಾ ಘೋಷ್ ಅದ್ಭುತ ಬ್ಯಾಟಿಂಗ್
ಈ ಪಂದ್ಯದಲ್ಲಿ ಟಾಸ್ ಗೆದ್ದ ಶ್ರೀಲಂಕಾ, ಭಾರತವನ್ನು ಮೊದಲು ಬ್ಯಾಟಿಂಗ್ ಮಾಡಲು ಆಹ್ವಾನಿಸಿತು. ಹೀಗಾಗಿ ಮೊದಲು ಬ್ಯಾಟ್ ಮಾಡಿದ ಭಾರತ ಮಹಿಳಾ ತಂಡ 50 ಓವರ್ಗಳಲ್ಲಿ 9 ವಿಕೆಟ್ಗೆ 275 ರನ್ ಗಳಿಸಿತು. ಭಾರತದ ಪರ ರಿಚಾ ಘೋಷ್ ಅದ್ಭುತ ಬ್ಯಾಟಿಂಗ್ ನಡೆಸಿ ಕೇವಲ 48 ಎಸೆತಗಳಲ್ಲಿ ಐದು ಬೌಂಡರಿ ಮತ್ತು ಮೂರು ಸಿಕ್ಸರ್ಗಳ ಸಹಿತ 58 ರನ್ ಗಳಿಸಿದರು. ಉಳಿದಂತೆ ಜೆಮಿಮಾ ರೊಡ್ರಿಗಸ್ (37 ರನ್), ಪ್ರತೀಕಾ ರಾವಲ್ (35 ರನ್) ಮತ್ತು ಹರ್ಮನ್ಪ್ರೀತ್ ಕೌರ್ (30 ರನ್) ಕೂಡ ಉತ್ತಮ ಇನ್ನಿಂಗ್ಸ್ ಆಡಿದರು. ಶ್ರೀಲಂಕಾ ಪರ ಚಾಮರಿ ಅಟಪಟ್ಟು ಅದ್ಭುತ ಬೌಲಿಂಗ್ ಮಾಡಿ 10 ಓವರ್ಗಳಲ್ಲಿ 43 ರನ್ಗಳಿಗೆ 3 ವಿಕೆಟ್ ಪಡೆದರೆ, ಸುಗಂಧಿಕಾ ಕುಮಾರಿ ಕೂಡ 44 ರನ್ ನೀಡುವ ಮೂಲಕ 3 ಆಟಗಾರ್ತಿಯರನ್ನು ಪೆವಿಲಿಯನ್ಗೆ ಕಳುಹಿಸಿದರು.
ಆರಂಭಿಕ ವಿಕೆಟ್ಗಳು ಬಿದ್ದರೂ ಭಾರತಕ್ಕೆ ಲಾಭವಾಗಲಿಲ್ಲ
276 ರನ್ಗಳ ಗುರಿ ಬೆನ್ನಟ್ಟಿದ ಲಂಕಾ ತಂಡವನ್ನು ಭಾರತ ಆರಂಭದಲ್ಲೇ ಒತ್ತಡಕ್ಕೆ ಸಿಲುಕಿಸಿತು. ಒಂದು ಹಂತದಲ್ಲಿ ಆತಿಥೇಯ ಶ್ರೀಲಂಕಾ 209 ರನ್ಗಳಿಗೆ 5 ವಿಕೆಟ್ ಕಳೆದುಕೊಂಡು ಸೋಲುವ ಭೀತಿಯಲ್ಲಿತ್ತು. ಆದರೆ ಆ ನಂತರ ನೀಲಾಕ್ಷಿ ಡಿ ಸಿಲ್ವಾ ಕೇವಲ 33 ಎಸೆತಗಳಲ್ಲಿ 56 ರನ್ಗಳ ಅಬ್ಬರದ ಇನ್ನಿಂಗ್ಸ್ ಆಡುವ ಮೂಲಕ ತಂಡವನ್ನು ಮತ್ತೆ ಗೆಲುವಿನ ಟ್ರ್ಯಾಕ್ಗೆ ತಂದರು. ಕೊನೆಯಲ್ಲಿ ಅನುಷ್ಕಾ ಸಂಜೀವನಿ (ಅಜೇಯ 23) ಮತ್ತು ಸುಗಂಧಿಕಾ ಕುಮಾರಿ (ಅಜೇಯ 19) ಭಾರತದ ದವಡೆಯಿಂದ ಜಯವನ್ನು ಕಸಿದುಕೊಂಡರು. ಈ ಇಬ್ಬರು ಬ್ಯಾಟರ್ಗಳು ಎಂಟನೇ ವಿಕೆಟ್ಗೆ 38 ರನ್ಗಳ ಅಜೇಯ ಜೊತೆಯಾಟವನ್ನಾಡಿ ತಂಡವನ್ನು ಗೆಲುವಿನ ದಡ ಮುಟ್ಟಿಸಿದರು. ಶ್ರೀಲಂಕಾ ಪರ ಹರ್ಷಿತಾ ಸಮರವಿಕ್ರಮ ಅತ್ಯಧಿಕ 53 ರನ್ಗಳ ಅರ್ಧಶತಕ ಬಾರಿಸಿದರೆ, ಭಾರತದ ಪರ ಆಫ್ ಸ್ಪಿನ್ನರ್ ಸ್ನೇಹ್ ರಾಣಾ 10 ಓವರ್ಗಳಲ್ಲಿ 45 ರನ್ಗಳಿಗೆ 3 ವಿಕೆಟ್, ಅರುಂಧತಿ ರೆಡ್ಡಿ, ಪ್ರತಿಕಾ ರಾವಲ್ ಮತ್ತು ಎನ್. ಚಾರ್ನಿ ತಲಾ ಒಂದು ವಿಕೆಟ್ ಪಡೆದರು.
IPL 2025: ರಾಜಸ್ಥಾನ್ ಹೆಗಲೇರಿದೆ ದುರಾದೃಷ್ಟ; ಕೆಕೆಆರ್ ವಿರುದ್ಧ ರಾಯಲ್ಸ್ಗೆ 1 ರನ್ ಸೋಲು
ಪಾಯಿಂಟ್ ಪಟ್ಟಿ
ಶ್ರೀಲಂಕಾ ವಿರುದ್ಧದ ಈ ಸೋಲಿನ ಹೊರತಾಗಿಯೂ ಭಾರತ ವನಿತಾ ಪಡೆ ಪಾಯಿಂಟ್ ಪಟ್ಟಿಯಲ್ಲಿ ಅಗ್ರಸ್ಥಾನದಲ್ಲಿದ್ದರೆ, ಆತಿಥೇಯ ಶ್ರೀಲಂಕಾ ತಂಡ ಎರಡನೇ ಸ್ಥಾನವನ್ನು ಪಡೆದುಕೊಂಡಿದೆ. ಉಳಿದಂತೆ ಮೊದಲ ಎರಡು ಪಂದ್ಯಗಳನ್ನು ಸೋತಿರುವ ದಕ್ಷಿಣ ಆಫ್ರಿಕಾ ವನಿತಾ ಪಡೆ ಯಾವುದೇ ಅಂಕಗಳಿಲ್ಲದೆ ಪಾಯಿಂಟ್ ಪಟ್ಟಿಯಲ್ಲಿ ಮೂರನೇ ಸ್ಥಾನದಲ್ಲಿದೆ.
ಮತ್ತಷ್ಟು ಕ್ರೀಡಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
Published On - 8:51 pm, Sun, 4 May 25
