ಪಾಕ್ ವಿರುದ್ಧ ಅಬ್ಬರಿಸಿದ ಕೊಹ್ಲಿ ಲಂಕಾ ವಿರುದ್ದ ಮಂಕಾಗಲು ಇದುವೇ ಕಾರಣ..!

ಕೊಲಂಬೊದ ಆರ್​. ಪ್ರೇಮದಾಸ ಮೈದಾನದಲ್ಲಿ ನಡೆದ ಏಷ್ಯಾಕಪ್​ನ ಸೂಪರ್-4 ಹಂತದ 3ನೇ ಪಂದ್ಯದಲ್ಲಿ ಪಾಕಿಸ್ತಾನ್ ವಿರುದ್ಧ ವಿರಾಟ್ ಕೊಹ್ಲಿ ಸಿಡಿಲಬ್ಬರದ ಬ್ಯಾಟಿಂಗ್ ಪ್ರದರ್ಶಿಸಿದ್ದರು. ಆ ಪಂದ್ಯದಲ್ಲಿ ಮೂರನೇ ಕ್ರಮಾಂಕದಲ್ಲಿ ಬ್ಯಾಟ್ ಬೀಸಿದ್ದ ಕಿಂಗ್ ಕೊಹ್ಲಿ 94 ಎಸೆತಗಳಲ್ಲಿ 3 ಭರ್ಜರಿ ಸಿಕ್ಸ್ ಹಾಗೂ 9 ಫೋರ್​ಗಳೊಂದಿಗೆ ಅಜೇಯ 122 ರನ್ ಬಾರಿಸಿ ಅಬ್ಬರಿಸಿದ್ದರು.

ಆದರೆ ಇದೇ ಮೈದಾನದಲ್ಲಿ ಮಂಗಳವಾರ ನಡೆದ ಪಂದ್ಯದಲ್ಲಿ ವಿರಾಟ್ ಕೊಹ್ಲಿ ಎದುರಿಸಿದ್ದು 12 ಎಸೆತಗಳು. ಕಲೆಹಾಕಿದ್ದು ಕೇವಲ 3 ರನ್​ಗಳು ಮಾತ್ರ. ಅಂದರೆ ಒಂದೇ ದಿನಕ್ಕೆ ವಿರಾಟ್ ಕೊಹ್ಲಿ ಮೂರಂಕಿ ಮೊತ್ತದಿಂದ 3 ಅಂಕಿಗೆ ಇಳಿದಿದ್ದರು. ಇದಕ್ಕೆ ಮುಖ್ಯ ಕಾರಣ ಎಡಗೈ ಸ್ಪಿನ್ನರ್ ಮೋಡಿ.

ಅಂದರೆ ಶ್ರೀಲಂಕಾ ನಾಯಕ ದಸುನ್ ಶಾನಕ ಎಡಗೈ ಸ್ಪಿನ್ನರ್​ ಅನ್ನು ವಿರಾಟ್ ಕೊಹ್ಲಿ ವಿರುದ್ಧ ಹೊಸ ಅಸ್ತ್ರವಾಗಿ ಪ್ರಯೋಗಿಸಿದ್ದರು. ಅತ್ತ ಶುಭ್​ಮನ್ ಗಿಲ್ ವಿಕೆಟ್ ಪಡೆದ ಖುಷಿಯಲ್ಲಿದ್ದ ದುನಿತ್ ವೆಲ್ಲಲಾಗೆ ಕೊಹ್ಲಿ ಕೂಡ ಸುಲಭವಾಗಿ ವಿಕೆಟ್ ಒಪ್ಪಿಸಿದರು.

ಸಾಮಾನ್ಯವಾಗಿ ವಿರಾಟ್ ಕೊಹ್ಲಿ ಎಡಗೈ ಸ್ಪಿನ್ನರ್​ಗಳ ಎಸೆತದಲ್ಲಿ ಶಾರ್ಟ್ ಮಿಡ್ ವಿಕೆಟ್​ನತ್ತ ಶಾಟ್ ಬಾರಿಸಲು ತಡಕಾಡುತ್ತಾರೆ. ಈ ದೌರ್ಬಲ್ಯವನ್ನು ಅರಿತಿದ್ದ ಶ್ರೀಲಂಕಾ ನಾಯಕ ದಸುನ್ ಶಾನಕ ಎಡಗೈ ಸ್ಪಿನ್ನರ್​ ಅನ್ನು ಕೊಹ್ಲಿ ವಿರುದ್ಧ ಪ್ರಯೋಗಿಸಿದ್ದಾರೆ. ಅದರಂತೆ ಯುವ ಎಡಗೈ ಸ್ಪಿನ್ನರ್ ದುನಿತ್ ಕೊಹ್ಲಿಯನ್ನು ಶಾರ್ಟ್ ಮಿಡ್ ವಿಕೆಟ್​ನತ್ತ ಬಾರಿಸುವಲ್ಲಿ ಪ್ರೇರೇಪಿಸಿದರು.

ಇತ್ತ ಭರ್ಜರಿ ಫಾರ್ಮ್​ನಲ್ಲಿದ್ದ ಕೊಹ್ಲಿ ಕೂಡ ಯುವ ಸ್ಪಿನ್ನರ್​ನ ಸವಾಲನ್ನು ಸ್ವೀಕರಿಸಿ ಶಾರ್ಟ್ ಮಿಡ್ ವಿಕೆಟ್​ನತ್ತ ಬಾರಿಸಲು ಯತ್ನಿಸಿದರು. ಆದರೆ ಚೆಂಡು ಲೆಗ್ ಸೈಡ್​ನಲ್ಲಿ ಫ್ರಂಟ್​ ಫೀಲ್ಡ್​ನಲ್ಲಿದ್ದ ದಸುನ್ ಶಾನಕ ಕೈ ಸೇರಿತು. ಇದರೊಂದಿಗೆ ಎಡಗೈ ಸ್ಪಿನ್ನರ್ ವಿರಾಟ್ ಕೊಹ್ಲಿ ಪಾಲಿಗೆ ಮತ್ತೊಮ್ಮೆ ಮುಳುವಾದರು.

ಏಕೆಂದರೆ ಏಕದಿನ ಕ್ರಿಕೆಟ್​ನಲ್ಲಿ ವಿರಾಟ್ ಕೊಹ್ಲಿ 97 ಇನಿಂಗ್ಸ್​ಗಳಲ್ಲಿ ಎಡಗೈ ಸ್ಪಿನ್ನರ್​ಗಳನ್ನು ಎದುರಿಸಿದ್ದಾರೆ. ಈ ವೇಳೆ 22 ಬಾರಿ ವಿಕೆಟ್ ಒಪ್ಪಿಸಿದ್ದರು ಎಂಬುದು ಇಲ್ಲಿ ಉಲ್ಲೇಖಾರ್ಹ. ಹಾಗೆಯೇ ಎಡಗೈ ಸ್ಪಿನ್ನರ್​ಗಳ ದಾಳಿಯಲ್ಲಿ ವಿರಾಟ್ ಕೊಹ್ಲಿ 89.97 ಸ್ಟ್ರೈಕ್ ರೇಟ್‌ನಲ್ಲಿ 1427 ರನ್​ಗಳಿಸಲಷ್ಟೇ ಶಕ್ತರಾಗಿದ್ದಾರೆ.

ಈ ಎಲ್ಲಾ ಅಂಕಿ ಅಂಶಗಳೊಂದಿಗೆ ತಂತ್ರ ರೂಪಿಸಿದ್ದ ಶ್ರೀಲಂಕಾ ತಂಡವು ವಿರಾಟ್ ಕೊಹ್ಲಿ ವಿರುದ್ಧ ಎಡಗೈ ಸ್ಪಿನ್ನರ್​ ಅಸ್ತ್ರವನ್ನು ಬಳಸಿದ್ದಾರೆ. ಈ ಮೂಲಕ ಸುಲಭವಾಗಿ ಔಟ್ ಮಾಡುವಲ್ಲಿ ಯಶಸ್ವಿಯಾಗಿದ್ದಾರೆ.

12 ಇನಿಂಗ್ಸ್​ಗಳಲ್ಲಿ 8 ಬಾರಿ ಔಟ್:

2022 ರಿಂದ ವಿರಾಟ್ ಕೊಹ್ಲಿ ಏಕದಿನ ಕ್ರಿಕೆಟ್​ನಲ್ಲಿ 12 ಬಾರಿ ಎಡಗೈ ಸ್ಪಿನ್ನರ್​ಗಳ ವಿರುದ್ಧ ಬ್ಯಾಟ್ ಬೀಸಿದ್ದಾರೆ. ಈ ವೇಳೆ 8 ಬಾರಿ ಔಟ್ ಆಗಿರುವುದು ಅಚ್ಚರಿ. ಇಲ್ಲಿ ಮತ್ತೊಂದು ಅಚ್ಚರಿ ಎಂದರೆ ಈ 12 ಇನಿಂಗ್ಸ್​ಗಳಲ್ಲಿ ಒಮ್ಮೆಯೂ ಬಲಗೈ ಸ್ಪಿನ್ನರ್​ಗಳು ಔಟ್ ಮಾಡಿಲ್ಲ ಎಂಬುದು. ಅಂದರೆ ಕಳೆದೊಂದು ವರ್ಷದಿಂದ ವಿರಾಟ್ ಕೊಹ್ಲಿ ಪಾಲಿಗೆ ಎಡಗೈ ಸ್ಪಿನ್ನರ್​ಗಳೇ ಕಂಟಕವಾಗಿ ಪರಿಣಮಿಸಿದ್ದಾರೆ.

ಎಡಗೈ ಸ್ಪಿನ್ನರ್​ vs ವಿರಾಟ್ ಕೊಹ್ಲಿ:

ವಿರಾಟ್ ಕೊಹ್ಲಿ ಏಕದಿನ ಕ್ರಿಕೆಟ್​ನಲ್ಲಿ ಮಾತ್ರ ಎಡಗೈ ಸ್ಪಿನ್ನರ್​ಗಳ ಎಸೆತಗಳಲ್ಲಿ ಮುಗ್ಗರಿಸುತ್ತಿದ್ದಾರೆ. ಇದಾಗ್ಯೂ ಒಟ್ಟಾರೆ ಅಂಕಿ ಅಂಶಗಳನ್ನು ಗಣನೆಗೆ ತೆಗೆದುಕೊಂಡರೆ ಕೊಹ್ಲಿ ಉತ್ತಮ ಪ್ರದರ್ಶನ ನೀಡಿದ್ದಾರೆ ಎನ್ನಬಹುದು. ಏಕೆಂದರೆ ವಿರಾಟ್ ಕೊಹ್ಲಿ ಎಲ್ಲಾ ಮೂರು ಸ್ವರೂಪಗಳಲ್ಲಿ 220 ಇನ್ನಿಂಗ್ಸ್‌ಗಳಲ್ಲಿ ಎಡಗೈ ಸ್ಪಿನ್ನರ್‌ಗಳನ್ನು ಎದುರಿಸಿದ್ದಾರೆ.

ಇದನ್ನೂ ಓದಿ: ಕಿಂಗ್ ಕೊಹ್ಲಿಯ 1 ಶತಕಕ್ಕೆ 10 ದಾಖಲೆಗಳು ಉಡೀಸ್..!

ಈ ವೇಳೆ 45 ಬಾರಿ ಎಡಗೈ ಸ್ಪಿನ್ನರ್​ಗೆ ತಮ್ಮ ವಿಕೆಟ್ ನೀಡಿದ್ದಾರೆ. ಇದೇ ವೇಳೆ 71.86 ಸರಾಸರಿಯಲ್ಲಿ 2989 ರನ್​ಗಳಿಸುವಲ್ಲಿ ಯಶಸ್ವಿಯಾಗಿದ್ದಾರೆ. ಇದಾಗ್ಯೂ 2022 ರಿಂದ ವಿರಾಟ್ ಕೊಹ್ಲಿ 12 ಏಕದಿನ ಇನಿಂಗ್ಸ್​ಗಳಲ್ಲಿ 8 ಬಾರಿ ಎಡಗೈ ಸ್ಪಿನ್ನರ್​​ಗಳಿಗೆ ವಿಕೆಟ್ ಒಪ್ಪಿಸಿರುವುದು ಅಚ್ಚರಿ ಎನ್ನದೇ ವಿಧಿಯಿಲ್ಲ.

Published On - 6:29 pm, Tue, 12 September 23