ಹೊಸ ನಿಯಮಗಳ ಹೈಡ್ರಾಮಾ! ಒಂದೇ ದಿನ 3 ರೆಡ್ ಕಾರ್ಡ್..!
ಫುಟ್ಬಾಲ್ ಮೈದಾನದಲ್ಲಿ ‘ರೆಡ್ ಕಾರ್ಡ್’ ಎನ್ನುವುದು ಕೇವಲ ಎಚ್ಚರಿಕೆಯಲ್ಲ. ಅದು ಆಟದ ಗತಿಯನ್ನೇ ಬದಲಿಸಬಲ್ಲ ಅತ್ಯಂತ ಕಠಿಣ ಶಿಕ್ಷೆ! ವಿಶ್ವದ ಅತ್ಯಂತ ಜನಪ್ರಿಯ ಕ್ರೀಡೆಯಾದ ಫುಟ್ಬಾಲ್ನಲ್ಲಿ ಶಿಸ್ತು ಮತ್ತು ಆಟಗಾರರ ಸುರಕ್ಷತೆಗೆ ಮೊದಲ ಆದ್ಯತೆ ನೀಡಲಾಗುತ್ತದೆ. ಪಂದ್ಯದ ವೇಳೆ ಆಟಗಾರರು ನಿಯಮಗಳನ್ನು ಉಲ್ಲಂಘಿಸಿದರೆ ಅಥವಾ ಅಶಿಸ್ತಿನ ವರ್ತನೆ ತೋರಿದರೆ ರೆಫರಿ ರೆಡ್ ಕಾರ್ಡ್ ಪ್ರದರ್ಶಿಸುತ್ತಾರೆ. ಈ ಕಾರ್ಡ್ ಹೊರಬಿದ್ದರೆ ಆಟಗಾರನಿಗೆ ಮಾತ್ರವಲ್ಲ, ಇಡೀ ತಂಡಕ್ಕೇ ಭಾರಿ ಹಿನ್ನಡೆಯಾಗುತ್ತದೆ.
Updated on: Jun 13, 2026 | 11:17 AM
ಫಿಫಾ ವಿಶ್ವಕಪ್ನ 23ನೇ ಸೀಸನ್ಗೆ ಅದ್ಧೂರಿ ಚಾಲನೆ ದೊರೆತಿದೆ. ಮೆಕ್ಸಿಕೋದ ಪ್ರತಿಷ್ಠಿತ ಎಸ್ಟಾಡಿಯೋ ಅಝಟೆಕಾ ಕ್ರೀಡಾಂಗಣದಲ್ಲಿ ನಡೆದ ಮೆಕ್ಸಿಕೋ ಮತ್ತು ಸೌತ್ ಆಫ್ರಿಕಾ ನಡುವಿನ ಉದ್ಘಾಟನಾ ಪಂದ್ಯವು ಇದೀಗ ಇತಿಹಾಸ ಪುಟ ಸೇರಿದೆ. ಆದರೆ ಇದು ಆಟದಿಂದಲ್ಲ. ಬದಲಾಗಿ ರೆಡ್ ಕಾರ್ಡ್ನಿಂದಾಗಿ..!
ಇತಿಹಾಸ ಬರೆದ ಉದ್ಘಾಟನಾ ಪಂದ್ಯ!
ಟೂರ್ನಿಯ ಮೊದಲ ಪಂದ್ಯದಲ್ಲಿ ಆತಿಥೇಯ ಮೆಕ್ಸಿಕೋ ತಂಡವು ಸೌತ್ ಆಫ್ರಿಕಾವನ್ನು 2-0 ಗೋಲುಗಳಿಂದ ಮಣಿಸಿತು. ಆದರೆ, ಎಸ್ಟಾಡಿಯೋ ಅಝಟೆಕಾ ಕ್ರೀಡಾಂಗಣದಲ್ಲಿ ನಡೆದ ಈ ಹಣಾಹಣಿ ಫುಟ್ಬಾಲ್ ಇತಿಹಾಸದಲ್ಲಿ ಅತ್ಯಂತ ವಿವಾದಾತ್ಮಕ ಹಾಗೂ ಕಠಿಣ ಪಂದ್ಯವಾಗಿ ದಾಖಲಾಗಿದೆ. ಇದಕ್ಕೆ ಮುಖ್ಯ ಕಾರಣ ಮೂವರು ಆಟಗಾರರು ರೆಡ್ ಕಾರ್ಡ್ ಪಡೆದಿರುವುದು.
ಈ ಪಂದ್ಯದಲ್ಲಿ ರೆಫರಿಯಾಗಿ ಕಾಣಿಸಿಕೊಂಡ ಬ್ರೆಝಿಲ್ನ ವಿಲ್ಟನ್ ಪೆರೇರಾ ಸಂಪಾಯೊ ಅವರು ದ್ವಿತೀಯಾರ್ಧದಲ್ಲಿ ಒಟ್ಟು 3 ನೇರ ರೆಡ್ ಕಾರ್ಡ್ಗಳನ್ನು ಪ್ರದರ್ಶಿಸಿ ಇತಿಹಾಸ ನಿರ್ಮಿಸಿದರು. ಅಂದರೆ ವಿಶ್ವಕಪ್ ಇತಿಹಾಸದಲ್ಲಿ ಉದ್ಘಾಟನಾ ಪಂದ್ಯವೊಂದರಲ್ಲೇ ಮೂವರು ಆಟಗಾರರು ಮೈದಾನದಿಂದ ಹೊರಹಾಕಲ್ಪಟ್ಟಿರುವುದು ಇದೇ ಮೊದಲು.
ಕಟ್ಟುನಿಟ್ಟಾದ ಫಿಫಾ ನಿಯಮಗಳ ಪ್ರಭಾವ!
ಈ ಬಾರಿಯ ಫಿಫಾ ವಿಶ್ವಕಪ್ನಲ್ಲಿ ಕಟ್ಟು ನಿಟ್ಟಿನ ನಿಯಮಗಳನ್ನು ಜಾರಿಗೆ ತರಲಾಗಿದೆ. ಅಂತಾರಾಷ್ಟ್ರೀಯ ಫುಟ್ಬಾಲ್ ಅಸೋಸಿಯೇಷನ್ ಮಂಡಳಿ (IFAB) ಜಾರಿಗೆ ತಂದಿರುವ ಹೊಸ ಶಿಸ್ತಿನ ನಿಯಮಗಳೇ 3 ರೆಡ್ ಕಾರ್ಡ್ ಸಿಗಲು ಮುಖ್ಯ ಕಾರಣ ಎಂದು ವಿಶ್ಲೇಷಿಸಲಾಗುತ್ತಿದೆ.
- ಬಾಯಿ ಮುಚ್ಚಿಕೊಂಡರೆ ರೆಡ್ ಕಾರ್ಡ್: ಮೈದಾನದಲ್ಲಿ ಆಟಗಾರರು ಗಲಾಟೆ ಅಥವಾ ವಾಗ್ವಾದದ ಸಮಯದಲ್ಲಿ ಎದುರಾಳಿ ಅಥವಾ ರೆಫರಿಯನ್ನು ನಿಂದಿಸುವುದನ್ನು ಬಚ್ಚಿಡಲು ತಮ್ಮ ಬಾಯಿಯನ್ನು ಕೈ ಅಥವಾ ಜೆರ್ಸಿಯಿಂದ ಮುಚ್ಚಿಕೊಂಡರೆ ನೇರವಾಗಿ ರೆಡ್ ಕಾರ್ಡ್ ನೀಡುವ ನಿಯಮ ತರಲಾಗಿದೆ.
- ಪ್ರತಿಭಟನೆಗೆ ಶಿಕ್ಷೆ: ತೀರ್ಪುಗಾರರ ನಿರ್ಧಾರವನ್ನು ಪ್ರತಿಭಟಿಸಿ ಅಶಿಸ್ತು ತೋರಿದರೆ ಅಥವಾ ಮೈದಾನ ಬಿಟ್ಟು ಹೊರನಡೆದರೆ ಕಠಿಣ ಕಾರ್ಡ್ ಶಿಕ್ಷೆ ಕಾಯಂ ಆಗಿದೆ.
ರೆಡ್ ಕಾರ್ಡ್ ಪಡೆದ ಆಟಗಾರರು ಯಾರು?
- ಸ್ಪೆಫೆಲೊ ‘ಯಾಯಾ’ ಸಿಥೋಲ್ (ಸೌತ್ ಆಫ್ರಿಕಾ): ಮೆಕ್ಸಿಕೋ ತಂಡದ ಆಟಗಾರ ಬ್ರಿಯಾನ್ ಗುಟಿಯೆರೆಸ್ಗೆ ಗೋಲು ಗಳಿಸಲು ಉತ್ತಮ ಅವಕಾಶವಿತ್ತು. ಈ ವೇಳೆ ಸಿಥೋಲ್ ಅವರು ನಿಯಮಬಾಹಿರವಾಗಿ ಅತ್ಯಂತ ಅಪಾಯಕಾರಿ ಟ್ಯಾಕಲ್ ಮಾಡಿ ಬೀಳಿಸಿದರು. ಈ ಅಪಾಯಕಾರಿ ಟ್ಯಾಕಲ್ ಕಾರಣ ಮ್ಯಾಚ್ ರೆಫರಿ ತಕ್ಷಣವೇ ಸ್ಪೆಫೆಲೊ ‘ಯಾಯಾ’ ಸಿಥೋಲ್ಗೆ ನೇರ ರೆಡ್ ಕಾರ್ಡ್ ನೀಡಿದ್ದಾರೆ.
- ಥೆಂಬಾ ಝ್ವಾನೆ (ಸೌತ್ ಆಫ್ರಿಕಾ): ಮೆಕ್ಸಿಕೋ ತಂಡದ ರಾಬರ್ಟೊ ಅಲ್ವಾರಾಡೊ ಅವರೊಂದಿಗೆ ನಡೆದ ಗಲಾಟೆಯ ಸಂದರ್ಭದಲ್ಲಿ, ಝ್ವಾನೆ ಅವರು ಅಶಿಸ್ತಿನ ವರ್ತನೆ ತೋರಿದ್ದರು. ವಿಡಿಯೋ ಅಸಿಸ್ಟೆಂಟ್ ರೆಫರಿ (VAR) ಮರುಪರಿಶೀಲನೆಯ ನಂತರ, ಅವರು ಎದುರಾಳಿಯ ಮುಖಕ್ಕೆ ಹೊಡೆದಿರುವುದು ಪತ್ತೆಯಾದ ಹಿನ್ನೆಲೆಯಲ್ಲಿ ರೆಫರಿ ಥೆಂಬಾ ಝ್ವಾನೆಗೆ ನೇರ ರೆಡ್ ಕಾರ್ಡ್ ನೀಡಿದ್ದಾರೆ.
- ಸೆಸಾರ್ ಮಾಂಟೆಸ್ (ಮೆಕ್ಸಿಕೋ): ಪಂದ್ಯ ಮುಗಿಯಲು ಕೇವಲ ಕೆಲವು ನಿಮಿಷಗಳು ಬಾಕಿ ಇರುವಾಗ ಮೆಕ್ಸಿಕೋದ ಡಿಫೆಂಡರ್ ಸೆಸಾರ್ ಮಾಂಟೆಸ್ ಸೌತ್ ಆಫ್ರಿಕಾ ಆಟಗಾರನನ್ನು ಕೆಳಗೆ ಉರುಳಿಸಿದ್ದರು. ಈ ಆಕ್ರಮಣಕಾರಿ ಆಟಕ್ಕೆ ಸೆಸಾರ್ ಮಾಂಟೆಸ್ಗೆ ರೆಡ್ ಕಾರ್ಡ್ ನೀಡಲಾಗಿದೆ.
ರೆಡ್ ಕಾರ್ಡ್ ಪಡೆದರೆ ಏನು ಸಮಸ್ಯೆ?
ರೆಡ್ ಕಾರ್ಡ್ ಪಡೆದ ಆಟಗಾರ ತಕ್ಷಣವೇ ಮೈದಾನವನ್ನು ಬಿಟ್ಟು ಹೊರಹೋಗಬೇಕು. ಅವರು ಪಂದ್ಯದ ಉಳಿದ ಅವಧಿಯಲ್ಲಿ ಮೈದಾನದಲ್ಲಿ ಆಡುವಂತಿಲ್ಲ ಮತ್ತು ಸಬ್ಸ್ಟಿಟ್ಯೂಟ್ ಬೆಂಚ್ನಲ್ಲಿಯೂ ಕುಳಿತುಕೊಳ್ಳುವಂತಿಲ್ಲ.
ಹಾಗೆಯೇ ರೆಡ್ ಕಾರ್ಡ್ ಪಡೆದ ಆಟಗಾರನ ಬದಲಿಗೆ ಸಬ್ಸ್ಟಿಟ್ಯೂಟ್ ಆಗಿ ಮತ್ತೊಬ್ಬ ಆಟಗಾರನನ್ನು ಮೈದಾನಕ್ಕೆ ಇಳಿಸಲು ಅವಕಾಶವಿರುವುದಿಲ್ಲ. ಇದರಿಂದಾಗಿ ಆ ತಂಡವು ಉಳಿದ ಪಂದ್ಯವನ್ನು ಕೇವಲ 10 ಆಟಗಾರರೊಂದಿಗೆ ಆಡಬೇಕಾಗುತ್ತದೆ. ಇದು ತಂಡದ ಮೇಲೆ ಭಾರಿ ಒತ್ತಡವನ್ನು ಉಂಟುಮಾಡುವುದಲ್ಲದೆ, ಸೋಲಿನ ಸಾಧ್ಯತೆಯನ್ನು ಹೆಚ್ಚಿಸುತ್ತದೆ.
ಇನ್ನು ರೆಡ್ ಕಾರ್ಡ್ ಪಡೆದ ಆಟಗಾರನಿಗೆ ಕೇವಲ ಆ ಪಂದ್ಯ ಮಾತ್ರವಲ್ಲದೆ, ಅವರ ತಂಡ ಆಡುವ ಮುಂದಿನ ಕನಿಷ್ಠ ಒಂದು ಪಂದ್ಯದಲ್ಲಿ ಆಡದಂತೆ ನಿಷೇಧ ಹೇರಲಾಗುತ್ತದೆ. ತಪ್ಪು ತುಂಬಾ ಗಂಭೀರವಾಗಿದ್ದರೆ (ಉದಾಹರಣೆಗೆ ಮೈದಾನದಲ್ಲಿ ಹೊಡೆದಾಟ ನಡೆಸಿದ್ದರೆ), ಫಿಫಾ ಶಿಸ್ತು ಸಮಿತಿಯು ಈ ನಿಷೇಧವನ್ನು 3 ಪಂದ್ಯಗಳವರೆಗೆ ವಿಸ್ತರಿಸಬಹುದು.
ಇದನ್ನೂ ಓದಿ: ಬರೋಬ್ಬರಿ 27 ಪಂದ್ಯಗಳು… ಟೀಮ್ ಇಂಡಿಯಾದ ವಿಶ್ವಕಪ್ ಸಿದ್ಧತೆ ಶುರು!
4 ರೆಡ್ ಕಾರ್ಡ್!
2022ರ ಇಡೀ ಖತಾರ್ ವಿಶ್ವಕಪ್ನ ಒಟ್ಟು 64 ಪಂದ್ಯಗಳಲ್ಲಿ ಕೇವಲ 4 ರೆಡ್ ಕಾರ್ಡ್ಗಳನ್ನು ಮಾತ್ರ ನೀಡಲಾಗಿತ್ತು. ಆದರೆ, 2026ರ ವಿಶ್ವಕಪ್ನಲ್ಲಿ ಕೇವಲ ಉದ್ಘಾಟನಾ ದಿನವೇ 3 ರೆಡ್ ಕಾರ್ಡ್ಗಳು ಹೊರಬಿದ್ದಿರುವುದು ಟೂರ್ನಿಯು ಎಷ್ಟು ಆಕ್ರಮಣಕಾರಿ ಮತ್ತು ಕಟ್ಟುನಿಟ್ಟಾಗಿ ಸಾಗಲಿದೆ ಎಂಬುದಕ್ಕೆ ಮುನ್ಸೂಚನೆಯಾಗಿದೆ.
