ನನ್ನ ದಾಖಲೆಯನ್ನು ಸರಿಗಟ್ಟುವ ಅವಕಾಶ ರವಿಚಂದ್ರನ್ ಅಶ್ವಿನ್​ಗಿದೆ: ಮುರಳೀಧರನ್

ಟೆಸ್ಟ್​ ಕ್ರಿಕೆಟ್​ನಲ್ಲಿ ಬೌಲರ್​ಗಳು 300 ವಿಕೆಟ್ ಪಡೆದರೆ ಮತ್ತು ಬ್ಯಾಟ್ಸ್​ಮನ್​ಗಳು 5,000 ಕ್ಕಿಂತ ಜಾಸ್ತಿ ರನ್ ಗಳಿಸಿದರೆ ಅವರ ದಾಖಲೆಗಳನ್ನು ಯಾರೂ ಸರಿಗಟ್ಟಲಾರರು ಅಂತಾ ಭಾವಿಸುವ ಒಂದು ಕಾಲವಿತ್ತು. ಆದರೆ ಆ ಕಾಲ ಕ್ರಮೇಣವಾಗಿ ಬದಲಾಗುವುದನ್ನು ಕ್ರಿಕೆಟ್​ ಪ್ರೇಮಿಗಳು ಗಮನಿಸುತ್ತಾ ಬಂದಿದ್ದಾರೆ.

ಭಾರತದ ಸಚಿನ್ ತೆಂಡೂಲ್ಕರ್ ಹೆಚ್ಚು ಕಡಿಮೆ 16,000 (15,921) ರನ್​ಗಳನ್ನು ಟೆಸ್ಟ್​ ಕ್ರಿಕೆಟ್​ನಲ್ಲಿ ಬಾರಿಸಿ ವಿದಾಯ ಹೇಳಿದರು. ಹಾಗೆಯೇ ಶ್ರೀಲಂಕಾದ ಮುತ್ತಯ್ಯ ಮುರಳೀಧರನ್ ಬರೋಬ್ಬರಿ 800 ವಿಕೆಟ್​ ಪಡೆಯುವ ಸಾಧನೆ ಮಾಡಿದರು. 300ಕ್ಕಿಂತ ಹೆಚ್ಚು ವಿಕೆಟ್ ಪಡೆದ ಬೌಲರ್​ಗಳು ಮತ್ತು 5,000 ಕ್ಕಿಂತ ಜಾಸ್ತಿ ರನ್ ಗಳಿಸಿದ ಸಾಕಷ್ಟು ಬ್ಯಾಟ್ಸ್​ಮನ್​ಗಳು ಟೆಸ್ಟ್ ಕ್ರಿಕೆಟ್ ಇತಿಹಾಸದಲ್ಲಿ ನಮಗೀಗ ಸಿಗುತ್ತಾರೆ.

ನಾವಿಲ್ಲಿ ಬೌಲರ್​ಗಳನ್ನು ಕುರಿತು ಮಾತ್ರ ಚರ್ಚಿಸುವ. ನಿಮಗೆಲ್ಲ ಗೊತ್ತಿರುವ ಹಾಗೆ ಮುರಳಿ ಟೆಸ್ಟ್​ ಕ್ರಿಕೆಟ್ ಇತಿಹಾಸದಲ್ಲೇ ಅತಿಹೆಚ್ಚು ವಿಕೆಟ್ ಪಡೆದ ಬೌಲರ್ ಆಗಿದ್ದಾರೆ. ಆಸ್ಟ್ರೇಲಿಯಾದ ಶೇನ್ ವಾರ್ನ್ 708 ವಿಕೆಟ್ ಪಡೆದು ಎರಡನೇ ಸ್ಥಾನದಲ್ಲಿದ್ದಾರೆ. 619 ವಿಕೆಟ್​ಗಳೊಂದಿಗೆ ಮೂರನೇ ಸ್ಥಾನದಲ್ಲಿರುವವರು ನಮ್ಮ ಹುಡುಗ ಅನಿಲ್ ಕುಂಬ್ಳೆ.

ಮುತ್ತಯ್ಯ ಮುರಳೀಧರನ್

ಹಾಗಾದರೆ, ಪ್ರಸಕ್ತ ಬೌಲರ್​ಗಳ ಪೈಕಿ ಮುರಳಿಯ ದಾಖಲೆಯನ್ನು ಯಾರಾದರೂಸರಿಗಟ್ಟಬಲ್ಲರೆ? ಭಾರತದ ರವಿಚಂದ್ರನ್ ಅಶ್ವಿನ್ ಮತ್ತು ಆಸ್ಟ್ರೇಲಿಯಾದ ನೇಥನ್ ಲಿಯಾನ್ ಅವರಿಗೆ ಆ ಅವಕಾಶ ಇರಬಹುದಾದರೂ 800 ವಿಕೆಟ್ ಪಡೆಯುವುದು ಸುಲಭದ ಮಾತು ಅಲ್ಲ. ಅಶ್ವಿನ್ ಇದುವರೆಗೆ 74 ಟೆಸ್ಟ್ ಪಂದ್ಯಗಳನ್ನಾಡಿದ್ದು, 377 ವಿಕೆಟ್ ಕಬಳಿಸಿದ್ದಾರೆ. ಮುಂದಿನ ವಾರ ಬ್ರಿಸ್ಬೇನ್​ನಲ್ಲಿ ತಮ್ಮ ಕೆರೀಯರ್​ನ 100 ನೇ ಟೆಸ್ಟ್​ ಆಡಲಿರುವ ಲಿಯಾನ್ 396 ವಿಕೆಟ್ ಕಿತ್ತಿದ್ದಾರೆ. ನಿಸ್ಸಂದೇಹವಾಗಿ ಅವರು ಈಗಿನ ಸ್ಪಿನ್ನರ್​ಗಳ ಪೈಕಿ ಶ್ರೇಷ್ಠರು. ಆದರೆ, ಮುರಳಿ ತಲುಪಿದ ಶಿಖರವನ್ನು ಅವರಿಗೆ ಮುಟ್ಟಲಾದೀತೆ?

ಆಸ್ಟ್ರೇಲಿಯಾದ ಸಿಡ್ನಿ ಮಾರ್ನಿಂಗ್ ಹೆರಾಲ್ಡ್ ಪತ್ರಿಕೆಗೆ ನೀಡಿರುವ ಸಂದರ್ಶನದಲ್ಲಿ ಮುರಳಿ ಭಾರತೀಯ ಬೌಲರ್​ಗೆ ಖಂಡಿತವಾಗಿಯೂ ಅವಕಾಶವಿದೆ ಎಂದು ಹೇಳಿದ್ದಾರೆ.

ಯಾರು 800 ವಿಕೆಟ್​ ಪಡೆಯಬಲ್ಲರು ಎನ್ನುವುದು ನಿಮ್ಮ ಪ್ರಶ್ನೆಯೇ? ಅಶ್ವಿನ್ ಆ ಸಾಧನೆ ಮಾಡಬಹುದಾದ ಬೌಲರ್ ಎಂದು ನನಗನ್ನಿಸುತ್ತೆ. ಯಾಕೆಂದರೆ ನಿಸ್ಸಂಶಯವಾಗಿ ಅವರೊಬ್ಬ ಶ್ರೇಷ್ಠ ಬೌಲರ್. ಅವರನ್ನು ಬಿಟ್ಟರೆ ಬೇಱವುದೇ ಯುವ ಬೌಲರ್ 800 ವಿಕೆಟ್​ ಪಡೆಯುವ ಸಾಮರ್ಥ್ಯ ಹೊಂದಿದ್ದಾನೆ ಅಂತಾ ನನಗನ್ನಿಸುವುದಿಲ್ಲ. ನೇಥನ್ ಲಿಯಾನ್ ಸುಮಾರು 400 ವಿಕೆಟ್​ಗಳನ್ನು ಪಡೆದಿದಿರುವುದರಿಂದ ಅವರಿಗೂ ಅವಕಾಶವಿದೆ. ಆದರೆ 800 ವಿಕೆಟ್​ ಪಡೆಯಲು ಆಸ್ಸೀ ಬಹಳಷ್ಟು ಟೆಸ್ಟ್​ಗಳನ್ನಾಡಬೇಕಾಗುತ್ತದೆ ಎಂದು ಮುರಳಿ ಹೇಳಿದ್ದಾರೆ.

ಕ್ರಿಕೆಟ್​ನ ಸ್ವರೂಪ ತೀವ್ರವಾಗಿ ಬದಲಾಗುತ್ತಿರುವುದರಿಂದ ಸ್ಪಿನ್ನರ್​ಗಳ ಮತ್ತೊಂದು ಸುವರ್ಣ ಯುಗ ಬರಲಾರದೆಂದು ಮುರಳಿ ಭಾವಿಸುತ್ತಾರೆ.

ಮೂಲಭೂತ ಸಮಸ್ಯೆಯೇನೆಂದರೆ, ಟಿ20 ಕ್ರಿಕೆಟ್ ಮತ್ತು ಒಂದು ದಿನದ ಅಂತರರಾಷ್ಟ್ರೀಯ ಪಂದ್ಯಗಳು ಟೆಸ್ಟ್​ ಕ್ರಿಕೆಟ್​ನ ಸ್ವರೂಪವನ್ನು ಬದಲಾಯಿಸಿವೆ. ನಾನಾಡುತ್ತಿದ್ದ ದಿನಗಳಲ್ಲಿ ಬ್ಯಾಟ್ಸ್​ಮನ್​ಗಳು ತಾಂತ್ರಿಕವಾಗಿ ಪರಿಣಿತರಾಗಿದ್ದರು ಮತ್ತು ನಿರ್ಜೀವ ಪಿಚ್​ಗಳ ಮೇಲೆ ನಾವು ಬೌಲಿಂಗ್ ಮಾಡಬೇಕಾಗುತ್ತಿತ್ತು, ಈಗಿನ ಆಟಗಾರರು ಮೂರು ದಿನಗಳಲ್ಲಿ ಟೆಸ್ಟ್ ಪಂದ್ಯವನ್ನು ಮುಗಿಸುವ ತವಕದಲ್ಲಿರುತ್ತಾರೆ ಎಂದು ಮುರಳಿ ಹೇಳಿದ್ದಾರೆ.

ನೇಥನ್ ಲಿಯಾನ್

ನನ್ನ ಸಮಕಾಲೀನ ಸ್ಪಿನ್ನರ್​ಗಳು ಪಿಚ್​ನಿಂದ ನೆರವು ಪಡೆಯಲು ಹೆಚ್ಚು ಶ್ರಮವಹಿಸಬೇಕಾಗುತಿತ್ತು. ಈಗಿನ ಬೌಲರ್​ಗಳು ಅದನ್ನು ಮಾಡಬೇಕಿಲ್ಲ. ಸತತವಾಗಿ ಉತ್ತಮ ಲೈನ್ ಮತ್ತು ಲೆಂಗ್ತ್ ಕಾಯ್ದುಕೊಂಡು ಬೌಲ್ ಮಾಡಿದರೆ ಸಾಕು, ಅವರಿಗೆ 5 ವಿಕೆಟ್​ಗಳು ಸುಲಭವಾಗಿ ಸಿಗುತ್ತವೆ. ಯಾಕೆಂದರೆ ಮಾಡರ್ನ್ ಯುಗದ ಬ್ಯಾಟ್ಸ್​ಮನ್​ಗಳು ಆಕ್ರಮಣಕಾರಿ ಆಟವಾಡಲು ಬಯಸುತ್ತಾರೆ ಎಂದು ಮುರಳಿ ಹೇಳಿದ್ದಾರೆ.

ಸ್ಪಿನ್ನರ್​ಗಳು ಫೀಲ್ಡ್ ಅನ್ನು ಸರಿಯಾಗಿ ಸೆಟ್ ಮಾಡಿಕೊಂಡರೆ ವಿಕೆಟ್​ಗಳನ್ನು ಕಬಳಿಸುವ ಉತ್ತಮ ಅವಕಾಶ ಅವರಿಗಿದೆ. ಬ್ಯಾಟ್ಸ್​ಮನ್​ಗಳು ತಾವಾಗಿಯೇ ಪ್ರಮಾದವೆಸಗಿ ವಿಕೆಟ್ ಒಪ್ಪಿಸಿಬಿಡುತ್ತಾರೆ. ನನ್ನ ಜಮಾನಾದಲ್ಲಿ ಸ್ಪಿನ್ನರ್​ಗಳು ವಿಕೆಟ್ ಪಡೆಯಲು ಬಹಳ ಶ್ರಮ ಪಡಬೇಕಾಗುತ್ತಿತ್ತು. ಹಾಗಾಗೇ ಅವರು ಹೊಸ ಎಸೆತಗಳನ್ನು ರೂಪಿಸಿಕೊಳ್ಳಲು ಪ್ರಯತ್ನಿಸುತ್ತಿದ್ದರು. ಈಗಿನ ಬೌಲರ್​ಗಳು ಅದನ್ನೆಲ್ಲ ಟಿ20 ಕ್ರಿಕೆಟ್​ನಲ್ಲಿ ಮಾಡುತ್ತಾರೆ. ಬ್ಯಾಟ್ಸ್​ಮನ್​ಗಳು ಅಕ್ರಮಣಕಾರಿ ಮೂಡ್​ನಲ್ಲಿ ಇರುವುದರಿಂದ ಸ್ಪಿನ್ನರ್​ಗಳು ತಮ್ಮ ಬೌಲಿಂಗ್​ನಲ್ಲಿ ವೈವಿಧ್ಯತೆ ತರಲು ಪ್ರಯತ್ನಿಸುತ್ತಾರೆ. ಆದರೆ ಟೆಸ್ಟ್​ ಕ್ರಿಕೆಟ್​ನಲ್ಲಿ ಅದು ಬೇಕಿಲ್ಲ ಎಂದು ಮುರಳಿ ಹೇಳಿದ್ದಾರೆ.