Viral Video: ಉಚಿತ ಐಸ್ಕ್ರೀಮ್ಗಾಗಿ ಬೆಂಗಳೂರಿಗರು ಹೇಗೆ ನೃತ್ಯ ಮಾಡಿದ್ದಾರೆ ನೋಡಿ
Bengaluru : ಸಿಸಿ ಕ್ಯಾಮೆರಾ ಮುಂದೆ ನಿಮಗೆ ತಿಳಿದಂತೆ ಡ್ಯಾನ್ಸ್ ಮಾಡಬೇಕು, ಅಂದರೆ ಮಾತ್ರ ಫ್ರೀ ಐಸ್ಕ್ರೀಮ್ ಎಂಬ ಷರತ್ತು ಈ ಅಂಗಡಿಯದಾಗಿತ್ತು. ಒಂದು ವಾರದತನಕ ಇದು ಯಶಸ್ವಿಯಾಗಿ ನಡೆಯಿತು ಎನ್ನುವುದಕ್ಕೆ ಈ ವೈರಲ್ ವಿಡಿಯೋ ಸಾಕ್ಷಿ.
Ice cream : ಐಸ್ಕ್ರೀಮ್ ಪ್ರಿಯರಿಗೆ ಯಾವ ಕಾಲವಾದರೇನು? ಈ ಮಳೆಗಾಲದ ಮಧ್ಯರಾತ್ರಿಯೂ ಐಸ್ಕ್ರೀಮ್ ಎಂದರೆ ಎದ್ದು ಕುಳಿತುಕೊಳ್ಳುತ್ತಾರೆ. ಇನ್ನು ಉಚಿತ ಐಸ್ಕ್ರೀಮ್ ಎಂದರೆ? ಇದೀಗ ವೈರಲ್ ಆಗಿರುವ ಈ ವಿಡಿಯೋ ನೋಡಿ, ರಾಷ್ಟ್ರಿಯ ಐಸ್ಕ್ರೀಮ್ ದಿನದ (July 16, National Ice Cream Day) ಪ್ರಯುಕ್ತ ಬೆಂಗಳೂರಿನ ಕಾರ್ನರ್ ಹೌಸ್ ಐಸ್ಕ್ರೀಮ್ಸ್ (Corner House Ice creams) ಒಂದು ವಾರದ ತನಕ ಹೀಗೊಂದು ಮಜಾ ಆಫರ್ ಇಟ್ಟಿತ್ತು. ಈ ಅಂಗಡಿಗೆ ಬಂದು ಸಿಸಿ ಕ್ಯಾಮೆರಾ ಎದುರು ಡ್ಯಾನ್ಸ್ ಮಾಡಿದವರಿಗೆಲ್ಲರಿಗೂ ಫ್ರೀ ಐಸ್ಕ್ರೀಮ್! ಉಲ್ಲಾಸದಿಂದ ಕೂಡಿದ ಈ ವಿಡಿಯೋ ವೈರಲ್ ಆಗಿದ್ದು ನೆಟ್ಟಿಗರು ಇದನ್ನು ನೋಡಿ ಖುಷಿಗೊಳ್ಳುತ್ತಿದ್ದಾರೆ.
ಬೆಂಗಳೂರಿನ ಇಂದಿರಾನಗರ ಶಾಖೆಯ ವಿಡಿಯೋ ಇದಾಗಿದೆ. ಈ ವಿಡಿಯೋ ನೋಡಿದ ಜನರು ಆಫರ್ ಮುಗಿದ ಮೇಲೆಯೂ ಇಲ್ಲಿಗೆ ಡ್ಯಾನ್ಸ್ ಮಾಡುವ ಉತ್ಸಾಹ ಮತ್ತು ಉಚಿತ ಐಸ್ಕ್ರೀಮ್ ಪಡೆದುಕೊಳ್ಳಲು ಬರುತ್ತಿದ್ದರು. ವಯಸ್ಸಿನ ಭೇದವಿಲ್ಲದೆ ಇಲ್ಲಿ ಎಲ್ಲರೂ ಪುಟ್ಟ ಮಕ್ಕಳಂತೆ ಐಸ್ಕ್ರೀಮ್ಗಾಗಿ ಡ್ಯಾನ್ಸ್ ಮಾಡುವುದನ್ನು ನೋಡಲು ಬಹಳೇ ಖುಷಿ ಎನ್ನಿಸುತ್ತಿದೆ ಎನ್ನುತ್ತಿದ್ದಾರೆ ಅನೇಕರು.
ಇದನ್ನೂ ಓದಿ : Viral Video: ಇಲ್ಲಿದ್ದಾರೆ ತೇಲುವ ಚಹಾದಂಗಡಿಯ ಛಾಯಕ್ಕ
ಪ್ರೊಮೋಷನಲ್ ಆ್ಯಕ್ಟಿವಿಟಿಯ ಕಾನ್ಸೆಪ್ಟ್ ಚೆನ್ನಾಗಿದೆ. ಆದರೆ ಹೊಸ ಕ್ಯಾಮೆರಾಗಳನ್ನು ಇಟ್ಟಿದ್ದರೆ ಒಳ್ಳೆಯ ವಿಶುವಲ್ಸ್ ಸಿಗುತ್ತಿದ್ದವಲ್ಲ ಎಂದಿದ್ದಾರೆ ಒಬ್ಬರು. ಆಗಾಗ ಇಂಥ ಆಫರ್ಗಳನ್ನು ಆಯೋಜಿಸಿ, ನಿಮ್ಮ ಅಂಗಡಿಗೆ ನಾವೂ ಬರುತ್ತೇವೆ ಎಂದಿದ್ದಾರೆ ಕೆಲವರು. ಇಂಥ ಪರಿಕಲ್ಪನೆಯನ್ನು ಈತನಕ ಎಲ್ಲಿಯೂ ನೋಡಿರಲಿಲ್ಲ, ಬಹಳ ಖುಷಿ ಎಂದಿದ್ದಾರೆ ಮತ್ತೊಬ್ಬರು.
ಇದನ್ನೂ ಓದಿ : Viral: ಶಿವಾಜಿನಗರದ ಡಂಪ್ಯಾರ್ಡ್ನಿಂದ ಸೆಲ್ವಮ್ಮನ ತಳ್ಳುಗಾಡಿ ಮರಳುವುದೇ?
ಹೀಗೆಯೇ ಡ್ಯಾನ್ಸ್ ಮಾಡಬೇಕೆಂಬ ನಿಯಮವೇನೂ ಇಲ್ಲಿರಲಿಲ್ಲ. ಒಟ್ಟು ಕ್ಯಾಮೆರಾ ಮುಂದೆ ಅವರಿಗನ್ನಿಸಿದಂತೆ ಕೆಲ ಕ್ಷಣಗಳ ಕಾಲ ಹೆಜ್ಜೆ ಹಾಕಿದರೆ ಮುಗಿಯಿತು. ತಕ್ಷಣವೇ ಉಚಿತ ಐಸ್ಕ್ರೀಮ್ ಕೈಯಲ್ಲಿಡಲಾಗುತ್ತಿತ್ತು.
ಈ ವಿಡಿಯೋ ನೋಡಿದ ನಿಮ್ಮ ಅಭಿಪ್ರಾಯವೇನು?
ಮತ್ತಷ್ಟು ವೈರಲ್ ನ್ಯೂಸ್ಗಾಗಿ ಕ್ಲಿಕ್ ಮಾಡಿ
Published On - 10:21 am, Tue, 25 July 23
