Trending : ಬಕ್ಸಾ ಕಾಡಿನ ಕ್ಯಾಮೆರಾದಲ್ಲಿ ಸೆರೆಬಿದ್ದ ಕ್ಲೌಡೆಡ್ ಲೆಪರ್ಡ್
Clouded Leopard : ಪಶ್ಚಿಮ ಬಂಗಾಳದ ಅರಣ್ಯ ಇಲಾಖೆಯು ಕ್ಲೌಡೆಡ್ ಲೆಪರ್ಡ್ ಫೋಟೋವನ್ನು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದೆ. ಇದು ಅತ್ಯಂತ ಪುರಾತನ ದೊಡ್ಡಬೆಕ್ಕಿನ ವಂಶಕ್ಕೆ ಸೇರಿದ ಅಳಿವಿನಂಚಿನಲ್ಲಿರುವ ಪ್ರಾಣಿಯಾಗಿದೆ.
Updated on: Aug 05, 2022 | 2:13 PM
Trending news : ಎಷ್ಟೊಂದು ವೈವಿಧ್ಯಮಯ ಜೀವಜಗತ್ತು ನಮ್ಮನ್ನು ಸುತ್ತುವರಿದಿದೆ. ದಿನಕ್ಕೊಂದಾದರೂ ಅಪರೂಪದ ಜೀವಿಗಳು ಕಣ್ಣಿಗೆ ಬೀಳುತ್ತಲೇ ಇರುತ್ತವೆ. ನಿನ್ನೆಯಷ್ಟೇ ಸೀ ಕುಕುಂಬರ್ ನ ವಿಡಿಯೋ ನೋಡಿದಿರಿ. ಇಂದು ಪಶ್ಚಿಮ ಬಂಗಾಳದ ಬಕ್ಸಾ ಹುಲಿ ಸಂರಕ್ಷಣಾ ಅರಣ್ಯದ ಕ್ಯಾಮೆರಾದಲ್ಲಿ ಸೆರೆಬಿದ್ದ ಕ್ಲೌಡೆಡ್ ಲೆಪರ್ಡ್ (Clouded Leopard) ಅನ್ನು ನೋಡಿ. ಆಗಸ್ಟ್ 4, ಇಂಟರ್ನ್ಯಾಷನಲ್ ಕ್ಲೌಡ್ ಲೆಪರ್ಡ್ ಡೇ ನಿಮಿತ್ತ ತನ್ನ ಫೇಸ್‌ಬುಕ್ ಪುಟದಲ್ಲಿ ಪಶ್ಚಿಮ ಬಂಗಾಳದ ಅರಣ್ಯ ಇಲಾಖೆಯು ಈ ಫೋಟೋ ಪೋಸ್ಟ್ ಮಾಡಿದೆ. ಇವುಗಳ ಸಂತತಿ ಬಹಳ ಕ್ಷೀಣಿಸಿದ್ದು ಸದ್ಯ 10,000 ಕ್ಕಿಂತಲೂ ಕಡಿಮೆ ಸಂಖ್ಯೆಯಲ್ಲಿ ವಾಸಿಸುತ್ತಿರಬಹುದು ಎಂದು ಅಂದಾಜಿಸಲಾಗಿದೆ. ಆದ್ದರಿಂದ IUCN ಅಳಿವಿನಂಚಿನಲ್ಲಿರುವ ಪ್ರಾಣಿಗಳ ಪಟ್ಟಿಯಲ್ಲಿ ಈ ಪ್ರಾಣಿಯನ್ನೂ ಸೇರಿಸಿದೆ.
ಕ್ಲೌಡೆಡ್ ಲೆಪರ್ಡ್ (ನಿಯೋಫೆಲಿಸ್ ನೆಬುಲೋಸಾ) ಭಾರತದಲ್ಲಿರುವ ದೊಡ್ಡ ಬೆಕ್ಕಿನ ಜಾತಿ. ದಟ್ಟಕಾಡುಗಳಲ್ಲಿ ಮಾತ್ರ ಇವುಗಳನ್ನು ಕಾಣಬಹುದಾಗಿದೆ. ಬಕ್ಸಾ ಹುಲಿ ಸಂರಕ್ಷಣಾ ಪ್ರದೇಶದಲ್ಲಿ ಅಳವಡಿಸಿದ್ದ ಕ್ಯಾಮೆರಾದಲ್ಲಿ ಈ ಪ್ರಾಣಿಯ ಅನೇಕ ಚಿತ್ರಗಳು ಸೆರೆಯಾಗಿವೆ. ಅವುಗಳ ಪೈಕಿ ಸ್ಪಷ್ಟವಾದ ಚಿತ್ರವನ್ನು ಇಲಾಖೆಯು ಈಗ ಹಂಚಿಕೊಂಡಿದೆ.
20 ನೇ ಶತಮಾನದ ದ್ವಿತೀಯಾರ್ಧದಲ್ಲಿ ಬೇಟೆ ಮತ್ತು ಅರಣ್ಯನಾಶದ ಪರಿಣಾಮದಿಂದಾಗಿ ಇವುಗಳ ಸಂಖ್ಯೆ ಕುಸಿತ ಕಂಡಿದೆ. ನಿಶಾಚರಿಗಳಾದ ಇವು ಮರಗಳಲ್ಲಿ ವಾಸಿಸುತ್ತವೆ ಮತ್ತು ಸಣ್ಣ ಸಸ್ತನಿಗಳು ಇವುಗಳ ಆಹಾರ. ದೊಡ್ಡಗಾತ್ರದ, ಆಕರ್ಷಕವಾಗಿರುವ ಈ ಕ್ಲೌಡೆಡ್ ಲೆಪರ್ಡ್ನ ಫೋಟೋವನ್ನು ಅನೇಕರು ಸಾಮಾಜಿಕ ತಾಣಗಳಲ್ಲಿ ಮೆಚ್ಚಿ ಹಂಚಿಕೊಂಡಿದ್ದಾರೆ. ಐಎಫ್ಎಸ್ ಅಧಿಕಾರಿ ಪರ್ವೀನ್ ಕಸ್ವಾನ್ ಅವರೂ ಕೂಡ. ಅನೇಕರು ಈ ಅಪರೂಪದ ಪ್ರಾಣಿಯನ್ನು ನೋಡಿ ಅದ್ಭುತ ಎಂದು ಪ್ರತಿಕ್ರಿಯಿಸಿದ್ದಾರೆ.
ಪಶ್ಚಿಮ ಬಂಗಾಳದ ಪ್ರವಾಸೋದ್ಯಮ ಇಲಾಖೆಯ ಪ್ರಕಾರ, ಬಕ್ಸಾ ಹುಲಿ ಸಂರಕ್ಷಿತ ಪ್ರದೇಶವು 1983ರಲ್ಲಿ ರೂಪುಗೊಂಡಿದೆ. 1992 ರಲ್ಲಿ ಇದಕ್ಕೆ ರಾಷ್ಟ್ರೀಯ ಉದ್ಯಾನವನದ ಸ್ಥಾನಮಾನ ಒದಗಿತು. 759 ಚದರ ಕಿ.ಮೀ ಪ್ರದೇಶವು ಹುಲಿ ಸಂರಕ್ಷಿತ ಪ್ರದೇಶವಾಗಿದೆ. ಬಕ್ಸಾ ಎನ್ನುವುದು ಅಲ್ಲಿರುವ ಕೋಟೆಯ ಹೆಸರು. ಅದೇ ಹೆಸರಿನಿಂದಲೇ ಈ ಅರಣ್ಯಪ್ರದೇಶಕ್ಕೆ ಹೆಸರಿಡಲಾಗಿದೆ. ಅನೇಕ ಜೀವವೈವಿಧ್ಯವು ಇಲ್ಲಿ ಸಮೃದ್ಧವಾಗಿದೆ. ಅಪರೂಪದ ಆರ್ಕಿಡ್, ಔಷಧೀಯ ಸಸ್ಯಗಳಿವೆ. ಮನುಷ್ಯರು ಪ್ರವೇಶಿಸಲು ಸಾಧ್ಯವಾಗದಂಥ ಭೂಪ್ರದೇಶಗಳು ಇಲ್ಲಿವೆ. ಹಾಗಾಗಿ ಸಿಂಚುಲಾ ಶ್ರೇಣಿಯ ಬಕ್ಸಾದ ಕೆಲ ಬೆಟ್ಟಗಳ ಕುರಿತು ಯಾವುದೇ ಸಂಶೋಧನೆ ಸಾಧ್ಯವಾಗಿಲ್ಲ. ಇಲ್ಲಿರುವ ವೈವಿಧ್ಯಮಯ ಜೀವಪರಿಸರ ವಿಶೇಷ ಗಮನ ಸೆಳೆಯುತ್ತದೆ. 230ಕ್ಕೂ ಹೆಚ್ಚು ಜಾತಿಯ ವೈವಿಧ್ಯಮಯ ಪ್ರಾಣಿಗಳು, 67 ಸಸ್ತನಿಗಳು, 36 ಸರೀಸೃಪಗಳು ಮತ್ತು ವಲಸೆ ಬಂದ ಅನೇಕ ಪಕ್ಷಿಗಳು, ಸ್ಥಳೀಯ ಜೀವವೈವಿಧ್ಯವು ಇಲ್ಲಿಯ ಅರಣ್ಯ ಶ್ರೀಮಂತಿಕೆಗೆ ಸಾಕ್ಷಿ.
ವನ್ಯಜಗತ್ತಿನ ಮತ್ತಷ್ಟು ಸುದ್ದಿಗಾಗಿ ಇಲ್ಲಿ ಕ್ಲಿಕ್ ಮಾಡಿ
