ಅಸೀಮ್ ಮುನೀರ್ ಮಿಲಿಟರಿ ಡ್ರೆಸ್ ಬಿಟ್ಟು ಸೂಟ್ ಧರಿಸಿ ಜೆಡಿ ವ್ಯಾನ್ಸ್​ಗೆ ಸ್ವಾಗತ ಕೋರಿದ್ದೇಕೆ?

ಇಸ್ಲಮಾಬಾದ್, ಏಪ್ರಿಲ್ 11: ಅಮೆರಿಕ ಹಾಗೂ ಇರಾನ್ (Iran War) ಎರಡು ವಾರಗಳ ಕದನ ವಿರಾಮವನ್ನು ಘೋಷಿಸಿದ ನಂತರ ಲೆಬನಾನ್​ಗಾಗಿ ಮತ್ತೆ ಎರಡೂ ಕಡೆಯವರ ನಡುವೆ ಬಿಕ್ಕಟ್ಟು ಎದುರಾಗಿತ್ತು. ಇದರಿಂದ ಇರಾನ್ ಕದನವಿರಾಮವನ್ನು ಹಿಂಪಡೆಯುವ ಬೆದರಿಕೆಯೊಡ್ಡಿದ್ದರು. ಈ ಬಗ್ಗೆ ಮಾತುಕತೆ ನಡೆಸಲು ಅಮೆರಿಕದ ಉಪಾಧ್ಯಕ್ಷ ಜೆ.ಡಿ ವ್ಯಾನ್ಸ್ ನೇತೃತ್ವದ ಯುಎಸ್ ನಿಯೋಗ ಮತ್ತು ಇರಾನಿನ ನಾಯಕರು ಪಾಕಿಸ್ತಾನಕ್ಕೆ ತೆರಳಿದ್ದಾರೆ. ಇಸ್ಲಮಾಬಾದ್​ಗೆ ಬಂದ ಜೆ.ಡಿ. ವ್ಯಾನ್ಸ್ ಅವರನ್ನು ಸ್ವಾಗತಿಸಲು ಪಾಕಿಸ್ತಾನದ ಸೇನಾ ಮುಖ್ಯಸ್ಥ ಅಸಿಮ್ ಮುನೀರ್ ವಿಮಾನ ನಿಲ್ದಾಣಕ್ಕೆ ಆಗಮಿಸಿದ್ದರು. ಇದಕ್ಕೂ ಮೊದಲು ಇರಾನಿನ ನಿಯೋಗವನ್ನು ಮಿಲಿಟರಿ ಉಡುಗೆಯಲ್ಲಿ ಸ್ವಾಗತಿಸಿದ್ದ ಅಸೀಮ್ ಮುನೀರ್ ಅಮೆರಿಕದ ನಿಯೋಗವನ್ನು ಸ್ವಾಗತಿಸುವಾಗ ಸೂಟ್ ಧರಿಸಿ ಬಂದಿದ್ದು ಬಹಳ ಗಮನ ಸೆಳೆಯಿತು.

ಇರಾನ್​ನ ಸಂಸತ್ತಿನ ಸ್ಪೀಕರ್ ಮೊಹಮ್ಮದ್ ಗಾಲಿಬಾಫ್ ಮತ್ತು ವಿದೇಶಾಂಗ ಸಚಿವ ಅಬ್ಬಾಸ್ ಅರಘ್ಚಿ ನೇತೃತ್ವದ 71 ಸದಸ್ಯರ ನಿಯೋಗವನ್ನು ಸ್ವಾಗತಿಸುವಾಗ ಅಸೀಮ್ ಮುನೀರ್ ಮಿಲಿಟರಿ ಡ್ರೆಸ್ ಧರಿಸಿದ್ದರು. ಅದಾದ ಕೆಲವು ಗಂಟೆಗಳ ನಂತರ ಜೆಡಿ ವ್ಯಾನ್ಸ್ ಅವರ ನಿಯೋಗವನ್ನು ಸ್ವಾಗತಿಸುವಾಗ ಸೂಟು-ಬೂಟು ಧರಿಸಿ ಬಂದಿದ್ದರು. ಇದು ಅವರ ರಾಜತಾಂತ್ರಿಕ ದೃಷ್ಟಿಕೋನವನ್ನು ಸೂಚಿಸುತ್ತದೆ. ಇದು ಇರಾನ್ ಮತ್ತು ಯುಎಸ್ ಎರಡನ್ನೂ ಗುರಿಯಾಗಿಟ್ಟುಕೊಂಡು ಉದ್ದೇಶಪೂರ್ವಕವಾಗಿ ಸಂದೇಶ ಕಳುಹಿಸುವಿಕೆ ಎಂದು ಹಲವಾರು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.

ಸೇನಾ ಅಧಿಕಾರಿಯೊಬ್ಬರು ವಿದೇಶಿ ನಾಯಕರನ್ನು ಸ್ವೀಕರಿಸುವಾಗ ಯಾವಾಗಲೂ ಸಮವಸ್ತ್ರದಲ್ಲಿರಬೇಕು. ಅಸಿಮ್ ಮುನೀರ್ ಅವರು ಅಮೆರಿಕನ್ನರೊಂದಿಗೆ ರಾಜತಾಂತ್ರಿಕ ಮತ್ತು ಇರಾನ್‌ನೊಂದಿಗೆ ಸೈನಿಕ ಎಂದು ತೋರಿಸಲು ಈ ರೀತಿ ತಮ್ಮ ಡ್ರೆಸ್ ಬದಲಾಯಿಸಿದ್ದಾರೆ ಎನ್ನಲಾಗುತ್ತಿದೆ.

ಇನ್ನಷ್ಟು ಅಂತಾರಾಷ್ಟ್ರೀಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ