ಸಿಖ್ ಯುನಾನಿ ವೈದ್ಯನ ಹತ್ಯೆಯ ಹೊಣೆ ಹೊತ್ತ ಐಸಿಸ್-ಕೆ; ವರದಿ ಕೇಳಿದ ಪಾಕ್ ಆಂತರಿಕ ವ್ಯವಹಾರಗಳ ಸಚಿವಾಲಯ
ಅಫ್ಘಾನಿಸ್ತಾನದಲ್ಲಿ ತಾಲಿಬಾನ್ ಆಡಳಿತ ಶುರುವಾದಾಗಿನಿಂದಲೂ ಐಸಿಸ್-ಕೆ ದಾಳಿಯೂ ಹೆಚ್ಚಾಗಿದೆ. ಅಫ್ಘಾನ್ನ ಹಲವು ಭಾಗಗಳಲ್ಲೂ ದಾಳಿ ನಡೆಸಿದೆ. ಆಗಸ್ಟ್ 26ರಂದು ಕಾಬೂಲ್ ಏರ್ಪೋರ್ಟ್ನಲ್ಲಿ ಮಾರಣಾಂತಿಕವಾದ ಆತ್ಮಾಹುತಿ ದಾಳಿ ನಡೆಸಿತ್ತು.
Updated on:Oct 03, 2021 | 1:34 PM
ಪೇಶಾವರ (Peshawar)ದಲ್ಲಿ ಇತ್ತೀಚೆಗಷ್ಟೇ ಸಿಖ್ ಸಮುದಾಯ (Sikh Community)ದ ಖ್ಯಾತ ಯುನಾನಿ ವೈದ್ಯ (ಹಕೀಮ್) ಸರ್ದಾರ್ ಸತ್ನಾಮ್ ಸಿಂಗ್ (45)ರನ್ನು ಅವರ ಕ್ಲಿನಿಕ್ಗೇ ನುಗ್ಗಿ ದುಷ್ಕರ್ಮಿಗಳು ಹತ್ಯೆ ಮಾಡಿದ್ದರು. ಅಪರಿಚಿತ ಬಂದೂಕುಧಾರಿಗಳು ಕ್ಲಿನಿಕ್ಗೆ ಬಂದು, ಕ್ಯಾಬಿನ್ ಬಾಗಿಲು ನೂಕಿ ಸತ್ನಾಮ್ ಸಿಂಗ್ರಿಗೆ ಗುಂಡು ಹಾರಿಸಿದ್ದರು. ಇದೀಗ ಈ ಹತ್ಯೆಯನ್ನು ತಾವೇ ನಡೆಸಿದ್ದಾಗಿ ಐಸಿಸ್-ಕೆ (ISIS-K-ಇಸ್ಲಾಮಿಕ್ ಸ್ಟೇಟ್ ಖೊರಾಸನ್) ಒಪ್ಪಿಕೊಂಡಿದೆ. ಇದು ಇಸ್ಲಾಮಿಕ್ ಸ್ಟೇಟ್ಸ್ ಅಫ್ಘಾನಿಸ್ತಾನದ ಅಂಗಸಂಸ್ಥೆ. ಸಿಖ್ ಯುನಾನಿ ವೈದ್ಯನ ಹತ್ಯೆಯ ಹೊಣೆ ಐಸಿಸ್ -ಕೆ ಹೊರುತ್ತಿದ್ದಂತೆ ಪಾಕಿಸ್ತಾನದ ಆಂತರಿಕ ಸಚಿವಾಲಯ ಇದರಲ್ಲಿ ಹಸ್ತಕ್ಷೇಪ ಮಾಡಿದೆ. ಸಿಖ್ ವೈದ್ಯನ ಹತ್ಯೆಯ ಕುರಿತಾದ ಸಮಗ್ರ ಮಾಹಿತಿಯನ್ನು ನೀಡುವಂತೆ ಖೈಬರ್ ಪಖ್ತುಂಖ್ವಾ ಪ್ರಾಂತೀಯ ಸರ್ಕಾರದ ಬಳಿ ಕೇಳಿದೆ.
ಪಾಕಿಸ್ತಾನದ ವಾಯುವ್ಯ ನಗರವಾದ ಪೇಶಾವರ ಖೈಬರ್ ಪಂಖ್ತುಂಖ್ವಾ ಪ್ರಾಂತ್ಯಕ್ಕೆ ಸೇರಿದೆ. ಹತ್ಯೆಗೀಡಾದ ಸಿಖ್ ಹಕೀಮ್ ಸರ್ದಾರ್ ಸತ್ನಾಮ್ ಸಿಂಗ್, ಸಿಖ್ ಸಮುದಾಯದ ಪ್ರಮುಖ ನಾಯಕನಾಗಿ ಗುರುತಿಸಿಕೊಂಡಿದ್ದರು. ಕಳೆದ 20 ವರ್ಷಗಳಿಂದಲೂ ಪೇಶಾವರ್ನ ಚರ್ಸದ್ದ ರಸ್ತೆಯಲ್ಲಿ ಧರ್ಮಂದರ್ ಫಾರ್ಮಸಿ ಎಂಬ ಹೆಸರಿನ ಕ್ಲಿನಿಕ್ ನಡೆಸುತ್ತಿದ್ದರು. ಹತ್ಯೆ ನಡೆದದ್ದು ಸೆಪ್ಟೆಂಬರ್ 30ರಂದು. ಅಂದು ನಾಲ್ವರು ಅಪರಿಚಿತರು ಬಂದೂಕು ಹಿಡಿದು ಬಂದು ಗುಂಡಿನ ದಾಳಿ ನಡೆಸಿದ್ದಾರೆ. ವೈದ್ಯನ ಹತ್ಯೆ ಮಾಡಿ ಅಲ್ಲಿಂದ ಪಾರಾಗಿದ್ದರು. ಶುಕ್ರವಾರ ಇವರ ಅಂತ್ಯಕ್ರಿಯೆ ನಡೆದಿದೆ.
ಅಫ್ಘಾನಿಸ್ತಾನದಲ್ಲಿ ತಾಲಿಬಾನ್ ಆಡಳಿತ ಶುರುವಾದಾಗಿನಿಂದಲೂ ಐಸಿಸ್-ಕೆ ದಾಳಿಯೂ ಹೆಚ್ಚಾಗಿದೆ. ಅಫ್ಘಾನ್ನ ಹಲವು ಭಾಗಗಳಲ್ಲೂ ದಾಳಿ ನಡೆಸಿದೆ. ಆಗಸ್ಟ್ 26ರಂದು ಕಾಬೂಲ್ ಏರ್ಪೋರ್ಟ್ನಲ್ಲಿ ಮಾರಣಾಂತಿಕವಾದ ಆತ್ಮಾಹುತಿ ದಾಳಿ ನಡೆಸಿತ್ತು. ಅದರಲ್ಲಿ ಸುಮಾರು 170 ಅಫ್ಘಾನ್ ಸೈನಿಕರನ್ನು ಮತ್ತು 13 ಯುಎಸ್ ಸೇನಾ ಸಿಬ್ಬಂದಿಯನ್ನು ಹತ್ಯೆಗೈದಿದ್ದೇವೆ ಎಂದೂ ಐಸಿಸ್-ಕೆ ಹೇಳಿಕೊಂಡಿದೆ. ಇದೀಗ ಸಿಖ್ ವೈದ್ಯನ ಹತ್ಯೆಯ ಹೊಣೆಯನ್ನೂ ಹೊತ್ತಿದೆ. ಪೇಶಾವರದಲ್ಲಿ ಸಿಖ್ರನ್ನು ಪದೇಪದೆ ಟಾರ್ಗೆಟ್ ಮಾಡಲಾಗುತ್ತಿದೆ. 2018ರಲ್ಲಿ ಸಿಖ್ ಪ್ರಮುಖ ನಾಯಕ ಚರಣಜಿತ್ ಸಿಂಗ್ ಎಂಬುವರನ್ನು ಅಪರಿಚಿತನೊಬ್ಬ ಹತ್ಯೆ ಮಾಡಿದ್ದ. ಹಾಗೇ, 2016ರಲ್ಲಿ ಪಾಕಿಸ್ತಾನ ತೆಹ್ರೀಕ್-ಇ-ಇನ್ಸಾಫ್ ಪಕ್ಷದ ಸದಸ್ಯ ಸೋರೆನ್ ಸಿಂಗ್ರನ್ನು ಪೇಶಾವರದಲ್ಲಿಯೇ ಹತ್ಯೆ ಮಾಡಲಾಗಿತ್ತು. 2020ರಲ್ಲಿ ಸುದ್ದಿವಾಹಿನಿಯೊಂದರ ನಿರೂಪಕ ರವೀಂದರ್ ಸಿಂಗ್ರನ್ನು ಭೀಕರವಾಗಿ ಕೊಲ್ಲಲಾಗಿತ್ತು.
ಇದನ್ನೂ ಓದಿ: ‘ಕರ್ನಾಟಕ ಬಿಟ್ಟು ಹೋಗುತ್ತೇನೆ, ಯಾರ ಕಣ್ಣಿಗೂ ಕಾಣಿಸಲ್ಲ’; ನಟಿ ವಿಜಯಲಕ್ಷ್ಮೀ ಬಹಿರಂಗ ಹೇಳಿಕೆ
ಬಹಿರಂಗ ಹೇಳಿಕೆ ನೀಡದಂತೆ ಜೆಡಿಎಸ್ ಶಾಸಕರಿಗೆ ಹೆಚ್ ಡಿ ಕುಮಾರಸ್ವಾಮಿ ಸೂಚನೆ
Published On - 1:32 pm, Sun, 3 October 21
