ಇಸ್ಲಮಾಬಾದ್​ಗೆ ಬರಲು ಇಷ್ಟವಿಲ್ಲದೆ ಇದ್ದರೆ, ವರ್ಚ್ಯುವಲ್ ಆಗಿ ಪಾಲ್ಗೊಳ್ಳಿ; ಸಾರ್ಕ್​ ಶೃಂಗಸಭೆಗೆ ಪಾಕಿಸ್ತಾನದಿಂದ ಭಾರತಕ್ಕೆ ಆಹ್ವಾನ !

ಈಗಾಗಲೇ ತುಂಬ ವಿಳಂಬವಾಗಿರುವ ಸಾರ್ಕ್ ಶೃಂಗಸಭೆ (ದಕ್ಷಿಣ ಏಷ್ಯಾ ಪ್ರಾದೇಶಿಕ ಸಹಕಾರ ಸಂಘಟನೆ-South Asian Association for Regional Cooperation)ಯಲ್ಲಿ ಪಾಲ್ಗೊಳ್ಳುವಂತೆ ಭಾರತಕ್ಕೆ, ನೆರೆರಾಷ್ಟ್ರ ಪಾಕಿಸ್ತಾನ ಆಹ್ವಾನ ನೀಡಿದೆ. ಸಾರ್ಕ್​ ಶೃಂಗಸಭೆ ವರ್ಚ್ಯುವಲ್​ ಆಗಿ ನಡೆಯಲಿದ್ದು, ಭಾರತಕ್ಕೆ, ಪಾಕಿಸ್ತಾನ ವಿದೇಶಾಂಗ ವ್ಯವಹಾರಗಳ ಸಚಿವ ಮಹಮ್ಮದ್​ ಖುರೇಶಿ ಇಂದು ಆಹ್ವಾನ ನೀಡಿದ್ದಾರೆ.  ಇಂದು ಸುದ್ದಿಗೋಷ್ಠಿ ನಡೆಸಿದ್ದ ಖುರೇಶಿ, ಇದೀಗ ಕೊವಿಡ್ 19 ಸಾಂಕ್ರಾಮಿಕ ಮತ್ತೆ ಹೆಚ್ಚುತ್ತಿದೆ. ಹೀಗಾಗಿ ಭಾರತ ಸಾರ್ಕ್​ ಶೃಂಗಸಭೆಯಲ್ಲಿ ಭೌತಿಕವಾಗಿ ಪಾಲ್ಗೊಳ್ಳಲು ಇಚ್ಛಿಸದೆ ಇದ್ದರೆ, ವರ್ಚ್ಯುವಲ್​ ಆಗಿ ಭಾಗವಹಿಸಬಹುದು ಎಂದು ಹೇಳಿದ್ದರು. ಅಂದರೆ ಈ ಮೂಲಕ ಆಹ್ವಾನ ನೀಡಿದ್ದರು. ಆದರೆ ಸಾರ್ಕ್​ ಶೃಂಗಸಭೆಯಲ್ಲಿ ಪಾಲ್ಗೊಳ್ಳುವಂತೆ ಪಾಕಿಸ್ತಾನ ನಮಗೆ ಯಾವುದೇ ಔಪಚಾರಿಕ ಆಮಂತ್ರಣ ಕೊಟ್ಟಿಲ್ಲ. ಆ ದೇಶದಿಂದ ಅಧಿಕೃತ ಆಹ್ವಾನ ಬಂದಿಲ್ಲ ಎಂದು ಭಾರತ ಸ್ಪಷ್ಟಪಡಿಸಿದೆ.

ಈ ಸಾರ್ಕ್​ ಎಂಬುದು ದಕ್ಷಿಣ ಏಷ್ಯಾದ ಪ್ರಾದೇಶಿಕ ಸಹಕಾರ ಸಂಘಟನೆಯಾಗಿದ್ದು, ಅಫ್ಘಾನಿಸ್ತಾನ, ಬಾಂಗ್ಲಾದೇಶ, ಭೂತಾನ್, ಭಾರತ, ಮಾಲ್ಡೀವ್ಸ್​, ನೇಪಾಳ, ಪಾಕಿಸ್ತಾನ ಮತ್ತು ಶ್ರೀಲಂಕಾ ದೇಶಗಳನ್ನು ಒಳಗೊಂಡ ಪ್ರಾದೇಶಿಕ ಗುಂಪಾಗಿದೆ. 2016ರಿಂದಲೂ ಸಾರ್ಕ್​ ಅಷ್ಟೊಂದು ಪರಿಣಾಮಕಾರಿಯಾಗಿ ಸಕ್ರಿಯವಾಗಿಲ್ಲ. 2014ರಲ್ಲಿ ನೇಪಾಳದ ಕಾಠ್ಮಂಡುವಿನಲ್ಲಿ ಸಾರ್ಕ್​ ದ್ವೈವಾರ್ಷಿಕ  ಶೃಂಗಸಭೆ ನಡೆದಿತ್ತು. ಅದಾದ ನಂತರ 2016ರ ನವೆಂಬರ್ 15-19ರ ಅವಧಿಯಲ್ಲಿ ಇಸ್ಲಮಾಬಾದ್​ನಲ್ಲಿ ನಡೆಯಬೇಕಿತ್ತು. ಆದರೆ ಆ ಸಂದರ್ಭದಲ್ಲಿ ಜಮ್ಮು-ಕಾಶ್ಮೀರದ ಉರಿ ವಲಯದಲ್ಲಿ ಉಗ್ರದಾಳಿಯಾಗಿದ್ದರಿಂದ ಭಾರತ ಸರ್ಕಾರ ಪಾಕ್​ ಆತಿಥ್ಯ ವಹಿಸಿದ್ದ ಸಾರ್ಕ್​​ನಲ್ಲಿ ಪಾಲ್ಗೊಳ್ಳಲು ಮುಂದಾಗಲಿಲ್ಲ. ಉರಿಯಲ್ಲಿ ದಾಳಿ ಮಾಡಿದವರು ಪಾಕಿಸ್ತಾನ ಮೂಲದ ಉಗ್ರರೇ ಆಗಿದ್ದಾರೆ. ನಾವು ಸಾರ್ಕ್​ ಸಮಿಟ್​​ನಲ್ಲಿ ಪಾಲ್ಗೊಳ್ಳುವುದಿಲ್ಲ ಎಂದು ಭಾರತ ಹೇಳಿತ್ತು.

ಈ ಬಾರಿ ಸಾರ್ಕ್​ ಶೃಂಗಸಭೆ ಆಯೋಜಿಸಲು ಪಾಕಿಸ್ತಾನ ಸಿದ್ಧವಾಗಿದೆ ಎಂದು ಇಂದು ಹೇಳಿಕೊಂಡಿರುವ ಖುರೇಶಿ, ಭಾರತವನ್ನು ದೂಷಿಸಿದ್ದಾರೆ. ಸಾರ್ಕ್​ ಒಂದು ಒಳ್ಳೆಯ ವೇದಿಕೆ. ಆದರೆ ಭಾರತ ತನ್ನ ಮೊಂಡುತನದಿಂದ ಈ ಫೋರಮ್​ನ್ನು ನಿಷ್ಕ್ರಿಯಗೊಳಿಸಿದೆ. ಅವರು ಇಸ್ಲಮಾಬಾದ್​ಗೆ ಬರಲು ಹಿಂಜರಿಯುತ್ತಾರೆ. ಇಲ್ಲಿಗೆ ಬರುವುದಿಲ್ಲ ಎಂದು ಹೇಳಿದರು.  ಈಗಲೂ ಹೇಳುತ್ತೇನೆ..ಭಾರತದ ಹಠಕ್ಕೆ ಈ ವೇದಿಕೆ ಹಾಳಾಗುವುದು ಬೇಡ. ಒಮ್ಮೆ ಆ ದೇಶಕ್ಕೆ ಇಸ್ಲಮಾಬಾದ್​ಗೆ ಬರಲು ಇಷ್ಟವಿಲ್ಲದೆ ಹೋದಲ್ಲಿ ಅಥವಾ ಕೊವಿಡ್​ 19 ಸಾಂಕ್ರಾಮಿಕ ಇದೆ ಎಂಬ ಆತಂಕ ಇದ್ದಲ್ಲಿ ವರ್ಚ್ಯುವಲ್ ಆಗಿಯೇ ಪಾಳ್ಗೊಳ್ಳಲಿ ಎಂದು ಹೇಳಿದ್ದಾರೆ.

ಆದರೆ ಸಾರ್ಕ್ ಶೃಂಗಸಭೆಗೆ ಸಂಬಂಧಪಟ್ಟ ಅಧಿಕೃತ ಆಹ್ವಾನ ನಮಗೆ ಬಂದಿಲ್ಲ ಎಂದು ಭಾರತ ಹೇಳಿದ್ದು ಬಿಟ್ಟರೆ ಇನ್ಯಾವುದೇ ಮಾಹಿತಿಯೂ ಇಲ್ಲ. ಭಾರತ-ಪಾಕ್​ ನಡುವೆ ಏನೇನೂ ಸರಿಯಿಲ್ಲ. ಹಾಗೇ, ಸಾರ್ಕ್​ನಲ್ಲಿ ಒಂದಾದ ಅಫ್ಘಾನಿಸ್ತಾನದಲ್ಲೂ ಕೂಡ ತೀವ್ರ ಸ್ವರೂಪದ ಅಸ್ಥಿರತೆ ತಾಂಡವವಾಡುತ್ತಿದೆ. ಈ ಒಕ್ಕೂಟದ ಯಾವುದೇ ಒಂದು ದೇಶ ಶೃಂಗಸಭೆ ಮಾಡುತ್ತೇವೆ ಬನ್ನಿ ಎಂದು ಕರೆಯಲು ಸಾಧ್ಯವಿಲ್ಲ. ಎಲ್ಲರೂ ಒಗ್ಗಟ್ಟಾಗಿಯೇ ನಿರ್ಧಾರ ಮಾಡಬೇಕಾಗುತ್ತದೆ. ಭಾರತದ ನಿಲುವು ಸದ್ಯದಲ್ಲೇ ಪ್ರಕಟವಾಗಲಿದೆ.

ಇದನ್ನೂ ಓದಿ: ಮೂರನೇ ಅಲೆ ಶುರುವಾದರೂ ಜಾತ್ರೆ ಮತ್ತು ಉತ್ಸವಗಳಲ್ಲಿ ಸಹಸ್ರಾರು ಜನ ಸೇರುವುದು ಮುಂದುವರಿದಿದೆ!

Published On - 7:19 pm, Mon, 3 January 22