ಝೆಲೆನ್ಸ್ಕಿ ಹೊರಗಿಟ್ಟು ಉಕ್ರೇನ್ ಭವಿಷ್ಯ ನಿರ್ಧಾರ: ರಷ್ಯಾ, ಅಮೆರಿಕ, ಚೀನಾ ಮಹಾ ಶೃಂಗಸಭೆಗೆ ಮಾಸ್ಕೋ ಮುಂದು

ವಾಷಿಂಗ್ಟನ್, ಅಕ್ಟೋಬರ್ 19: ರಷ್ಯಾ ಮತ್ತು ಉಕ್ರೇನ್ ನಡುವಿನ ನಾಲ್ಕು ವರ್ಷಗಳ ಸಂಘರ್ಷಕ್ಕೆ ಮಾಸ್ಕೋ ಪರವಾದ ಶಾಂತಿ ಒಪ್ಪಂದದ ಮೂಲಕ ಅಂತ್ಯಹಾಡಲು ರಷ್ಯಾ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ ಮಹತ್ವದ ಪ್ರಸ್ತಾವನೆಯೊಂದನ್ನು ಮುಂದಿಟ್ಟಿದ್ದಾರೆ. ಮುಂದಿನ ತಿಂಗಳು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಹಾಗೂ ಚೀನಾ ಅಧ್ಯಕ್ಷ ಷಿ ಜಿನ್‌ಪಿಂಗ್ ಅವರೊಂದಿಗೆ 3 ದಿನಗಳ ತ್ರಿಪಕ್ಷೀಯ ಶೃಂಗಸಭೆ ನಡೆಸುವ ಯೋಜನೆಯನ್ನು ಪುಟಿನ್ ಪ್ರಸ್ತಾಪಿಸಿದ್ದಾರೆ ಎಂದು ವಾಲ್ ಸ್ಟ್ರೀಟ್ ಜರ್ನಲ್ ವರದಿ ಮಾಡಿದೆ. ಇತ್ತೀಚೆಗೆ ಟ್ರಂಪ್ ಅವರೊಂದಿಗೆ ನಡೆದ ದೂರವಾಣಿ ಸಂಭಾಷಣೆಯ ವೇಳೆ ಪುಟಿನ್ ಈ ಕಲ್ಪನೆಯನ್ನು ಮುಂದಿಟ್ಟಿದ್ದು, ಇದೇ ವೇಳೆ ರಷ್ಯಾದಿಂದ ಡೀಸೆಲ್ ಖರೀದಿಸುವ ಕುರಿತ ತೈಲ ಒಪ್ಪಂದವೂ ಚರ್ಚೆಗೆ ಬಂದಿದೆ.

ಚೀನಾ ಸಮ್ಮತಿ, ಅಮೆರಿಕದ ಮೀನಮೇಷ

ಡೊನಾಲ್ಡ್ ಟ್ರಂಪ್ ಈ ಸಭೆಯಲ್ಲಿ ಭಾಗವಹಿಸಲು ಒಪ್ಪಿದರೆ ತಾವು ಸಿದ್ಧ ಎಂದು ಚೀನಾ ಅಧಿಕಾರಿಗಳು ತಿಳಿಸಿದ್ದಾರೆ. ಆದರೆ, ಅಮೆರಿಕದ ಹಿರಿಯ ಅಧಿಕಾರಿಗಳ ಪ್ರಕಾರ ಟ್ರಂಪ್ ಇನ್ನೂ ಈ ಶೃಂಗಸಭೆಗೆ ಅಧಿಕೃತ ಒಪ್ಪಿಗೆ ನೀಡಿಲ್ಲ. ಕ್ರೆಮ್ಲಿನ್ ವಕ್ತಾರ ಡಿಮಿಟ್ರಿ ಪೆಸ್ಕೋವ್ ಪ್ರತಿಕ್ರಿಯಿಸಿ,ಕಾರ್ಯಸೂಚಿ ಇನ್ನೂ ಅಂತಿಮಗೊಂಡಿಲ್ಲವಾದರೂ, ಮೂರೂ ದೇಶಗಳು ಇಂತಹ ಸಭೆಯ ಸಾಧ್ಯತೆಯನ್ನು ಸೈದ್ಧಾಂತಿಕವಾಗಿ ಒಪ್ಪಿಕೊಂಡಿವೆ ಎಂದಿದ್ದಾರೆ.

ಉಕ್ರೇನ್ ಮತ್ತು ಯುರೋಪ್‌ಗೆ ಆತಂಕ:ಉಕ್ರೇನ್ ಅನ್ನು ಸಂಪೂರ್ಣವಾಗಿ ಹೊರಗಿಟ್ಟು ರಷ್ಯಾ, ಅಮೆರಿಕ ಮತ್ತು ಚೀನಾ ಸೇರಿ ತಮ್ಮ ದೇಶದ ಭವಿಷ್ಯ ನಿರ್ಧರಿಸಲು ಮುಂದಾಗಿರುವುದು ಉಕ್ರೇನ್ ಅಧ್ಯಕ್ಷ ವೊಲೊಡಿಮಿರ್ ಝೆಲೆನ್ಸ್ಕಿ ಹಾಗೂ ಯುರೋಪಿಯನ್ ಮಿತ್ರರಾಷ್ಟ್ರಗಳನ್ನು ಕೆರಳಿಸಿದೆ.

ಇದನ್ನೂ ಓದಿ: ಉಕ್ರೇನ್‌ಗೆ ಕೈಕೊಟ್ಟ ಅಮೆರಿಕ: ಝೆಲೆನ್‌ಸ್ಕಿ ವಿರುದ್ಧ ಟ್ರಂಪ್ ಆಕ್ರೋಶ, ತೈಲಾಗಾರಗಳ ಮೇಲಿನ ದಾಳಿ ನಿಲ್ಲಿಸಲು ಎಚ್ಚರಿಕೆ

ತಮ್ಮ ಹಿತಾಸಕ್ತಿಗೆ ವಿರುದ್ಧವಾಗಿ ಮಾಸ್ಕೋಗೆ ಅನುಕೂಲಕರವಾದ ಒಪ್ಪಂದ ಹೇರಲಾಗುತ್ತಿದೆ ಎಂದು ಕೀವ್ ಆತಂಕ ವ್ಯಕ್ತಪಡಿಸಿದೆ.

ಝೆಲೆನ್ಸ್ಕಿ ವಿರುದ್ಧ ಟ್ರಂಪ್ ತೀವ್ರ ವಾಗ್ದಾಳಿ:ಟ್ರೂತ್ ಸೋಶಿಯಲ್‌ನಲ್ಲಿ ಪೋಸ್ಟ್ ಹಂಚಿಕೊಂಡಿರುವ ಟ್ರಂಪ್, ಶಾಂತಿ ಮಾತುಕತೆಗಳು ಉತ್ತಮ ಪ್ರಗತಿ ಕಾಣುತ್ತಿವೆ ಎಂದು ಹೇಳಿಕೊಂಡಿದ್ದಾರೆ.

ಅದೇ ವೇಳೆ ರಷ್ಯಾದ ಸಂಸ್ಕರಣಾಗಾರಗಳ ಮೇಲೆ ಉಕ್ರೇನ್ ನಡೆಸುತ್ತಿರುವ ದಾಳಿಗಳು ಜಾಗತಿಕ ತೈಲ ಬೆಲೆ ಏರಿಕೆಗೆ ಕಾರಣವಾಗುತ್ತಿವೆ ಎಂದು ಝೆಲೆನ್ಸ್ಕಿ ವಿರುದ್ಧ ಗರಂ ಆಗಿದ್ದಾರೆ.ನಾನು ಶಾಂತಿ ತರಲು ಪ್ರಯತ್ನಿಸುತ್ತಿದ್ದೇನೆ, ಆದರೆ ಯುರೋಪ್ ಮತ್ತು ಹಿಂದಿನ ಜೋ ಬೈಡನ್ ಆಡಳಿತ ನೀಡಿದ ಅಪಾರ ಹಣದಿಂದಾಗಿ ಝೆಲೆನ್ಸ್ಕಿಗೆ ಯುದ್ಧ ನಿಲ್ಲಿಸಲು ಇಷ್ಟವಿಲ್ಲ. ಅವರ ದೇಶ ಶಿಥಿಲಗೊಂಡಿದೆ, ಭೂಮಿ ಕೈಬಿಟ್ಟು ಹೋಗಿದೆ, ಸೈನಿಕರು ಸಾವನ್ನಪ್ಪುತ್ತಿದ್ದಾರೆ. ನನಗೆ ಈ ವಿನಾಶಕಾರಿ ರಕ್ತಪಾತ ಕೂಡಲೇ ಕೊನೆಗೊಳ್ಳಬೇಕು ಎಂದು ಟ್ರಂಪ್ ಗುಡುಗಿದ್ದಾರೆ.

ಡೀಸೆಲ್ ಒಪ್ಪಂದ ಮತ್ತು ನಿರ್ಬಂಧಗಳ ಸಡಿಲಿಕೆ: ಅಮೆರಿಕದಲ್ಲಿ ಹಣದುಬ್ಬರ ಹಾಗೂ ಇಂಧನ ದರ ಇಳಿಕೆ ಮಾಡುವ ಉದ್ದೇಶದಿಂದ ಟ್ರಂಪ್ ಆಡಳಿತವು ರಷ್ಯಾದ ಮೇಲಿನ ಕೆಲವು ಇಂಧನ ನಿರ್ಬಂಧಗಳನ್ನು ಸಡಿಲಿಸಿ ರಷ್ಯಾದಿಂದ ಡೀಸೆಲ್ ಆಮದಿಗೆ ಅನುಮತಿ ನೀಡಿದೆ. ಇದು ವಾಷಿಂಗ್ಟನ್ ಮತ್ತು ಯುರೋಪಿಯನ್ ಒಕ್ಕೂಟದ ನಡುವೆ ಭಿನ್ನಾಭಿಪ್ರಾಯ ಮೂಡಿಸಿದೆ.

ಭೌಗೋಳಿಕ ರಾಜಕೀಯ ಸಮೀಕರಣ: ಚೀನಾವನ್ನು ಮಧ್ಯಸ್ಥಿಕೆದಾರನಾಗಿ ತರುವ ಮೂಲಕ ಅಮೆರಿಕದ ಮೇಲೆ ರಾಜತಾಂತ್ರಿಕ ಒತ್ತಡ ಹೇರುವುದು ಹಾಗೂ ಯುದ್ಧದಲ್ಲಿ ತನ್ನ ಆರ್ಥಿಕ ಮತ್ತು ಗಡಿ ಹಿತಾಸಕ್ತಿಗಳನ್ನು ಕಾಯ್ದುಕೊಳ್ಳುವುದು ಪುಟಿನ್ ಅವರ ಈ ತ್ರಿಪಕ್ಷೀಯ ಸಭೆಯ ಹಿಂದಿನ ಮುಖ್ಯ ರಾಜತಾಂತ್ರಿಕ ತಂತ್ರವಾಗಿದೆ.

ಅಂತಾರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ 

Published On - 7:49 am, Mon, 19 October 26