ಅಮೆರಿಕ-ಸೌದಿ ಬೃಹತ್ ಪರಮಾಣು ಒಪ್ಪಂದಕ್ಕೆ ಸಹಿ, ಜಾಗತಿಕ ವಲಯದಲ್ಲಿ ತೀವ್ರ ಆತಂಕ
ಅಮೆರಿಕ-ಸೌದಿ ಬೃಹತ್ ಪರಮಾಣು ಒಪ್ಪಂದ ಜಾಗತಿಕ ಆತಂಕ ಮೂಡಿಸಿದೆ. ಸೌದಿಯಲ್ಲಿ ಪರಮಾಣು ಮೂಲಸೌಕರ್ಯ ನಿರ್ಮಿಸಲು ಅಮೆರಿಕನ್ ಕಂಪನಿಗಳಿಗೆ ಅವಕಾಶ. ಯುರೇನಿಯಂ ಸಮೃದ್ಧೀಕರಣ ನಿಷೇಧವಿಲ್ಲದೆ ಮತ್ತು ಕಠಿಣ ತಪಾಸಣೆಗಳಿಲ್ಲದೆ ಒಪ್ಪಂದವಾಗಿರುವುದರಿಂದ ಅಣ್ವಸ್ತ್ರ ಪ್ರಸರಣದ ಅಪಾಯ ಹೆಚ್ಚಿದೆ. ಮಧ್ಯಪ್ರಾಚ್ಯದ ರಾಜಕೀಯ ಸಮೀಕರಣಗಳ ಮೇಲೂ ಇದು ಪರಿಣಾಮ ಬೀರಲಿದೆ.
Updated on: Jul 23, 2026 | 11:23 AM
ರಿಯಾದ್, ಜುಲೈ 23: ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್(Donald Trump) ಅವರು ಸೌದಿ ಅರೇಬಿಯಾ ಜೊತೆಗಿನ ಬಹು-ಶತಕೋಟಿ ಡಾಲರ್ ಮೌಲ್ಯದ ಐತಿಹಾಸಿಕ ‘ನಾಗರಿಕ ಪರಮಾಣು ಒಪ್ಪಂದಕ್ಕೆ’ ಸಹಿ ಹಾಕಿದ್ದಾರೆ. ಮುಂದಿನ 30 ವರ್ಷಗಳ ಕಾಲ ಬಾಳಿಕೆ ಬರುವ ಈ ಒಪ್ಪಂದವು ಸೌದಿ ಅರೇಬಿಯಾದಲ್ಲಿ ಪರಮಾಣು ಮೂಲಸೌಕರ್ಯಗಳನ್ನು ನಿರ್ಮಿಸಲು ಅಮೆರಿಕನ್ ಕಂಪನಿಗಳಿಗೆ ಪೂರ್ಣ ಮುಕ್ತ ಅವಕಾಶ ನೀಡಲಿದೆ. ಆದರೆ, ಈ ಒಪ್ಪಂದದಲ್ಲಿ ಇರಬೇಕಾಗಿದ್ದ ಕಠಿಣ ಜಾಗತಿಕ ಸುರಕ್ಷತಾ ನಿಯಮಗಳನ್ನು ಸಡಿಲಗೊಳಿಸಿರುವುದು ವಿಶ್ವಮಟ್ಟದಲ್ಲಿ, ವಿಶೇಷವಾಗಿ ಅಣ್ವಸ್ತ್ರ ಪ್ರಸರಣದ ಕಳವಳವನ್ನು ಹೆಚ್ಚಿಸಿದೆ.
ಏನಿದು ‘123 ಒಪ್ಪಂದ’? ಅಮೆರಿಕದ ಇಂಧನ ಕಾರ್ಯದರ್ಶಿ ಕ್ರಿಸ್ ರೈಟ್ ಮತ್ತು ಸೌದಿ ಇಂಧನ ಸಚಿವ ಪ್ರಿನ್ಸ್ ಅಬ್ದುಲಜೀಜ್ ಬಿನ್ ಸಲ್ಮಾನ್ ಅವರು ‘123 ಒಪ್ಪಂದ’ ಎಂದು ಕರೆಯಲ್ಪಡುವ ಈ ಶಾಂತಿಯುತ ಪರಮಾಣು ಸಹಕಾರ ಒಪ್ಪಂದಕ್ಕೆ ಅಂಕಿತ ಹಾಕಿದ್ದಾರೆ. ಈ ಒಪ್ಪಂದದ ಮೂಲಕ ಸೌದಿ ಅರೇಬಿಯಾದಲ್ಲಿ ವಾಣಿಜ್ಯ ಪರಮಾಣು ವಿದ್ಯುತ್ ಸ್ಥಾವರಗಳನ್ನು ನಿರ್ಮಿಸುವ ಹಕ್ಕನ್ನು ಅಮೆರಿಕದ ಕಂಪನಿಗಳು ಪಡೆಯಲಿವೆ ಹಾಗೂ ರಷ್ಯಾ-ಚೀನಾದಂತಹ ವಿದೇಶಿ ಸ್ಪರ್ಧಿಗಳನ್ನು ಈ ರೇಸ್ನಿಂದ ಹೊರಗಿಡಲಾಗಿದೆ.
ಒಪ್ಪಂದದ ಮೇಲಿರುವ ಜಾಗತಿಕ ಆತಂಕಗಳೇನು? ಸಾಮಾನ್ಯವಾಗಿ ಅಮೆರಿಕ ಯಾವುದೇ ದೇಶದ ಜೊತೆ ಪರಮಾಣು ಒಪ್ಪಂದ ಮಾಡಿಕೊಳ್ಳುವಾಗ, ಆ ದೇಶವು ‘ಯುರೇನಿಯಂ ಉತ್ಕೃಷ್ಟಗೊಳಿಸುವುದನ್ನು’ ನಿಷೇಧಿಸುವ ಕಠಿಣ ಷರತ್ತು ವಿಧಿಸುತ್ತದೆ. ಆದರೆ ಸೌದಿಯೊಂದಿಗಿನ ಈ ಒಪ್ಪಂದದಲ್ಲಿ ಆ ನಿಷೇಧವಿಲ್ಲ, ಇದರಿಂದ ಸೌದಿ ಅರೇಬಿಯಾ ತನ್ನದೇ ನೆಲದಲ್ಲಿ ಯುರೇನಿಯಂ ಉತ್ಕೃಷ್ಟಗೊಳಿಸಲು ಹಾದಿ ಸುಗಮವಾಗಲಿದೆ. ಯುರೇನಿಯಂ ಉತ್ಕೃಷ್ಟಗೊಳಿಸುವ ತಂತ್ರಜ್ಞಾನವು ನಾಗರಿಕ ವಿದ್ಯುತ್ ಉತ್ಪಾದನೆಗೆ ಮಾತ್ರವಲ್ಲದೆ, ಪರಮಾಣು ಬಾಂಬ್ ತಯಾರಿಕೆಗೂ ಬಾಗಿಲು ತೆರೆಯುತ್ತದೆ.
ಮತ್ತಷ್ಟು ಓದಿ: ‘ಟ್ರಂಪ್ನನ್ನು ಕೊಲ್ಲುತ್ತೇವೆ’; ಇರಾನ್ನಲ್ಲಿ ಬೃಹತ್ ಬ್ಯಾನರ್!
ವಿಶ್ವಸಂಸ್ಥೆಯ ಅತ್ಯಂತ ಕಠಿಣ ಹಂತದ ತಪಾಸಣೆಗಳಿಗೆ ಸೌದಿಯನ್ನು ಒಳಪಡಿಸುವ ‘ಹೆಚ್ಚುವರಿ ಶಿಷ್ಟಾಚಾರ’ವನ್ನು ಈ ಒಪ್ಪಂದದಲ್ಲಿ ಸೇರಿಸಲಾಗಿಲ್ಲ ಎಂಬ ವರದಿಗಳಿವೆ.
ರಾಜಕೀಯ ಹಾಗೂ ಮಧ್ಯಪ್ರಾಚ್ಯ ಹಿನ್ನೆಲೆ ಇರಾನ್ ಯುದ್ಧ ಮತ್ತು ಪಾಕಿಸ್ತಾನದ ಬೆಂಬಲ: ಮಧ್ಯಪ್ರಾಚ್ಯದಲ್ಲಿ ಇರಾನ್ ಜೊತೆಗಿನ ಯುದ್ಧ ತೀವ್ರಗೊಂಡಿರುವ ಬೆನ್ನಲ್ಲೇ ಈ ಒಪ್ಪಂದ ಬಂದಿದೆ. ಒಂದು ವೇಳೆ ಇರಾನ್ ಪರಮಾಣು ಅಸ್ತ್ರ ಪಡೆದರೆ, ತಾವೂ ಪಡೆಯುವುದಾಗಿ ಸೌದಿ ರಾಜಕುಮಾರ ಮುಹಮ್ಮದ್ ಬಿನ್ ಸಲ್ಮಾನ್ (MBS) ಈ ಹಿಂದೆ ಎಚ್ಚರಿಸಿದ್ದರು.
ಸೌದಿ ಅರೇಬಿಯಾ ಈಗಾಗಲೇ ಪರಮಾಣು ಶಕ್ತಿ ಹೊಂದಿರುವ ಪಾಕಿಸ್ತಾನದ ಜೊತೆ ಪರಸ್ಪರ ರಕ್ಷಣಾ ಒಪ್ಪಂದ ಮಾಡಿಕೊಂಡಿದ್ದು, ಅಗತ್ಯಬಿದ್ದರೆ ತನ್ನ ಪರಮಾಣು ಕಾರ್ಯಕ್ರಮವನ್ನು ಸೌದಿಗೆ ಲಭ್ಯಗೊಳಿಸುವುದಾಗಿ ಪಾಕಿಸ್ತಾನ ಹೇಳಿತ್ತು.
ಯೆಮೆನ್ ಯುದ್ಧ ಮತ್ತು ತೈಲ ಕೋಟಾಗಳ ವಿಷಯದಲ್ಲಿ ಸೌದಿ ಮತ್ತು ಯುಎಇ ನಡುವೆ ಉಂಟಾಗಿದ್ದ ಉದ್ವಿಗ್ನತೆಗಳು ಶಮನಗೊಳ್ಳುತ್ತಿದ್ದು, ಗಲ್ಫ್ ರಾಷ್ಟ್ರಗಳು ಮತ್ತೆ ಒಂದಾಗುತ್ತಿರುವ ಬೆನ್ನಲ್ಲೇ ಅಮೆರಿಕದ ಈ ತೀರ್ಮಾನ ಹೊರಬಿದ್ದಿದೆ.
ಅಂತಾರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ
