Repo Rate: ರೆಪೋ ದರ ಏರಿಕೆಯೊಂದಿಗೆ ಸಾಲದ ಕಂತು ಆಗಲಿದೆ ಭಾರಿ, ಬಡ್ಡಿ ದರ ದುಬಾರಿ; ಗೃಹ, ವಾಹನ ಮೊದಲಾದ ಸಾಲ ವಜ್ಜೆ
ಆರ್ಬಿಐನಿಂದ ರೆಪೋ ದರ ಏರಿಕೆ ಘೋಷಣೆ ಮಾಡಿದ ನಂತರ ಬಡ್ಡಿ ದರ ಹಾಗೂ ಇಎಂಐ ಎರಡೂ ಹೆಚ್ಚಾಗಲಿದೆ. ಅದು ಹೇಗೆ ಎಂಬುದರ ವಿವರ ಇಲ್ಲಿದೆ.
Updated on:May 05, 2022 | 12:01 PM
ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾದಿಂದ ರೆಪೋ ದರವನ್ನು (Repo Rate) 40 ಬೇಸಿಸ್ ಪಾಯಿಂಟ್ಸ್ ಹೆಚ್ಚಿಸಲಾಗಿದೆ. ನಿರಂತರವಾಗಿ ಏರುತ್ತಲೇ ಸಾಗಿದ್ದ ಹಣದುಬ್ಬರದ ಒತ್ತಡವನ್ನು ಇಳಿಸಿಕೊಳ್ಳುವುದಕ್ಕೆ ಇಂಥದ್ದೊಂದು ನಿರ್ಧಾರ ಮಾಡಲಾಗಿದೆ ಎನ್ನಲಾಗುತ್ತಿದೆ. ಅಷ್ಟೇ ಅಲ್ಲ, ನಗದು ಮೀಸಲು ಅನುಪಾತವನ್ನು (Cash Reserve Ratio) 50 ಬೇಸಿಸ್ ಪಾಯಿಂಟ್ಸ್ ಹೆಚ್ಚಳ ಮಾಡಿದ್ದು, ಶೇ 4.50 ತಲುಪಿದೆ ಎಂದು ಗವರ್ನರ್ ಶಕ್ತಿಕಾಂತ ದಾಸ್ ತಿಳಿಸಿದ್ದಾರೆ. ಈ ಏರಿಕೆ ಮೂಲಕವಾಗಿ 83,711.55 ಕೋಟಿ ರೂಪಾಯಿಯ ಲಿಕ್ವಿಡಿಟಿಯನ್ನು ಕಡಿಮೆ ಮಾಡಿದಂತಾಗುತ್ತದೆ. ಈ ಸಿಆರ್ಆರ್ ಹೆಚ್ಚಳವು ಮೇ 21ರ ಮಧ್ಯರಾತ್ರಿಯಿಂದ ಜಾರಿಗೆ ಬರುತ್ತದೆ ಎಂದಿದ್ದಾರೆ. ಕೊನೆಯದಾಗಿ ರೆಪೋ ದರವನ್ನು ಕಡಿತ ಮಾಡಿದ್ದು 2020ರ ಮೇ ತಿಂಗಳಲ್ಲಿ. ಆ ನಂತರ ದರದಲ್ಲಿ ಯಾವುದೇ ಬದಲಾವಣೆ ಆಗಿರಲಿಲ್ಲ. ಏರಿಕೆಯು ತಕ್ಷಣದಿಂದಲೇ ಅನ್ವಯಿಸುತ್ತದೆ. ನಗದು ಮೀಸಲು ಅನುಪಾತ ಕೂಡ 50 ಬಿಪಿಎಸ್ ಹೆಚ್ಚಳ ಮಾಡಿರುವುದರಿಂದ ಬಡ್ಡಿ ದರದ ಮೇಲೆ ಇನ್ನಷ್ಟು ಪ್ರಭಾವ ಬೀರುತ್ತದೆ.
ಏನಿದು ರೆಪೋ ದರ ಮತ್ತು ಏಕೆ ಮುಖ್ಯ? ಯಾವಾಗೆಲ್ಲ ವಾಣಿಜ್ಯ ಬ್ಯಾಂಕ್ಗಳ ಬಳಿ ಹಣಕ್ಕೆ ಕೊರತೆ ಬೀಳುತ್ತದೋ ಆಗ ಆರ್ಬಿಐನ ಸಂಪರ್ಕಿಸಿ ಸಾಲ ಪಡೆದುಕೊಳ್ಳುತ್ತವೆ. ಈ ಬ್ಯಾಂಕ್ಗಳಿಗೆ ನಿರ್ದಿಷ್ಟ ದರದಲ್ಲಿ ಆರ್ಬಿಐ ಸಾಲ ನೀಡುತ್ತದೆ. ಅದನ್ನೇ ರೆಪೋ ದರ ಎನ್ನಲಾಗುತ್ತದೆ. ಈ ದರ ಏರಿಸಬೇಕೋ ಇಳಿಸಬೇಕೋ ಅಥವಾ ಬದಲಾವಣೆ ಮಾಡದೆ ಹಾಗೇ ಉಳಿಸಿಕೊಳ್ಳಬೇಕೋ ಎಂಬುದನ್ನು ಆರ್ಬಿಐ ನಿಯಮಿತವಾಗಿ ನಿರ್ಧರಿಸುತ್ತದೆ. ಕೇಂದ್ರ ಬ್ಯಾಂಕ್ನ ಹಣಕಾಸು ನೀತಿ ಸಮಿತಿಯ ನಿರ್ಧಾರವು ಲಿಕ್ವಿಡಿಟಿ ಮತ್ತು ಭಾರತೀಯ ಆರ್ಥಿಕತೆಯ ಹಣದುಬ್ಬರದ ಮೇಲೆ ಪರಿಣಾಮ ಬೀರುತ್ತದೆ. ಹಣದುಬ್ಬರ ನಿಯಂತ್ರಣ ವಿಚಾರಕ್ಕೆ ಬಂದಲ್ಲಿ ಅದನ್ನು ನಿಯಂತ್ರಿಸಲು ಆರ್ಬಿಐ ಬಳಿ ಇರುವ ಸಾಧನವೇ ರೆಪೋ ದರ. ಇದನ್ನು ಏರಿಸುವುದೋ ಅಥವಾ ಇಳಿಸುವುದೋ ಮಾಡುವ ಮೂಲಕ ವಾಣಿಜ್ಯ ಬ್ಯಾಂಕ್ಗಳಿಗೆ ಸಾಲವನ್ನು ಹೆಚ್ಚು ದುಬಾರಿ ಅಥವಾ ಅಗ್ಗ ಮಾಡಬಹುದು. ಇನ್ನು ರೆಪೋ ದರ ಏರಿಸಿದರೆ ಹಣದುಬ್ಬರ ಕಡಿಮೆ ಆಗುತ್ತದೆ. ಮತ್ತು ಅದೇ ರೀತಿ ರೆಪೋ ಇಳಿಸಿದರೆ ಹಣದುಬ್ಬರ ಹೆಚ್ಚುತ್ತದೆ.
ಗೃಹ ಸಾಲ, ವಾಹನ ಸಾಲ ಪಡೆಯುವವರ ಪಾಲಿಗೆ ಇದೆಂಥ ಅರ್ಥ? ಆರ್ಬಿಐನ ಈ ನಿರ್ಧಾರದಿಂದ ಬ್ಯಾಂಕ್ಗಳು ಸಾಲದ ಮೇಲಿನ ಬಡ್ಡಿ ದರವನ್ನು ಹೆಚ್ಚಿಸುತ್ತವೆ. ಆದ್ದರಿಂದ ಗೃಹ ಸಾಲ, ವಾಹನ ಸಾಲ ದುಬಾರಿ ಆಗಲಿದೆ. ಒಂದು ವೇಳೆ ಸಾಲ ತೆಗೆದುಕೊಳ್ಳುವ ಯೋಜನೆ ಇದ್ದರೆ ಶೀಘ್ರವೇ ಪಡೆಯುವುದು ಉತ್ತಮ. ಇಲ್ಲದಿದ್ದರೆ ಸಾಲದ ಮೇಲಿನ ಬಡ್ಡಿ ದರ ಶೀಘ್ರ ಏರಿಕೆ ಆಗಲು ಆರಂಭವಾಗುತ್ತದೆ. ಇಎಂಐಗಳು ಜಾಸ್ತಿ ಆಗುತ್ತವೆ. ಗೃಹ ಸಾಲ, ಕಾರಿನ ಸಾಲ, ಪರ್ಸನಲ್ ಲೋನ್ ಎಲ್ಲವೂ ದುಬಾರಿ ಆಗುತ್ತದೆ.
ಇನ್ನೂ ಹೆಚ್ಚಿನ ವಾಣಿಜ್ಯ ಸುದ್ದಿಗಾಗಿ ಇಲ್ಲಿ ಕ್ಲಿಕ್ ಮಾಡಿ, ಪ್ರಮುಖ ಸುದ್ದಿಗಾಗಿ ಇಲ್ಲಿ ಕ್ಲಿಕ್ ಮಾಡಿ
ಇದನ್ನೂ ಓದಿ: Indian Economy: ಕೊರೊನಾ ಸಮಯದ ನಷ್ಟ ಸರಿತೂಗಿಸಲು ಭಾರತಕ್ಕೆ 15 ವರ್ಷ ಬೇಕಾಗಬಹುದು ಎನ್ನುತ್ತಿದೆ ಆರ್ಬಿಐ
Published On - 12:01 pm, Thu, 5 May 22
