ಡಿಸೆಂಬರ್ ಮೊದಲ ಎರಡು ವಾರದಲ್ಲಿ ಎಫ್ಪಿಐಗಳಿಂದ 22,766 ಕೋಟಿ ರೂ ಒಳಹರಿವು
Foreign Portfolio Investments in India: ವಿದೇಶೀ ಪೋರ್ಟ್ಫೋಲಿಯೋ ಹೂಡಿಕೆಗಳು ಭಾರತದ ಈಕ್ವಿಟಿ ಮಾರುಕಟ್ಟೆಗಳತ್ತ ಲಗ್ಗೆ ಹಾಕುವುದು ಪುನಾರಂಭಗೊಂಡಿದೆ. ಅಕ್ಟೋಬರ್ ಮತ್ತು ನವೆಂಬರ್ನಲ್ಲಿ ಭಾರೀ ಪ್ರಮಾಣದಲ್ಲಿ ಹೊರಹೋಗಿದ್ದ ಎಫ್ಪಿಐಗಳು ಈಗ ಸ್ವಲ್ಪಸ್ವಲ್ಪವಾಗಿ ಬರತೊಡಗಿವೆ. ಡಿಸೆಂಬರ್ ಮೊದಲೆರಡು ವಾರದಲ್ಲಿ ಎಫ್ಪಿಐಗಳ ನಿವ್ವಳ ಒಳಹರಿವು 22,766 ಕೋಟಿ ರೂ ಇದೆ.
Updated on: Dec 15, 2024 | 6:58 PM
ನವದೆಹಲಿ, ಡಿಸೆಂಬರ್ 15: ಎರಡು ತಿಂಗಳು ಭಾರತೀಯ ಷೇರು ಮಾರುಕಟ್ಟೆಯಿಂದ ಹೊರಹೋಗಿದ್ದ ವಿದೇಶೀ ಪೋರ್ಟ್ಫೋಲಿಯೋ ಹೂಡಿಕೆಗಳು ಡಿಸೆಂಬರ್ನಲ್ಲಿ ವಾಪಸ್ ಬರತೊಡಗಿವೆ. ವರದಿ ಪ್ರಕಾರ ಡಿಸೆಂಬರ್ನ ಮೊದಲೆರಡು ವಾರದಲ್ಲಿ ವಿದೇಶೀ ಹೂಡಿಕೆದಾರರಿಂದ ಆಗಿರುವ ನಿವ್ವಳ ಹೂಡಿಕೆ 22,766 ಕೋಟಿ ರೂ ಎನ್ನಲಾಗಿದೆ. ನಿವ್ವಳ ಹೂಡಿಕೆ ಎಂದರೆ ಹೊರಹರಿವಿಗಿಂತ ಒಳಹರಿವು ಹೆಚ್ಚಳವಾಗಿರುವುದು. ಅಮೆರಿಕದ ಫೆಡರಲ್ ರಿಸರ್ವ್ನಿಂದ ಬಡ್ಡಿದರ ಕಡಿತ ಆಗುವ ನಿರೀಕ್ಷೆ ದಟ್ಟವಾಗಿರುವುದರಿಂದ ಎಫ್ಪಿಐಗಳು ಭಾರತೀಯ ಮಾರುಕಟ್ಟೆಯತ್ತ ಹರಿದುಬರಲು ಪ್ರಮುಖ ಕಾರಣ ಎನ್ನಲಾಗಿದೆ.
ಡಿಸೆಂಬರ್ನಲ್ಲಿ ಸೆಪ್ಟೆಂಬರ್ ತಿಂಗಳ ಲಯ ಕಾಣುತ್ತಿದೆ. ಸೆಪ್ಟೆಂಬರ್ನಲ್ಲಿ ಎಫ್ಪಿಐಗಳಿಂದ ಆದ ನಿವ್ವಳ ಹೂಡಿಕೆ 57,724 ಕೋಟಿ ರೂ ಇತ್ತು. ಅದಾದ ಬಳಿಕ ಎರಡು ತಿಂಗಳು ಸಾಕಷ್ಟು ಹೂಡಿಕೆಗಳು ಕಳೆದುಹೋಗಿವೆ. ಅದರಲ್ಲೂ ಅಕ್ಟೋಬರ್ ತಿಂಗಳಲ್ಲಿ ಹೊರಹರಿವು ತೀವ್ರವಾಗಿದೆ. ಆ ಒಂದು ತಿಂಗಳಲ್ಲೇ 94,017 ಕೋಟಿ ರೂನಷ್ಟು ಎಫ್ಪಿಐ ನಿವ್ವಳ ಹೊರಹರಿವು ಆಗಿದೆ. ನವೆಂಬರ್ನಲ್ಲಿ ಇದು 21,612 ಕೋಟಿ ರೂನಷ್ಟಿದೆ.
ಇದನ್ನೂ ಓದಿ: ಕೋವಿಡ್ ನಂತರ 17 ರಾಜ್ಯಗಳು ಶೇ. 9ಕ್ಕಿಂತಲೂ ಹೆಚ್ಚಿನ ದರದಲ್ಲಿ ಬೆಳವಣಿಗೆ; 25 ರಾಜ್ಯಗಳದ್ದು ಶೇ. 7ರ ಮೇಲ್ಪಟ್ಟ ಪ್ರಗತಿ
ಅಕ್ಟೋಬರ್ನಲ್ಲಿ ಭಾರೀ ಪ್ರಮಾಣದಲ್ಲಿ ಹೊರಹರಿವು ಆಗಿತ್ತಾದರೂ ವಾರ್ಷಿಕ ಲೆಕ್ಕ ತೆಗೆದುಕೊಂಡರೆ 2024 ಪಾಸಿಟಿವ್ ಆಗಿದೆ. ಪ್ರಸಕ್ತ ಕ್ಯಾಲಂಡರ್ ವರ್ಷದಲ್ಲಿ ನಿವ್ವಳ ಎಫ್ಪಿಐ ಹೂಡಿಕೆ ಇಲ್ಲಿಯವರೆಗೆ 7,747 ಕೋಟಿ ರೂ ದಾಖಲಾಗಿದೆ.
ಮುಂದಿನ ಅಮೆರಿಕಾ ವಾತಾವರಣದ ಮೇಲೆ ಹೂಡಿಕೆಗಳ ಹರಿವು ಅವಲಂಬನೆ
ಮುಂಬರುವ ದಿನಗಳಲ್ಲಿ ಭಾರತದ ಈಕ್ವಿಟಿ ಮಾರುಕಟ್ಟೆಗೆ ವಿದೇಶೀ ಹೂಡಿಕೆಗಳು ಎಷ್ಟು ಹರಿದುಬರಬಹುದು, ಅಥವಾ ಎಷ್ಟು ಹೂಡಿಕೆಗಳ ಹೊರಹರಿವು ಆಗಬಹುದು ಎನ್ನುವುದು ಹಲವು ಸಂಗತಿಗಳ ಮೇಲೆ ಅವಲಂಬಿಸಿದೆ. ಡೊನಾಲ್ಡ್ ಟ್ರಂಪ್ ಅಧಿಕಾರದ ಗದ್ದುಗೆಗೆ ಕುಳಿತು ಯಾವ್ಯಾವ ನೀತಿಗಳನ್ನು ಜಾರಿಗೆ ತರುತ್ತಾರೆ ಎನ್ನುವುದು ಈ ಸಂಗತಿಗಳಲ್ಲಿ ಒಂದು. ಹಣದುಬ್ಬರ, ಬಡ್ಡಿದರ ಇತ್ಯಾದಿ ಸಂಗತಿಗಳೂ ಕೂಡ ಎಫ್ಪಿಐಗಳ ಮೇಲೆ ಪ್ರಭಾವ ಬೀರುತ್ತವೆ ಎಂದು ತಜ್ಞರು ಹೇಳುತ್ತಾರೆ.
ಇದನ್ನೂ ಓದಿ: ನವೆಂಬರ್ನಲ್ಲಿ ಹಣದುಬ್ಬರ ಶೇ. 5.48ಕ್ಕೆ ಇಳಿಕೆ; ಹೆಚ್ಚು ಆದಾಯದ ರಾಜ್ಯಗಳಲ್ಲಿ ಬೆಲೆ ಏರಿಕೆ ಕಡಿಮೆ
ಜಾಗತಿಕವಾಗಿ ಹಣಕಾಸು ಹರಿವು ಸಲೀಸಾಗಿರುವುದರಿಂದ ಭಾರತದಂತಹ ಉದಯೋನ್ಮುಖ ಮಾರುಕಟ್ಟೆಗಳಿಗೆ ಬಂಡವಾಳ ಹರಿದುಬರಲು ಸಾಧ್ಯವಾಗಿದೆ ಎಂದೆನ್ನುತ್ತಾರೆ ಮತ್ತೊಬ್ಬ ತಜ್ಞರು.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
