Tax On Cryptocurrency: ಕ್ರಿಪ್ಟೋಕರೆನ್ಸಿ ಮೇಲಿನ ಲಾಭಕ್ಕೆ ತೆರಿಗೆ ಲೆಕ್ಕಾಚಾರ ಹೇಗೆ ಗೊತ್ತೆ?

ಭಾರತದಲ್ಲಿ ಕ್ರಿಪ್ಟೋಕರೆನ್ಸಿಯು ಮಾನ್ಯವಾದ ಕರೆನ್ಸಿಯಲ್ಲ ಅಥವಾ ಕಾನೂನುಬದ್ಧ ಟೆಂಡರ್ ಇಲ್ಲ. ಸಾಂಪ್ರದಾಯಿಕ ಅರ್ಥದಲ್ಲಿ ಹೇಳಬೇಕೆಂದರೆ, ಭಾರತದಲ್ಲಿ ಏನನ್ನಾದರೂ ಖರೀದಿಸಲು ಮತ್ತು ಮಾರಾಟ ಮಾಡಲು ಕ್ರಿಪ್ಟೋಕರೆನ್ಸಿ ಪಾವತಿಸಲು ಸಾಧ್ಯವಿಲ್ಲ. ಈ ಕಾರಣದಿಂದಾಗಿ ಕ್ರಿಪ್ಟೋಕರೆನ್ಸಿಗಳಿಂದ ಗಳಿಸಿದ ಆದಾಯದ ಮೇಲೆ ತೆರಿಗೆಯ ಬಗ್ಗೆ ಸದ್ಯಕ್ಕೆ ಯಾವುದೇ ನಿಯಮಗಳು ಅಥವಾ ನಿಯಂತ್ರಣವಿಲ್ಲ. ಆದರೆ ಇದರ ಹೊರತಾಗಿಯೂ ಬಿಟ್‌ಕಾಯಿನ್ ಮತ್ತು ಆಲ್ಟ್‌ಕಾಯಿನ್‌ಗಳ ಏರಿಕೆಯಿಂದಾಗಿ ಅನೇಕ ಭಾರತೀಯರು ತಡವಾಗಿ, ಹೊಸ ಕಾಲದ ಆಸ್ತಿ ವರ್ಗದಲ್ಲಿ ಹೂಡಿಕೆ ಮಾಡಿದ್ದಾರೆ. ಇದರಿಂದ ಉತ್ತಮ ಆದಾಯವನ್ನು ಗಳಿಸಿದ್ದಾರೆ. ಹೂಡಿಕೆದಾರರು ಈ ಆಸ್ತಿ ವರ್ಗದಿಂದ ಆಕರ್ಷಕ ಆದಾಯವನ್ನು ಗಳಿಸುವುದರೊಂದಿಗೆ ಕ್ರಿಪ್ಟೋಕರೆನ್ಸಿ ಹೂಡಿಕೆಗಳಿಂದ ಬರುವ ಆದಾಯದ ಮೇಲೆ ತೆರಿಗೆ ವಿಧಿಸಲು ಪ್ರಸ್ತಾವಗಳು ಬರುತ್ತಿವೆ. ಅಲ್ಲಿಂದೀಚೆಗೆ, ಜನರು ತಮ್ಮ ಆದಾಯವನ್ನು ಕ್ರಿಪ್ಟೋಕರೆನ್ಸಿಯಿಂದ “ಬಂಡವಾಳ ಲಾಭ”ದ ಅಡಿಯಲ್ಲಿ ಘೋಷಿಸಬೇಕು ಎಂದು ಹಲವಾರು ತೆರಿಗೆ ತಜ್ಞರು ಸಲಹೆ ನೀಡಿದ್ದಾರೆ. ಆದರೆ ಕ್ರಿಪ್ಟೋ ವ್ಯಾಪಾರದ ಮೇಲಿನ ಬಂಡವಾಳ ಲಾಭದ ತೆರಿಗೆಯನ್ನು ಹೇಗೆ ಲೆಕ್ಕ ಹಾಕಬೇಕು? ಇದು ತೆರಿಗೆದಾರರಲ್ಲಿ ಗೊಂದಲ ಮೂಡಿಸಿದೆ. ಒಂದು ಉದಾಹರಣೆಯನ್ನು ತೆಗೆದುಕೊಳ್ಳೋಣ ಮತ್ತು ಈ ಆದಾಯವನ್ನು ಹೇಗೆ ಬಂಡವಾಳ ಲಾಭವಾಗಿ ತೆರಿಗೆ ವಿಧಿಸಲಾಗುತ್ತದೆ ಎಂಬುದನ್ನು ಅರ್ಥ ಮಾಡಿಕೊಳ್ಳೋಣ.

ತೆರಿಗೆ ತಜ್ಞರು ಹೇಳುತ್ತಾರೆ, ಕ್ರಿಪ್ಟೋಕರೆನ್ಸಿಯನ್ನು ಬಂಡವಾಳದ ಆಸ್ತಿಯಾಗಿ ಇರಿಸಿದರೆ, ಅದರಿಂದ ಬಂದ ಲಾಭ ಅಥವಾ ನಷ್ಟವನ್ನು ಕ್ಯಾಪಿಟಲ್ ಗೇಯ್ನ್ಸ್ ಅಥವಾ ನಷ್ಟ ಎಂದು ವರದಿ ಮಾಡಬೇಕು. ಈ ಆಸ್ತಿಯನ್ನು 36 ತಿಂಗಳುಗಳಿಗಿಂತ ಹೆಚ್ಚು ಕಾಲ ಇಟ್ಟುಕೊಂಡಿದ್ದರೆ ಆ ನಂತರ ಲಾಭ/ನಷ್ಟಗಳನ್ನು ದೀರ್ಘಾವಧಿಯ ಕ್ಯಾಪಿಟಲ್ ಲಾಭ ಅಥವಾ ನಷ್ಟ ಎಂದು ವರ್ಗೀಕರಿಸಬೇಕು. ಮೂರು ವರ್ಷಗಳ ಮೊದಲು ಮಾರಾಟ ಮಾಡಿದರೆ ಲಾಭ/ನಷ್ಟಗಳನ್ನು ಅಲ್ಪಾವಧಿಯ ಕ್ಯಾಪಿಟಲ್ ಲಾಭ ಅಥವಾ ನಷ್ಟ ಎಂದು ಪರಿಗಣಿಸಲಾಗುತ್ತದೆ. ಮೊದಲ ಪ್ರಕರಣದಲ್ಲಿ (ದೀರ್ಘಾವಧಿಯ ಕ್ಯಾಪಿಟಲ್ ಲಾಭಗಳು) ಲಾಭಗಳಿಗೆ ಶೇ 20ರಷ್ಟು ತೆರಿಗೆ ವಿಧಿಸಲಾಗುತ್ತದೆ. ಅದರ ಮೇಲೆ ಅನ್ವಯವಾಗುವ ಸರ್​ಚಾರ್ಜ್ ಮತ್ತು ಸೆಸ್ ಇರುತ್ತದೆ. ಎರಡನೇ ಪ್ರಕರಣದಲ್ಲಿ (ಅಲ್ಪಾವಧಿಯ ಬಂಡವಾಳ ಲಾಭಗಳು) ತೆರಿಗೆದಾರರ ಆದಾಯ ತೆರಿಗೆ ಸ್ಲ್ಯಾಬ್​ ಅನ್ವಯಿಸಿ ಲಾಭಗಳಿಗೆ ತೆರಿಗೆ ವಿಧಿಸಲಾಗುತ್ತದೆ.

ಮೇ 1, 2019ರಂದು ರೂ. 1 ಲಕ್ಷ ಮೌಲ್ಯದ ಬಿಟ್‌ಕಾಯಿನ್‌ಗಳನ್ನು ಖರೀದಿಸಿದ್ದಾರೆ ಮತ್ತು ಜನವರಿ 5, 2021ರಂದು ರೂ. 1.5 ಲಕ್ಷಕ್ಕೆ ಮಾರಾಟ ಮಾಡಿದ್ದಾರೆ ಎಂದು ಭಾವಿಸೋಣ. ಇಲ್ಲಿ, ಅವಧಿಯು 36 ತಿಂಗಳಿಗಿಂತ ಕಡಿಮೆಯಿರುತ್ತದೆ. ಆದ್ದರಿಂದ ಲಾಭವನ್ನು ಅಲ್ಪಾವಧಿಯ ಕ್ಯಾಪಿಟಲ್​ ಗೇಯ್ನ್ಸ್ ಎಂದು ಪರಿಗಣಿಸಲಾಗುತ್ತದೆ. ಆದ್ದರಿಂದ ರೂ. 50,000 ಲಾಭವನ್ನು ತೆರಿಗೆಯ ಆದಾಯಕ್ಕೆ ಸೇರಿಸಲಾಗುತ್ತದೆ. ಸ್ಲ್ಯಾಬ್‌ಗೆ ಅನುಗುಣವಾಗಿ ತೆರಿಗೆ ವಿಧಿಸಲಾಗುತ್ತದೆ. ಮೇಲಿನ ಉದಾಹರಣೆಯಲ್ಲಿ ಜನವರಿ 5, 2018ಕ್ಕಿಂತ ಮೊದಲು ಬಿಟ್‌ಕಾಯಿನ್ ಅನ್ನು ಖರೀದಿಸಿದ್ದರೆ, ಆ ನಂತರ ಲಾಭಗಳನ್ನು ದೀರ್ಘಾವಧಿಯ ಕ್ಯಾಪಿಟಲ್ ಗೇಯ್ನ್ ಎಂದು ಪರಿಗಣಿಸಲಾಗುತ್ತದೆ. ಅದರ ಇಂಡೆಕ್ಸೇಶನ್ ಪ್ರಯೋಜನದೊಂದಿಗೆ ಶೇ 20ರಷ್ಟು ತೆರಿಗೆ ವಿಧಿಸಲಾಗುತ್ತದೆ. ಸೂಚ್ಯಂಕವು ಒಂದು ಸ್ವತ್ತಿನ ಖರೀದಿ ಬೆಲೆಯನ್ನು ಫ್ಯಾಕ್ಟರ್ ಹಣದುಬ್ಬರಕ್ಕೆ ಸರಿಹೊಂದಿಸುವ ಪ್ರಕ್ರಿಯೆಯಾಗಿದೆ.

ಇಲ್ಲಿ ಉಲ್ಲೇಖಿಸಬೇಕಾದ ಅಂಶವೆಂದರೆ, ಯಾವುದೇ ಕ್ರಿಪ್ಟೋಕರೆನ್ಸಿಗಳಲ್ಲಿ ಹೂಡಿಕೆ ಮಾಡಿದ್ದರೆ ಆದಾಯ ತೆರಿಗೆ ರಿಟರ್ನ್‌ನಲ್ಲಿ ಬಹಿರಂಗಪಡಿಸಬೇಕು. ಇಲ್ಲದಿದ್ದರೆ ಆ ಆಸ್ತಿಯನ್ನು ಮಾರಾಟ ಮಾಡಿದಾಗ ಮತ್ತು ಕೆಲವು ಲಾಭಗಳನ್ನು ಪಡೆದಾಗ ದಂಡ ಬೀಳುವ ಸಾಧ್ಯತೆಗಳಿವೆ.

ಇದನ್ನೂ ಓದಿ: ಕ್ರಿಪ್ಟೋಗಳು ನಿಲ್ಲಿಸುವುದಕ್ಕೆ ಸಾಧ್ಯವಿಲ್ಲ, ನಿಯಂತ್ರಣ ಅಗತ್ಯವಿದೆ: ಸಂಸದರ ಸಂಸದೀಯ ಸಮಿತಿ ಸಭೆಯ ಅಭಿಮತ