ಐಡಿಎಫ್ಸಿ ಮತ್ತು ಐಡಿಎಫ್ಸಿ ಫಸ್ಟ್ ಬ್ಯಾಂಕ್ ವಿಲೀನಕ್ಕೆ ಷೇರುದಾರರ ಸಮ್ಮತಿ
IDFC and IDFC First Bank Merger proposal: ಐಡಿಎಫ್ಸಿ ಮತ್ತು ಐಡಿಎಫ್ಸಿ ಫಸ್ಟ್ ಬ್ಯಾಂಕ್ನ ವಿಲೀನ ಪ್ರಸ್ತಾವಕ್ಕೆ ಷೇರುದಾರರು ಸಮ್ಮತಿ ನೀಡಿದ್ದಾರೆ. ಎನ್ಸಿಎಲ್ಟಿ ಮೊನ್ನೆ (ಮೇ 17) ನಡೆಸಿದ ಇವೋಟಿಂಗ್ನಲ್ಲಿ ಶೇ. 99.95ರಷ್ಟು ಷೇರುದಾರರು ಮರ್ಜ್ ಸ್ಕೀಮ್ಗೆ ಒಪ್ಪಿಗೆ ಕೊಟ್ಟಿದ್ದಾರೆ ಎಂದು ಆಡಳಿತ ಮಂಡಳಿ ಹೇಳಿದೆ. ಈ ಪ್ರಕ್ರಿಯೆಯಲ್ಲಿ ಮೊದಲಿಗೆ ಐಡಿಎಫ್ಸಿ ಜೊತೆ ಐಡಿಎಫ್ಸಿ ಐಎಚ್ಎಸ್ಸಿ ವಿಲೀನಗೊಳ್ಳಲಿದೆ. ಅದಾದ ಬಳಿಕ ಐಡಿಎಫ್ಸಿ ಫಸ್ಟ್ ಬ್ಯಾಂಕ್ ಜೊತೆ ಐಡಿಎಫ್ಸಿ ವಿಲೀನಗೊಳ್ಳುತ್ತದೆ. ಐಡಿಎಫ್ಸಿಯ ಷೇರುದಾರರಿಗೆ ಪ್ರತೀ 100 ಷೇರಿಗೆ 155 ಬ್ಯಾಂಕ್ ಷೇರು ಸಿಗುತ್ತದೆ.
Updated on: May 19, 2024 | 10:52 AM
ನವದೆಹಲಿ, ಮೇ 19: ಎಚ್ಡಿಎಫ್ಸಿ ಮತ್ತು ಎಚ್ಡಿಎಫ್ಸಿ ಬ್ಯಾಂಕ್ಗಳು ವಿಲೀನಗೊಂಡ ರೀತಿಯಲ್ಲೇ ಎರಡು ಐಡಿಎಫ್ಸಿ ಸಂಸ್ಥೆಗಳು ಸೇರಲಿವೆ. ಐಡಿಎಫ್ಸಿ ಮತ್ತು ಐಡಿಎಫ್ಸಿ ಫಸ್ಟ್ ಬ್ಯಾಂಕ್ ವಿಲೀನಗೊಳಿಸುವ ಪ್ರಸ್ತಾವಕ್ಕೆ (IDFC First Bank merger proposal) ಷೇರುದಾರರು ಸಮ್ಮತಿಸಿದ್ದಾರೆ. ಕಾನೂನು ಪ್ರಕ್ರಿಯೆಯಾಗಿ ರಾಷ್ಟ್ರೀಯ ಕಂಪನಿ ಕಾನೂನು ನ್ಯಾಯಮಂಡಳಿ (ಎನ್ಸಿಎಲ್ಟಿ) ಮೇ 17ರಂದು ವಿಡಿಯೋ ಕಾನ್ಫರೆನ್ಸ್ ಮತ್ತಿತರ ಆನ್ಲೈನ್ ಮೂಲಕ ಷೇರುದಾರರು ಹಾಗು ಎಲ್ಲಾ ಹಕ್ಕುದಾರರ ಸಭೆ ನಡೆಸಿತು. ಈ ವೇಳೆ ವಿಲೀನ ಪ್ರಸ್ತಾವಕ್ಕೆ ಹೆಚ್ಚೂಕಡಿಮೆ ನೂರಕ್ಕೆ ನೂರರಷ್ಟು ಅನುಮೋದನೆ ಸಿಕ್ಕಿದೆ. ಇದರೊಂದಿಗೆ ಐಡಿಎಫ್ಸಿ ಸಂಸ್ಥೆ ತನ್ನ ಅಂಗಸಂಸ್ಥೆಯಾದ ಐಡಿಎಫ್ಸಿ ಬ್ಯಾಂಕ್ನೊಂದಿಗೆ ವಿಲೀನವಾಗಲಿದೆ.
‘ವಿಲೀನಗೊಳಿಸುವ ಈ ಯೋಜನೆಗೆ ಒಪ್ಪಿಗೆ ಬೇಡುವ ನಿರ್ಣಯಕ್ಕೆ ಶೇ. 99.95ರಷ್ಟು ಬಹುಮತದೊಂದಿಗೆ ಈಕ್ವಿಟಿ ಷೇರುದಾರರು ಒಪ್ಪಿಗೆ ಕೊಟ್ಟಿದ್ದಾರೆ’ ಎಂದು ಐಡಿಎಫ್ಸಿ ಫಸ್ಟ್ ಬ್ಯಾಂಕ್ನ ಆಡಳಿತ ಮಂಡಳಿ ತಿಳಿಸಿದೆ.
ಸಭೆಯಲ್ಲಿ ಇ-ವೋಟಿಂಗ್ ಮೂಲಕ ನಿರ್ಣಯ ಪಾಸ್ ಆಗಿದೆ. ಬ್ಯಾಂಕ್ನ ಶೇ. 75ಕ್ಕೂ ಮೌಲ್ಯದ ಷೇರುಗಳನ್ನು ಹೊಂದಿರುವ ಈಕ್ವಿಟಿ ಷೇರುದಾರು ಈ ವೋಟಿಂಗ್ನಲ್ಲಿ ಪಾಲ್ಗೊಂಡಿದ್ದರು. ಇದರೊಂದಿಗೆ ಅಧಿಕೃತವಾಗಿ ಐಡಿಎಫ್ಸಿ ಮತ್ತು ಐಡಿಎಫ್ಸಿ ಬ್ಯಾಂಕ್ ವಿಲೀನಕ್ಕೆ ಒಪ್ಪಿಗೆ ಮುದ್ರೆ ಸಿಕ್ಕಂತಾಗಿದೆ. ನಾನ್ ಕನ್ವರ್ಟಿಬಲ್ ಡಿಬಂಚರ್ ಅಥವಾ ಎನ್ಸಿಡಿಗಳನ್ನು ಹೊಂದಿರುವ ಹೂಡಿಕೆದಾರರೂ ಈ ಸ್ಕೀಮ್ಗೆ ಸಮ್ಮತಿಸಿದ್ದಾರೆ.
ಇದನ್ನೂ ಓದಿ: Sundar Pichai: AI ಆತಂಕ ಬೇಡ, ಅರ್ಥ ಮಾಡಿಕೊಳ್ಳಿ: ಭಾರತದ ಯುವ ಟೆಕ್ಕಿಗಳಿಗೆ ಸುಂದರ ಸಲಹೆ ನೀಡಿದ ಪಿಚೈ!
ಐಡಿಎಫ್ಸಿ ಸಂಸ್ಥೆ 1997ರಲ್ಲಿ ಆರಂಭವಾಗಿದೆ. 2015ರಲ್ಲಿ ಆರ್ಬಿಐ ಲೈಸೆನ್ಸ್ ಪಡೆದು ಬ್ಯಾಂಕ್ ಸ್ಥಾಪಿಸಿದೆ. 2018ರಲ್ಲಿ ಕ್ಯಾಪಿಟಲ್ ಫಸ್ಟ್ ಎಂಬ ಬ್ಯಾಂಕೇತರ ಸಂಸ್ಥೆಯನ್ನು ಖರೀದಿಸಿತು. ಐಡಿಎಫ್ಸಿ ಬ್ಯಾಂಕ್ ಹೆಸರು ಐಡಿಎಫ್ಸಿ ಫಸ್ಟ್ ಬ್ಯಾಂಕ್ ಎಂದು ಬದಲಾಯಿತು.
ಈಗ ಬ್ಯಾಂಕ್ ಜೊತೆ ಮಾತೃ ಸಂಸ್ಥೆ ವಿಲೀನವಾಗುತ್ತಿದೆ. ಮೊದಲಿಗೆ ಐಡಿಎಫ್ಸಿ ಜೊತೆ ಐಡಿಎಫ್ಸಿ ಎಫ್ಎಚ್ಎಸ್ಎಲ್ ಸೇರ್ಪಡೆ ಆಗುತ್ತದೆ. ಬಳಿಕ ಐಡಿಎಫ್ಸಿ ಮತ್ತು ಐಡಿಎಫ್ಸಿ ಫಸ್ಟ್ ಬ್ಯಾಂಕ್ ವಿಲೀನವಾಗುತ್ತದೆ. ಅಂತಿಮವಾಗಿ ಐಡಿಎಫ್ಸಿ ಫಸ್ಟ್ ಬ್ಯಾಂಕ್ ಉಳಿಯಲಿದೆ.
ಇದನ್ನೂ ಓದಿ: Forbes 30 Under 30 List: ಫೋರ್ಬ್ಸ್ ಪಟ್ಟಿಯಲ್ಲಿ ಮಿಂಚುತ್ತಿರುವ ಭಾರತೀಯ ಯುವ ಉದ್ಯಮಿಗಳು
ಎರಡು ಸಂಸ್ಥೆಗಳ ಷೇರುದಾರರಿಗೆ ಏನು ಸಿಗುತ್ತೆ?
ಐಡಿಎಫ್ಸಿ ಮತ್ತು ಐಡಿಎಫ್ಸಿ ಫಸ್ಟ್ ಬ್ಯಾಂಕ್ ಎರಡೂ ಕೂಡ ಷೇರು ಮಾರುಕಟ್ಟೆಯಲ್ಲಿ ಲಿಸ್ಟ್ ಆಗಿರುವ ಸಂಸ್ಥೆಗಳಾಗಿವೆ. ಐಡಿಎಫ್ಸಿ ಸಂಸ್ಥೆಯ ಷೇರುದಾರರಿಗೆ ಪ್ರತೀ 100 ಷೇರಿಗೆ ಐಡಿಎಫ್ಸಿ ಫಸ್ಟ್ ಬ್ಯಾಂಕ್ನ 155 ಷೇರುಗಳು ಸಿಗಲಿವೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
