MEIL: ವಿಶ್ವದ ಅತಿದೊಡ್ಡ ತೈಲಬಾವಿ ರಿಗ್ ನಿರ್ಮಾಣ ಪ್ರಕ್ರಿಯೆಗೆ ಹೊಸ ವೇಗ, ಶೀಘ್ರ ONGCಗೆ ಹಸ್ತಾಂತರ

ವಿಶಾಖಪಟ್ಟಣ: ಆಂಧ್ರ ಪ್ರದೇಶದ ಪೂರ್ವ ಮತ್ತು ಪಶ್ಚಿಮ ಗೋದಾವರಿ ಜಿಲ್ಲೆಯಲ್ಲಿರುವ ಪೆಟ್ರೋಲಿಯಂ ಉತ್ಪನ್ನಗಳನ್ನು ತೆಗೆದು ಸಂಸ್ಕರಿಸಲು ಅನುವು ಮಾಡಿಕೊಡುವ ಬೃಹತ್ ರಿಗ್​ಗಳನ್ನು ಮೆಘಾ ಎಂಜಿನಿಯರಿಂಗ್ ಮತ್ತು ಇನ್​ಫ್ರಾಸ್ಟ್ಟಕ್ಚರ್ ಲಿಮಿಟೆಡ್ (Megha Engineering and Infrastructures Limited – MEIL) ನಿರ್ಮಿಸುತ್ತಿದೆ. 2000 ಹಾರ್ಸ್​ಪವರ್ (HP) ಸಾಮರ್ಥ್ಯದ ಡ್ರಿಲಿಂಗ್ ರಿಗ್​ ನಿರ್ಮಾಣ ಕಾಮಗಾರಿಗೆ ಎಂಇಐಎಲ್ ಹೊಸ ವೇಗ ನೀಡಿದೆ. ರಾಜಮಂಡ್ರಿ ಜಿಲ್ಲೆಯ ಭೀಮವರಂನಲ್ಲಿರುವ ಈ ರಿಗ್​ಗಾಗಿ ಅತ್ಯಾಧುನಿಕ ತಂತ್ರಜ್ಞಾನ ಬಳಕೆಯಾಗುತ್ತಿದೆ. ಈ ಅತ್ಯಾಧುನಿಕ 2000 ಹೆಚ್​ಪಿ ಸಾಮರ್ಥ್ಯದ ರಿಗ್​ನ ಸಾಮರ್ಥ್ಯ, ಸಾಂಪ್ರದಾಯಿಕ ವಿನ್ಯಾಸದ 3000 ಎಚ್​ಪಿ ರಿಗ್​ಗೆ ಸಮನಾಗಿದೆ. ದೇಶೀಯ ನಿರ್ಮಾಣದ ಈ ರಿಗ್​ನ ಕಾರ್ಯಾಚರಣೆಯೂ ಯಶಸ್ವಿಯಾಗಿದೆ. ಭೂಮಿಯ 6 ಕಿಮೀ (6000 ಮೀಟರ್) ಆಳದಲ್ಲಿಯೂ ಈ ರಿಗ್ ಕಾರ್ಯನಿರ್ವಹಿಸಬಲ್ಲದು.

ಈವರೆಗೆ ಎಂಇಐಎಲ್ ಭೂಮಿಯನ್ನು ಆಳದಲ್ಲಿ ಅಗೆಯುವ 10 ರಿಗ್​ಗಳನ್ನು ಪೂರೈಸಿದೆ. ಈ ಪೈಕಿ ಮೂರು ಈಗಾಗಲೇ ಕಾರ್ಯಾರಂಭ ಮಾಡಿವೆ. ಏಳು ರಿಗ್​ಗಳ ಅಳವಡಿಕೆ ಆಂತಿಮ ಹಂತದಲ್ಲಿದ್ದು, ಶೀಘ್ರ ಕಾರ್ಯಾರಂಭ ಮಾಡಲಿವೆ. ಮುಂದಿನ 4ರಿಂದ 5 ವಾರಗಳಲ್ಲಿ ಇವೂ ಒಎನ್​ಜಿಸಿಯ ವಿವಿಧ ಕ್ಷೇತ್ರಗಳಲ್ಲಿ ಕಾರ್ಯಾರಂಭ ಮಾಡಲಿವೆ. ಇದೇ ಹೊತ್ತಿಗೆ ಎಂಇಐಎಲ್ ಐದು ವರ್ಕ್​ಓವರ್ ರಿಗ್​ಗಳನ್ನು​ (ತೈಲಬಾವಿ ಅಥವಾ ನೈಸರ್ಗಿಕ ಅನಿಲ ಹೊರತೆಗೆಯುವ ಸ್ಥಳಗಳಲ್ಲಿ ವಿಶೇಷ ಕಾರ್ಯಾಚರಣೆಗೆ ಬಳಸುವ ಉಪಕರಣ) ಹಸ್ತಾಂತರಿಸಿದೆ. ಮೊದಲ ಕಂತಿನಲ್ಲಿ ಹಸ್ತಾಂತರಿಸಿದ ಈ ರಿಗ್​ಗಳನ್ನು ಮೆಶ್​ಸಾನಾ, ಅಹಮದಾಬಾದ್, ಅಂಕಲೇಶ್ವರ, ಅಗರ್ತಲ ಮತ್ತು ಶಿವ್​ಸಾಗರ್​ ಒನ್​ಜಿಸಿ ಘಟಕಗಳಲ್ಲಿ ಅಳವಡಿಸಲಾಗಿದೆ. 2ನೇ ಕಂತಿನಲ್ಲಿ ಹಸ್ತಾಂತರಿಸಬೇಕಾದ 5 ರಿಗ್​ಗಳು ನಿರ್ಮಾಣದ ಅಂತಿಮ ಹಂತದಲ್ಲಿವೆ.

ಓಎನ್​ಜಿಸಿಗಾಗಿ 47 ರಿಗ್​ಗಳನ್ನು ನಿರ್ಮಿಸಿಕೊಡುವ ಆರ್ಡರ್​ ಅನ್ನು ಎಂಇಐಎಲ್ ಸ್ಪರ್ಧಾತ್ಮಕ ಬಿಡಿಂಗ್​ನಲ್ಲಿ ಪಡೆದುಕೊಂಡಿತ್ತು. ಈ ಪೈಕಿ 20 ವರ್ಕ್​ಓವರ್ ರಿಗ್​ಗಳಾಗಿದ್ದರೆ, 27 ಲ್ಯಾಂಡ್ ಡ್ರಿಲಿಂಗ್ ರಿಗ್​ಗಳು. 20 ವರ್ಕ್​ಓವರ್ ರಿಗ್​ಗಳಲ್ಲಿ 12 ರಿಗ್​ಗಳು 50 ಟನ್ ಸಾಮರ್ಥ್ಯದ್ದು, 4 ರಿಗ್​ಗಳು 100 ಟನ್ ಸಾಮರ್ಥ್ಯದ್ದಾಗಿವೆ. ಉಳಿದ 4 ರಿಗ್​ಗಳಿಗೆ 150 ಟನ್ ಸಾಮರ್ಥ್ಯ ಇರುತ್ತದೆ. 27 ಲ್ಯಾಂಡ್ ಡ್ರಿಲಿಂಗ್ ರಿಗ್​ಗಳ ಪೈಕಿ 2 ಮೊಬೈಲ್ ಹೈಡ್ರಾಲಿಕ್ ರಿಗ್​ಗಳಿಗೆ 1500 ಎಚ್​ಪಿ ಶಕ್ತಿ ಇರುತ್ತದೆ. 17 ರಿಗ್​ಗಳು 1500 ಎಚ್​ಪಿ ಸಾಮರ್ಥ್ಯದೊಂದಿಗೆ ಎಸಿ ವಿಎಫ್​ಡಿ ಸೌಲಭ್ಯವನ್ನೂ ಹೊಂದಿರುತ್ತವೆ. 6 ರಿಗ್​ಗಳಿಗೆ ಎಸಿ ವಿಎಫ್​ಡಿ ಜೊತೆಗೆ 2000 ಎಚ್​ಪಿ ಸಾಮರ್ಥ್ಯ ಇದ್ದರೆ, ಉಳಿದೆರೆಡು ರಿಗ್​ಗಳಿಗೆ ಎಚ್​ಟಿ ವಿಎಫ್​ಡಿ ಜೊತೆಗೆ 2000 ಎಚ್​ಪಿ ಸಾಮರ್ಥ್ಯ ಇರಲಿದೆ.

ಅಸ್ಸಾಂ (ಸಿಬ್​ಸಾಗರ್, ಜೊರಾಹತ್), ಆಂಧ್ರ ಪ್ರದೇಶ (ರಾಜಮಂಡ್ರಿ), ಗುಜರಾತ್ (ಅಹಮದಾಬಾದ್, ಅಂಕಲೇಶ್ವರ, ಮೆಹಸನ ಮತ್ತು ಕಾಂಬೇ), ತ್ರಿಪುರ (ಅಗರ್ತಲ) ಮತ್ತು ತಮಿಳುನಾಡಿನಲ್ಲಿ (ಕಾರೈಕಲ್) ಇರುವ ಒಎನ್​ಜಿಸಿ ಘಟಕಗಳಲ್ಲಿ ಈ ರಿಗ್​ಗಳನ್ನು ಅಳವಡಿಸಲಾಗುತ್ತದೆ. ಸುರಕ್ಷೆ ಮತ್ತು ನಿರ್ವಹಣೆಗಾಗಿ ಕೆಲಸ ನಿಲ್ಲಿಸಬೇಕಾದ ಅವಧಿಯನ್ನು ಕಡಿತಗೊಳಿಸುವ ಉದ್ದೇಶದಿಂದ ಈ ರಿಗ್​ಗಳನ್ನು ಸಂಪೂರ್ಣ ಸ್ವಯಂಚಾಲಿತ (ಆಟೊಮೇಷನ್) ವ್ಯವಸ್ಥೆ ಇರುವ ರೀತಿಯಲ್ಲಿ ನಿರ್ಮಿಸಲಾಗಿದೆ. ಒಎನ್​ಡಿಜಿಯಲ್ಲಿ ಭೂಮಿ ಕೊರೆಯುವ ಯಂತ್ರೋಪಕರಣಗಳಿಗೆ ಇಂಥ ರಿಗ್​ಗಳು ಸೇರ್ಪಡೆಯಾಗುತ್ತಿರುವುದು ಇದೇ ಮೊದಲು. ಮುಂದಿನ ದಿನಗಳಲ್ಲಿ ಬಾವಿ ತೋಡುವ ತಂತ್ರಜ್ಞಾನದಲ್ಲಿ ಈ ರಿಗ್​ಗಳು ಅತ್ಯಗತ್ಯವಾಗಿರುವ ಮಹತ್ವದ ಪರಿವರ್ತನೆಗೆ ಕಾರಣವಾಗಲಿದೆ ಎಂದು ನಿರೀಕ್ಷಿಸಲಾಗಿದೆ.

ಕೊವಿಡ್-19ರ ಸಂಕಷ್ಟದ ನಡುವೆಯೂ ಎಂಇಐಎಲ್ ಈ ಯೋಜನೆಯನ್ನು ಪೂರ್ಣಗೊಳಿಸಲು ಬದ್ಧತೆ ಹೊಂದಿದೆ. ವಿಷಯಜ್ಞಾನ, ಬದ್ಧತೆ ಮತ್ತು ಕಠಿಣ ಪರಿಶ್ರಮದಿಂದ ಎಂಇಐಎಲ್ ಈ ಯೋಜನೆಯನ್ನು ಸಕಾಲದಲ್ಲಿ ಪೂರ್ಣಗೊಳಿಸಲು ಎಂಇಐಎಲ್ ಪ್ರಯತ್ನಿಸುತ್ತಿದೆ. ವಿಶ್ವದ ಇತರ ದೇಶಗಳಿಂದ ಬರಬೇಕಿರುವ ಯಂತ್ರೋಪಕರಣಗಳನ್ನು ತರಿಸಿಕೊಳ್ಳುವುದು ಇಂದಿಗೂ ಕಠಿಣ ಸವಾಲೇ ಆಗಿದೆ. ಪೂರೈಕೆ ಜಾಲವು ಇದೀಗ ಮತ್ತೆ ಕಾರ್ಯಾರಂಭ ಮಾಡುತ್ತಿದೆ. ಹೀಗಾಗಿ ರಿಗ್​ಗಳ ಕೆಲಸವನ್ನು ಸಕಾಲದಲ್ಲಿ ಪೂರ್ಣಗೊಳಿಸಿ, ಒಎನ್​ಜಿಸಿಗೆ ಹಸ್ತಾಂತರ ಮಾಡಲು ಸಾಧ್ಯವಾಗುತ್ತಿದೆ.

ಇದೇ ಸಂದರ್ಭ ಮಾಧ್ಯಮ ಪ್ರತಿನಿಧಿಗಳೊಂದಿಗೆ ಮಾತನಾಡಿದ ಎಂಇಐಎಲ್ ಕಂಪನಿಯ ತಾಂತ್ರಿಕ ವಿಭಾಗದ ಮುಖ್ಯಸ್ಥ ಕೆ.ಸತ್ಯನಾರಾಯಣ, ‘ಕೊವಿಡ್ ಪಿಡುಗು ಇದೀಗ ಅಂತ್ಯಗೊಳ್ಳುತ್ತಿದೆ. ರಿಗ್​ಗಳ ಉತ್ಪಾದನೆ ಮತ್ತು ಹಸ್ತಾಂತರ ಪ್ರಕ್ರಿಯೆಯನ್ನು ಸಕಾಲದಲ್ಲಿ ಪೂರ್ಣಗೊಳಿಸಲು ಕಂಪನಿಯು ಅಗತ್ಯ ಕ್ರಮ ವಹಿಸಿದೆ. ಇಂಧನ ಕ್ಷೇತ್ರದಲ್ಲಿ ಕಂಪನಿಯು ಪ್ರಮುಖ ಪಾತ್ರ ನಿರ್ವಹಿಸುತ್ತಿದೆ. ವಿಶ್ವದಲ್ಲಿ ಲಭ್ಯವಿರುವ ಅತ್ಯುತ್ತಮ ಹೈಡ್ರಾಲಿಕ್ ತಂತ್ರಜ್ಞಾನವನ್ನು ಈ ರಿಗ್​ಗಳು ಹೊಂದಿವೆ. ಇಂಧನದ ಬೆಲೆ ಹೆಚ್ಚಾಗುತ್ತಿರುವ ಈ ಕಾಲದಲ್ಲಿ ಈ ಅತ್ಯಾಧುನಿಕ ರಿಗ್​ಗಳು ಭಾರತೀಯ ಇಂಧನ ವಲಯಕ್ಕೆ ಶಕ್ತಿ ತುಂಬಲಿದೆ. ಭಾರತದಲ್ಲಿ ಲಭ್ಯವಿರುವ ನೈಸರ್ಗಿಕ ತೈಲ ಮತ್ತು ಅನಿಲವನ್ನು ಹೊರತೆಗೆದು ಸಂಸ್ಕರಿಸಲು ಇದರಿಂದ ಅನುಕೂಲವಾಗುತ್ತದೆ. ಭಾರತದಲ್ಲಿ ಡ್ರಿಲಿಂಗ್ ರಿಗ್​ಗಳನ್ನು ಉತ್ಪಾದಿಸುತ್ತಿರುವ ಮೊದಲ ಖಾಸಗಿ ಕಂಪನಿ ಎಂಇಐಎಲ್. ಮೇಕ್​ ಇನ್ ಇಂಡಿಯಾ ಮತ್ತು ಆತ್ಮನಿರ್ಭರ್ ಭಾರತ್ ಉಪಕ್ರಮಗಳ ಆಶಯಕ್ಕೆ ಅನುಗುಣವಾಗಿ ಈ ರಿಗ್​ಗಳನ್ನು ಉತ್ಪಾದಿಸಲಾಗುತ್ತಿದೆ. ವಿಶ್ವದಲ್ಲಿ ಅತಿಹೆಚ್ಚು ಸಾಮರ್ಥ್ಯದ ರಿಗ್​ಗಳನ್ನು ಎಂಇಐಎಲ್ ಉತ್ಪಾದಿಸಿದೆ.

ಇದನ್ನೂ ಓದಿ: ಪುಣೆ: ಒಲೆಕ್ಟ್ರಾ ಗ್ರೀನ್‌ಟೆಕ್‌ನ 150 ಇ-ಬಸ್‌ಗಳಿಗೆ ಪ್ರಧಾನಿ ಮೋದಿ ಚಾಲನೆ; ಮಾಹಿತಿ ಹಂಚಿಕೊಂಡ MEIL

ಇದನ್ನೂ ಓದಿ: MEIL: ಜೊಜಿಲಾ ಸುರಂಗ: ಎರಡು ಮುಖ್ಯ ಹಂತ ಪೂರ್ಣಗೊಳಿಸಿದ ಎಂಇಐಎಲ್