ಎನ್​ಇಎಫ್​ಟಿ ಹೊಸ ಮೈಲಿಗಲ್ಲು; ಒಂದೇ ದಿನ 4 ಕೋಟಿಗೂ ಹೆಚ್ಚು ಹಣದ ವಹಿವಾಟು

ನವದೆಹಲಿ, ಮಾರ್ಚ್ 3: ನ್ಯಾಷನಲ್ ಎಲೆಕ್ಟ್ರಾನಿಕ್ ಫಂಡ್ಸ್ ಟ್ರಾನ್ಸ್​ಫರ್ ಅಥವಾ ಎನ್​ಇಎಫ್​ಟಿ ಮತ್ತು ಆರ್​ಟಿಜಿಎಸ್ (NEFT & RTGS) ವ್ಯವಸ್ಥೆಯನ್ನು ಬ್ಯಾಂಕ್ ಖಾತೆಯಿಂದ ಮತ್ತೊಂದು ಬ್ಯಾಂಕ್ ಖಾತೆಗೆ ಹಣ ವರ್ಗಾವಣೆಗೆ ಉಪಯೋಗಿಸಲಾಗುತ್ತದೆ. ಯುಪಿಐ ಬಂದ ಬಳಿಕ ಇವೆರಡರ ಪ್ರಾಬಲ್ಯ ಕಡಿಮೆ ಆಗಿದೆಯಾದರೂ ನಿಂತಿಲ್ಲ. ಎನ್​ಇಎಫ್​ಟಿ ಈಗಲೂ ವ್ಯಾಪಕವಾಗಿ ಬಳಕೆ ಆಗುತ್ತಿದೆ. ಆರ್​ಬಿಐ ಮೊನ್ನೆ ಪ್ರಕಟಿಸಿದ ದತ್ತಾಂಶದ ಪ್ರಕಾರ ಎನ್​ಇಎಫ್​ಟಿ ಹೊಸ ಮೈಲಿಗಲ್ಲು ಕೂಡ ಮುಟ್ಟಿದೆ. ಒಂದು ದಿನದಲ್ಲಿ 4 ಕೋಟಿಗೂ ಹೆಚ್ಚು ಹಣ ವಹಿವಾಟು ನಡೆದಿದೆ. ಫೆಬ್ರುವರಿ 29ರಂದು ಒಂದೇ ದಿನದಂದು 4,10,61,337 ವಹಿವಾಟುಗಳು ಎನ್​ಇಎಫ್​ಟಿ ಮೂಲಕ ನಡೆದಿವೆ ಎಂದು ಆರ್​ಬಿಐ ಮಾಹಿತಿ ನೀಡಿದೆ

ಕಳೆದ ಹತ್ತು ವರ್ಷದಲ್ಲಿ ಎನ್​ಇಎಫ್​ಟಿ ವಹಿವಾಟಿನಲ್ಲಿ ಶೇ 700ರಷ್ಟು ಹೆಚ್ಚಾಗಿದೆ. ರಿಯಲ್ ಟೈಮ್ ಗ್ರಾಸ್ ಸೆಟಲ್ಮೆಂಟ್ ಅಥವಾ ಆರ್​ಟಿಜಿಎಸ್ ಬಳಕೆ ಶೇ. 200ರಷ್ಟು ಹೆಚ್ಚಾಗಿದೆ. ಇನ್ನು ಎನ್​ಇಎಫ್​ಟಿ ಮೂಲಕ ವರ್ಗಾವಣೆ ಆದ ಹಣದ ಮೌಲ್ಯ 10 ವರ್ಷದಲ್ಲಿ ಶೇ. 670ರಷ್ಟು ಹೆಚ್ಚಾಗಿದೆ. ಆರ್​ಟಿಜಿಎಸ್ ಸಾಧನೆ ಶೇ 104ರಷ್ಟು ಹೆಚ್ಚಾಗಿದೆ. ಇವೆರಡೂ ಪ್ಲಾಟ್​ಫಾರ್ಮ್ ಅನ್ನು ಆರ್​ಬಿಐ ನಿರ್ವಹಿಸುತ್ತಿದೆ. ಹಣ ವರ್ಗಾವಣೆಯಲ್ಲಿ ಯುಪಿಐ ಪ್ರಾಬಲ್ಯ ತೋರಿದರೂ ಎನ್​ಇಎಫ್​ಟಿ ಮತ್ತು ಆರ್​ಟಿಜಿಎಸ್ ಬಳಕೆ ಕೂಡ ಹೆಚ್ಚಿರುವುದನ್ನು ಗಮನಿಸಿದರೆ ಭಾರತದಲ್ಲಿ ಒಟ್ಟಾರೆ ಡಿಜಿಟಲ್ ಟ್ರಾನ್ಸಾಕ್ಷನ್ ತೀರಾ ಹೆಚ್ಚಾಗಿರುವುದು ಸ್ಪಷ್ಟವಾಗುತ್ತದೆ.

ಇದನ್ನೂ ಓದಿ: ಭಾರತದ ಫಾರೆಕ್ಸ್ ರಿಸರ್ವ್ಸ್ ಈಗ ಮತ್ತೆ 619 ಟ್ರಿಲಿಯನ್ ಡಾಲರ್ ಗಡಿಗೆ; ವಾರದಲ್ಲಿ 3 ಟ್ರಿಲಿಯನ್ ಡಾಲರ್​ನಷ್ಟು ಹೆಚ್ಚಳ

ಎರಡು ಸಾವಿರ ರೂ ಕರೆನ್ಸಿ ಶೇ. 97.62ರಷ್ಟು ವಾಪಸ್

ಮಾರ್ಚ್ 1ರಂದು ಆರ್​ಬಿಐ ಬಿಡುಗಡೆ ಮಾಡಿದ ಮಾಹಿತಿ ಪ್ರಕಾರ, 2,000 ರೂ ಮುಖಬೆಲೆಯ ನೋಟುಗಳಲ್ಲಿ ಆರ್​ಬಿಐಗೆ ಮರಳಿರುವುದು ಶೇ 97.62ರಷ್ಟಂತೆ. 2023ರ ಮೇ 19ರಂದು ಎರಡು ಸಾವಿರ ರೂ ನೋಟನ್ನು ಆರ್​ಬಿಐ ಚಲಾವಣೆಯಿಂದ ಹಿಂಪಡೆದುಕೊಂಡಿತ್ತು. ಆಗ ಚಲಾವಣೆಯಲ್ಲಿ ಇದ್ದದ್ದು 3.56 ಲಕ್ಷ ಕೋಟಿ ರೂ ಮೌಲ್ಯದ ಎರಡು ಸಾವಿರ ರೂ ನೋಟುಗಳು. ಆ ನೋಟುಗಳನ್ನು ಮರಳಿಸುವಂತೆ ಆರ್​ಬಿಐ ತಿಳಿಸಿದೆ. ಈಗ 2024ರ ಫೆಬ್ರುವರಿ 29ರಂದು ಆರ್​ಬಿಐಗೆ ಇನ್ನೂ ಮರಳದೇ ಇರುವ ಎರಡು ಸಾವಿರ ರೂ ನೋಟುಗಳ ಮೌಲ್ಯ 8,470 ಕೋಟಿ ರೂ.

ಎರಡು ಸಾವಿರ ರೂ ನೋಟುಗಳನ್ನು ಹೊಂದಿರುವವರು ಈಗಲೂ ಕೂಡ ಅದನ್ನು ಮರಳಿಸಿ, ಬೇರೆ ಮಾನ್ಯ ನೋಟುಗಳನ್ನು ಪಡೆದುಕೊಳ್ಳಲು ಅವಕಾಶ ಇದೆ. ಅಥವಾ ಆ ಮೌಲ್ಯದ ಹಣವನ್ನು ಬ್ಯಾಂಕ್ ಖಾತೆಗೆ ಠೇವಣಿ ಇರಿಸಬಹುದು. ಆರ್​ಬಿಐನ 19 ಕಚೇರಿಗಳಲ್ಲಿ ಈ ಸೌಲಭ್ಯ ಇದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ