TV9kannada Web Team | Edited By: Srinivas Mata
Mar 07, 2022 | 3:10 PM
ಅಮೆರಿಕ ಹಾಗೂ ಅದರ ಯುರೋಪಿಯನ್ ಮಿತ್ರ ರಾಷ್ಟ್ರಗಳು ರಷ್ಯಾದ ತೈಲದ ಮೇಲೆ ನಿಷೇಧ ಹೇರುವ ಬಗ್ಗೆ ಆಲೋಚನೆ ಮಾಡುತ್ತಿವೆ ಎಂಬ ಸುದ್ದಿಯ ವರದಿಗಳ ಹಿನ್ನೆಲೆಯಲ್ಲಿ ಕಚ್ಚಾ ತೈಲ (Oil Price) ದರವು ಹೊಸದಾಗಿ ಮತ್ತೆ ಏರಿಕೆ ದಾಖಲಿಸಿದ ಮೇಲೆ ಸೋಮವಾರದಂದು (ಮಾರ್ಚ್ 7, 2022) ಭಾರತದ ರೂಪಾಯಿ ಮೌಲ್ಯವು ಅಮೆರಿಕದ ಡಾಲರ್ ವಿರುದ್ಧ ಸಾರ್ವಕಾಲಿಕ ಕನಿಷ್ಠ ಮಟ್ಟವಾದ 77ಕ್ಕೆ ತಲುಪಿತು. ಕರೆನ್ಸಿ ದುರ್ಬಲಗೊಳ್ಳುತ್ತಿರುವ ಸತತ ನಾಲ್ಕನೇ ಸೆಷನ್ ಇದು. ಮಾರ್ಚ್ 7ನೇ ತಾರೀಕಿನ ಮಧ್ಯಾಹ್ನ 12.11ರ ಹೊತ್ತಿಗೆ ಭಾರತದ ರೂಪಾಯಿಯು ಡಾಲರ್ ವಿರುದ್ಧ 76.96ರಲ್ಲಿ ವಹಿವಾಟು ನಡೆಸುತ್ತಿತ್ತು. ಅದರ ಹಿಂದಿನ ಮುಕ್ತಾಯಕ್ಕಿಂತ ಶೇ 1.03ರಷ್ಟು ಕಡಿಮೆ ಆಯಿತು. ಇದು ಒಂದು ಡಾಲರ್‌ಗೆ 76.96ಕ್ಕೆ ಪ್ರಾರಂಭವಾಯಿತು ಮತ್ತು ದಿನದಲ್ಲಿ ದಾಖಲೆಯ 76.97 ಮುಟ್ಟಿತು.
ಹೆಚ್ಚಿನ ಕಚ್ಚಾ ತೈಲ ದರವು ಭಾರತದ ಚಾಲ್ತಿ ಖಾತೆ ಕೊರತೆಯನ್ನು ಹೆಚ್ಚಿಸುವ ಸಾಧ್ಯತೆಯಿದೆ ಎಂದು ವಿಶ್ಲೇಷಕರು ಹೇಳುತ್ತಾರೆ. ಹೆಚ್ಚಿನ ಚಾಲ್ತಿ ಖಾತೆ ಕೊರತೆಯು ದೇಶೀಯ ಕರೆನ್ಸಿಯ ಮೇಲೆ ಮತ್ತಷ್ಟು ಒತ್ತಡವನ್ನು ಉಂಟು ಮಾಡುವ ಸಾಧ್ಯತೆಯಿದೆ. ಉಕ್ರೇನ್‌ನ ಮೇಲೆ ರಷ್ಯಾದ ದಾಳಿ ಮತ್ತು ರಷ್ಯಾದಿಂದ ಕಚ್ಚಾ ತೈಲದ ಕಡಿಮೆ ರಫ್ತು ಸೇರಿ ತೈಲ ಬೆಲೆಗಳನ್ನು ದೀರ್ಘಾವಧಿಯವರೆಗೆ ಹೆಚ್ಚಿಸುತ್ತವೆ. “ಜಾಗತಿಕ ಕಚ್ಚಾ ತೈಲ ಮಾರುಕಟ್ಟೆಗಳಲ್ಲಿನ ದೊಡ್ಡ ಅಸಮತೋಲನದಿಂದಾಗಿ ಮುಂದಿನ 6ರಿಂದ 9 ತಿಂಗಳಲ್ಲಿ ಜಾಗತಿಕ ಕಚ್ಚಾ ಬೆಲೆಗಳು ಹೆಚ್ಚಾಗುವ ಅಪಾಯಗಳನ್ನು ನಾವು ಗಮನಿಸುತ್ತಿದ್ದೇವೆ,” ಎಂದು ವಿಶ್ಲೇಷಕರು ಹೇಳಿದ್ದಾರೆ.
ಬ್ರೆಂಟ್ ಸುಮಾರು 14 ವರ್ಷಗಳ ಗರಿಷ್ಠ ಮಟ್ಟವಾದ 140 ಯುಎಸ್ಡಿಗೆ ಏರಿತು. ಯುಎಸ್ ವಹಿವಾಟಿನಲ್ಲಿ ತೈಲವು 2008ರಿಂದ ಈಚೆಗೆ ಗರಿಷ್ಠ ಮಟ್ಟವನ್ನು ತಲುಪಿತು ಮತ್ತು ಅದು ತಣ್ಣಗಾಗುವ ಯಾವುದೇ ಲಕ್ಷಣಗಳು ಸಹ ಇಲ್ಲ. ಯುಎಸ್ ವಿದೇಶಾಂಗ ಕಾರ್ಯದರ್ಶಿ ಆಂಟೋನಿ ಬ್ಲಿಂಕೆನ್ ಸುದ್ದಿ ವಾಹಿನಿಗಳಿಗೆ ಮಾತನಾಡಿ, “ಈಗ ನಮ್ಮ ಯುರೋಪಿಯನ್ ಪಾಲುದಾರರು ಮತ್ತು ಮಿತ್ರರಾಷ್ಟ್ರಗಳೊಂದಿಗೆ ರಷ್ಯಾದ ತೈಲ ಆಮದನ್ನು ನಿಷೇಧಿಸುವ ನಿರೀಕ್ಷೆಯನ್ನು ಸಂಘಟಿತ ರೀತಿಯಲ್ಲಿ ನೋಡಲು ಮಾತನಾಡುತ್ತಿದ್ದೇವೆ. ವಿಶ್ವ ಮಾರುಕಟ್ಟೆಯಲ್ಲಿ ಸೂಕ್ತವಾದ ತೈಲ ಪೂರೈಕೆ ಇನ್ನೂ ಇದೆ ಎಂದು ಖಚಿತಪಡಿಸಿಕೊಳ್ಳುತ್ತೇವೆ,” ಎಂದು ಹೇಳಿದ ನಂತರ ಇತ್ತೀಚಿನ ಹಿನ್ನಡೆಯು ಸಂಭವಿಸಿದೆ.
ಕೊಟಕ್ ಸಾಂಸ್ಥಿಕ ಈಕ್ವಿಟೀಸ್ ವರದಿ ಪ್ರಕಾರ, ಪ್ರತಿ ಬ್ಯಾರೆಲ್ಗೆ 120 ಡಾಲರ್ನ ಸರಾಸರಿ ಕಚ್ಚಾ ತೈಲ ಬೆಲೆಯು ಭಾರತೀಯ ಆರ್ಥಿಕತೆಗೆ ಹೆಚ್ಚುತ್ತಿರುವ 70 ಶತಕೋಟಿ ಅಮೆರಿಕನ್ ಡಾಲರ್ ವೆಚ್ಚವನ್ನು ಹೊರೆಸುತ್ತದೆ. ಇದು ಹಣಕಾಸು ವರ್ಷ 2023 ವರ್ಸಸ್ ಹಣಕಾಸು 2022 ನೋಡಿದರೆ ಜಿಡಿಪಿಯ ಶೇ 1.9 ಆಗುತ್ತದೆ. ಕಚ್ಚಾ ತೈಲ ಬೆಲೆಗಳ ತೀಕ್ಷ್ಣ ಹೆಚ್ಚಳವು CAD/ಜಿಡಿಪಿ, ಹೆಚ್ಚಿನ ಹಣದುಬ್ಬರ ಮತ್ತು ಕಡಿಮೆ ಬೆಳವಣಿಗೆಯ ರೂಪದಲ್ಲಿ ಕಠಿಣ ಸವಾಲುಗಳನ್ನು ಒಡ್ಡುತ್ತವೆ.
ಕಡಿಮೆ ಅಬಕಾರಿ ಆದಾಯ ಮತ್ತು ಹೆಚ್ಚಿನ ಎಂಎಸ್ಪಿಗಳ ರೂಪದಲ್ಲಿ, ಪೆಟ್ರೋಲಿಯಂ ಉತ್ಪನ್ನಗಳು ಮತ್ತು ಕಂಪೆನಿಗಳ ಹೆಚ್ಚಿನ ರೀಟೇಲ್ ಬೆಲೆಗಳ ರೂಪದಲ್ಲಿ ಕುಟುಂಬಗಳ ಹೆಚ್ಚುವರಿ ವೆಚ್ಚವನ್ನು ಸರ್ಕಾರವು ತೆಗೆದುಕೊಂಡಿದೆ. ಆದರೂ ಕಂಪೆನಿಗಳು ಹೆಚ್ಚಿನ ಇಂಧನ ವೆಚ್ಚವನ್ನು ಅಂತಿಮವಾಗಿ ಕುಟುಂಬಗಳ ಮೇಲೆ ವರ್ಗಾಯಿಸುತ್ತವೆ. ಜಾಗತಿಕ ಮಾರುಕಟ್ಟೆಗೆ ಇರಾನಿನ ಕಚ್ಚಾ ತೈಲದ ಸಂಭಾವ್ಯ ವಾಪಸಾತಿಯಲ್ಲಿನ ವಿಳಂಬ, ಲಿಬಿಯಾದಲ್ಲಿ ತಾಜಾ ಪೂರೈಕೆಯ ಅಡಚಣೆಗಳು ಮತ್ತು ಭಾರತೀಯ ಷೇರುಗಳಲ್ಲಿ ವಿದೇಶಿ ಹೂಡಿಕೆದಾರರ ನಿರಂತರ ಮಾರಾಟವು ವ್ಯಾಪಾರಿಗಳಲ್ಲಿನ ಭಾವನೆಗಳನ್ನು ಆತಂಕಕ್ಕೆ ದೂಡಿ, ದೇಶೀಯ ಕರೆನ್ಸಿಯನ್ನು ಒತ್ತಡದಲ್ಲಿ ಇರಿಸಿತು. ಅಕ್ಟೋಬರ್‌ನಿಂದ ವಿದೇಶೀ ಹೂಡಿಕೆದಾರರು ಸುಮಾರು 2 ಲಕ್ಷ ಕೋಟಿ ರೂಪಾಯಿಗಳಷ್ಟು ಮಾರಾಟ ಮಾಡಿದ್ದಾರೆ.
ದೇಶೀಯವಾಗಿ ಮಾರುಕಟ್ಟೆಯಲ್ಲಿ ಭಾಗವಹಿಸುವವರು ಮಾರ್ಚ್ 10ರಂದು ಬರಲಿರುವ ಉತ್ತರ ಪ್ರದೇಶ, ಉತ್ತರಾಖಂಡ, ಗೋವಾ, ಪಂಜಾಬ್ ಮತ್ತು ಮಣಿಪುರದ ಐದು ರಾಜ್ಯಗಳ ರಾಜ್ಯ ಚುನಾವಣಾ ಫಲಿತಾಂಶಗಳನ್ನು ಗಮನಿಸುತ್ತಿದ್ದಾರೆ. ಐಐಪಿ ಡೇಟಾ ಬಿಡುಗಡೆ ದಿನಾಂಕವನ್ನು ಮಾರ್ಚ್ 11ಕ್ಕೆ ನಿಗದಿಪಡಿಸಲಾಗಿದೆ.
ಇದನ್ನೂ ಓದಿ: Russia- Ukraine Crisis: ರಷ್ಯಾ- ಉಕ್ರೇನ್ ಬಿಕ್ಕಟ್ಟಿನ ಮಧ್ಯೆ ಕಚ್ಚಾ ತೈಲ ಬ್ಯಾರಲ್ಗೆ 10 ಯುಎಸ್ಡಿಗೂ ಜಾಸ್ತಿ ಹೆಚ್ಚಳ
