ಅಮೆರಿಕದಲ್ಲಿ ಅಟ್ಲಿ-ಅಲ್ಲು ಅರ್ಜುನ್ ಅಲೆದಾಟ, ಇದು ಸಾಮಾನ್ಯ ಸಿನಿಮಾ ಅಲ್ಲ

‘ಪುಷ್ಪ’ (Pushpa) ಸಿನಿಮಾ ಮೂಲಕ ಸ್ಮಗ್ಲರ್ ಒಬ್ಬನ ಕತೆ ಹೇಳಿದ್ದ ಅಲ್ಲು ಅರ್ಜುನ್ (Allu Arjun), ತಮ್ಮ ಮುಂದಿನ ಸಿನಿಮಾಕ್ಕೆ ಪ್ಯಾನ್ ಇಂಡಿಯಾ ನಿರ್ದೇಶಕ ಅಟ್ಲಿ (Atlee) ಜೊತೆ ಕೈ ಜೋಡಿಸಿದ್ದು, ಈ ಸಿನಿಮಾದಲ್ಲಿ ಅವರು ಭವಿಷ್ಯದ ಕತೆ ಹೇಳಲು ಹೊರಟಿದ್ದಾರೆ. ಭಾರತದ ಮೊಟ್ಟ ಮೊದಲ ಸೂಪರ್ ಹೀರೋ-ಏಲಿಯನ್ ಮಾದರಿಯ ಸಿನಿಮಾಕ್ಕೆ ಅಲ್ಲು ಅರ್ಜುನ್ ಮತ್ತು ಅಟ್ಲಿ ಕೈ ಹಾಕಿದ್ದಾರೆ. ಇದು ಭಾರತದ ಈ ವರೆಗಿನ ಅತಿ ದೊಡ್ಡ ಬಜೆಟ್​ನ ಸಿನಿಮಾ ಎನಿಸಿಕೊಳ್ಳಲಿದ್ದು, ಸಿನಿಮಾಕ್ಕೆ ಬಂಡವಾಳ ಹೂಡುತ್ತಿರುವುದು ಖ್ಯಾತ ನಿರ್ಮಾಪಕ ಕಲಾನಿಧಿ ಮಾರನ್. ಸಿನಿಮಾದ ಪೋಸ್ಟ್ ಪ್ರೊಡಕ್ಷನ್ನ ವಿಡಿಯೋ ಒಂದು ಈಗಾಗಲೇ ಬಿಡುಗಡೆ ಆಗಿದ್ದು, ವಿಡಿಯೋ ನೋಡಿದರೆ ಇದು ಸಾಮಾನ್ಯ ಸಿನಿಮಾ ಖಂಡಿತ ಅಲ್ಲ ಎಂಬುದು ತಿಳಿದು ಬರುತ್ತದೆ.

ಅಟ್ಲಿ ಮತ್ತು ಅರ್ಜುನ್ ಅವರುಗಳು ಅಮೆರಿಕಕ್ಕೆ ತೆರಳಿ ಅಲ್ಲಿನ ಟಾಪ್ ವಿಎಫ್​ಎಕ್ಸ್, ಪ್ರಾಪ್, ಮೋಷನ್ ಕ್ಯಾಪ್ಚರ್ ಸ್ಟುಡಿಯೋಗಳಿಗೆ ಭೇಟಿ ನೀಡಿ ಮಾತುಕತೆ ನಡೆಸಿದ್ದಾರೆ. ‘ಅವತಾರ್’, ‘ಟರ್ನಿಮೇಟರ್’ ಇನ್ನೂ ಹಲವು ಹಾಲಿವುಡ್​ನ ಐಕಾನಿಕ್ ಫ್ಯೂಚರಿಸ್ಟಿಕ್ ಸಿನಿಮಾಗಳಿಗೆ ಕೆಲಸ ಮಾಡಿರುವ ಸ್ಟುಡಿಯೋಗಳಿಗೆ ಭೇಟಿ ನೀಡಿರುವ ಅಲ್ಲು ಅರ್ಜುನ್ ಮತ್ತು ಅಟ್ಲಿ ಅತ್ಯುತ್ತಮ ಸಂಸ್ಥೆಗಳೊಟ್ಟಿಗೆ ಒಪ್ಪಂದ ಮಾಡಿಕೊಂಡಿದ್ದು, ಈಗಾಗಲೇ ಕೆಲಸ ಆರಂಭಿಸಿದ್ದಾರೆ.

ಅಟ್ಲಿ-ಅಲ್ಲು ಅರ್ಜುನ್ ಅವರ ಸಿನಿಮಾ ಸೂಪರ್ ಹೀರೋ vs ಏಲಿಯನ್ ರೀತಿಯ ಸಿನಿಮಾ ಆಗಿದ್ದು, ಚಿತ್ರ-ವಿಚಿತ್ರ ಪ್ರಾಪ್​ಗಳು ಸಿನಿಮಾದಲ್ಲಿ ಇರಲಿವೆ. ಹಾಲಿವುಡ್​ನ ಏಲಿಯನ್ ಸಿನಿಮಾ ಮಾದರಿಯ ಜೀವಿಗಳು, ಚಿತ್ರ-ವಿಚಿತ್ರ ಪ್ರಾಣಿಗಳ ಪಾತ್ರಗಳು ಈ ಸಿನಿಮಾದಲ್ಲಿ ಇರಲಿದ್ದು, ಇವಕ್ಕಾಗಿ ಡಿಸೈನ್ಗಳನ್ನು ಅಟ್ಲಿ ಹಾಗೂ ಅಲ್ಲು ಅರ್ಜುನ್ ಫೈನಲ್ ಮಾಡಿದ್ದಾರೆ. ಹಾಲಿವುಡ್​ನ ಸ್ಟುಡಿಯೋಗಳಿಗೆ ಅಟ್ಲಿ, ಸಿನಿಮಾದ ಚಿತ್ರಕತೆ ಹೇಳಿದ್ದು, ಸ್ಟುಡಿಯೋ ತಂತ್ರಜ್ಞರು, ಇದೊಂದು ಅದ್ಭುತವಾದ ಚಿತ್ರಕತೆ, ಒಂದರ ಹಿಂದೊಂದರಂತೆ ಅದ್ಭುತ ದೃಶ್ಯಗಳು, ಆಕ್ಷನ್​ ಈ ಚಿತ್ರಕತೆಯಲ್ಲಿ ಇದೆ ಎಂದು ಕೊಂಡಾಡಿದ್ದಾರೆ. ಈ ಸಿನಿಮಾಕ್ಕೆ ಕೆಲಸ ಮಾಡಲು ಉತ್ಸುಕರಾಗಿರುವುದಾಗಿಯೂ ಹೇಳಿದ್ದಾರೆ.

ಇದನ್ನೂ ಓದಿ:ಅಲ್ಲು ಅರ್ಜುನ್​ಗೆ ಪ್ರಿಯಾಂಕಾ ಚೋಪ್ರಾ ನಾಯಕಿ? ನಿರ್ದೇಶಕ ಅಟ್ಲಿ ಮಾಸ್ಟರ್ ಪ್ಲ್ಯಾನ್

ಅಲ್ಲು ಅರ್ಜುನ್ ಅವರ ಮೋಷನ್ ಕ್ಯಾಪ್ಚರ್ ಮತ್ತು ಮೋಷನ್ ಅನಿಮೇಷನ್ ಚಿತ್ರೀಕರಣವನ್ನು ಸಹ ಸ್ಟುಡಿಯೋನಲ್ಲಿ ಈಗಾಗಲೇ ಮಾಡಲಾಗಿದೆ. ಅಲ್ಲು ಅರ್ಜುನ್ ಅವರ ಫೇಷಿಯಲ್ ಎಮೋಷನ್ ಕ್ಯಾಪ್ಚರ್ ಅನ್ನು ಮಾಡಲಾಗಿದೆ. ಅಲ್ಲು ಅರ್ಜುನ್, ಮೋಷನ್ ಕ್ಯಾಪ್ಚರ್ ಡಿವೈಸ್ ಹಾಕಿಕೊಂಡು ಭಿನ್ನ ಭಿನ್ನ ಎಮೋಷನ್​ಗಳನ್ನು ದಾಖಲಿಸಿದ್ದಾರೆ.

View this post on Instagram

A post shared by Sun Pictures (@sunpictures)

ಇದು, ಭಾರತದ ಈ ವರೆಗಿನ ಅತಿ ದೊಡ್ಡ ಬಜೆಟ್​ನ ಸಿನಿಮಾಗಳಲ್ಲಿ ಒಂದು ಎನ್ನಲಾಗುತ್ತಿದೆ. ರಾಜಮೌಳಿ-ಮಹೇಶ್ ಬಾಬು ಸಿನಿಮಾ ಹಾಗೂ ರಣ್​ಬೀರ್ ಕಪೂರ್-ಯಶ್ ಅವರ ರಾಮಾಯಣ ಹೊರತುಪಡಿಸಿದರೆ ಇದು ಮೂರನೇ ಅತಿ ದೊಡ್ಡ ಬಜೆಟ್ ಸಿನಿಮಾ ಎನ್ನಲಾಗುತ್ತಿದೆ. ಸಿನಿಮಾಕ್ಕೆ ಇನ್ನು ಹೆಸರಿಟ್ಟಿಲ್ಲ, ಸುಮಾರು ಒಂದು ವರ್ಷಗಳ ಕಾಲ ಈ ಸಿನಿಮಾದ ಚಿತ್ರೀಕರಣ ನಡೆಯಲಿದೆ ಎನ್ನಲಾಗುತ್ತಿದೆ. ಈ ಹಿಂದೆ ‘ರೋಬೋ’ ಸಿನಿಮಾ ನಿರ್ಮಿಸಿ ದೊಡ್ಡ ರಿಸ್ಕ್ ತೆಗೆದುಕೊಂಡಿದ್ದ ಸನ್ ನೆಟ್​ವರ್ಕ್​ನ ಕಲಾನಿಧಿ ಮಾರನ್ ಅವರು ಈ ಸಿನಿಮಾಕ್ಕೆ ಬಂಡವಾಳ ತೊಡಗಿದ್ದಾರೆ.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ