ಒಂದು ರುಪಾಯಿಗೆ ಪಿವಿಆರ್, ಐನಾಕ್ಸ್ಗಳಲ್ಲಿ ಭರಪೂರ ಮನರಂಜನೆ
PVR-Inox: ಕೇವಲ ಒಂದು ರುಪಾಯಿಗೆ ಪಿವಿಆರ್-ಐನಾಕ್ಸ್ಗಳಂಥಹಾ ಮಲ್ಟಿಪ್ಲೆಕ್ಸ್ಗಳಲ್ಲಿ ಮನೊರಂಜನೆ ಪಡೆಯಬಹುದು, ಗುಣಮಟ್ಟದ ದೃಶ್ಯ, ಸೌಂಡ್ನ ಅನುಭೂತಿ ಪಡೆಯಬಹುದು!
Updated on:Apr 21, 2023 | 3:21 PM
ಮಲ್ಟಿಪ್ಲೆಕ್ಸ್ಗಳಲ್ಲಿ (Multiplex) ಸಿನಿಮಾ ನೋಡುವ ಅನುಭವ ಅದ್ಭುತ, ಆದರೆ ಪಿವಿಆರ್ (PVR), ಐನಾಕ್ಸ್ (Inox)ಗಳಂಥಹಾ ಮಲ್ಟಿಪ್ಲೆಕ್ಸ್ಗಳಲ್ಲಿ ಸಿನಿಮಾ ನೋಡುವುದು ಬಹಳ ಖರ್ಚಿನ ಬಾಬತ್ತು. ಕೊಡುವ ಸೇವೆಗಿಂತಲೂ ತುಸು ಹೆಚ್ಚೇ ಶುಲ್ಕವನ್ನು ಮಲ್ಟಿಪ್ಲೆಕ್ಸ್ಗಳು ಪಡೆಯುತ್ತವೆ ಎಂಬುದು ಗ್ರಾಹಕರ ಬಹು ಸಮಯದ ದೂರು. ಆದರೆ ಇದೀಗ ಕೇವಲ ಒಂದು ರುಪಾಯಿಗೆ ಮಲ್ಟಿಪ್ಲೆಕ್ಸ್ಗಳಲ್ಲಿ 30 ನಿಮಿಷಗಳ ಕಾಲ ಮನೊರಂಜನೆ ಪಡೆಯಬಹುದು, ಅಂಥಹದ್ದೊಂದು ಆಫರ್ ಅನ್ನು ಪಿವಿಆರ್ ಹಾಗೂ ಐನಾಕ್ಸ್ಗಳು ಜಂಟಿಯಾಗಿ ಪ್ರೇಕ್ಷಕರಿಗೆ ನೀಡುತ್ತಿವೆ.
ಕೇವಲ ಒಂದು ರುಪಾಯಿ ನೀಡಿ 30 ನಿಮಿಷಗಳ ಕಾಲ ಐನಾಕ್ಸ್ ಹಾಗೂ ಪಿವಿಆರ್ಗಳಲ್ಲಿ ಅವರು ತೋರಿಸುವ ಸಿನಿಮಾ ಟ್ರೈಲರ್ಗಳನ್ನು ನೋಡಬಹುದಾಗಿದೆ. ಅದ್ಭುತ ಸೌಂಡ್, ಗುಣಮಟ್ಟದ ದೃಶ್ಯಗಳನ್ನು ವೀಕ್ಷಿಸುವ ಜೊತೆಗೆ ನೆಚ್ಚಿನ ನಟರ, ಸಿನಿಮಾಗಳ ಟ್ರೈಲರ್ ಅನ್ನು ಎಕ್ಸ್ಕ್ಲೂಸಿವ್ ಆಗಿ ನೋಡುವ ಅವಕಾಶವನ್ನೂ ಇದು ಕಲ್ಪಿಸಿದೆ. ”ಪ್ರೇಕ್ಷಕರಿಗೆ ಅದ್ಭುತ ಅನುಭೂತಿಯ ಪರಿಚಯ ಮಾಡಿಸುವುದು ಹಾಗೂ ಸಿನಿಮಾವನ್ನು ನೋಡಲು ಅಣಿಗೊಳಿಸಲು ಈ ಯೋಜನೆಯ ಉದ್ದೇಶ” ಎಂದಿದ್ದಾರೆ ಐನಾಕ್ಸ್ನ ಸಿಇಓ ಅಲೋಕ್ ಟಂಡನ್.
ಈ ಟ್ರೈಲರ್ ಪ್ರದರ್ಶನವು ಏಪ್ರಿಲ್ 7 ರಿಂದಲೇ ಭಾರತದಾದ್ಯಂತ ಪಿವಿಆರ್ ಹಾಗೂ ಐನಾಕ್ಸ್ಗಳಲ್ಲಿ ಪ್ರಾರಂಭವಾಗಿದೆ. ದಕ್ಷಿಣ ಭಾರತದ ಪಿವಿಆರ್ ಹಾಗೂ ಐನಾಕ್ಸ್ಗಳಲ್ಲಿ ಬೆಲೆ ತುಸು ಹೆಚ್ಚಿರಲಿದೆ. ಮಲ್ಟಿಪ್ಲೆಕ್ಸ್ಗಳು ನೀಡಿರುವ ಮಾಹಿತಿಯಂತೆ ಟ್ರೈಲರ್ ಶೋಗಳು ಹೆಚ್ಚು ಪ್ರೇಕ್ಷಕರನ್ನು ಆಕರ್ಷಿಸುತ್ತಿದ್ದು 50% ಗೂ ಹೆಚ್ಚು ಆಕ್ಯುಪೆನ್ಸಿ ಈ ಟ್ರೈಲರ್ ಶೋಗಳಿಗೆ ಇವೆಯಂತೆ. ಟ್ರೈಲರ್ ಶೋಗಳು ಲಾಂಚ್ ಆದಾಗಿನಿಂದ ಎರಡು ವಾರದೊಳಗಾಗಿ ಸುಮಾರು 40000 ಮಂದಿ ಈ ಶೋಗಳನ್ನು ನೋಡಿರುವುದಾಗಿ ಸಿಇಓ ಅಲೋಕ್ ಟಂಡನ್ ಹೇಳಿದ್ದಾರೆ.
ಪಿವಿಆರ್ ಸಿಇಓ ಗೌತಮ್ ದತ್ತ ಮಾತನಾಡಿ, ”ಒಂದು ರುಪಾಯಿ ಬೆಲೆ ಇಟ್ಟಿರುವುದು, ಶೋಗೆ ಬರುವ ಪ್ರತಿಕ್ರಿಯೆಗಳನ್ನು ಮಾಪನ ಮಾಡುವುದಕ್ಕಷ್ಟೆ. ಟಿಕೆಟ್ ಶೋ ಆದರಷ್ಟೆ ಅಂಕಿ-ಅಂಶಗಳು ಸಿಗುತ್ತವೆ. ಈ ಟ್ರೈಲರ್ ಶೋಗಳಿಂದ ಬಿಗ್ಬಜೆಟ್ ಸಿನಿಮಾಗಳಿಗೆ ಹಾಗೂ ಇನ್ನಿತರೆ ಸಣ್ಣ-ಮಧ್ಯಮ ಬಜೆಟ್ ಸಿನಿಮಾಗಳಿಗೆ ದೊಡ್ಡ ಮಟ್ಟದಲ್ಲಿ ಸಹಕಾರಿಯಾಗಲಿದೆ. ಟ್ರೈಲರ್ ಶೋಗಳ ಮೂಲಕ ಸಿನಿಮಾಗಳಿಗೆ ದೊಡ್ಡ ಮಟ್ಟದ ಪ್ರಚಾರ ಸಿಗಲಿದೆ. ಈ ಯೋಜನೆಯಿಂದಾಗಿ ನಮ್ಮಲ್ಲಿ ಸಿನಿಮಾ ನೋಡುಗರ ಸಂಖ್ಯೆ ಮುಂದಿನ ಕೆಲವು ತಿಂಗಳಲ್ಲಿ ಗಣನೀಯವಾಗಿ ಹೆಚ್ಚಳವಾಗಲಿದೆ ಎಂಬುದು ನಮ್ಮ ನಂಬಿಕೆ” ಎಂದಿದ್ದಾರೆ.
ಟ್ರೈಲರ್ ಶೋನಲ್ಲಿ ತೋರಿಸಲಾಗುವ ಟ್ರೈಲರ್ಗಳನ್ನು ಪಿವಿಆರ್ ಹಾಗೂ ಐನಾಕ್ಸ್ಗಳು ತಾವೇ ಆಯ್ಕೆ ಮಾಡಿಕೊಳ್ಳಲಿವೆ. ಮುಂದಿನ ದಿನಗಳಲ್ಲಿ ಬಿಡುಗಡೆ ಆಗಲಿರುವ ಹಾಲಿವುಡ್, ಬಾಲಿವುಡ್ ಹಾಗೂ ಸ್ಥಳೀಯ ಭಾಷೆಗಳ ಸಿನಿಮಾಗಳ ಟೀಸರ್ ಹಾಗೂ ಟ್ರೈಲರ್ಗಳನ್ನು ಈ ಶೋಗಳಲ್ಲಿ ಪ್ರದರ್ಶಿತಗೊಳಿಸಲಾಗುತ್ತದೆ. ಪ್ರಸ್ತುತ, ಕಿಸಿ ಕ ಭಾಯ್ ಕಿಸಿ ಕಿ ಜಾನ್, ಪೊನ್ನಿಯನ್ ಸೆಲ್ವನ್ 2, ಓಫನ್ಹೈಮರ್ ಇನ್ನಿತರೆ ಕೆಲವು ಸಿನಿಮಾಗಳು ಟ್ರೈಲರ್ಗಳನ್ನು ಪ್ರದರ್ಶನ ಮಾಡಲಾಗುತ್ತಿದೆ. ಈ ಟ್ರೈಲರ್ಶೋಗಳಿಗೆ ಕೌಂಟರ್ನಲ್ಲಿ ಹಾಗೂ ಆನ್ಲೈನ್ನಲ್ಲಿ ಟಿಕೆಟ್ ಖರೀದಿ ಮಾಡಬಹುದಾಗಿದೆ.
ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ
Published On - 3:06 pm, Fri, 21 April 23
