‘ಜೆನ್ ಜಿ’ಗಳನ್ನು ‘ಜನರೇಷನ್ ಗಟಾರ್’ ಎಂದಿದ್ದಕ್ಕೆ ಸ್ಪಷ್ಟನೆ ನೀಡಿದ ಕಂಗನಾ ರಣಾವತ್
‘ಮಾನವ ಜೀವನವು ವಿಕಸನದ ಮೇಲೆ ಆಧಾರಿತವಾಗಿದೆ ಎಂದು ವಿಜ್ಞಾನ ಹೇಳುತ್ತದೆ. ಆದರೆ ಫೆಮಿನಾಜಿಗಳು ಪ್ರಾಣಿ ಪ್ರವೃತ್ತಿಯನ್ನು ಉತ್ತೇಜಿಸುತ್ತಿದ್ದಾರೆ’ ಎಂದು ಕಂಗನಾ ರಣಾವತ್ ಅವರು ಹೇಳಿದ್ದಾರೆ. ಗುರುಪೂರ್ಣಿಮೆ ಪ್ರಯುಕ್ತ ವಿಡಿಯೋ ಹಂಚಿಕೊಂಡಿರುವ ಅವರು ಜಿನ್ ಜಿಗಳ ಬಗ್ಗೆ ತಾವು ಮಾತನಾಡಿದ್ದಕ್ಕೆ ಸ್ಪಷ್ಟನೆ ನೀಡಿದ್ದಾರೆ.
Updated on: Jul 29, 2026 | 4:17 PM
ಯುವ ಪೀಳಿಗೆಯನ್ನು ‘ಜನರೇಷನ್ ಗಟಾರ್’ (Generation Gutter) ಎಂದು ಕರೆದು ತೀವ್ರ ಆಕ್ರೋಶಕ್ಕೆ ಗುರಿಯಾಗಿದ್ದ ನಟಿ ಹಾಗೂ ಬಿಜೆಪಿ ಸಂಸದೆ ಕಂಗನಾ ರಣಾವತ್, ಇದೀಗ ತಮ್ಮ ಹೇಳಿಕೆಗೆ ಇನ್ಸ್ಟಾಗ್ರಾಮ್ ರೀಲ್ಸ್ ಮೂಲಕ ಸ್ಪಷ್ಟನೆ ನೀಡಿದ್ದಾರೆ. ಯುವತಿಯರು ಜವಾಬ್ದಾರಿಯಿಲ್ಲದೆ ಸ್ವಾತಂತ್ರ್ಯವನ್ನು ದುರುಪಯೋಗಪಡಿಸಿಕೊಳ್ಳುತ್ತಿದ್ದಾರೆ ಎಂದು ಕಂಗನಾ (Kangana Ranaut) ನೀಡಿದ್ದ ಹೇಳಿಕೆ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಚರ್ಚೆಗೆ ಗ್ರಾಸವಾಗಿತ್ತು. ಈ ಬೆನ್ನಲ್ಲೇ ತಮ್ಮ ಮಾಧ್ಯಮ ಮಿತ್ರರಿಗಾಗಿ ವೀಡಿಯೊ ಹಂಚಿಕೊಂಡಿರುವ ಅವರು, ತಮ್ಮ ಹೇಳಿಕೆಯನ್ನು ಸಮರ್ಥಿಸಿಕೊಂಡಿದ್ದಾರೆ.
ವೀಡಿಯೊದಲ್ಲಿ ಮಾತನಾಡಿದ ಕಂಗನಾ, ‘ನಮ್ಮ ಮನೆಯ ಮಕ್ಕಳು ಅಶ್ಲೀಲ ಮಾತುಗಳನ್ನು ಬಳಸಿ ಲೈಂಗಿಕವಾಗಿ ಬಿಂಬಿತವಾಗುವುದನ್ನು ನಾವು ಬಯಸುವುದಿಲ್ಲ. ಇದರಿಂದ ಮನೆಯ ಹಿರಿಯರ ಮುಂದೆ ಮುಜುಗರಪಡುವಂತಾಗುತ್ತದೆ. ಇಂತಹ ನಡವಳಿಕೆಯನ್ನು ನಾವು ಒಪ್ಪುವುದಿಲ್ಲ ಹಾಗೂ ಇದನ್ನು ಸಾಮಾನ್ಯೀಕರಿಸಲು ಬಿಡುವುದಿಲ್ಲ’ ಎಂದಿದ್ದಾರೆ.
View this post on Instagram
ಮಾಧ್ಯಮಗಳ ವಿರುದ್ಧ ಕಿಡಿಕಾರಿದ ಕಂಗನಾ ಅವರು, ‘ನಾನು ಸ್ಕೈರೂಟ್ ಕಾರ್ಯಕ್ರಮವನ್ನು ಅಭಿನಂದಿಸಿದ್ದಾಗಲಿ ಅಥವಾ ನೀಟ್ ಪರೀಕ್ಷಾರ್ಥಿಗಳಿಗೆ ಶುಭ ಹಾರೈಸಿದ್ದಾಗಲಿ ಮಾಧ್ಯಮಗಳು ತೋರಿಸಲಿಲ್ಲ. ಆದರೆ ಕೆಲವು ಲೈಕ್ಸ್ ಮತ್ತು ಫಾಲೋವರ್ಸ್ಗಾಗಿ ನನ್ನ ಹೇಳಿಕೆಯನ್ನು ತಪ್ಪಾಗಿ ಬಿಂಬಿಸುತ್ತಿವೆ. ಕೆಲವು ಫೆಮಿನಿಸ್ಟ್ಗಳು ಮಹಿಳೆಯರಿಗೆ ಸಭ್ಯತೆಯ ಹೊಣೆ ಏಕೆ ಎಂದು ಪ್ರಶ್ನಿಸುತ್ತಿದ್ದಾರೆ’ ಎಂದು ಆಕ್ಷೇಪ ವ್ಯಕ್ತಪಡಿಸಿದ್ದಾರೆ.
‘ಶಿಸ್ತಿನಿಂದ ಇರುವುದು ಆಯ್ಕೆಯಲ್ಲ, ಅದು ಅನಿವಾರ್ಯ’:
ಫೆಮಿನಿಸ್ಟ್ಗಳ ಪ್ರಶ್ನೆಗೆ ತಿರುಗೇಟು ನೀಡಿದ ಕಂಗನಾ, ‘ಎಕ್ಸ್ಕ್ಯೂಸ್ ಮೀ.. ನೀವು ನಿಮ್ಮ ಹೆಣ್ಣುಮಕ್ಕಳಿಗೆ ಇದನ್ನೇ ಕಲಿಸುತ್ತೀರಾ? ಶಿಸ್ತಿನಲ್ಲಿರುವುದು ಒಂದು ಆಯ್ಕೆಯಲ್ಲ. ನೀವು ಸಮಾಜದಲ್ಲಿ ಇರಬೇಕೆಂದರೆ ಸಂವಿಧಾನದ ಪ್ರಕಾರವೇ ನಡೆದುಕೊಳ್ಳಬೇಕು’ ಎಂದು ಖಾರವಾಗಿ ಹೇಳಿದ್ದಾರೆ. ಅಲ್ಲದೆ, ಪ್ರಧಾನಮಂತ್ರಿಯವರನ್ನು ಗೌರವಿಸುವ ಬಗ್ಗೆ ಮಾತನಾಡಿದ್ದಾರೆ.
ಇದನ್ನೂ ಓದಿ: ಹಿಂದೂ ಯುವತಿಯರ ಬಗ್ಗೆ ವಿವಾದಾತ್ಮಕ ಪೋಸ್ಟ್ ಹಂಚಿಕೊಂಡ ಕಂಗನಾ ರಣಾವತ್
ಮೋದಿ ಪರ ಕಂಗನಾ ಮಾತು:
‘ಮಕ್ಕಳು ಪ್ರಧಾನಮಂತ್ರಿಯವರನ್ನು ಎಕ್ಸಾಮ್ ಬಡ್ಡಿ ಎನ್ನುತ್ತಾರೆ. ಕೆಲವರು ಅವರನ್ನು ನಾಯಕ, ಸ್ನೇಹಿತ, ಕುಟುಂಬದ ಸದಸ್ಯ ಅಥವಾ ದೇವರಂತೆ ಕಾಣುತ್ತಾರೆ. ಯಾರ ಭಾವನೆಗಳನ್ನೂ ಗಾಯಗೊಳಿಸಲು ಯಾರಿಗೂ ಹಕ್ಕಿಲ್ಲ. ಇದು ಕೂಲ್ ಆಗಿ ಕಾಣಿಸಿಕೊಳ್ಳುವುದಲ್ಲ, ಮೂಲಭೂತ ನಾಗರಿಕ ಪ್ರಜ್ಞೆ. ಅದು ನಿಮಗಿಲ್ಲದಿದ್ದರೆ ಕಲಿತುಕೊಳ್ಳಬೇಕು’ ಎಂದಿದ್ದಾರೆ.
‘ಫೆಮಿನಾಜಿ’ ಪ್ರಭಾವಕ್ಕೆ ಒಳಗಾಗಬೇಡಿ:
ಯುವಜನತೆ ಫೆಮಿನಾಜಿಗಳ ಪ್ರಭಾವಕ್ಕೆ ಒಳಗಾಗಿ ಜೀವನ ಹಾಳುಮಾಡಿಕೊಳ್ಳಬಾರದು ಎಂದು ಮನವಿ ಮಾಡಿದ ಕಂಗನಾ, ‘ಈ ರೀತಿಯ ಮುಜುಗರದ ನಡವಳಿಕೆಯನ್ನು ನಿಮ್ಮ ಕೊಠಡಿಯೊಳಗೆ ಮಾತ್ರ ಇಟ್ಟುಕೊಳ್ಳಿ. ಹೊರಗಡೆ ಬಂದಾಗ ಮರ್ಯಾದೆಯಿಂದ ಇರಲೇಬೇಕು, ಇಲ್ಲವಾದರೆ ನಿಮ್ಮ ಭವಿಷ್ಯ ಕತ್ತಲೆಯಾಗುತ್ತದೆ’ ಎಂದು ಎಚ್ಚರಿಸಿದ್ದಾರೆ.
ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ.
